Kolos 4

1Aruun kéekinie ku búsukateen bu, arijokiin majokar meejoŋoore abe nu mújub. Áribaŋino kaanuku aruun yooŋ aribajabaj ake éekiniuun, abe ondu t'etiir bufor bu.

Karimu ku

2Arijok alitee ti kalawu ku. Siheluun síniyo kane áriyemi ti kalawu Atambatun, abe n'arieno eyeehen. 3Af'áriyemi ti kalawu, n'aŋ'arilaw n'uni man Atambatun n'awun uni bítim iriiwaare ésuk i hirim hoone, abe n'irisokiin yooŋ béenuusee bite bu *Kiris. Aŋarkeyi naane iwaarawaare béenuusee bondu híkinineŋe fu n'ikulee. 4Náami arilaw man n'iwaare bo akuur but naane iware i bo káhinu.

5Arinoŋk nu búwesinato hágila kéeyilenut ku. Af'aribaj bítim bite káhiniiin meejake kep, atum'ariwas bo beefakuun. 6Árihamin ko kireyi fe báhamin beetoofe, beebaje éñjeriŋ, man n'árimeyi yooŋ naane ariware i kásafin an fe.

Kasaafu kiraanu ku

7Ati úne Tisik#4.7 A̱juk Epotor i 20.4; Efees 6.21-22. u úmaŋie-maŋie u, eeemo u burok uni bifeeneŋ, abe n'aŋ'arok burok bite Anahaan u ajoŋooree, o kasokuuun buŋ b'eemo fu fe. 8Íiboñinuuno eebin eesokuun buŋ b'iriemo fu, abe n'ayaŋgananuun yooŋ ñúwejet. 9Íboñiniinboñin boko n'Onesim#4.9 A̱juk Filemoŋ 10-15. ite u t'aruun. Akina yooŋ ati úne éejube, abe n'úmaŋio dómbokun. Boko kasokuuun beebaje bu beebe fe.

10Aristarik eeemo ee n'íñje t'ekulu i asaafuun. Mark yooŋ at'ute Barnabas#4.10 Aristarik: a̱juk Epotor i 19.29; 27.2. Mark: a̱juk Epotor i 12.12,25; 13.13; 15.37-39; Barnabas: a̱juk Epotor i 9.27; 11.22,30. asaafuun. (Af'abin t'aruun, arijoko áwariee naane ibine i isokuun.) 11Yesu ii kaane Sustus asaafuun yooŋ. T'Esuwif i kéeyilene ku ti *Kiris, bákahaaji konde taŋ ifi karok n'íñje bija ti *Jáyi jite Atambatun, abe iŋi káhin yooŋ hikawam heeyaŋg.

12Epafuras#4.12 A̱juk Kolos 1.7. eeemo u yooŋ ite t'aruun asaafuun. Akina aroka ite Yesu Kiris, abe aŋ'áñiŋkaan kep ti kalawu Atambatun bija t'aruun kaanuku man n'arijok alitee, n'arihaat yooŋ ti káyilen ku, abe n'arifare káhinu b'Atambatun ámaŋie bu fe. 13Iiseedoo bonde: ondu ti kálaamool kep uŋu hoonuun hu, aruun ni bakate ku Lawodise, ni bakate ku Iyerapolis. 14Luk, áwiy uni n'asontena u yooŋ toko asaafuun, akina ni Demas#4.14 Luk: a̱juk 2 Timote 4.11; Filemoŋ 24; Demas: a̱juk 2 Timote 4.10; Filemoŋ 24..

15Arisaaf uni bakate ku Lawodise *kéeyilene ku. Arisaaf yooŋ Nenfa, ni kéeyilene ku fe kiŋki kakuukanooro te o. 16Af'arijaŋga eleetar yende arihaban, n'aŋ'ariboñ yo bakate ku Lawodise kéeyilene ku keejaŋga yo yooŋ. Aruun yooŋ n'arijaŋga yi bakate ku Lawodise kayakuun i káboñina#4.16 A̱juk Efees 1.1.. 17Ariene Arkip#4.17 A̱juk Filemoŋ 2. anaŋ toko hikawo tu burok b'Anahaan u asaano bu, man n'ahaban bo áwariee.

18Kasaafu konde, íñje Pool inoŋke fu iikiñj ko n'emoŋiam#4.18 Pool asokasok ake eekiñjo eleetar yende. Bare biraanu bonde, akina anoŋke fu eekiñj bo.. Atum'arifiil kaanuku íñj'endu t'ekulu i.

Atambatun aja ásoniyanuun arireyi fe.

Currently Selected:

Kolos 4: cwt

Highlight

Copy

Compare