Juakoin kirjaine 4

1Mis tullah teijän keskenäzet torat da riijat? Misbo muus, gu ei teijän himolois, kudamat toratah teijän rungas? 2Työ tahtotto, no etto sua, sit työ tapatto. Työ himoilettokseh, no etto voi suaha. Työ riidelettö da toruatto, no teil ei ole, sendäh gu etto pakiče. 3I hos pakičetto, ga etto sua, sendäh gu pakičetto pahah näh, gu panna kai omien himoloin täyttämizeh.

4Työ, kudamat hylgäittö Jumalan! Ettogo tiijä: ken suvaiččou muailmua, se vihuau Jumalua? Ga sit ken tahtou olla muailmale hyvänny, rodieu Jumalan vihaniekakse. 5Vai smietittö, sudre on kirjutettu: «Jumal suvaiččou hengie, kudaman meih pani, suvaiččou varuandah suate toizeh»? 6No sidä suurembi on se armo, kudaman Häi andau. Sikse Kirjutuksis on sanottu:

– Jumal on ylbielöi vastah,

a sanankuulijoile Häi andau armon.

7Heitykkiä sit Jumalale, no vastustakkua pahalastu, sit se pagieu teis. 8Lähekkiä Jumalah, sit Häi lähenöy teih. Puhtastakkua omat käit, työ riähkänluadijat! Puhtastakkua omat sydämet, työ kaksimielizet! 9Ellendäkkiä oma kurjus, piekkiä pahua mieldy da itkekkiä! Anna teijän nagro muuttuu pahakse mielekse, a ilo itkukse. 10Heitykkiä Ižändän ies, sit Häi teidy ylendäy.

Ei pie suudie toizii

11Älgiä paiskua pahua toine toizes, vellet. Ken pagizou velles pahua, libo suudiu händy, pagizou Zakonua vastah da suudiu Zakonua. No ku sinä suudit Zakonua, sit et ole Zakonan noudai, a olet sen sud՚d՚u. 12On vai yksi Zakonan andai dai sud՚d՚u, Häi, kudamal on valdu piästiä da valdu hävittiä. A kenbo sinä olet tostu suudimah?

Älä suurendelei

13Kuulkua nygöi työ, kudamat sanotto: «Tänäpäi libo huomei myö lähtemmö sih da sih linnah, olemmo sie vuvven, piemmö kauppua, suammo hyvät d՚engat.» 14No työ iče etto tiijä, midä huomenine päivy tuou. Mi on teijän elaigu? Savvu työ oletto, kudai nägyy kodvazen, sit häviey. 15Nenga pidäs teil sanuo: «Gu Ižändy tahtonou, sit myö elämmö da ruammo sidä libo tädä.» 16A nygöi työ ylbienny havizetto. Kai moine havizendu on pahas. 17Sendäh, ken tiedäy, midä pidäy ruadua, no ei rua sidä, se suau riähkiä.

Currently Selected:

Juakoin kirjaine 4: LIVVI

Highlight

Copy