1 Ndzǝr Kwaranti 13
13
Yiɗǝdzi
1Ma Yi ada mǝzi ka ndǝrɛ akwa nya yarɛ nǝr ndzi ba nǝr ndzǝr hyantǝr Hyal, ama Yi adi aka yiɗǝdzi wɛ, Yi ada 'ya nya apa tuwar yang tǝ ndɛ ada tsa wala tuwar kararau. 2#Mat 17:20; 21:21; Mar 11:23Ma Yi aka sǝgar nabikur ba Yi ada zǝndi sanga dzǝri ɗǝwa-ɗǝwa ba sanga zǝndi su, ba ma Yi aka hamnta dzǝri nam ada mǝzi ka mbǝyanta paya yarɛ, ama Yi adi aka yiɗǝdzi wɛ, Yi adi mima wɛ. 3Ma Yi hamnta sanga sǝ nam tǝ Yi akǝri ala ndzǝ nam ngudi ba ma Yi hamnta kǝrna ka ndǝ mbanta, ama Yi adi aka yiɗǝdzi wɛ, ta 'ya alai paidar mima wɛ.
4Yiɗǝdzi ani kǝmar, yiɗǝdzi ani hankal. Dzǝ adi ada vǝ ndǝ wɛ, dzǝ adi ada agula wɛ, dzǝ adi ada haɓǝkǝr wɛ. 5Dzǝ adi kura hankal wɛ, dzǝ adi ada bara si nǝni wɛ, ɗǝfari adi ada sǝwa sam wɛ, dzǝ adi ada ngǝzi su kulɗa akwa ɗǝfu wɛ. 6Yiɗǝdzi adi ada kutsari ala 'ya su kulɗa wɛ ama dzǝ ada kutsari aka dzǝrkur. 7Yiɗǝdzi adi ada sǝkur su wɛ, dzǝ ada mbǝrsa aka sanga su, dzǝ ada tǝmatsǝni sanga su, dzǝ ada ɓati sanga su.
8Yiɗǝdzi adi ada kuri wɛ. Ama ma nabikur yarɛ adai, dar ata kuri! Ma ndǝrɛ akwa nya yarɛ pam-pam adai, dar ata kuri; ma zǝndi su adai, ata kwatsǝni atǝra. 9Akuya mur ta zǝndi su sang wɛ ba muri adi ada 'ya nabikur ata kǝra su sang wɛ, 10ama sakatǝ sǝ nam ghǝi-ghǝi ni si, sǝ nam kura ghǝi-ghǝi ni ata santadzi. 11Sakatǝ Yi waza, Yi ada ndǝrɛ apa waza, Yi ada ɗǝnga su apa waza, Yi ada kwamtsǝni su apa waza. Sakatǝ Yi 'ya ndǝ ngga, Yi ngyar 'ya su apa waza aghǝlawai. 12Kulini muri ada wula parsu ama mbalmbali apa akwa kutǝram; muri ata siya wula tǝni ntsɛ aka ntsɛ. Kulini bwadukwa sǝ yari ɗiɗi ani tǝ Yi zǝndi; ama Yi ata siya zǝndi sang-sang, tsu apa tǝ Hyal zǝndi tǝra sang-sang.
13Ba kulini sǝ yarni makǝr ni ata ndzai kura kurkuri: hamnta dzǝri, tǝmatsǝni, ba yiɗǝdzi. Ama nam ngga ta sang akwa ntsa dar ani yiɗǝdzi.
Currently Selected:
1 Ndzǝr Kwaranti 13: CKL
Highlight
Copy
Compare
Share
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
