Juakoin kirjaine 3

Älä anna kielele valdua

1Vellet, äijil teis ei pidäs ruveta opastajikse. Tiijättöhäi, meidy opastajii ruvetah suudimah kovembal suvvol. 2Kaikin myö hairehtummo da äijäh luaduh. Ken ei hairehtu paginois, se on vijatoi ristikanzu, häi voibi pidiä vallas kogo rungangi. 3Gu pannemmo ravvat heboloile suuh, sit net kuunnellah meidy, a myö voimmo ohjata kogo heijän rungua. 4Kačo laivatgi, hos ylen jygiet net ollah, i suuret tuulet kannellah niilöi, a pieni perämela ohjuau laivan sinne, kunne tahtou peränpidäi. 5Mugai kieli on pieni rungan palaine, no voibi löyhkiä suuril dieloloil. Kačo, mittuine pieni tuli sytyttäy mittuman suuren mečän! 6Kieli sežo on tuli. Meijän rungas se on viäryön muailmu. Se rikkou kogo rungan, se sytyttäy tuleh meijän elaijan rattahan, iče on virinnyh uaduspäi.

7Kaikenjyttymät elätit voibi ristikanzu kezevyttiä da on jo kezevyttänyh, n՚ellijalgazet, linnut, vilizijät dai meren elätit, 8no kieldy ei voi kezevyttiä ni yksi ristikanzu. Se on piettelemätöi da paha, täyzi tappajua juaduu. 9Kielel myö ylendämmö Ižändiä da Tuattua, i sil myö kiruommo rahvahii, Jumalan jyttymikse luajittuloi. 10Yhtes suus lähtietäh kiitändy dai kiruondu. Nenga ei pie olla, vellet. 11Eihäi yhtes samazes viennouzemas tule magei dai kargei vezi. 12Ei smokvupuus kazveta oliivat, eigo viinumuarjuoksas smokvat, vai kui, vellet minun? Mugai suolazes nouzemas ei pagie magei vezi.

Mualline da taivahalline mielevys

13Ken teis on mielevy da ellendäi? Ozutakkah häi sen hyväl elaijal – dieloloil, kudamat on ruattu vagavazesti da mielevästi. 14No ku teijän vačas ollou kačker viha da himo riijellä, älgiä haviskua älgiägo mengiä tovele vastah. 15Se ei ole ylähänpäi tulluh mielevys, a on mualline, ristikanzois tulluh, karuloin viizahus. 16Sikse gu sie, kus on viha da riidelendyhimo, sie kai on segazin da on kaikkie pahuttu. 17A ylähänpäi tulluh mielevys on enzimäzikse puhtas, sit rauhažu, hyväsydämelline da sobužu, täyzi armuo da hyvii ruadoloi, se ei eroittele rahvahii, eigo laittelei. 18Rauhuon luadijat kylvetäh rauhuon siemen, da se siemen andau sualehekse oigien elaijan.

Currently Selected:

Juakoin kirjaine 3: LIVVI

Highlight

Copy