1 Tesalonik 1

Kasaafu ku

1Íñje Pool, ni Silas, ni Timote, irikiñjuun fee, aruun bakate ku Tesalonik#1.1 Silas: a̱juk Epotor i 15.22; Timote: a̱juk Epotor i 16.1; Tesalonik: a̱juk Epotor i 17.1; 2 Korent 1.16. *kéeyilene ku, aruun k'Atambatun Faaf u, n'Anahaan u Yesu *Kiris kakino ku. Atambatun aja ásoniyanuun, abe n'awunuun káasuumaay.

Buroŋ bite bakate ku Tesalonik, ni káyilen kooniin

2Iŋ'iriene Atambatun ko kireyi fe eyeehen uŋu hoonuun hu arireyi fe, abe iŋ'irilaw yooŋ ko kireyi fe bija t'aruun. 3Iŋ'iriboo bíbaŋino hágila Atambatun Faaf úne buroon bamb'árihin béewufoore bu káyilen koonuun ti Yesu, nu buŋ b'áriñiŋkaane fu tu burok aŋarkeyi naane árimaŋiomaŋi, nu buŋ b'eyakar yeenuun t'Anahaan ite úne Yesu *Kiris eyane fu#1.3 A̱juk yooŋ 1 Korent 13.13.. 4Kújakuwe, írimoomi kaanuku Atambatun ámaŋiuunmaŋi, abe n'ajifanuun kaanuku áriiyemi bokoone ku. 5Irisokuunsok Hirim Heetoofe hu, káanukiiit ni kirim barebare, bare yooŋ ni sembe site Búwejet Beenabe bu, abe bukuurakuur uni kaanuku Hirim honde Heetoofe hu hite nu múniyo. Abe arijukajuk naane biriiko bite b'uni t'aruun bíñjeriŋuun i. 6Arineefananeefan ti máhinar mite m'uni, ni mite m'Anahaan u; arijukajuk sílaam iŋ'ite Hirim Heetoofe hu, bare arijokajok ho ni katoofu ku, ku Búwejet Beenabe bu kuŋku buwun#1.6 A̱juk Epotor i 17.5-9.. 7Iyu yooŋ i bakate ku Maseduwan *kéeyilene ku, ni bakate ku Akayi kareyi fe ifi kafin yooŋ kaneefan ti máhinar moonuun#1.7 Maseduwan: a̱juk 2 Korent 1.16; Akayi: a̱juk 2 Korent 1.1.. 8Múniyo hirim hite Anahaan u t'aruun tu hunuute fu heejamo Maseduwan n'Akayi, abe hiraanut toko; tánotan yooŋ fe, káyilen koonuun t'Atambatun kijamajamo. Náami iribajut bike bite káwutiyen te bo. 9Ésuk i fe eŋ'esok naane arijoke i uni áwariee h'iribine hu t'aruun, ni naane ariwase i ñájiim ñu ariijok t'Atambatun eeemo u buroŋ, abe n'árijeŋgino, akina ite u nu múniyo. 10Aruun bokondu ti kanahan Añio eeyak u kánuutina t'etiir eebin. Añio ondu aamo fu Yesu a aritane u t'eket i. Akina afakane fu úne tu kúnuur keebin ku tu hunak hoone hite Kajoonan ku.

Currently Selected:

1 Tesalonik 1: cwt

Highlight

Copy

Compare