གཉིད་པ་ཀོ་རིན་ཐི། 1
1
1ཨོ་ཐ་ཡི་གུ་ཤོ་ དཀོན་མཆོག་ག་ ཐུགས་བཞེད་དང་ཏུ་ཉི་ ཁིརིས་ཡི་ཤུ་ག་སྐུ་ཚབ་རི་ཁཱན་ པ་ཝལ་དང་ཨ་ཧ་ཀོ་ཏ་ ཏི་མོ་ཐི་གི་ ཀོ་རིན་ཐི་ག་ཆོ་ཁཱན་ དཀོན་མཆོག་ག་ ཆོས་ཚོགས་དང་ ཨ་ཁའི་ཡ་ག་ཆོ་ཁཱན་ ཡི་ཤུ་པ་ ཐམས་ཅན་ག་ཏཱན་ འབྲི་ཅ་གི༌ལ།
2ཨ་ཧ་ཡབ་དཀོན་མཆོག་དང་ གཙོ་བོ་ཡི་ཤུ་ཁིརིས་གི་ ཐུགས་རྗེ་དང་སྐྱིད་པུ་ ན་ཧ་གནང་ཆེན༎
དཀོན་མཆོག་གི་ ཐམས་ཅན་ག་ སེམས་གསོ་ཨ་ཉི་གནང༌ཅ།
3བསྟོད་པ་ཐམས་ཅན་རང་ ཨ་ཧ་གཙོ་བོ་ ཡི་ཤུ་ཁིརིས་ག་ཡབ་དང་ དཀོན་མཆོག་ག་ཏཱན་ཕུལ༌ཅ། རོག་ཤོ་ སྙིང་རྗེ་ཨ་ཁཱན་ཡབ་དང་ སེམས་གསོ་ཨ་ཉི་གནང་ཁཱན་ དཀོན་མཆོག་གི༌ལ། 4ནང་དོག་པེ་གང་ཀ་ དཀོན་མཆོག་གི་ ཨ་ཧ་སེམས་གསོ་ཨ་ཉི་ གནང་ཁཱན་གི་ རོག་ཏེ་བ་ཀ་བུ་ སེམས་གསོ་ ཨ་ལེ་རེ་ཆེན་དག་པ་གི་ ཨའི་ཧང་ད་བུ་ནང་དོག་ནེ་བུ་ རོ་ཀི་ཨ་ཧ་ སེམས་གསོ་ཨ་ཉི་གནང༌ཅ། 5ཧང་ཡ་དག་ནེ་ལ་ ཨའི་ཁིརིས་ག་ཡོར་ཀེ་ ཧབ་ཏུར་དཀའ་ཝ་ཅཱད་པ་ཐུར་ ཨོམ་ཏུར་རང་ ཁིརིས་ག་ཐུང་ཀེ་ཨ་ཉི་ དཀོན་མཆོག་གི་ ཨ་ཧ་སེམས་གསོ་ཨ་ཉི་གནང༌ཅ། 6ཨོ་ཉི་ཨ་དེན་གེ་ ཨའི་ནང་དོག་ཁཱན་ཤོ་ ན་ཧ་སེམས་གསོ་ ཨ་ལེ་དེན་གེ་དང་ ཐར་པ་ཉོང་པེ་དེན་གེ་གི༌ལ། ཉི་ཨ་ཧ་སེམས་གསོ་ཨ་ཉི་ གནང་ཁཱན་ཤོ་ ཨ་ཤི་བུ་ ན་ཧ་སེམས་གསོ་ ཨན་ཆེན་དག་པ་གི་གི༌ལ། ཉི་ཤ་ ཨའི་ནང་དོག་པ་ད་བུ་རང་ ན་ཧ་བ་བུ་ ནང་དོག་པ་ཀབ་ཉི་ ན་ཤི་ཐེས་ཉི་ཆོ་ལེ་རེ༌བེ། 7ཧང་ཡ་དག་ནེ་ལ་ ན་ཧ་བ་བུ་ ཨའི་ད་བུ་རང་ དཀའ་ཝ་ཅཱད་པ་ཨ་དེན་གེ་ ཨ་ཧ་སེམས་གསོ་ཨ་ཉི་ གནང་མ་པུརུས་ཀིན་ཨ་ཉི་ ན་ཧ་བ་བུ་ སེམས་གསོ་ཨ་ཉི་གནང་མེ་དག་ཉི་ ཨ་ཤི་སེན༌ཅ།
8ཡུང་ཟི་བ་ ས་ཆ་ཨེ་ཤི་ཡ་ག་ ཨ་ཧ་དཀའ་ཝ་ཅཱད་ཁཱན་ག་ཀོར་གེ་ ན་ཤི་མ་སེ་ཝ་ཨ་ཉི་ཐ་ལེ་ག་ ཨ་ཧ་སེམས་མཱན༌ཅ། ཧང་ཡ་དག་ནེ་ལ་ ཨའི་གནམ་མེད་ས་མེད་ ཀ་ལུ་ཏཱད༌པ། ཉི་ཨ་ཤི་ ཐེས་པེ་མར་བ་ཨ་དེན་གེ་ ཨ་ཧ་བ་ ཤི་ལེ་ཨོ་ཕེ་ལ་དག་ཉི་མི༌ཝ། 9དེན་མ་རང་ ཨ་ཧ་བ་ ཤི་ལེ་གི་ཝ་ལ་དག་ཉི་མི༌ཝ། ཨོ་ཉི་ཨ་དེན་གེ་ ཨ་ཤི་ཨའི་ཏེན་ག་ ཏེན་མེ་མང་གི་ཝ་ ཤི་ཁཱན་བ་ཝུ་ལེ་རེ་ཁཱན་ དཀོན་མཆོག་ག་ ཏེན་མེ་ག་ལམ༌པ། 10དཀོན་མཆོག་གི་ ཨ་ཧ་བ་ ཤི་ལེ་ཅམ་པ་གེ་ སྐྱབས་ཨ་ཉི་གནང༌མ། ཉི་རོ་ཀི་ ཨ་ཧ་སྐྱབས་ཨ་ཉི་གནང༌མེ། ཉི་རོ་ཀི་ ཨ་ཧ་ཏ་བུ་རང་ སྐྱབས་ཨ་ཉི་གནང་མེ་དག་ཉི་ ཨ་ཤི་ལོ་དིན༌ཅ། 11ན་ཤི་ཨ་ཧ་དེན་གེ་ སྨོན་ལམ་ཏབ་ཉི་ ཇ་རོ་ཨ་ཝ་ཨ་དེན་གེ་ རོ་ཀི་ཨ་ཧ་ སྐྱབས་ཨ་ཉི་གནང༌མེ། ཉི་སོ་ངོ་མང་པུ་ཐུར་གི་ སྨོན་ལམ་ཏབ་ཁཱན་ཁེ་པ་ སྙན་གསེང་པ་ཨ་དེན་གེ་ ཨ་ཧ་ཚབ་ཀ་ རོག་ཏེ་བ་ཀི་ དཀོན་མཆོག་ག་ བཀའ་དྲིན་བསམ༌མེ༎
པ་ཝལ་ག་འཆར་གཞི་སོར་པ༌ལ།
12ཨ་ཤི་ཨོ་ཐ་ཀོར་གེ་ ངལ་རངས༌ཅ། ཨ་ཤི་ཨོ་ཐ་འཛམ་གླིང་ག་ ཧང་ཨ་ཝ་ཐུར་ ཙོ་ཙོ་རང་ ན་ཧ་བ་ཀབ་ཉི་འཁྲིལ་ལ་ཀབ་ཉི་ དྲང་པུ་ཨ་ཉི་ ཉི་སེམས་ཤོ་ཉི་ ཨ་ཝ་གི་ལ་དག་ཉི་ ཨ་ཧ་སེམས་ཀི་ འཛོམས་དཔང་ཨན༌ཅ། དག་པ་ཀབ་ཉི་ འཛམ་གླིང་ག་རིག་པ་ག་ ཏེན་ཉི་མང་གི་ཝ་ དཀོན་མཆོག་ག་ ཐུགས་རྗེ་ག་ཏེན་ཉི་ ཨ་ཝ་གི༌ལ། 13-14ཧང་ཡ་དག་ནེ་ལ་ ན་ཤི་ལྷག་པེ་དང་ ཧ་གོ་ལེ་མར་བ་ཨ་ཉི་ ཨ་ཤི་ཧང་རང་ འབྲི་བ་མཱན༌ཅ། ཉི་ན་ཤི་ ཨ་ཧ་ཀོར་གེ་ ད་ཟེ་རེ་ ཧ་གོ་ཝ་པུརུས་ཀིན་ཨ་ཉི་ ཨ་ཧ་ཀོར་གེ་ ཐམས་ཅན་རང་ ཧ་གོ་ལེ་རེ་བེ་དག་ཉི་ ཇི་གི་རེ་ཆ་ཨ་ཝ༌ཅ། ཉི་ཤ་ གཙོ་བོ་ཡི་ཤུ་ག་ནོང་ཀ་ ཨ་ཤི་ན་ཧ་ཡོར་ཀེ་ ངལ་རངས་པ་པུརུས་ཀིན་ཨ་ཉི་ ན་ཤི་བུ་ ཨ་ཧ་ཡོར་ཀེ་ ངལ་རངས་པེ་རེ༌བེ།
15ཨོ་ཐ་ཀོར་གེ་ ཇི་གི་ལོ་དི་ཝ་ཨ་དེན་གེ་ ན་ཤི་བྱིན་རླབས་ ཤེབ་ཉིག་ཙིང་ ཉོང་ཅེན་དག་པ་གི་ ཇང་གོ་རང་ ན་ཧ་བ་ཆོ་ས་ ཤོན་གོད་པེ་དི་ལེ་ག་ འཆར་གཞི་ཙ༌མ། 16ཇང་མ་ཀེ་དོ་ནི་ཡ་ག་ དི་ལ་ཀབ་ཉི་དང་ ཉ་གེ་ལོག་པ་ཀབ་ཉི་ ན་ཧ་བ་ཆོ་ས་ཤོ་ལེ་ག་ འཆར་གཞི་ཙ་མ་ཆོ༌ཝ། ཉི་ན་ཤི་ ཇང་ཡ་ཧུ་དི་ཡ་ག་ཏཱན་ ཀུན་ཏིན་ཆེན་དག་ཉི་ ཇི་གི་མི་ཝ་ཆོ༌ཝ།
17ཨོ་ཐ་འཆར་གཞི་ཙ་མེ་གང་ཀ་ ཇི་གི་སེམས་ ལེག་པཱན་མ་མི་ལཱན་ ཙ་མ་སྨོ། ཧང་ གི་ལ་དག་ཡེག་ཉི་ ཆུ་མ་ཐུར་ག་རང་ མང་གི་དག་ཉི་ཡེག་ཁཱན་ འཛམ་གླིང་ག་ སོ་ངོ་བ་ད་བུ་ཨ་ཉི་ ཇི་གི་འཆར་གཞི་ཙ་མ་ད་བུ་ ཐོང་ལ་སྨོ། 18དག་པ་ཀབ་ཉི་ དཀོན་མཆོག་ཤོ་ དེན་པ་གི་ལ་དག་ཉི་ ཨ་ཤི་སེན༌ཅ། ཉི་ཨུ་ཉུ་པུརུས་ཀིན་ཨ་ཉི་ ཨ་ཤི་ ན་ཧ་གི་ལ་དག་ཡེག་ཐཱན་ མང་གི་དག་ཉི་ ཡེག་པ་མཱན་ཅ་ཨ་ཉི་ ན་ཤི་སེན༌ཅ། 19ཧང་ཡ་དག་ནེ་ལ་ ཇང་དང་སི་ལཱས་ ཉི་ཏི་མོ་ཐི་གི་ ན་ཧ་པོང་ཀ་ དཀོན་མཆོག་ག་སྲས་ ཡི་ཤུ་ཁིརིས་ག་ཀོར་གེ་ བཤད་པ་ཀབ་ཉི་ གི་ལ་མང་གི་ཨ་ཉི་ མ་བཤད་པ༌ཅ། དག་པ་ཀབ་ཉི་ རོ་ཀ་ནང་ཀ་ ཧ་ལ་ཨ་ནེ་བུ་ གི་ལ་ཤ༌ཅ། 20ཧང་ཡ་དག་ནེ་ལ་ དཀོན་མཆོག་གི་ དབུ་མནའ་བཞེས་ཁཱན་ ཐམས་ཅན་རང་ རོ་ཀ་ཐུང་ཀེ་ཨ་ཉི་ དེན་ཐ་འགྲུབ་ཕ༌ཅ། ཨོ་ཉི་ཨ་དེན་གེ་ ཁིརིས་ག་ཐུང་ཀེ་ཨ་ཉི་ དཀོན་མཆོག་ག་ གཟི་བརྗིད་ཕུལ་བ་ཀབ་ཉི་ ཨ་ཤི་ཨ་མེན་དག་ཉི་ ཞུན༌ཅ།
21ཉི་ཨོམ་ ཁིརིས་ག་མཚན་ག་ ཨའི་དང་ ནའི་སྒྲིང་སྒྲིང་ཨ་ཉི་ ཐིང་མེ་རིག་ཁཱན་ཤོ་ དཀོན་མཆོག་གི༌ལ། ཉི་རོ་ཀི་ཨ་ཉི་ ཨའི་ཀེ་བ་གི༌ལ། 22ཨའི་ཤོ་ རོ་ཀ་གི་ལ་དག་ཉི་ ངོ་པག་པེ་དེན་གེ་ རོ་ཀི་ཨ་ཧ་ཐུང་ཀ་ ཐེལ་ཙི་ཕི་ཉི་གནང་མ༌ཅ། ཉི་རོ་ཀ་དམ་པའི་ཐུགས་ཉིད་ཁེ་པ་ ཨ་ཧ་ཇ་མི་ཨ་ཉི་ རོ་ཀི་ཨ་ཧ་ཐིང་ལོམ་ནང་ཀ་ ཐ་ཉི་གནང་མ༌ཅ།
23ཉི་ཨོམ་ ཇི་གི་དེན་པ་ཡེག་ཅ་གི་ལ་དག་ཉི་ འཛོམས་དཔང་ཨ་ལེ་དེན་གེ་ ཇི་གི་དཀོན་མཆོག་ཞུན༌ཅ། ཇང་ཀོ་རིན་ཐི་ག་ཏཱན་ མ་ལོག་ཁཱན་ཤོ་ ན་ཧ་བ་ ཇང་གེ་ ཇུར་ཇང་མ་ཉོང་ཅེན་དག་པ་གི་གི༌ལ། 24ན་ཤི་དད་པ་ཨ་དེན་གེ་ ཧང་ཏེན་ཨ་ལེ་ཁེ་ལེ་གི་ལ་སྨོ་ ཨོ་ཉ་ཀོར་གེ་ ཡེག་པེ་དེན་གེ་མང་གི་ཝ་ ན་ཧ་བ་ གཙོ་བོ་ག་ ཤོ་ནང་ཕེ་ཝ་ཅོད་པེ་དེན་གེ་ ཨ་ཤི་ན་ཧ་བ་ཀབ་ཉི་ ལའི་ཨ་ལེ་གོད༌ཅ། ཧང་ཡ་དག་ནེ་ལ་ དད་པ་ག་ཐུང་ཀེ་ཨ་ཉི་ ན་ཧ་བ་སྒྲིང་སྒྲིང་ཨ་ཉི་ ཆོན་ཅ་གི༌ལ།
Currently Selected:
གཉིད་པ་ཀོ་རིན་ཐི། 1: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
