Diyuturunumiyu 1
1
Ti Sugu Panginuun Pag-ighit ti manga Israilita sa Bantud Sinai
1Inda pag ribru tungkul sa manga itinultul ag binagaw ni Muysis sa tanan Israilita katpung ati di waya sida sa pangawakawaan, sa butlakan Sapa Hurdan. Makampuhan sida sa Karatagan Hurdan#1:1 Karatagan Hurdan: sa Hibriyu, Araba. Katunda diman sa talata 7. arani sa Sup, sa karaw-an Paran, Tupil, Laban, Hasirut hanggan Disahab. 2(Manga 11 ka sirang lakawun ginan sa Bantud Sinai#1:2 Bantud Sinai: sa Hibriyu, Hurib. atabug sa Kadis Barnia nu lakaw sa Bantud Siir.) 3Pagka sa un-an pag sirang ika-11 pag bulan, sa ika-40 pag timpu, ginan sa pag-ighit manga Israilita sa Ihiptu, sinabi ni Muysis sa kanda ti tanan isinugu Panginuun sa kanda. 4Natupad inda igu natalu ni Muysis#1:4 ni Muysis: ngatay, Panginuun. si Sihun imaw ti hari manga Amuriyu, mag-uli sa Hisbun, ag si Ug ti hari Basan, mag-uli sa Astarut ag Idri. 5Nakan ngani ipinaliwanag ni Muysis sa kanda ti kasuguan Panginuun ati sa butlakan Hurdan, sa sakup Muab. Magkun siya, 6“Katpung ati kita sa Hurib, magkun sa kanta ti Panginuun nita Diyus, ‘Dugay yi kamu magpangulian sitay pag bantud, 7nakan ngani pag-ighit yi kamu. Pag-atag kamu sa kabantudan manga Amuriyu hanggan sa manga rugar sa kay kalibut — sa Karatagan Hurdan, sa manga kabantudan, sa tagudtud sa isalpan,#1:7 tagudtud sa isalpan: sa Hibriyu, Sipila. sa Nigib hanggan sa manga rugar sa baybay dagat. Pag-atag kamu sa daga Kanaan hanggan sa Libanun, tugka sa daka Sapa Iyupratis. 8Bantayi niyu! Pag-iayaw niku inda pag daga sa kanyu. Paglakaw yi kamu bag-u apua yi tunda pag daga ti itinaratu niku sa kanyu manga ginurang, sa kanda ni Abraham, ni Isaak, hanggan ni Hakub, tugka waya sa kanda manga sinulput.’ ”
Nagpili si Muysis manga Manughusay
(Pag. 18:13-27)
9Magkun waya si Muysis, “Sa ati katpung pag udas pagsabihun niku sa kanyu: ‘Unman niku kamu kaya pangunahan mag-usa. 10Pinayamu kamu Panginuun niyu Diyus. Ag kainda, mayamu yi kamu ga manga pamgasan sa langit. 11Mana ti Panginuun, ti Diyus niyu manga ginurang, ti higit waya pumayamu sa kanyu linibu ka ulit ag papaladan niya kamu angay sa kay itinaratu. 12Dapat ay kabitay niku ayusun mag-usa kanyu manga arawayan hanggan kakurian? 13Nakan ngani pagpili kamu ginan sa kada niyu lahi manga tawu madunung, maraintindi ag paggalangun, bag-u sida ti buwatun niku manugpanguna sa kanyu.’
14“Nagpasnu kamu kuntay mayad inda pag gayak niku. 15Nakan ipinadumara niku sa kanyu bilang manga manughusay ag manga takinan ti manga tawu madunung hanggan paggalangun ginan sa kanyu lahi. Ti iba managut sa 1,000 tawu, ti iba waydi sa 100, bag-u ti iba sa 50, bag-u ti iba sa 10. 16Sa ati katpung pag udas pag-isugu niku sa kanyu manga manughusay kuntay, ‘Husayun niyu ti kasu manga tawu, ag sintinsiyahan gid matadlung, bukun lang sa manga Israilita nu unman hanggan yi waydi ti manga day-uhan mag-ulian kaibahan niyu. 17Kailangan unman kamu may baliwahan sa kanyu magsintinsiya; parihu niyu patingihan ti manga makuri hanggan ti mayaman. Danga kamu magkadala una sa kantapu, dahil ginan di sa Diyus ti manga pasya niyu pagbuwatun. Nu makuri sa kanyu ti kasu, daran-a niyu sa kangku bag-u aku yi ti bahala sumintinsiya.’ 18Ag sinabi diman niku sa kanyu kaybi ti dapat niyu buwatun.
Nagpadara Sida manga Manugtiid
(Bil. 13:1-33)
19“Angay sa pag-isugu Panginuun nita Diyus, nighit kita ginan sa Bantud Sinai, bag-u naglakaw sa maluang ag madala pag pangawakawaan kanyu gid nakitan, bag-u inmatag kita sa kabantudan manga Amuriyu. Pagras-ug nita sa Kadis Barnia, 20magkun aku sa kanyu, ‘Nakaras-ug yi kamu sa kabantudan manga Amuriyu ti pag-iayaw Panginuun nita Diyus sa kanta. 21Bantayi niyu ti inayaw niya pag daga sa kanyu! Apuun niyu inda angay sa sinabi Panginuun, ti Diyus niyu manga ginurang. Danga kamu magkadala ngatay magpanlumuy.’
22“Pagpakarani kamu tanan sa kangku bag-u magkun, ‘Manpadara dapu kita manga tawu hampay tiidan ti daga ag sabihan nida kita nu naan kita pag lumakaw ag nu naan pag manga banwa kanta atagan.’
23“Naisip niku mayad tida pag gayak, nakan ngani nagpili aku 12 ka tawu, usa sa kada lahi. 24Linmakaw sida lakaw sa kabantudan, ag rinmas-ug sa Luung Iskul bag-u nantiid sida ati. 25Sa kanda pagbalik, may dara sida sa kanta manga burak kayu ati ginan, bag-u ibinarita nida abunda ti daga pag-iayaw Panginuun nita Diyus sa kanta.
26“Dapat ay magbugya kamu mag-atag; linabag niyu ti sugu Panginuun niyu Diyus. 27Magriklamu kamu sa kanyu manga turda bag-u magkun, ‘Galit sa kanta ti Panginuun, nakan ngani pinaighit niya kita ginan sa Ihiptu hampay iayaw sa kamang manga Amuriyu para kita kanda matyun. 28Kabitay kita makaatag? Pinadala kita manga nagtiid sa ati pag daga. Pagsabihun nida kuntay mas mabaskug bag-u mas arabwat man kaysa kanta ti manga tawu ati, ag ti manga banwa nida daraka bag-u magkasangputan manga alad batu ga sunggu yi sa langit kay ka abwat. Bag-u nakitan waya nida ati ti manga lahi ni Anak.’
29“Bag-u magkun aku sa kanyu, ‘Danga kamu magkakulbaan ngatay magkadala sa kanda. 30Ti Panginuun niyu Diyus imaw ti umuna ag lumaban para sa kanyu, parihu sa kanyu nakitan kay binuwat sa Ihiptu 31hanggan sa pangawakawaan. Nakitan niyu nu kabitay kamu inalagaan Panginuun niyu Diyus, parihu sa ama mag-alaga sa kay anak, tugka sa makaaput kamu sa inda pag daga.’
32“Dapat una katida ti tanan, unman diman kamu nagpaniwala sa Panginuun niyu Diyus, 33ti manuggiya sa kanyu maglakaw sa panab-anan apuy nu yabi bag-u rurum nu sirang. Hinanapan niya kamu manga rugar kampuhan bag-u itinudlu sa kanyu nu naan kamu pag lumakaw.
34-35“Pagka nadnugan Panginuun kanyu manga riklamu, nangisug siya bag-u nanumpa, ‘Unman una di usa sa inda pag daut sinulput ti makakit marinu pag daga itinaratu niku sa kanda manga ginurang, 36purya lang sa kan Kalib kay anak ni Hipuni. Makitan niya inda, ag ipakaun niku sa kanya hanggan sa kay lahi inda pag daga kay inatihan, dahil buu tagipusuun niya aku sinunud.’
37“Dahil sa kanyu, nangisug diman ti Panginuun sa kangku. Magkun siya sa kangku, ‘Una kawu unman diman makaras-ug sa ati pag daga. 38Dapat kanmu suruguun si Huswi kay anak ni Nun makaras-ug di ati. Parig-una nimu siya, dahil siya ti manguna sa manga Israilita sa pag-apu sa daga.’
39“Bag-u magkun ti Panginuun sa kanta tanan, ‘Makaslud diman sa ati pag daga kanyu manga anak kay unman waya may buut. Magkadala kamu barang bihagun sida, dapat sa kanda niku pag-ipakaun inda pag daga bag-u kanda yi ngap apuun inda. 40Dapat kamu, bumalik maan sa pangawakawaan atabug sa Dagat Marara.’
41“Bag-u magkun kamu, ‘Naglabag kami sa Panginuun. Atabug kami ag lumaban angay sa sugu Panginuun nimi Diyus sa kanmi.’ Nakan ngani inalistu kada usa sa kanyu ti ayaw-ayaw manga armas, ag mag-isip kamu malpus lang kay umagaw sa kabantudan.
42“Dapat magkun ti Panginuun sa kangku, ‘Sabihun nimu sa kanda kuntay danga dap maglakaw ag maglaban, dahil balaw niku sida awatan. Matalu sida nida manga kalaban.’
43“Nakan ngani sinabihan niku kamu, dapat ay unman kamu nagpatingi sa kangku. Linabag niyu ti sugu Panginuun, ag dahil sa kanyu magpadayaw nandugma gid kamu sa kabantudan. 44Ag nanlaban sa kanyu ti manga Amuriyu mag-uli ati, bag-u ga manga putyukan sida magbukad, ag imaw ti tinmalu sa kanyu ginan sa Siir tugka sa Hurma. 45Nagbalik maan kamu bag-u nanlulumian tag sa Panginuun, dapat ay unman siya namatingi ngatay nagsagut sa kanyu. 46Tunda ngani kay dahilan nu hayga nangulian kamu masyadu dugay sa Kadis.”
Currently Selected:
Diyuturunumiyu 1: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
