1 Korintiye 3
3
Ndewoyi lyenta Həmɨnpwa
1Ji-nuwo, ite na zə hakəwnə hɨn taa byeli kəwnə ɓətɨ wule ji-kotte ɓongə vor pitə nə, shezə na byelə kəwnə ɓətɨ hwun ji-vɨrati, a kwa ji-kpalami a vor koɗə Ma Həmɨnpwa a Yaɓwarən. 2Wati na vəwnə, taa vəwnə sɨzɨmtɨ nyerətə, gəkɨlə a itɨngɨn baa supo hwunaa nda nyerə. 3Baa ɓəgəng hwun ji-koɗə vɨrati, gə baa ɓəgəng jiwne nee a wakasəwnə ka sə, baa ɓəgəng hwune dɨ ndəlkasə. Angɨn a bɨldən atɨ hwun ji-vɨrati a vor sɨtə, aa ɓətɨ ji-kotti. 4Ka wule byela hwuna dɨ byelə, ama a sa atɨ, “Hɨnə hɨnggə Bulus,” ama mgban a sa atɨ, “Hɨnə hɨnggə Apolos,” angɨn a bɨlə atɨ baa supo hwune a vor sɨtə ɓətɨ mi vɨrati.
5Ɓə wonə Apolos? Wonə Bulus mgban? Hin dɨ kpeyə kɨse da Həmɨmiye nə a vor lyente nda venə. A vor lyentɨngɨn hwuna mwakan. 6Hɨnə laga daase, Apolos nə vədə haɓye, shezə Həmɨnpwa nə dɨ ɗɨkdə shingɨn təna za a wula a kangə. 7Ma laga daase, ka ma vədə haɓye, tənaa asə, shezə Həmɨnpwa nə ɓəmbə ndi ma dɨ ɗɨkdə shingɨn təna ɓə wula a kangə. 8Gə ləngɨn, ka ma laga daase ka ma vədə haɓye tənə kat hiɗə, ama aa pɨrgə nduwongɨn, nagi ndo ma a vorsərən mgban ɓa luu moonə lyente nda ɗa. 9Hin kat hinə ndewe lyenta Həmɨnpwa, hwun mgban hwunə gaashe ka nwoshe dan.
10Dɨ ha wuladəha da Həmɨnpwa na ɓə kwak mgba-vɨne ɓətɨ wule ma lee nwoshe kɨr-kɨr nə, imi aɓə shi ta nwoshe a nə mgba vɨnəngɨn. Naa mingɨn a bədə myensərən ka wule nwoshe təna dɨ nwo. 11Gə taa ama də ɓa mɨna kwak a mgba-vɨnə som pɨrgə Yesu Ma Həmɨnpwa a Yaɓwarən ndi ma sɨnə mgba-vɨna mya kwakə. 12A vorsərən kat tən myee dɨ nwoshe a nə mgba-vɨna mya kwakə, nagi ka dyamse, nagi ka nggɨrngɨme, nagi ka fara wulunge, nagi ka kade, nagi ka kwangətə, nagi ka kasoɓwe, 13mye ɓa bɨldə lyenta nagi ndo ma bwang a fərəngɨn. Də mye ɓa kana lyentɨngɨn ka ɗiye, gə mya lee wule fukatɨ lyentɨngɨn. 14Wule nwoshe mangɨn a nwo kana kangə tənaa hyinə, mangɨn ɓa luu moone dan. 15Nwoshe da ma kana hyinə mgban, mangɨn ɗongə moone dan, shee dan kɨɗə. Ndi mangɨn ka nənəngɨn ɓa kwa mbə a dɨmə, ɓətɨ wule ma mbi dɨmi dɨ vor ɗiye.
16Hwunaa leyə atɨ hwunə shafe da Həmɨnpwa, Pita Həmɨnpwa mgban nee nzaa sɨsəwnə ma? 17Nagi ndo ma kat tukuta shafe da Həmɨnpwa kɨɗan, Həmɨnpwa ɓa tukuta mangɨn a kɨɗan mgban, gə shafe da Həmɨnpwa haa ɗəmɗəmə. Hwunə shafəngɨn.
18Ɓe ama aa vwaka nəngɨn. Anda wonə a vorsəwnə dɨ niyi ɓətɨ nda gə ka lelə vɨra wanetɨnə, ndɨka mangɨn a gəə wule ma mya dɨ nan ɓətɨ dɨɗə, gə nda gə ka lelə diyale. 19Gə lelə vɨrangnə a haka Həmɨnpwa dɨɗəwnə, səngɨn ɗa mya doro atɨ, “Nda dɨ ɗɨkdə ji-lelə vɨrangnə təna pawo a kɨsə pengə kuta lelə byele darən.”#3.19 Naasə: Ayuba 5.13. 20Mya mɨna doro atɨ, “Həmɨmiye lee wule səɗə-yedye da ji-lelə vɨrangnə atɨ a ɓayə.”#3.20 Naasə: Dyemshe 94.11. 21Gə ləngɨn hwun ji-kottə, ɓe ama aa məndaranye gə le da ama. Gə nagi nda mɨnə kat hɨnggəwnə nə. 22Nagi nda Bulus nə, nagi nda Apolos nə, nagi nda Kefas nə mgban, nagi vɨrangnə nə, nagi myenti ka we, nagi nzatɨnə nə, nagi nzate ɓaga shi nə, nagi nda mɨnə kat hɨnggəwnə nə, 23hwun mgban hwunə hɨnggə Ma Həmɨnpwa a Yaɓwarən, Ma Həmɨnpwa a Yaɓwarən mgban hɨnggə Həmɨnpwa nə.
Currently Selected:
1 Korintiye 3: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
