1 Korintiye 4
4
Kpe-lagbe da Ma Həmɨnpwa a Yaɓwarən
1Ɓə kana ɓwaare ta nggutenə ɓətɨ hinə kɨse da Ma Həmɨnpwa a Yaɓwarən, a myee dɨ koɗi ka ləməgi diyale da Həmɨnpwa 'ye a haa ɓotə. 2Gə-angɨn ɓə kana kɨse a gə ka tikɨstə a nə lyente mya vərən. 3Taa salə nggute hwuna ngguti, na mɨnə hwuna kana ke, na mɨnə mgban ɓwaare a dɨ ɓashidi a nəngɨn, asə aa pɨrdi də. Hɨn taawa ɓashiyə nə na. 4Huboshinə hiɗə, kat ka angɨn taawa bədə myenshi a mɨndə na atɨ taa ɗa a səhasə, ndi Həmɨmiye nə dɨ ɓashidi. 5Gə ləngɨn mgban ɓe hwunaa ɓashidə ama ɓəgəng a lɨbadən. Kulam maa fəre da Həmɨmiye a shi, gə sɨnə ɓa bɨldə wule shee a haa ɓotə a dɨma dərən gə vor kulitə təna gə haa bwange. Sɨnə ɓa bɨldə wule sa ɓwaare a dɨ kana a vor hubosərən. Beetɨ angɨn nə nagi ndo ma ɓa ɗɨm humwaha dɨ haka Həmɨnpwa.
6Ji-nuwo, ɓəgəng na ɗəwnə byelə səɗe a na ka Apolos, gə hwuna ɗyegən asə dɨ hakenə gə ɓe hwunaa sargyele a nə sa mya doro vor Malɨmtɨ Ɗəmɗəmtə. Gə mgban ɓe hwunaa nggorosə konye ka le da ama atɨ sɨnə pɨrgə marə. 7Ɓə wonə səw atɨ hye pɨrgə ama? Mɨnə hye gə kan, a mgban aa vəti mya vu? Na ɓaa mya vu hye luwo, mɨnə ɗa hye dɨ nggur nanga ɓətɨ aa ɓaa mya vu?
8Hwuna dɨ niyə ɓətɨ hwun ɗɨm sa kana kat! Hwuna dɨ niyə ɓəgəng ɓətɨ hwun ji-gɨnəti! Hwuna dɨ niyə ɓətɨ hwun gəə həmi! Hin mgban hinə mi ɓayi! Mwoshinə atɨ giɓa nda hwun həmi, ndəng hina nda kwa ɗɨmə a ɗa həmne kəwnə. 9Hɨnggi na dɨ niyə ɓətɨ hin kpe-lagbe myee shikəwnə ka le da Həmɨnpwa mye mɨndenə a kpawtɨ saare, hinə ɓətɨ kwa ji-gbərəwyee mya fardarən təna dɨ muɗə tukoti nə. Sə mgban hina gəə sɨ niti a humwa vɨratə kat, hina mɨna gəə sɨɓayi ɓaa a haka malyenye ka mbiɗitɨ ɓwaare kat. 10Hina gəə dəɗi ɓayi ɓaa gə le da Ma Həmɨnpwa a Yaɓwarən, hwun hwuna dɨ niyə hwun mi tikɨshi gə le da Ma Həmɨnpwa a Yaɓwarən! Hɨnggenə hin taa gəti kenə hinaa nyerə, hwun hwuna dɨ niyə hwun nyerə dwat! Hwuna dɨ niyə sə pepeyə ɓwaare kana dɨ fukadəwnə, hin təna hyatenə! 11Baa dɨmə fəranə supo, hinə a vor myatə ka wor-haɓye, hinə dɨ ɓwe shiyakɨshe woyi kaarən, hinə mya dɨ lyebrenə a verəwdenə ta ɗenə sɨmwarashe, hinə dɨ woyi taa hwoɗi kenə. 12Hina dɨ ɗa lyentə kɨr-kɨr ka ruwasenə hina ɓə ɗɨmə a zɨmə. Mye kana shartenə, hɨnggenə ɗɨkə hina dɨ ɗɨkərən pepetə. Mye kana tənəə denə hina dɨ nggur mbasɨtə ka angɨn. 13Mye kana kɨɗa kwakɨngenə, hina dɨ mɨndə angɨn ka lə feme. Baa ɓəgəng hinə gi ɓətɨ ɗɨkzɨrə kwashi ganə a vɨratə.
14Hɨn taa dorshinə gə na vəwnə sopye, na doro gə na fyel-kwakingəwnə a kənəwnə shee gə hwunə je de. 15Nagi nda myee dɨ kənəwnə shee a nə tɨfe da Ma Həmɨnpwa a Yaɓwarən a furo ɓətɨ mɨnə, kat ka angɨn hwun tamdə ka baatə pɨrgə hiɗə. Gə hɨn gəə baati a hakəwnə a vor Yesu Ma Həmɨnpwa a Yaɓwarən dɨ haka ləmə fema na shikəwnə kan. 16Səngɨn nə ɗa na dɨ səwnə atɨ hwuna koɗə mbwayi. 17Gə ləngɨn nə mgban na dɨ lyen Timoti a hakəwnə, sɨnə nze de a na dɨ mworən, sɨnə a na mwakan a vor lyenta Yesu Ma Həmɨnpwa a Yaɓwarən. Ndi ɓa ɗyangəwnə ka shee a nə nzaashi a vor tɨfe da Yesu Ma Həmɨnpwa a Yaɓwarən ɓətɨya na kənə ji-kottə shee a vəni hiwtə a mbəgə hee kat.
18Ɓəgəng imi a vorsəwnə a maɗə a dɨ nggorkonye, təna dɨ niyə ɓətɨ taa diyə mɨni. 19Həmɨnpwa kana mwa, hɨn ɓa mɨnə aa dɨ ɓongə, hɨn ɓa sɨ naa wule mingɨn 'ye maɗi dɨ nggorkonye dɨ byeli ɓaa, na naa wule gəte təna gə kaarə. 20Gə həmne da Həmɨnpwa aa byelə kwaamə ɓəmbə, gəta Pitɨ Ɗəmɗəmtə nə. 21Mɨnə hwuna dɨ mwo atɨ na ɗa? Hwuna dɨ mwo atɨ na shikəwnə ka sɨfele ma, naasə mgban na shikəwnə ka mwoha ka hyatane?
Currently Selected:
1 Korintiye 4: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
