1 Korintiye 1
1
1Hɨnə Bulus, Həmɨnpwa nə wari gə na gəə hɨnə kpa-lagbe da Yesu Ma Həmɨnpwa a Yaɓwarən dɨ ha kanatɨ dan. Hinə ɓwaa ka Sostanis nduwogəm nzə-kotti.
2Hinə dɨ wunaka ji-kottə 'ye a vor vɨra Korintiya. Hwunə myee Həmɨnpwa a vomiyərən ka Yesu Ma Həmɨnpwa a Yaɓwarən 'ye nda mɨna wagatɨrən a gəədərən ɗəmɗəm ɓwaa ka mbiɗitɨ myee dɨ kala Həmɨmiye dam Yesu Ma Həmɨnpwa a Yaɓwarən gbəətə nagi a ndo haa a bətɨ vɨratə. Sɨnə Həmɨmiye darən mgban.
3Maa wuladəha ka ɗolte dɨ haka Həmɨnpwa Baagəm ka Həmɨmiye Yesu Ma Həmɨnpwa a Yaɓwarən, a nza ɓwaa kəwnə.
Bulus a ɗa usəkətə
4Hɨnə dɨ ɗa Həmɨnpwa usəkətə mba-dɨ-mba gə le dəwnə, gə wuladəha dan a nda bɨləwnə dɨ haka Yesu Ma Həmɨnpwa a Yaɓwarən. 5Dɨ hakan nda vəwnə nagi ndawula gɨnəti a vor byele ka lele dəwnə a nə ləməgye dan. 6Gə Həmɨnpwa bɨldən atɨ takale denə a nə Ma Həmɨnpwa a Yaɓwarən a hakəwnə diyalə. 7Gə ləngɨn hwunaa ɗongə gəta Həmɨnpwa ite ndawula kəwnə kaarə a vor kulate hwuna nza a dɨ kula mɨnata Həmɨmiye Yesu Ma Həmɨnpwa a Yaɓwarən ka hɨmne. 8Sɨnə ɓa nyerədəwnə baa hwuna nza a tɨlə kpawtə, mya pəwnə shet-shet taa mgbaalə səhasə kəwnə a fərə mɨnata Yesu Ma Həmɨnpwa a Yaɓwarən ndi Həmɨmiye dam. 9Həmɨnpwa nə tikɨs ndi ma warəwnə gə hwuna nza ɓwaa-ɓwaa ka nzəngɨn Həmɨmiye dam Yesu Ma Həmɨnpwa a Yaɓwarən.
Ɓayasətə a waka ji-kottə
10Ji-nuwo, hɨnə dɨ nyisəwnə a vor kwakɨ Həmɨmiye dam Yesu Ma Həmɨnpwa a Yaɓwarən, ɓe hwunaa yə ɓayasə ka byele, ɓe wakasəwnə aa kɨɗə. Ndɨka hwuna peyə, ɗyangale dəwnə ka səɗə-yedye dəwnə a gə hiɗə. 11Ji-nuwogi, imi dɨ vor myee nza vor hwoda Kuluwi shike ka le a nəngəwnə atɨ ndəlsətə nee a wakasəwnə. 12Sa ɗa na ɓə boyownə sə nə atɨ, hiɗə a vorsəwnə a dɨ sa atɨ, “Hɨnə hɨnggə Bulus.” Hiɗə dɨ vorsəwnə a sa atɨ, “Hɨnə hɨnggə Apolos.” Ama mgban a sa atɨ, “Hɨnə hɨnggə Kefas.” Ama a mɨnə a sa atɨ, “Hɨnə hɨnggə Ma Həmɨnpwa a Yaɓwarən.”
13Na ɗiyə atɨ ɓwaa, Ma Həmɨnpwa a Yaɓwarən a təkə som-som ma? Ɓə Bulus mgban, mya gbaltən a kada ɓɨdɨmtə gə le dəwna? Naasə mgban mya ɗəwnə batisɨmatə a vor kwakɨ Bulus ma? 14Hɨn ɗa Həmɨnpwa usəkətə ka ite atɨ taa ɗa ama batisɨmatə a vorsəwnə, pɨrgə yə Kɨribus ka Gayus ɓəmbə. 15Gə ləngɨn ama aa dɨ mba satə sa atɨ a vor kwaka hɨn Bulus mya ɗan batisɨmatə. 16(Hɨntɨngə ɗyanga atɨ hɨn ɗa mi hwoda Stefanas batisɨmatə, taayə ɗyanga na hɨn mɨnə ɗa ama batisɨmatə ɓə pɨrgə mingɨn.) 17Gə Ma Həmɨnpwa a Yaɓwarən aa lyanari gə na ɗa ɓwaare batisɨmatə, shezə nda lyanari gə na bwe ləmə feme dan. Na ɗaasə aa ka lelə duwo ne, gəkɨlə ɓe gəte a kada ɓɨdɨmta Ma Həmɨnpwa a Yaɓwarən aa gə ɓaa.
Ma Həmɨnpwa a Yaɓwarən nə lele ka gəta Həmɨnpwa
18Gə a haka myee ɗeegə tɨfe da Həmɨnpwa dɨ mbəri, ləmə we da Yesu a nə kada ɓɨdɨmtə lə dɨɗəwnə taa naarə kan, shezə hɨm myee dɨ ɗɨm mbətə, a hakam gətɨ da Həmɨnpwa nə. 19Gə mye doro atɨ,
“Hɨn ɓa tukuta lelə duwo ne,
wule kuta da ji-lele mgban
hɨn ɓa mɨndən nda gə ɓaa.”#1.19 Naasə: Ishaya 29.14.
20Ɓə a ndo haa gə ji-lele? A ndo haa gə ji-lee kəndə ɓashita Musa? A ndo haa gə ndəkəshi wanetɨna? Həmɨnpwa aa mɨndə lelə vɨrangnə ngga gə i ɓaati? 21Gə a vor lele da Həmɨnpwa nda ɗyanga a ɗaka mi vɨratə gə ɓe vɨratə aa leerən dɨ ha lele darən, shezə mgban nda niyə ɓə wula nda mbədə myee mwakan dɨ ha la mya hiwarən kan a nə ləməgye dan 'ye mya ngguro ɓətɨ dɨɗəwnə. 22Tən Yawude səkushipə təna dɨ ɨlə, tən Heline mgban təna dɨ ɨl wule lelə vɨrangnə, 23shezə hin hina dɨ hiwa ka le da Yesu Ma Həmɨnpwa a Yaɓwarən ndi ma mya gbaltən a nə kada ɓɨdɨmtə. Ləməgingɨn fara pawti a haka Yawude, a haka myee aa Yawude byele da dəɗi, 24shezə a haka myee Həmɨnpwa a watɨrən, a Yawude kat ka Heline, Ma Həmɨnpwa a Yaɓwarən gəta Həmɨnpwa nə kat ka lele dan. 25Nagi nda dɨɗəwne da Həmɨnpwa nə, ɓə pɨrgə lele da ɓwaara. Yatɨ da Həmɨnpwa mgban pɨrgə nyerəta ɓwaara.
26Ji-nuwo, ɗyangam ka nzaasəwnə Həmɨnpwa a ɓə warəwnə. Hananang dɨ vorsəwnə aa mi lelə ɓətɨ mi vɨratə a dɨ kana, hananang dɨ vorsəwnə taa itɨ gəti kaarən, hananang mgban aa dɨ mgbe mi tikɨshi. 27Shezə Həmɨnpwa a nggɨl shee mya naarən ɓətɨ dɨɗəwnə a vɨratə gə nda və ji-lele sopye. Həmɨnpwa a nggɨl shee taa mbarəti kaarən gə nda və myee ka nyerətə kaarən sopye. 28Nda nggɨl shi hyatane ganə a vɨratə ka 'ye mya ushitɨrən a mɨndərən ɓaa gə nda kɨɗa shee ɓwaare a dɨ naarən ka fukatə, 29gə ɓe ama aa ngguunəngɨn a humwa Həmɨnpwa. 30Gə le da Həmɨnpwa hwuna nza ɓwaa ka Yesu Ma Həmɨnpwa a Yaɓwarən, sɨnə leləngɨn a shi hakam dɨ haka Həmɨnpwa, nda mɨndəm mi pepeyi, nda vomiyəm, a dɨmdəm gə kɨsawnə səhase. 31Gə-angɨn ɓətɨya mya doro atɨ, “Ma dɨ məndaranye, maa nda məndaranye gə le da Həmɨmiye ɓəmbə.”#1.31 Naasə: Jerimaya 9.24.
Currently Selected:
1 Korintiye 1: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
