Apocalipsis 1
1
1'Nak siu'nie Sinia' iwijna'm pa Sijwajieti Jesús kanjwejla'm pet siupapo jikawos siuniwa wask'i'nelaja ti ja ke pajayi wat ka 'nakajana'a. Sijwajieti Jesús kiak iyone ti 'yakajanitie, pakayi ti ijliuyi pa Juan siupi jijliujwanik poli jlele kan'wenkijna'm. 2Sekyi'i Juan ijwil'ne pet wikie'eyi siupuwa i'wi'in. 'Yina 'naka'ne siu'nie ti 'yitt'iyipi, ti ijwilik'iji'n siuniwa jlamtis pa Sinia', siu'neje ni ijiatk'i ti Sijwajieti Jesús ti iyo pet jika'niyeja'.
3'Esie'etie siunie Sinia' iyone ni i'nio' siunie yamtijie'n siu'niwa inamtis ti tip'esina, 'yina ti nak inka'niye ti tajle ni Sinia'. Kia'iyo siunapo ipi'ya, siu'neje napo iyoyi siu'niwa 'niwa inamtis ti tip'esina, Sinia' 'esie'etie siunie iwijna'm, lapakawo ti je pa tojwa'a siunie jloma ti janeyi.
Juan itijwile siupapo Sinia' jilis yi' puwa ji'wetis pet ijwienjli sikio' itij'we times tom'niji
4Ya'am Juank'i'm, ya'am ti ajloyi siu'nie imp'esinik siojopo Sinia' jilis yiyits'i ni ji'wetis ijwienjli sikio' itij'we times tom'niji, yiji pet siojona ajnat Asia. Siunie Sinia' jikap'ijliuskiye siu'neje na askamankiye ti jitiajlayiji siunie ti jla'am jane'yasap,#Ex 3.14 siu'neje na ti 'nelanjie'e t'ipi ti po' ta'a, siu'neje na ti ja'nejts'eje, tajle 'neje jla'am napok ijwienjli sikio' itij'we times tom'niji Sinia' jikimet ti 'es ti initaj ti ijniul wita'm ti teje'yi siupa yi'iji'n ti jla'am ti anechiyas. 5'Yina tajle 'neje ni Sijwajieti Jesús siunie jika'niyewo ti 'es, jla'am ti inia'an ti yapi pijia'm ti tajli pi a'no',#Hch 26.23; Col 1.18 siu'neje ti wikie'eyi siunapo anechiyasas yi'ne ajnat'e ti jika anechiyasis. 'Namats'e pa Sijwajieti, isia'ni pa ji'woyis, siu'neje ti 'ya'al, 'yina lapakawo ti iyo ka kasjwajiete siuniwa sakeyis. 6Siu'neje ti kaswojwa'n pet anechiyasisa', siu'neje ti kaswojwa'n Jinia' jika pa'yijisa'.#Ex 19.6; Apoc 5.10; 20.6 ¡'Esiji ka ijnok'i'ni siunie jiwunitieye ti 'es, siu'neje ni jijweye ti ja tena'a! Amén.
7¡'Yena'yi ilia'm, Sijwajieti na'm isia'm, ti yiji jana poli!#Dan 7.13; Mt 24.30; 1 Ts 4.17
Wikie'eyi napo i'nio' ti jan'we'en,
siunapo iliant'ipi kiak jawo jan'wenis.
'Yina wikie'eyi napo i'nio' yi' ape'e 'ni ajnat
ja ke jlasiye ni ja jijliak'aliye,
siu'neje ni jlajlas janwoyi ti jan'wenis.#Zac 12.10; Mt 24.30
Kiak janwo. Amén.
8“Ya'am siunie iniant'ipi, yam'neje siunie yi' jlaja”,#Is 41.4; 44.6; Apoc 1.17; 22.13 iyo ni Saka'niona, Sinia' ti lajk'ipa ka ijnojliji, ti jla'am ti 'naka, siu'neje na ti 'nelanjie'e t'ipi po' ta'a, siu'neje na ti ja'nejts'eje.
Juan i'wi'in pa jloniye pa Sijwajieti ti 'es
9Ya'am Juank'i'm siunie askiecha, lapakawo pet siuti ani'nopijieteje ni Jesús 'yina si'wet ijwienjlajam'ne siunie Sinia' jika anechijiayas, siu'neje ti siliaye iniuk'i wita'm ti siwet'ia poyeta, 'yina majejli naka 'neje siunie sijweye pet ti ani'netiejeta pet ilia'm niwaka. Sena 'ne yi'i jlaja ajnat siujlie'e i'niat tijwajiape'n jle' iyo'ate Patmos, 'yina je 'wena paka int'emink'i naka jla'am ti awoyi yamtikie' niwak Sinia' jlamtis, siu'neje na ijiatk'i ti Jesús iyo jika'niyeja'. 10Siojokia jloma ti Saka'niona jika jloma, 'yina siojopa Sinia' jikimet ti 'es ti yi' itipe'e, sekyi'i ti ape'yayeyi siojo jla'lap siupa i'yask'i ti to'm i'niajk'i, 'yina ijiok'i'ni siojo jla'lap iyo, iyo'ate siujlie'e wakiak'iu' ti tipajwukk'i, 11ti iyonk'i 'ate:
—'Ete'e siuniwa ji'we'en, 'yina e'ne pa imp'esinikie. Sek jane'yi ka jloyeyinie'e siunapo Sinia' jilis yiyits'i siuniwa ji'wetis ijwienjli sikio' itij'we times tom'niji yiji janaka ajnat Asia: Sinia' jilis yiji jana Éfeso, siunapo yiji jana Esmirna, siu'neje jana Pérgamo, siojona Tiatira, siojona Sardis, siu'neje jana Filadelfia, janaka 'neje jla'am siojona Laodicea.
12Sekyi'i ti a'yenata i'wichaja ti a'yentaja siupa i'nio' i'yas'ni ijyik'i, 'yina 'wenayeyi'iji niwa a'wene, a'wenayi siojowa katese'l ji'wetis wikinie maja ti 'najli, 'yina ijwienjli sikio' itij'we times tom'niji ja nojwa'm. 13Jikiowe'e jawak ajwel'ni a'wena 'ni, ti ka je i'nioye wata'a,#Dan 7.13 ji'wu' ni itiojyi itij'w ape'e 'niwa jisietis, jlam'ne pet siojo jika'wak ya'm ape'e 'ni t'ot, ti kia'iyo 'naka wikinie maja ti 'najli. 14Lemi'yi jli jletik 'ate iyo jla'a 'wole po' ti lemits'i siuniwa ji'wole,#Dan 7.9 iyot'i 'neje siunie wi'yit ni k'iejliyi. Siuniwa jitiete iyot'e pet 'ate siunie jwat ti yat'e. 15Jlampet siuniwa jisietis isisie'etie ti 'yakaje intaj je ijwi'yi, iyo'ate siunie wikinie ti tijliona ti tiwoki ka 'najleje'n siunie 'es, wikinie siu'nie t'onk'i.#Dan 10.5-6 'Yina siunie jla'lap jwesiejayik'i'ni iyot'e 'ate siunie jla'lap ni i'niat siunie taj'l ape'e jana tikijnaki. 16Ijwienjli sikio' itij'we times tom'niji niwa katese'l siuniwa yi' poliyi yijni kiojyi, ti itiujmat 'nijiye siunie jikio' jijweyeje, sekyi'i siunie jitisajnat jitiok ti jikiwitawa timesi ti 'yakajlamk'i itiajlat jikiwitk'i. Jlampet siojo jitiokio' iyot'e pet 'ate siunie kilie' ti ijiat ti 'esi', ti lajk'ipa kanp'one.
17Jlampet siuti a'wenayi, jlam sek anoyeyi'iji'n kiajwe, 'yinit'iyijpe siunie ti ijiate ti 'yale. 'Yina jikio' siunie jijweye yi'n itipe'e sekyi'i ti iyonak'i 'ate:
—Ke ijnots'ijni. Ya'am siunie ti inia'an, siu'neje ni jlaj,#Is 41.4; 44.6-8; 48.12; Apoc 1.8; 22.13 18siu'neje ni 'wasa'n. Ijiate ti ts'alpe, 'yina 'nakayi si'wasa'n, jajiok'i'ni ti ja ke sinitia'n. Yam'neje ti yik'i siuniwa jikie'el ti t'ajlinitijaja'm janak 'najlati jika anechijiayas. 19'Ete'e siuniwa ji'we'en 'nakayi, siu'neje niwa ja'nakaj kapajata wata'a. 20Siunie iyo 'niwa ji'we'en siu'niwa ijwienjli sikio' itij'we times tom'niji katese'l siu'niwa yi' poliyi, ti e'n isiojyi ti atojmat ijwiyeje, siu'neje 'niwa ijwienjli sikio' itij'we times tom'niji katese'l ji'wetis ti wikinie maja ti 'najli. 'Yina siu'niwa ijwienjli sikio' itij'we times tom'niji katese'l siu'niwa yi' poliyi, niwaka ijwienjli sikio' itij'we times tom'niji jijliujwajnas napo Sinia' jilis, jlampet siu'niwa ijwienjli sikio' itij'we times tom'niji katese'l ji'wetis, niwaka pet siuniwa ijwienjli sikio' itij'we times tom'niji Sinia' jilis ji'wetis.
Currently Selected:
Apocalipsis 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.