Avruh 21

V'nen hua na m'ertu na m'akarien

(Tv'el V'nen Hua 15:12-18)

1Patu v'nen hua udlani laha anr m'ertu udlani. 2#Livai 25:39-46.Ipavr ti kul m'ertu na m'akarien iv'i m'ertu a Isrel, hin ipam'akar pai ipalm'sei. Arna saru na pai, palni ipav'el vn, ikaul si kinkin. 3Ipavr ti naran ima a utam itauamu, hin ilak mamk uaki, naran ihiris a parian, hin ipalak mamk uam. V'eti ipavr ti iten sera lheienan naran ima ser, naran ihiris a parian, a naun ipasapei. 4Ipavr ti mlinan ittu tav'et iamk ani, sarei, a natn dui v'aha a natn tav'et iak, a naun m'er a natn apavv'i nkan a mlinan, hin ipav'el kalak mamk uaki. 5V'eti, ipavr ti dui na m'akarien ipavr ti a, ‘Kana nlap'as a mlinak, a nauk, m'er a natk istudau. Kana nkav'el vn.’ 6Laha, a mlinan ipauirv'a asn ardu na v'nen hua. Sarei, a mlinan ipauirv'a a karliu, asn nakal na liu, kashs drlnan m'a rin iamk, laha ipav'i m'ertu na m'akarienan ikahiris naran.

7Ipavr ti dui iamk iulul a natn tav'et a ti ipav'i tav'et na m'akarien, hin ikaunanut av'aran inap'ar arm'ertu na m'akarien. 8Ipavr ti mlinan iarn ip'as ani ml, sena ti ittukar sarei a ti ipav'i nkan, ipuli pr. Hin ikaulul ani a m'ertu na v'anu uraur, sena ti, ipavr ti inap'i lera, hin ithap'il sarei ani. 9Ipavr ti mlinan ittukar sarei sanan a natn dui, ipamhmah ani inep'a ti aani m'er arnet tav'et nakl. 10Ipavr ti ilev' a naun uraur, ikalev'la tim'ahan, v'aha klusan, v'aha si uraur iv'i nkan sena ti iv'i a naun. 11Ipavr ti iahan sei itl lera sanan, hin ipav'el vn uaki, tav'et lera ikauli.

12 # Livai 24:17. Ipavr ti dui iamk irp dui uraur, laha dui lera im'a, apavrpep'ni. 13#Nut Kaka 35:10-34; TVH 19:1-13; Susua 20:1-9.V'eti, ipavr ti ialaksrahi a ti iparpep'ni, v'eti Atua itaui al lm'an uaki, Kana p'etu nut ipamk a kam'i a ti iparuh kadav'a atlera.

14V'eti, ipavr ti dui iamk itv'ahur sarei a ti iputakm a tv'aln, a ti ipahap'il ani karpep'ni, palev'lei asn nev'etetak, a ti ipam'a.

15M'ertu irp a tetian v'aha a unian, aparpep'ni pr.

16 # TVH 24:7. M'ertu iv'nah dui uraur kulul ani, v'aha ipavr ti avpaslei al lm'an, aparpep'ni pr.

17 # Livai 20:9; Mat 15:4; Mak 7:10. M'ertu ils a tetian v'aha a unian, aparpep'ni pr.

18Ipavr ti ardu avv'lv'al, laha nki iamk irp nki uraur m'a nav'et, v'aha ithi m'a lm'an, v'eti dui lera iahm'a, ilak arna piasan uaki, 19ipavr ti ithal ml kav'el av'aran m'a napilaktan, akahan si kinkin m'a m'ertu irpi. Ipuli sena napn iam'akar aranan, kamhmah ani pr, ipaier naran p'akn ima kap'as ml.

20Ipavr ti dui iamk irp dui na m'akarienan v'aha tav'et na m'akarienan m'a nai, dav'a ti im'a a nv' lm'an, ipalev' uliena si stuan. 21V'eti, ipavr ti isilv' napn iamk v'aha iru, akatu uliena si stuan ani, sena ti iv'i nkan.

22Ipavr ti ardu avthth hir, kutakm a tav'et itkar, kani ti ilev' sei ilahml, v'eti der kinkin iaier m'ertu kinkin, apatu uliena si stu ani, a naun a tav'et lera ipatu ulien nen. Sarei, ipuli ipanep'a nut ardu na v'nen hua avvri inap'ei. 23V'eti, ipavr ti der kinkin ima, apatu silv'ien sena silv'ien, 24#Livai 24:19,20; TVH 19:21; Mat 5:38.m'eta natei sena m'eta natei, lu natei sena lu natei, lm'a natei sena lm'a natei, tl natei sena tl natei, 25nut p'akr ienap' sena nut p'akr ienap', nut p'akr imaur sena nut p'akr imaur, nut arp p'akr sena nut arp p'akr.

V'nen hua ier m'ertu iua sei

26Ipavr ti dui iamk irp m'aten a dui na m'akarienan, v'aha nkan a tav'et na m'akarienan, laha ima kastu, hin ipam'ahu a ti ipav'el vn sena m'aten lera. 27Laha, ipavr ti irpla lu dui na m'akarienan, v'aha lu tav'et na m'akarienan, hin ipam'ahu a ti ipav'el vn sena lun lera.

28Ipavr ti pluk iamk ivap'n dui v'aha tav'et iamk, sarei im'a, apamhr pluk lera dav'a ti ipam'a pr. Akahan p'akn kinkin, v'eti akatu uliena si stu kinkin a duian. 29V'eti ipavr ti pluk lera iten sarei inap'i lera itauamu, laha atvr sarei a duian, laha iahudei, dav'a ti irpep'n dui v'aha tav'et kinkin, apavmhr pluk dav'a ti ipam'a, duian aparpep'ni pr. 30V'eti ipavr ti atau ulien arna silv'ienan, ipuli a ti ipasilv'. Nav'et atu aranan, hin ipuli pr. 31Ipavr ti pluk ivap'n net dui kinkin v'aha net tav'et kinkin, apani ipanap'i lera ani. 32Ipavr ti pluk ivap'n dui v'aha tav'et na m'akarien kinkin, apatu nav'et ineltl (30) an a mlinan, sarei, apamhr pluk lera dav'a ti ipam'a.

33Ipavr ti dui iamk ihl tah lil iamk v'eti iatavkari, v'aha, ipavr ti ilev'la sei itavkar tah nen, laha pluk v'aha tuki iamk irs a nln, 34dui ihl tah ipamhmah a sei, ipatu nav'et a dui iua pluk, v'eti hin ipaua si slm la im'a ha ipav'i nkan.

35Ipavr ti pluk na dui iamk iutakm a nka dui uraur, kani ti im'a, apavulul a nki isilv' uam, kavtupr nav'et avlav'i sanan, sarei, nki im'a apavtupri ml. 36V'eti, ipavr ti atrndu sarei ti pluk lera ivap'n sei nakl, v'eti mlinan iahudei, hin ipuli pr, pluk sena pluk. V'eti nki itam'a sarei, hin ipauei.

Currently Selected:

Avruh 21: nmb

Highlight

Copy

Compare