Pedrin enzimäine kirjaine 4
4
Elaijan muutos
1Nu gu Hristos omal rungal tirpi gor՚at, otakkua työgi tämä tirpandumieli toravehkehekse, sendäh gu ken omal rungal on nähnyh gor՚ua, se heittäy riähkän azundan. 2Sit häi ei elä jiännytty elaigua ristikanzan himoloin mugah, a eläy Jumalan tahton mugah. 3Luajiittohäi työ mennyzil aijoil jo kylläl sidä pahua, midä Jumalua tundemattomat rahvahat suvaijah luadie. Työ elittö vällillisty elaigua omis himolois, joitto, piruičitto, humaloičittokseh da ruavoitto ilgiedy ruaduo, gu kumardelittokseh valehjumaloile. 4Nygöi hyö kummeksitah sidä, gu työ etto juokse heijänke sih samazeh vällillizen elaijan virdah, da nagretah teidy. 5No heil pidäy andua čottu Hänele, kudai on valmis suudimah elävii dai kuolluzii. 6Sendäh kuolluzilegi on saneltu jevangelii, anna heijän hengi eläs, muga kui eläy Jumal, hos heijän rungu sai sen samazen suvvon, kui kai rahvas.
7Kaikele tulou terväh loppu. Olgua sit vagaval mielel da selgiel piäl, gu voizitto moliekseh. 8Enne kaikkie suvaikkua lujah toine tostu, sendäh gu suvaičendu kattau äijät riähkät. 9Vastakkua toine tostu hyvin da kurkettamattah. 10Avvutakkua toine toizele Jumalan annetul n՚erol, piekkiä huoldu Hänen kaikenluaduzis hyvyzis, kui hyvät koinkaččojat. 11Gu ken paissou, paiskah Jumalan annettuloil sanoil, gu ken avvuttannou toizile, avvutakkah Jumalan annetul väil, gu Jumalale annettas kunnivo kaikes Iisusan Hristosan kauti. Hänen on kunnivo da valdu ainos dai ilmazen ijän. Amin՚.
Jumalanuskojan tirpamizet
12Kallehet vellet! Älgiä kummeksikkua sidä tulihistu gor՚ua, kudamal teidy opitah, buitegu teile luajittas midätahto erinomastu. 13A piekkiä hyviä mieldy sidä enämbäl, midä enämbi teijän kohtah tulou Hristosan gorii. Sit työ voitto olla hyväs mieles da pidiä iluo sitgi, konzu jiävihes Hänen taivahalline valgei. 14Konzu teidy kirotah Hristosan nimen täh, oletto ozakkahat: teijän piäl on suuri da vägevy Hengi, Jumalan Hengi. 15Älgäh niken teis gor՚evutakkah iččie toizen tapandal, vargahuol, pahanluajindal, libo seguondal toizen dieloloih. 16No gu kedä gor՚evutetanneh sendäh, gu häi on hristossalaine, anna ei huijustai, a kiittäy Jumalua tämän nimen täh. 17On tulluh suvvon aigu, i enzimäzikse Jumal suudiu oman rahvahan. No gu se suudo alganou meis, ga mittuine sit roih niilöin agju, kudamat ei kuunnella Jumalan jevangeliedu?
18Gu oigeigi odva piäzöy,
ga midäbo sit roih jumalattomale
da riähkähizele!
19Sendäh net, kudamat tirpetäh gor՚ua Jumalan tahton mugah, annettahes suremattoman Luadijan käzih da jatkettahes hyvyönluajindua.
Currently Selected:
Pedrin enzimäine kirjaine 4: LIVVI
Highlight
Share
Copy
Want to have your highlights saved across all your devices? Sign up or sign in
(c) Biblienkiännändyinstituuttu, Helsinki 2003
