1 Korintiye 6
6
Kaadəha a waka ji-kottə
1Hwun ji-kottə, hwun kana ɗɨməsə a wakasəwnə, ɓe ama aa mwamdiya a kaadə kpeyəsən a humwa myee aawa koɗə Həmɨnpwa, hwun tawa wudə humwa myee Həmɨnpwa a vomiyərən ka kaadəha dəwnə. 2Hwunaa leyə atɨ ɓa mingɨn 'ye Həmɨnpwa a vomiyərən nza ɓwaa ka Yesu a ɓashiyə myee kwo koɗə Həmɨnpwa a vɨrata? Anda hwunə ɓa ɓashiyə mingɨn ganə a vɨratə, ɓə gə mɨnə nzɨ-lə kəng-kənga a wakasəwnə mgban hwunaa dɨ nza a byelə a ɗadən? 3Hwunaa leyə atɨ hɨm nə ɓa ɓashiyə malyenye ma? Na sə, mɨnə shinə a nzaasəwnə fərə-fərə a vɨrata? 4Gə-angɨn, aa ndɨka hwun kana ɗɨməsə a wakasəwnə, hwuna zə haka myee aa tɨl asə a waka ji-kottə gə təna ɓashiyəwnə? 5Na boyownə ləməginə gə hwuna leyə atɨ shee hwuna dɨ ɗa, shi sopi. Taayə ndəng ma twayə də mgban a wakasəwna hwun ji-kottə, a ma ɓa takəwnə a ləməgyee a wakasəwna? 6Ma atɨ nzə-kotti, sɨnə dɨ muɗi kaadə nduwongɨn a humwa ji-ɓashite aa ji-kotti, kana nda zə haka ji-kottə.
7Nagi a nə sate atɨ hwuna dɨ kaadəsə a vəni ɓashitə, angɨn fukəti a humwa Həmɨnpwa. Nagi nda mya pawo kəwnə, a tɨmbɨrtəwnə, aa ndɨka hwuna nda nggur mbasɨtə ka ləngɨn? 8Zə niyəm, hwun ji-kottə, hwunə mɨni a wakasəwnə dɨ ɗasə shi hashe dɨ tɨmbɨrsə.
9Hwunaa leyə atɨ myee aawa koɗə Həmɨnpwa wule mingɨn aa dɨ ɗɨm həmne dan ma? Ɓe hwunaa vwaka nəngəwnə, hwuna leyə atɨ myee dɨ ɗa sharawne, ka ji-koɗə pɨle, ka myee dɨ ɨl mandye, ka mandyee dɨ ɨl morye, ka moryee dɨ bi ka ndeyingrən moryi, 10ka mahərye, ka ji-nzumwe ka ji-kpasə mbale, ka myee dɨ lamdəha kɨɗa kwake, ka ji-dəməha, mingɨn kat aa dɨ ɗɨm həmne da Həmɨnpwa. 11Imi a wakasəwnə, wule shingɨn nə təna duwa ɗa kɨnɨnɨng. Ɓəgəng mye suɓwagəwnə, vomiyəwnə. Həmɨnpwa sawuɗəwnə dɨ haka Həmɨmiye Yesu Ma Həmɨnpwa a Yaɓwarən ka gəta Pitɨ Ɗəmɗəmta Həmɨnpwatɨ dam.
Sharawne
12Ɓətɨ hwuna boyo atɨ, “Hɨnə ka humwatə na ɗa nagi ndo sə.” Kat ka angɨn aa nagi ndo sə nə ɓa gwadəha. “Hɨnə ka humwatə na ɗa nagi ndo sə.” Kat ka angɨn taa dɨ mwa asə a ɓweri na nza vor gbərəwe. 13Ɓətɨ hwuna mɨna boyo atɨ, “Mya ɗa sɨzɨmtə gə yedi ɓwaara, yedi ɓwaara mgban gə sɨzɨmtə.” Kat ka angɨn Həmɨnpwa ɓa figərən kat təna mbəə ɓaa. Myaa ɗa sɨtə gə sharawne, shezə mya ɗa sɨtɨ ɓwaara gə ndukodə Həmɨmiye, Həmɨmiye mgban gə sɨtɨ ɓwaara. 14Həmɨnpwa a maddə Həmɨmiye Yesu gə we ka gətɨ dan, sə mgban ndi ɓa maddəm gə we ka myentə. 15Hwunaa leyə atɨ nagi ndo haa a sɨsəwnə hɨnggə Yesu Ma Həmɨnpwa a Yaɓwarən nə ma? Na woyo ya na nggur sɨtɨ Yesu Ma Həmɨnpwa a Yaɓwarən a ɗa sharawne kaara? Aa dɨ ɗa. 16Hwunaa leyə atɨ ma pɨrdə nəngɨn a sharawne sɨsən peyə gə hiɗə ka sharatɨngɨn? Gə mya boyo atɨ, “Tən dɨ kpeyə təna gəə sɨtə hiɗə.”#6.16 Naasə: Tiyatə 2.24. 17Shezə ma pedə nəngɨn ka Həmɨmiye Yesu mangɨn mgban peyə gə hiɗə ka Həmɨmiye a vor pitə.
18Hwoyəm gə sharawne gɨsəmgən ɓong-ɓong. Səhasa mbiɗi kat tam a sɨtə, shezə ma kana ɗa sharawne sɨsən nə nda dɨ kɨɗarə. 19Hwunaa leyə atɨ sɨsəwnə shafe da Pitɨ Ɗəmɗəmtə na? Həmɨnpwa nə vəwnə, nda nza vorsəwnə, aa yə hwunə nza nənəngəwnə, 20ɗərə mya ɗərtəwnə a lurəwnə. Gə ləngɨn ndukomdə Həmɨnpwa ka sɨsəwnə.
Currently Selected:
1 Korintiye 6: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
