HESEKIEL 20
20
Ehalo lyaKalunga netangalalo lyomuntu
1Esiku etimulongo lyomwedhi omutitano gwomumvo omutiheyali gwomuupongekwa, aawiliki yaIsrael yamwe oye ya kungame, ya pule ndje ehalo lyaKalunga, oyo noya kuutumba komeho gandje. 2Omuwa okwa lombwele ndje a ti: 3“Muna gwomuntu, lombwela aantu mboka noku ya hokololela shoka ngame, Omuwa Omupangeliawike, tandi popi te ti: Omwe ya okupula ehalo lyandje, ndishi? Oshili ngaashi ngame Kalunga omunamwenyo, itandi pitika, mu pule ndje sha. Ngame, Omuwa Omupangeliawike, nda popi.
4“Muna gwomuntu, owa hala oku ya pangula? Shi ninga ano. Ya dhimbulutha iinima iinyanyalithi ya ningwa koohekulu. 5Ya lombwela shoka tandi ti. Sho nda hogolola Israel, onde ya uvanekele euvaneko. Onde ya ihololele muEgipiti e tandi ya lombwele: ongame Omuwa Kalunga keni. 6Onde ya uvanekele, ndi ya tembudhe mo muEgipiti, ndi ya fale kevi nde li ya hogololela lya tondoka omahini nomagadhi goonyushi, evi ewanawalela. 7Onde ya lombwele, ya ekelehi iimenka mbyoka yi nyanyalitha ye yi hole, opo yaa inyateke niikalunga yiifundja yaEgipiti, oshoka ongame Omuwa Kalunga kawo. 8Ihe oya tsu ondumbo nangame noya tindi okupulakena. Inaa ekelahi iimenka yawo yi nyanyalitha nenge ya ethe iikalunga yaEgipiti. Onda dhiladhila oku ya hwamena nondjahi yandje muEgipiti. 9Ihe inandi shi ninga, opo ndaa sithe edhina lyandje ohoni montaneho yaantu mboka ya kala mokati kawo, sho nda li nda lombwele Israel kutya otandi ya tembudha mo muEgipiti.
10“Onde ya tembudha mo nonde ya eta mombuga, 11moka nde ya pe iipango yandje noku ya longa omautho gandje ngoka taga gandja omwenyo kushaa ngoka ta vulika kugo. 12Onda ningi eyapulo lyEsabati endhindhiliko pokati ketu nayo, opo li ya dhimbuluthe kutya ongame, Omuwa, tandi ya yapula. 13Ihe omombuga nokuli ya tsu ondumbo nangame. Oya yono iipango yandje e taye ekelehi omautho gandje ngoka taga gandja omwenyo kushaa ngoka ta vulika kugo. Oya shekitha Esabati. Onda li nda hala ndi ya geelele mombuga noku ya hanagula po. 14Ihe inandi shi ninga, opo ndaa shekithe edhina lyandje mokati kiigwana mbyoka ya mono ndje tandi tembudha mo Israel muEgipiti. 15Onkee ndu uvaneke mombuga kutya itandi ya fala we kevi nde li ya uvanekele, evi lya tondoka omahini nomagadhi goonyushi, evi ewanawalela. 16Onde shi uvaneke, oshoka oye ekelehi omautho gandje, ya yono iipango yandje noya shekitha Esabati — oya hokwa okusimaneka iimenka.
17“Ihe onde ya etele olukeno. Onda tokola, ndaaye ya dhipagele mombuga. 18Onda lombwele oyana mombuga nda ti: Inamu lambalala oshinkoti shoohokulu nenge mu inyateke niimenka yawo. 19Ongame Omuwa Kalunga keni. Vulikeni kiipango yandje, dhiginineni omautho gandje. 20Yapuleni esiku lyEsabati, opo li ninge endhindhiliko lyehangano twe li hanganeni, notali ke mu dhimbulutha kutya ongame Omuwa Kalunga keni.
21“Ihe nepipi ndyoka wo olya tsu ondumbo nangame. Olya yono iipango yandje noinali dhiginina omautho gandje, ngoka taga gandja omwenyo kukehe ngoka ta vulika kugo. Olya shekitha Esabati. Onda li nda hala oku li geelela mombuga noku li dhipagela mo alihe. 22Ihe inandi shi ninga, opo ndaa shekithe edhina lyandje mokati kiigwana mbyoka ya mono ndje, sho tandi tembudha mo Israel muEgipiti. 23Onkee onda ningi euvaneko lilwe mombuga. Onda gana kutya otandi ya halakanithile nuuyuni. 24Onde shi ningi, oshoka oye ekelehi omautho gandje, ya yono iipango yandje, ya shekitha Esabati noya simaneke iimenka tuu mbyoka oohekulu ye yi simaneke.
25“Onde ya pe omalombwelo gaa shi omawanawa nomautho itaage ya etele omwenyo. 26Onde ya etha yi inyateke nomayambo gawo yene, ya yambe aatango yawo aamati. Osha li egeelo kuyo noku ya ulukila kutya ongame Omuwa.
27“Muna gwomuntu, ngashingeyi lombwela Aaisraeli shoka ngame, Omuwa Omupangeliawike, tandi ya lombwele. Nguka ogwo omukalo gulwe oohekulu ya pula ndje muuhasha wawo. 28Onde ya eta mevi ndyoka ndu uvaneke kutya otandi li ya pe. Ihe shaa mpoka ya mono ondundu onde nomuti gwa ziza, oya yambele po omayambo gawo. Oya geyitha ndje nomafikilondjambo niinuwandjambo yawo. 29Onde ya pula: Omahala ngaka gokoondundu ogashike, nkoka tamu yi? Omolwashoka haga ithanwa omahala gokoondundu sigo onena. 30Lombwela Aaisraeli shoka ngame, Omuwa Omupangeliawike, tandi ti: Omolwashike tamu yono omayono ngoka ga ningwa koohokulu, sho tamu landula iimenka yawo iinyanyalithi? 31Sigo onena otamu saagele omayambo tuu ngoka notamu inyateke niimenka, sho tamu yamba aana yeni kuyo momulilo. Ihe nando ongeyi, ne Aaisraeli otamu pula kutya ehalo lyandje olini! Oshili ngaashi ngame Omuwa Omupangeliawike, Kalunga omunamwenyo, itandi mu pitikile mu pule ndje sha. 32Otamu ti: Tse otwa hala tu kale twa fa iigwana yilwe, twa fa aantu yomiilongo yilwe haa simaneke omiti nomamanya. Ihe shika itashi ka ningwa.”
Kalunga ta geele e ta dhimine po
33“Oshili ngaashi ngame, Omuwa Omupangeliawike, Kalunga omunamwenyo, otandi mu londodha kutya mondjahi yandje otandi ke mu lelitha oshikaha shoonkondo, okwooko kwa taganana nondjahi onenenene. 34Otandi ke mu ulukila oonkondo dhandje nondjahi yandje, uuna tandi ke mu gongela notandi ke mu kongolola kiilongo ayihe nde mu halakanithile ko. 35Otandi ke mu fala mombuga yiigwana, notandi ke mu pangulila koshipala noshipala. 36Otandi ke mu pangula, ngaashi nda pangula oohokulu mombuga Sinai,” Omuwa Omupangeliawike osho ta ti.
37“Otandi ke mu pangela noku mu vulikitha kehangano lyandje. 38Otandi ka kutha mokati keni aatangalali naalunde. Otandi ya kutha mo miilongo moka ya kala ngashingeyi, ihe itandi ke ya pitikila we, ya galukile kevi lyaIsrael. Otamu ka tseya kutya ongame Omuwa.”
39Omuwa Omupangeliawike okwa ti: “Ngashingeyi ne Aaisraeli amuhe otamu iyopalele ne yene! Indeni ashike, mu ka simaneke iimenka yeni! Ihe otandi mu londodha kutya konima yaambika otamu ka vulika kungame e tamu etha okushekitha edhina lyandje mokuyambela iikalunga omayambo. 40Moshilongo kondundu yandje ondjapuki, ondundu onde yaIsrael, ne Aaisraeli amuhe otamu ka longela ndje. Otandi ka kala ndi na ombili nane notandi ke mu tegelela, mu yambele ndje omafikilondjambo geni, omayambo geni omawanawa nomagano omayapuki. 41Uuna tandi mu tembudha mo miilongo moka mwa halakanithilwa mo e tandi mu gongele, otandi ka taamba omafikilondjambo geni, niigwana otayi ka mona kutya ngame omuyapuki. 42Uuna tandi ke mu galulila kuIsrael, kevi ndyoka ndu uvaneke kutya otandi li pe oohokulu, nena otamu ka tseya kutya ongame Omuwa. 43Nena otamu ka dhimbulukwa iinima iinyanyalithi mwe yi ningi nonkene mwi inyateke. Otamu ki inyanyala moluuwinayi auhe mwe u ningi. 44Ngele tandi ikwatele ko, ndi gamene esimano lyandje, ne Aaisraeli otamu ka tseya kutya ongame Omuwa, oshoka ngame inandi mu ningila, ngaashi uukolokoshi weni niilonga yeni iiwinayi ye shi ilongela.” Omuwa oye a popi.
Omulilo muumbugantu
45Omuwa okwa lombwele ndje a ti: 46“Muna gwomuntu, taalela kuumbugantu. Uvithila uumbugantu, hunganekela omugulu gwokuumbugantu. 47Lombwela omugulu gwokuumbugantu, gu uve shoka ngame, Omuwa Omupangeliawike, tandi ti: Tala! Otandi tomeke omulilo mungoye, notagu yaka komuti kehe, omutalala nenge omukukutu. Kapu na shoka tashi gu dhimi. Otagu ka taandela okuza kuumbugantu sigo okuumbangalantu, noshaa ngoka otu uvu uupyu womalaka gomulilo. 48Otaa ka mona kutya ngame, Omuwa, onda tomeke omulilo, nokaku na ngoka te gu dhimi po.”
49Ngame onda ti: “Akwetse, Omuwa Omupangeliawike! Otaa popi ndje taa ti: ‘Ota popi ashike ootumbutumbu.’ ”
Currently Selected:
HESEKIEL 20: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
