Santiago 1
1
Santiago itijwile papo Sinia' jilis
1Asampey, i'lijwas ti jlekiejyi'n ape'e 'ni ajnat, ti jiwoye 'ate siunapo i'nio' t'ipi ti je pini' Israel jika kia'lis ti tajla siupapo itijwa'm niwa sikioye times tom'niji jitise'l t'ipi.#1 P 1.1 Ya'am Santiagok'i'm,#Mc 6.3; Hch 15.13; Gl 1.19 ti Sinia' siu'neje pi Saka'niona Jesús ti Sijwajieti jikawok'i'm; yam ti ip'isinik siu'nie atajiet'ase.
Jana 'najankijnieye ti tajle pa Sinia'
2I'lijwas, siuti kia'iyo ti yiyeta'ase niwaka inkajejlasayejes ti a'tisk'iji'n ti inijle'en, ja ijiatayijpe pet ka nikanitiejyi'n. 3'Yina 'najanayi pi jiwonayi ti ijnejlita ki iyo ni astankiujnieye ti 'es ti jiwoyeyi, naka ti i'neyasana ka atoma'yi ilia'm siuniwa ti jinilayitieyi asjlak'aliye. 4'Esiji ka wujwa ka anilayitieyi siunie iyo niwa ijio'wase'ni, 'yina je ijiat ka je inets'i ni jlaj yi'i, sek jane'yi ka jiwekiejana'a ka ama'yi ape'e siunie iyo ni ijiate ti 'es. Jlajma ka awoyeyi ti ja inwakajla, ja lajk'ina'a pa ka asetiana'.
5Jane'yi pa ti asa'm ti jawo ka 'naja'n pet, 'esiji ka 'ajle pa Sinia'. Siunie jasetia'n Sinia' janwe'na'm. 'Yina Sinia' je yijna'm wikie'eyi napo i'nio' ti t'ajla pa k'iejliyi jla'am iyonayi pit, 'yina ti Sinia' jwajla'a je isitia'n.#1 R 3.5-12; Sant 3.13-17 6Siunie i'nio' jant'ajle, ti jant'ajla pi k'iejliyi, 'esiji ka ijiatayi ti jankima ni jitienkiujnieye ti ja ke inkakiu. Jlampet siunie ti init'ajanit'ni ki iyone ni t'ajlaye sekyi'i 'wena jitiej yikiaj'le, naka'ne ni siunie ti iyo'ate siunie i'niat niwa ji'wukijlimpejes ti po'; yejwuti ni jlajwu ti wujwi, nakaye ti je ikajanit ni iyo 'yina initiajnate'n.#Mt 7.7-11; Jn 16.23-24 7Siunie ti kiak iyo, ja ke intejnisie ka Sinia' inwejna'm siunie t'ajle, 8kajeyepa ti je 'yaka paka ijiatayi paka iwoyi.
Sinia' jilis ti jwajla'a je i'win pet, siu'neje napo inkasi'
9Isiecha siunie je initonit ki iyo ti yi' ape'e 'ni ajnat, 'esiji ka wujwa pet ka inkaja'a pa Sinia', siuti Sinia' ijiunit. 10Jlampet siunie inkaja, 'esiji ka ijiatayi ka inkaja'ni, 'yina ti Sinia' ijliasat isia'm. Siunie i'nio' jwajla'a i'wi'in iyo'ate ni jop jlokie, ti je t'o'n. 11Ti kilie' poyeta, sekyi'i akat iliana ni jop, sekyi'i t'ekiye'e ni jlokie, 'yina netia'n na jloniye ti 'es.#Is 40.6-7 'Yina kia'iyoyi naka i'nio' inkaja, niwak jikijmatis ti jant'emina ti ja ke inejia'm jana ji'wasankiye ti t'o'n.
Siuniwa inkajejlasayejes, siu'neje niwa ti iyo sijliak'aliye
12Sinia' wuj ti ip'ilisi'n siunie to'm ilia'm, jla'yi ti inilayiti siuniwa inkajejlasayejes ti iyo sijliak'aliye. Jak je iyoyi niwaka siunie ti je 'yakajle'n ni i'nio', its'iuyeja pet ji'wet'e, janak ji'wajiet jana in'wasankiye siojona Sinia' ijwijla'm napo i'nio', ti itiliaja kanwejna'm, siunapo 'namaja.
13Siuti po' ni i'nio', siuniwa inkajejlasayejes ti ijioyi, ja ke inwo'ate, “Sinia' jlam sejlit.” Kajeyepa ti Sinia' je ti'wena ka siunie inkajejlasaye inkajle'n, ka 'nakayeyi pet kanwoyi siunie je 'es ka sek ine'yi ka jnejlitie pet pa ka ne'yi pa. 14'Yina jlam, jla'm ni i'nio' ni initoni ni inkajejlasaye, kajeyepa ti je 'yikijiet siuniwa itiliaja ka nenjlajap ka woyi, naka'ne ti it'imina. 15Jak je iyoyi ti wakajlata niwaka, sekyi'i 'yakaja pet ni jike' iyo. Ts'ijiye ti wakajlata pet ni jike', nakaye pet jana 'najlati ti 'yaka.
16I'lijwas ti yimijna'yase'm, 'esiji ka wujwa ka 'yena' siunie jiwoyeyi. 17Jlam'ne je kiak iyo; 'yejne'n siuniwa isis ti Sinia' iwints'e'm ti iyoyi si'wajieta', je tajle pa ka jikiechaye, 'wenajliyi ti tajle jla'am pi Sinia' ti yi' poliyi ti ilisane ni kilie', siu'neje ni we'la, katese'l kia'iyojliyi. Jlam ti je iyo'ate ni siuniwa jilisajna' ti yiyi ts'iji inetia'n ni siunie iyo ti 'nlanjie'e, siunie yi'i ni Sinia', je paj ka int'eki.#Núm 23.19; Mal 3.6 18Jlam ti tajle ni siunie iyo kawo ti iyo ka si'wasankiye ink'ieye'eje, 'yina ti ijiate ti kasts'isisi, ki iyo niwa jlamtis ti ijiatk'i ti awoki,#1 P 1.23 ti iyo ka sama ka iniana ka kaspo' ape'e 'ni ajnat ka inianak'iye ni siuniwa ijia jilisajna'.
Woyi siunie Sinia' jlamtis iyo kawoyi
19I'lijwas ti yimijna', ja ke inkiwaliye'yi siu'nie: siuti po pa jik'iuyeyi, 'esiji ka enayi 'ate; kia'iyojliyi siuti po' niwa jijwela', ke inesi'lie'yi; jla'yi ti ja ke ta'aja ka injwesisa'. 20Kajeyepa ni jijwesi' ni i'nio' teje'yi ilia'm siunie 'es ti Sinia' iyo kawo. 21It'imina ti awo'nase 'ate: leyeyi wikie'eyi siunie ni ijiate ti jit'iojli po', siu'neje niwa wuj ti je isis. 'Yina nijlasata'yi isia'm, siuti jikima'yi niwa Sinia' jlamtis ti jisiliaki yijinits'i niwa asosikis, 'yina niwak siuniwa jlamtis jijweye po' ka injwajieta.
22Kimayi niwa Sinia' jlamtis, kijmanayi'n ti iyo ka woyeyi. Je 'es ka jla'm ape'yaye jiwek, 'yina siuti kiak jiwoyeyi je jlewitayiji siunie ijiate ti 'es ka woyeyi. 23Siunie i'nio' ti ipi'yayeta niwa Sinia' jlamtis, 'yina ti jikio' je yi'ne, iyoye'ate siunie i'yejni jana ti'yenaja. Sekyi'i i'wi'n ni jipe'el, 24jla'yi ti i'wi'n pa jloniye iyo. Jlam'ne ti itime ti i'yejni sekyi'i ka kia'iwo ka jitiej inene'ni 'ate siupa iyo ti i'yejni japa ti'yenaja. 25Jlampet siunie wuj ti i'ye'en niwa Sinia' jlamtis, jla'yi ti je ilijape, je isiwaliyi'i ti iyoyi, niwaka pet ti jantajleje ni jinikanitieyi. Tepa jawo ka kiak je iwo ti jijweye po' niwa Sinia' jlamtis, 'yijene pi iyone ka t'aka inlajnits'i napo i'nio'.
26Siuti po' ni i'nio' inijwe'el ti iyo'ate, “Ya'am Sinia' jlask'i'm”, siuti ji'lij je 'es, jlam ti inikajyi'n. 'Yina siunie ijwil ka jitienkiujnieye poyeyi ni Sinia', ijiate laj lajaye siunie iyo. 27Siunie ijiat ti 'es ka woyi napo Sinia' jilis, 'najleje'n ni 'es ti iyoyi, lajk'ipa ka jit'iojliye jitieyi'i pa Sinia', niwaka: 'esiji ka noyeyeje napo kimpejnas, siu'neje napo ask'ilieki, ti jijliak'ali po' ape'e 'ni ajnat, jla'yi ka inilesaniji k'iye niwa wask'i'nelaja yi'i 'ni ajnat.
Currently Selected:
Santiago 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.