Romanos 1
1
1Asampey i'lijwas, ya'am ti Pablok'i'm ti atate'ase siu'nie ip'isinik. Sinia' jla'am ti tank'i, sekyi'i ijniejietk'i'm siu'nie isijmaye ka iyo Sijwajieti Jesús jijliujwanikie' ti sitiejieta naka ka yikiji'n ka ijwi'il siunie jika'niye ti 'es.
2'Yina je lajt'ik'ipe papok jijwejlanawos t'ipi siupapo inia'an papoka'ne ti yikiajle ti ijwile pet pijia'm nak jika'niye ti 'es yi'i niwa inlesajna' ti ijiate ti t'otata. 3-4'Yina je 'wena paka injwe'el, naka jlas Sijwajieti Jesús ni Saka'niona, siunie ti je istiejenit ti kia'iyo i'nio', naka ti je 'wena papo ka intajle, tajla'm papok David jilis ti tomik'i pijia'm. Jlampet siunie ti 'yakajanit'i ape'e ti jla'am ti Sinia' jlas, naka pet ti Sinia' jikimet yijap, siu'neje ti iniu kisie'e ti tajli ki a'no', je lajk'i 'ni iyo ni Sinia' jijweye ti je jlase'.
5Siuti ya'am ka lajak'i pet ni iyo ni Sijwajieti Jesús, lapakawo ti jla'am pa Sinia' ti sip'elisi'n, sekyi'i ijniejietk'i'm pet ka iyo Sijwajieti jijliujwanikie', ka ijwile napo i'nio' ka 'yakajanit'i ape'e ni iyo ti jla'am. Ja'nakayeyi ti ja wikie'eyeyi napo i'nio' yi' ape'e 'ni ajnat ja ke inkakiuyis, siu'neje ti jank'iuye siunie jlamtik jawoyi. 6-7Jlampet ti asa'am ti as'wet jana Roma, napok as'wet ijwienjliyi ni jiwoyeyi Sinia' wuj ti 'nama'ase, 'yina ti jla'am ti ta'nase ka ni'nopijietayiji ni Sijwajieti Jesús ka woye jika kia'lisa'ase'm. 'Esiji ka Sinia', jla'yi pa Saka'niona Jesús ti Sijwajieti imp'elisinape, jla'yi ka noye'asempe ka kamaja.
Pablo iyo ka ijno Rómaja
8Janiajnat ti inikanitiejeye awene pa Inia' astepe'e, ka lajak'i ni iyo pa Sijwajieti Jesús, kajeyepa ti ijiok'i'ni ape'e 'ni ajnat ti ti'niejenaja pa tiwonaja siunie iyo ni astankiujnieye ti 'es ti jiwoyeyi. 9Sinia', siunie ti awoyi'ni yamtikie' ti ajwe'el ni jlas, ti anayi wita'm 'ni ijiusik ti anoyeje, si'we'en ni awoyi ti je aleyi ti je sikiwali'ase'm ti 'ajlana'ni. 10Je aleyi ti ajwele'ni pa Sinia', ka kia'iwo ka intaltajanie'e, ka 'wenanie'e ijyilia'm ka nak ijiojwi, kajeyepa ti pajk'i ti awo ka yikiajle'e' ka 'wina. 11Tempi it'imina pet ti awotajank'iye ka ijio'wase, kajeyepa ti awojonk'iye ka iniuye'ase'm ka wi'nase'm siunie ti je niliak tajle pit janak Sinia' jikimet, ti ja 'nakayeyipe asjweye ja poye. 12Jayo'ate 'nakayijna'a ka inikelaja siunie astankiujnieye ti 'es, siuti pet ti ya'am kiak iyojliyi.
13Awotajank'iye pet ka 'najanayi, i'lijwas, ti je ijwienjliyi ka je inijnalasata'ni awotaja ka nak ijiojwi, 'yina ayeyi 'nijiye ti je ani'yaka'n, lapakawo ti je lajk'i ni siuniwa ip'ion'ni its'ioye. Siunie ajalastajan pet k'iye ka i'wi'in ka poye papo ti asa'am ka woye asosikis ink'iejyisa' ti anotieje'ase'm pet, ka wo'ate iyo siunapo je Judíojos, ti yijits'i niwa ijia ajnatis ti kiak iyoyi. 14Kajeyepa ti 'yiniye ka ikapia' ineyi wikie'eyi napo i'nio', siunapo ji'wet yiji niwa isi'il siu'neje napo ji'wet yi 'lajni, siunapo 'yijejne'n, siu'neje napo ti je 'yijejne'n. 15Tempi it'imina ni awoyi ti siwa'asitieyi'ni ti awo ka yikiji'n ka yamtiyi ask'ioye pet ti jleye Rómaja, nak Sinia' jika'niye ti 'es.
Jijweye iyo ni inka'niye ti 'es
16Siunie Sinia' jika'niye 'yajwejli je yiji,#Mc 8.38 kajeyepa ti naka jijweye jla'am, jak je iyoyiji wikie'eyi siunapo ja ke inkakiuyis napok janjwajyi'n.#1 Co 1.18 Janajnatana'a napo Judíojos, sek jane'yi ka napokayena'a pet siunapo ti je Judíojos. 17'Yina naka inka'niye, naka ti 'yakajanitk'i siunie Sinia' iyone napo i'nio' ti initiajnat ni jitis iyo, 'yina lajk'i pa jikiechaye ka intajleje ijwienjli jla'am siunie iyo ni i'nio' ti je 'yakakiu. Iyo niwa jlamtis ni Sinia' ti yi'i ni ji'wet ti iyo'ate, “Siunie ti Sinia' yiniji, ti jitienkiujnieye ti 'es ni i'nio' ti ji'niayi po', nak ji'wasankiye japoye.”#Hab 2.4; Gl 3.11
Siunapo i'nio' je Judíojos jitis po'
18Sinia' 'yakajanit siunie jiwak ti tal poliyi. Sekyi'i tisa'yi ape'e wikie'eyi napoka ti iyoyi ni jloski'la, siunapo ti ijiate ti je isis, siuniwa jikeyis niwak ip'ionk'iye ka 'najane paka iwone siunie ijiatk'i. 19Siunie iyone jla'am ka intant'ieje ti jla'am ti Sinia', 'yina nak 'yijene pi iyonisi, kajeyepa ti jla'am ti i'winkina. 20Kajeyepa siunie Sinia' ti je ti'wena 'yijenisi pi iyonisi ka intant'iejesi siuti kiak jawo jitiej janenis'ni 'ate niwa jilisajna' ti i'winis. Je ink'ie' ka kiak iwo, 'yina tajlap'e ti 'nelanjie'e poye 'ni ajnat ni jilisanik jla'am, ti 'yaka ti jla'am ti Sinia' jla'yi ti siunie jijweye laj jlaja. Jak je iyoyiji ti lajk'ipa ka ji'lij inojwatits'i 'yaka ti jitis po'.
21'Wanjliyi 'yijenataja pi iyonisi ti po' pi Sinia', 'yina ka kia'iwo ka woyisi siunie jota tiwonaja jla'am ni Sinia' ti jota tiwunitie tiwet'ianaja ka pakataja wek ka inkajayits'i. 'Yina siuniwa jitienkiujnieye iyonisi laj lajaye, jlam pet siunie iyo ti t'oni niwa jlosikis, je t'ekijyi nak ajnatiok. 22-23Kajeyepa ti ijiut 'nijiye siunie Sinia' ti je paj ka inetia'n, siu'neje ni jiwunitieye,#Sal 106.19-21; Jer 2.11 niwakataja jla'am siuniwa jitiej iyoma ti iyo jika diosisa', siunie i'nio' ti ji'niayi je itio'yi, ni'ne ti niwaka ajwejnas, siu'neje niwa pini 'lan jlele pet, siu'neje niwa pini' t'ot yilisi'n ajnatk'i jipelis.#Deut 4.15-18 Jak je iyoyiji 'wanjliyi ka inijwelis ka 'najanis jwajla'aja, 'yina napoka napo ti 'ne'lias.
24Tempi it'imina ti Sinia' jla'am ti ijiuti naka ni siunie itiliajasi ti ijiate ti je 'es, naka ti ti'niachiki, sekyi'i inisayisi siuniwa jikeyis ti ijiate ti taka'ajwejlasa'n. 25Iliyisi siunie ti ijiatk'i ti Sinia' i'winkijna'm niwaka niwa jilisajna', sekyi'i i'nialkitak'iyi ti iyoyisi siunie ti je ijiatk'i. Niwaka ti iyunitis, ti Sinia' ilisane, sekyi'i t'opiyeyisi kiajwe, jlam'ne ka inwunitis ni ijiateje ti Sinia' ti jlam ti jilisajna' 'yu'we jla'am ka kiak tiwonaja ka tonitie jajnok'i'ni. Amén.
26'Yina it'imina ti Sinia' ijiuti naka siunie ti itiliajasi wuj ti je 'es ti ijiate ti taka'ajwejlasa'n. Siunapo asejnia 'najlik'i wita'm, ti 'yakama ape'eyi siunie iniwonisi ti 'es pi iyoyisi ti jlosik ijyiwiteje. 27Jlampet siunapo ayijnies, kia'iyojliyi je pi i'yena jana asejnia siunie iyo ti 'es pi iyoyi, 'wenajliyi ti jlamk'i wita'm ti ayijnies, wuj ti taka'ajwejlasa'n ni jloski'la iyoyi. 'Yina jiwet'ia po' ti kia'iyoyi, kajeyepa ti pajk'i ti jitis tena'a, siunie iyo pit ni jloski'la 'yina ijniujliji siunie ja tiwonaja ti ja tisiejekik'i.
28Siuti kia'iyo ti je iyoyisink'iye ka intant'iejesi ni Sinia', 'yina sekyi'i ti ijiutieyi ni siunie jitienkiujnieye ti ti'niachiki 'nakayi ti jawoyisi siunie ti je ti'wena ka tiwoki ti ijiate ti je 'yu'we. 29Ijiate ti tipoyijits'i siuniwa je isis ti iyoyisi, jla'yi ti inisayisi ni siunie ti ijiate ti je 'esk'i, ti je tijnajyi, siu'neje ti ijiulsinaja'm pi jikiecha pi k'iejliyi pi i'wi'in, siu'neje ti ijiate ti netia'n siunie ti jlosik ti 'es. Siunie ti t'eliye ni jikiecha, siunapo kalankijietas, siunie ti je ilisa'n napo ijia, siunie yimi'n ti iliaki napo ijia, siunapo ti ijiateje ti inisayi ni jloski'la ti iyoyi, siunapo ti yiyijits'i'ni napo ijia ti iliaki. 30Siunapo ti jitiej ijiutie napo siupa ti iyoyi, siunapo ti teje'yi ilia'm pa Sinia', siunapo takalakijiejne'n, siu'neje napo initoniti'n, siu'neje napo iniwuniti'n. Siuti iyo ka ilesane ni siunie je 'es 'yijene pi iyone; ka jiniewot injloye, 'yina je its'iuye. 31Ijiate ti je iyoyisiyi ka 'najanisi paka iwonisi ni siunie 'es, jlam jlamtisjli'yi wekie'e siunie iyo ka woyisi. Jlosikis je ijyiwitijits'i, jla'yi ti je ip'ilisi'n paka jikiechaye. Siuti jitis po' pi jikiecha, ka kia'iwo ka netiajnat pi jitis iyoyi. 32'Yijenisi pi iyonisi siunie ti Sinia' 'yakajanitk'i siuniwa jlamtis ti iyo'ate, “Siunapo i'nio' ti iyoyi 'niwaka, napoka jla'am ti titiejietaja nak inlaye ti janetiajne'n.” Kiak iyoyetaja niwaka, 'yina yamjliyisi ti iyoyisi, jak je iyoyi ti i'winis napo ijia ti iyoyi niwaka, sekyi'i iyoyits'i 'ate, “'Esiji.”
Currently Selected:
Romanos 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.