དང་པ་ཀོ་རིན་ཐི། 13
13
ཕང༌ཅོ།
1ཇི་གི་སོ་ངོ་བ་ཀ་དང་ ཞིང་ཁམས་ག་འཐེན་པ་བ་ཀ་ཆཱས་ ཨན་ཐཱན་རང་གི་ནེ་བུ་ ཇི་གི་མ་ཕང་ནེ་ལ་ ཇང་ཤོ་ ཏྲིང་ཏྲིང་དང་ རེ་མུང་ཚ་ཕ་ཀབ་ཉི་ ཀཱན་ཇིག་པ་ད་བུ་ཤ་གི༌ལ། 2ཉི་ཇ་ག་ལུང་བསྟན་མེ་ག་ བྱིན་རླབས་དང་ གུམ་ནང་ཆཱས་ ཉི་ཡོན་ཏན་ ཐམས་ཅན་རང་སེ་ཉི་ ཉི་ཇ་ག་ཕུ་སིག་པེ་རེ་ཁཱན་དད་པ་ ཐམས་ཅན་རང་ཆོ་ནེ་བུ་ ཇ་ག་སྙིང་རྗེ་མ་ནེ་ལ་ ཇང་ཧང་རང་མང་གི། 3ཇི་གི་ཇ་ག་ཆོ་ཁཱན་ ཐམས་ཅན་རང་ དུག་པུ་བ་ཀ་བི་ཉི་ ཉི་ཇ་ག་ལུས་པུ་ མཆོད་པ་ཕུལ་བེ་ བིན་ཐཱན་རང་གི་ནེ་བུ་ ཇ་ག་སྙིང་རྗེ་མ་ནེ་ལ་ ཇི་གི་ཧང་རང་མ་ཉོང༌པ།
4སྙིང་རྗེ་གི་ བཟོད་པར་སྒོམ༌ཅ། སྙིང་རྗེ་གི་ བྱམས་པར་ཀེ༌ཅ། སྙིང་རྗེ་གི་ སེར་སྣ་ཨ་ལུ་མཱན༌ཅ། ཉི་སྙིང་རྗེ་གི་ ཁམ་ཙོང་མུ་མཱན༌ཅ། 5སྙིང་རྗེ་ཤོ་ ཀག་ཏར་མཱན༌ཅ། སྙིང་རྗེ་གི་རང་ཏེན་ཤ་ ཕཱན་མེ་གོད་པུ་མཱན༌ཅ། སྙིང་རྗེ་གི་ དོ་ཟོ་རོ་ཙིག་པུ་མཱན༌ཅ། ཉི་སྙིང་རྗེ་གི་ ངཱད་ཁཱན་བ་ཀ་ རྩིས་ཐ་ལུ་མཱན༌ཅ། 6སྙིང་རྗེ་གི་ངཱད་པ་ཀབ་ཉི་ ཤོ་ནང་ཕེ་ལུ་མཱན༌ཅ། དག་པ་ཀབ་ཉི་ དེན་པ་ག་སྙིང་རྗེ་གི་ ཤོ་ནང་ཕེན༌ཅ། 7སྙིང་རྗེ་གི་ ཧ་ལ་རང་ཐུབ་ཐ་ལུ་མཱན༌ཅ། ཧ་ལ་ཨ་ནེ་བུ་ དད་པ་ཨན༌ཅ། ཧ་ལ་ཨ་ནེ་བུ་ རེ་ཆ་ཨན༌ཅ། ཉི་ཧ་ལ་ཨ་ནེ་བུ་ ཐེས་ཉི་ཆོན༌ཅ།
8སྙིང་རྗེ་ཧ་ལ་རང་ ཆུ་མུ་མཱན༌ཅ། དག་པ་ཀབ་ཉི་ ལུང་བསྟན་ཁཱན་བ་ རེབ་ཀིན་ཐུར་ག་དེན་གེ་ཤ་གི༌ལ། ཧ་མ་གོ་ཁཱན་ལོ་ ཨ་ཁཱན་བ་བུ་ ཆུ་མེ༌ཅ། ཉི་ཡོན་ཏན་བ་བུ་ མ་ཝ་རི་ལེ༌ཅ། 9ཧང་ཡ་དག་ནེ་ལ་ ཨ་ཤི་ཐམས་ཅན་ག་ ཡོན་ཏན་ཉོང་པ་མཱན༌ཅ། ཉི་ཨ་ཤི་ ཐམས་ཅན་རང་ཚང་པ་ཨ་ཉི་ ལུང་བསྟན་མེ་རེ་བུ་མཱན༌ཅ། 10ཇུ་ཀ་དག་པ་ཀབ་ཉི་ ཕྲིག་ཀིན་ཆོ་ཁཱན་ཁེ་པ་ ཨོ་ཕ་ཀབ་ཉི་ ཕྲིག་ཀིན་མ་ཁཱན་བ་ མ་ཝ་རི༌ལེ།
11ཇང་ཝག་ཙ་ཨ་ཉི་ ཆོ་ལེ་གང་ཀ་ ཇི་གི་ཝག་ཙ་ད་བུ་ཨ་ཉི་ ཆཱས་ཕིན་ཆོ༌ཝ། ཇི་གི་ཝག་ཙ་ད་བུ་ཨ་ཉི་ མིན་ཆོ༌ཝ། ཉི་ཇི་གི་ཝག་ཙ་ད་བུ་ཨ་ཉི་ ཧ་གོན་ཆོ༌ཝ། དག་པ་ཀབ་ཉི་ ཇང་ཆི་ལུ་རི་དེན་གེ་ ཇི་གི་ཝག་ཙ་ཨ་ཉི་ ཆོ་ལེ་གང་ཀ་ཨ་ཁཱན་བ་ ཐུབ་ཐ༌ཝ། 12ཨ་ཤི་ཨོ་མ་ཐོང་ཁཱན་ཤོ་ མེ་ལོང་ག་ བ་རང་བོ་རོང་ཨ་ཉི་ཐོང་ཁཱན་ ཡོང་ད་བུ་ཤ་གི༌ལ། དག་པ་ཀབ་ཉི་ ཨུ་ཉུ་གང་ཀ་ པ་ཏོང་རུམ་ཉི་ གོད་པ་པུརུས་ཀིན་ཨ་ཉི་ དང་སང་ཀིན་ཨ་ཉི་ཐོང༌མེ། ཉི་དཀོན་མཆོག་གི་ ཨོམ་ཇ་ག་ཀོར་གེ་ ཐམས་ཅན་རང་ མཁྱེན་མ་པུརུས་ཀིན་ཨ་ཉི་ ཨུ་ཉུ་གང་ཀ་ ཇི་གི་བུ་ ཐམས་ཅན་རང་ ཧ་གོ་ལེ་རེ༌བེ།
13ཉི་ཨོམ་ དད་པ་དང་རེ་ཆ་ ཉི་སྙིང་རྗེ་སམ་ཤ་ལུས༌ཅ། དག་པ་ཀབ་ཉི་ རོག་ཏེ་སམ་གེ་ ཆི་ལུ་རང་ སྙིང་རྗེ་གི༌ལ༎
Currently Selected:
དང་པ་ཀོ་རིན་ཐི། 13: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
