དང་པ་ཏི་མོ་ཐི། 1
1
1ཨོ་ཐ་ཡི་གུ་ཁེ་པ་ ཨ་ཧ་སྐྱབས་མགོན་ དཀོན་མཆོག་དང་ རེ་ཆ་གནང་ཁཱན་ ཁིརིས་ཡི་ཤུ་གི་ གནང་མ་དང་ཏུ་ཉི་ ཁིརིས་ཡི་ཤུ་ག་ སྐུ་ཚབ་རི་ཁཱན་ པ་ཝལ་གི་ འབྲི་ཅ་གི༌ལ།
2དད་པ་ག་ཤེག་པ་ ཇ་ག་ཟ་ངོ་མ་ ཏི་མོ་ཐི་ག་ཏཱན་ ཇི་གི་ཨོ་ཐ་ཡི་གུ་ འབྲི་ཅ་གི༌ལ། ཡབ་དཀོན་མཆོག་དང་ ཨ་ཧ་གཙོ་བོ་ཁིརིས་ཡི་ཤུ་གི་ ཐུགས་རྗེ་དང་བྱམས་པར་ ཉི་སྐྱིད་པུ་ན་ག་གནང་ཆེན༎
རྫུས་མ་ཡེ་ཁཱན་བ་ཀེ་ རིག་པ་སྒྲིམ༌ཅོ།
3ཇང་མ་ཀེ་དོ་ནི་ཡ་ག་ དི་ལེ་གང་ཀ་ ཇི་གི་ན་ག་ཡེག་པ་ཆོ་ཝ་ ནཱན་ཨེ་ཕི་སཱས་ག་ཆོའི། ཉི་ཉ་ག་ རྫུས་མ་ཡེ་ཁཱན་སོ་ངོ་བ་ཀ་ ཨུ་ཉུ་ད་བུ་ ཡེ་ལེ་མང་ཕ་ཨ་ཉི་ ཡེག་ཅོ་དག༌ཉི། 4ནཱན་གི་ རོག་ཏེ་བ་ཀ་ དེན་ཐ་མ་ཁཱན་གཏམ་བ་དང་ མི་རྒྱུད་བ་ཀ་དེན་གེ་ ཆཱས་ཕི་ཉི་རང་མ་ཆོའི་ཨ་ཉི་ཡེག༌ཅོ། ཨོ་ཉ་ཆཱས་ཤོ་ ཧ་ལ་རང་མ་ཆུ༌མ། ཧང་ཡ་དག་ནེ་ལ་ ཨུ་ཉུ་གི་ ཤག་རུ་མེ་རིག༌ཅ། དག་པ་ཀབ་ཉི་ དད་པ་ག་ཐུང་ཀེ་ཨ་ཉི་སེ་ཁཱན་ དཀོན་མཆོག་ག་ཐུགས་བཞེད་ དེན་ཐ་འགྲུབ་ཕེ་རིག་པུ་མཱན༌ཅ། 5ཨོ་ཐ་བཀའ་རྒྱ་ བི་ལེ་དེན་ཐ་ཤོ་ ཉ་ག་ཆོ་ཁཱན་ཡི་ཤུ་པ་བ་ཀི་ བཱརའ་ག་སྙིང་རྗེ་ཨན་ཆེན་ དག་པ་གི་གི༌ལ། ཉི་སེམས་ཙང་མ་དང་ མི་ཐང་ལེག་པུ་ ཉི་དད་པ་ངོ་མ་གི་ཨ་ཉི་ ཨོ་ཉ་སྙིང་རྗེ་ ཨ་ལེ་རིག་ཅ་གི༌ལ། 6སོ་ངོ་ཚེ་བང་གི་ ཨོ་ཐ་བ་ཐུབ་ཐ་ཉི་ ཁུངས་ཧང་རང་མ་ཁཱན་ཆཱས་ག་ རོག་ཏེ་བ་ཀ་ ལམ་གེ་མ༌ཅ། 7རོག་ཏེ་བ་ དཀོན་མཆོག་ག་ བཀའ་ཁྲིམས་ག་ སློབ་དཔོན་ཨ་ལེ་ག་སེམས་ཨ་ན། དག་པ་ཀབ་ཉི་ རོག་ཏེ་བ་ཀི་ སེན་ཅ་ཨ་ཉི་ མིན་ཐཱན་རང་གི་ནེ་བུ་ རོག་ཏེ་བ་ཀི་ ཧང་ག་ཀོར་གེ་ ཆཱས་ཨན་ཅ་གི་ལ་སྨོ་ སེ་ལུ་མཱན༌ཅ།
8བཀའ་ཁྲིམས་དང་ཏུ་ཉི་ཨ་ནེ་ལ་ བཀའ་ཁྲིམས་ཤོ་ ལེག་པུ་གི་ལ་ཨ་ཉི་ ཨ་ཤི་སེན༌ཅ། 9ཨ་ཤི་ ཨུ་ཐུ་བུ་སེན་ཅ་ བཀའ་ཁྲིམས་ཤོ་ དྲང་པུ་བ་ཀ་དེན་གེ་ ཅོད་པ་མང་གི། དག་པ་ཀབ་ཉི་ བཀའ་ཁྲིམས་གེ་ གེ་བ་ལའི་ཨ་ཁཱན་བ་དང་ ངོ་ལོག་ཁཱན་བ་ ཉི་ཆོས་སེམས་མ་ཁཱན་དང་ སྡིག་ཅན་བ་ཀ་དེན་གེ་ ཅོད་པ་གི་ལ་ཨ༌ཉི། ཉི་བཀའ་ཁྲིམས་ཤོ་ སོ་ངོ་དམ་པ་མ་ཁཱན་བ་དང་ ངན་པ་བ་ ཉི་སོ་ངོ་ཤེ་ཁཱན་བ་ རང་ཏེན་ག་ཕ་མ་བུ་ ཤེ་ལེ་རེ་ཁཱན་ སོ་ངོ་བ་ཀ་དེན་གེ་ ཅོད་པ་གི༌ལ། 10ཉི་བཀའ་ཁྲིམས་ཤོ་ ལུས་འབྲེལ་མ་ཙང་མ་ཨ་ཁཱན་དང་ ཕེ་ཝག་ཙ་ནང་དོ་ ཨ་ཁཱན་བ་ཀ་དེན་གེ་ ཉི་ཟ་པ་ག་ཚོང་ཕི་ཁཱན་དང་ སོ་ད་ཕི་ཁཱན་བ་ ཉི་འཛོམས་དཔང་ མ་ཐྲང་ཁཱན་བ་དང་ དེན་པ་ཨ་ཉི་ཡེ་ཁཱན་གེ་ ཕི་འགྱུར་སིང་སིང་ ཨ་ཁཱན་བ་ཀ་དེན་གེ་གི༌ལ། 11ཉི་ཨུ་ཉུ་ཤོ་ བྱིན་རླབས་ཅན་ དཀོན་མཆོག་གི་ བཤད་པེ་ག་དེན་གེ་ ཇ་ག་གནང་ཁཱན་ གཟི་བརྗིད་ཅན་ག་ འཐེན་ལེག་པུ་གི༌ལ༎
དཀོན་མཆོག་ག་ཐུགས་རྗེ་ག་དེན་གེ་ བཀའ་དྲིན་བསམ་མ༌ལ།
12ཇི་གི་ཁིརིས་ཡི་ཤུ་ ཨ་ཧ་གཙོ་བོ་ག་ བཀའ་དྲིན་བསམ༌ཅ། ཧང་ཡ་དག་ནེ་ལ་ རོ་ཀི་ ཇང་ཏེན་ཏོག་ཏོ་ཙི་ཉི་ ཤུགས་སྟོབས་གནང་ཐཱན་ རོ་ཀ་ཕྱག་ཞུ་ལེ་ག་དེན་གེ་ ཀེ་ཉི་གནང༌མ། 13མ་པ་ གོ་མ་ཇང་ རོ་ཀ་སྐུར་པ་ཞུ་ཁཱན་དང་ རོ་ཀ་ཕྱག་ཞུ་ཁཱན་བ་ཀ་ མ་ལེག་པ་ཨ་ཁཱན་ ཉི་སྙིང་རྗེ་ད་སུ་རང་ མ་ཁཱན་གི་ནེ་བུ་ རོ་ཀི་ཇ་ག་ ཐུགས་རྗེ་གཟིགས་ཉི་གནང༌མ། ཧང་ཡ་དག་ནེ་ལ་ ཇི་གི་མ་སེ་ལཱན་ དད་པ་མ་ཀེ་བ་ཨ་དེན་གེ་ ཨུ་ཉུ་ད་བུ་ ཨ་ཝ་ཆོ༌ཝ། 14ཁིརིས་ཡི་ཤུ་ ཨ་ཧ་གཙོ་བོ་གི་ ཇ་ག་གནམ་མེད་ས་མེད་ ཐུགས་རྗེ་གཟིགས་ཉི་གནང༌མ། ཉི་རོ་ཀི་ ཇ་ག་ཚེ་ཁེ་པ་ རོ་ཀ་དད་པ་དང་ སྙིང་རྗེ་གི་ཨ་ཉི་ བྱིན་རླབས་གནང་མ༌ཅ།
15ཨོ་ཐ་ཡེག་ཐང་ཁེ་པ་ དེན་པ་གི༌ལ། ཁིརིས་ཡི་ཤུ་ཤོ་ སྡིག་ཅན་བ་ ཐར་པ་གནང་མེ་དེན་གེ་ འཛམ་གླིང་ག་བྱོན༌མ། ཉི་ཐམས་ཅན་གི་ ལོ་དི་ལེ་ཁེ༌ལེ། དག་པ་ཀབ་ཉི་ ཇང་ཤོ་ སྡིག་ཅན་ཐམས་ཅན་གེ་ མ་ལེག་པ་ཆོ༌ཝ། 16ཉི་ཇང་ སྡིག་ཅན་ཐམས་ཅན་གེ་ མ་ལེག་པ་ཆོ་ཝ་ཨ་དེན་གེ་ དཀོན་མཆོག་གི་ ཇ་ག་བྱམས་པར་ཨན་གནང་ཉི་ ཁིརིས་ཡི་ཤུ་ག་ བཟོད་པར་ཆི་ལུ་ཀོར་གེ་ ཇ་ག་ཐུང་ཀེ་ཨ་ཉི་ དཔེ་གེན་ཉི་གནང༌མ། ཧང་ཡ་དག་ནེ་ལ་ བཱརའ་སྡིག་ཅན་བ་ཀི་བུ་ རོ་ཀ་ཏཱན་དད་པ་ཀེ་ཉི་ ཚེ་མ་འགྱུར་བརྟན་པ་ ཉོང་པེ་རེ་བེ་ལ་དག་ཉི་ སེན་ཆེན་དག་པ་གི་གི༌ལ། 17ཇི་གི་སྨོན་ལམ་ཏབ་ཅ་ བསྟོད་པ་དང་ གུས་ཞབས་ཁེ་པ་ དུས་ཏ་བུ་རང་ དཀོན་མཆོག་ཐུར་ག་ཏཱན་ ཕུལ་ཆེན་ཨ༌ཉི། རོག་ཤོ་ མིང་གི་མ་ཐོང་ཁཱན་དང་ ཧ་ལ་རང་མ་གཤགས་ཁཱན་ ཉི་མ་འགྱུར་བརྟན་པ་ག་ དཔོན་གི༌ལ། ཨ་མེན༎
ཏི་མོ་ཐི་ག་ལའི།
18ཇ་ག་ཟ་ ཏི་མོ་ཐི་ ཇི་གི་ན་ག་ཡེག་ཁཱན་བ་ཤོ་ གོ་མ་ ལུང་བསྟན་པ་གི་ ན་ག་ཀོར་གེ་ གསུངས་ཁཱན་དང་ཏུ་ཉི་གི༌ལ། ཉི་ཨོ་ཐ་བ་དང་ཏུ་ཉི་ཨ་ནེ་ལ་ ནཱན་གི་ཕྱད་མདའ་ལེག་པུ་ཨ་ཉི་ ཕི་ལེ་རེ༌བེ། 19ན་ག་དད་པ་འགྱུར་བེ་མ་བི། ཉི་ན་ག་སེམས་ཀི་ ལེག་པུ་གི་ལ་དག་ཉི་ མི་ཝ་དང་ཏུ་ཉི་ཨའི། སོ་ངོ་ཚེ་བང་གི་ རོག་ཏེ་བ་ཀ་ སེམས་ཀི་མ་ན་ནེ་བུ་ ཨ་ཝ་ཨ་དེན་གེ་ རོག་ཏེ་བ་ཀ་དད་པ་ མ་ཝ་རི་ཝ༌ཅ། 20ཧུ་མེ་ནི་ཡཱས་དང་ ཨ་ལེག་ཇེན་དར་ཤོ་ ཨོ་ཉ་དད་པ་མ་ཝ་རི་ཁཱན་བ་ཀ་ དཔེ་གི༌ལ། ཨོ་ཐ་སོ་ངོ་བ་ཀི་ དཀོན་མཆོག་ག་ སྐུར་པ་ཞུ་ལེ་ག་ མ་ལམ་པེ་དེན་གེ་ ཇི་གི་རོག་ཏེ་བ་ སེ་ཏཱན་ག་ ག་དང་ག་སྤྲོད་པ༌ཅ༎
Currently Selected:
དང་པ་ཏི་མོ་ཐི། 1: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
