Avruh 20

V'nen Hua inal

1Sarei, Atua ivr v'nen laha udlani, kavr ti a, 2“Kana nv'i a Mlin Eia kav'i Atuam, la nlev'lah arna v'anu Itsip ha, kalev'lah arna nut avani ti kv'i m'ertu na m'akarien. 3Mapatei atua ururaur ml apavv'i tv'alk. 4#Avruh 34:17; Livai 19:4; 26:1; TVH 4:15-18; 27:15.Matr si kinkin ipama kav'i atuam kinkin. Imanep'a sei iter eia v'aha si kinkin arna nadep' v'aha si kinkin al nauei a nv' nadep'. 5#Avruh 34:6,7; Nut Kaka 14:18; TVH 7:9,10.Maiaul asnr kapatar, sena ti Kana nv'i a Mlin Eia kav'i Atuam'i. Kana nv'i Atua np'ausus kam'i. Kana p'erp a tatei sena si stuan ipaier a natn kaier a m'hip'n kaier a natn a m'hip'n kaier a m'hip'n a m'hip'n aranar m'ertu udlani avlep'la Kana. 6V'eti p'ev'iv'en vtmienak anr m'ertu apavnelnal apavsiv' tausen ipamk dav'a, la avlap'as a Kana kavuada v'nen huak ha. 7#Livai 19:12.Mavrp'ep'a nahan a Mlin Eia, iv'i Atuam ipunanut, inep'a ti iv'i si kaka uaki, sena ti a Mlin Eia ikavr ti m'ertu la ivr nahan inep'a ti iv'i si kaka uaki ha, kavr ti iahan si stu.

8 # Avruh 16:23-30; 31:12-14. Pav'ahur Sapat kauadei a ti ipav'i napnet. 9#Avruh 23:12; 31:15; 34:21; 35:2; Livai 23:3.Pam'akar napn ipalm'sei kan pariam udlani. 10V'eti saru na napn iv'i Sapatan a Mlin Eia, iv'i Atuam'i. Man pari kinkin aranan, nakm, a natm dui, a natm tav'et, dui na m'akarienam, tav'et na m'akarienam, plukam, m'a v'anudl kinkin la ilak asnm ha. 11#Ap'u 2:1-3; Avruh 31:17.Sena ti a Mlin Lilad ien nut eia, kan nut a nadep', kan nata, kan si udlani iter a nlr, arna napn ilm'sei karnrn hin arna napn saru. Sena si lera a Mlin Eia imhmah a napn na Sapat kataui ti iv'i napnet. 12#TVH 27:16; Mat 15:4; 19:19; Mak 7:10; 10:19; Luk 18:20; Evases 6:2; Evases 6:3.Pani ti nahar a tetiam m'ei a uniam ipav'a eia, a ti pavsilv' ipap'arei arna nadep' la a Mlin Eia, iv'i Atuam, itau anh ha.

13 # Ap'u 9:6; Livai 24:17; Mat 5:21; 19:18; Mak 10:19; Luk 18:20; Rum 13:9; Sim'is 2:11. Marpep'n m'ertu. 14#Livai 20:10; Mat 5:27; 19:18; Mak 10:19; Luk 18:20; Rum 13:9; Sim'is 2:11.Mav'nah tav'et, tav'et imav'nah dui. 15#Livai 19:11; Mat 19:18; Mak 10:19; Luk 18:20; Rum 13:9.Mav'nah sei. 16#Avruh 23:1; Mat 19:18; Mak 10:19; Luk 18:20.Mavrur si stua tv'alm kamlani kahap'il ani uaki. 17#Rum 7:7; 13:9.Marn ti paua nmaha tv'alm. Marn ti paua tav'eta tv'alm, v'aha dui na m'akarienan, v'aha tav'et na m'akarienan, v'aha plukan, v'aha tukian, v'aha si kinkin iv'i nka tv'alm.”

Arm'ertu avdedrn istudau sena ti a Mlin Eia imima asnr

18 # Isrel 12:18,19. M'ertu udlani avrn nav'l iv'l kavla ti ilev' m'aten kavrn drl natav kavla ienap' eia arna ptha. Laha, naran avla si lera, avvrdedrn kavp'tir v'iv'a au. 19Sarei, avvr an a Musis, kavvr ti a, “Nakm pav'ana m'a kam'em' p'vv'rn anh, v'eti Atua imav'ana m'a kam'em', imahei p'vram'a.”

20Laha, a Musis ivr anr m'ertu udlani, kavr ti a, “Mavdedrn, sena ti Atua imima asnm'i a ti ipandina kam'i, a ti dedrenienn ipater arna nahm'i a ti mavan si stu.” 21Laha, m'ertu udlani avp'tir v'iv'a au, v'eti a Musis imima asn m'alk, a nut Atua ilak.

V'nen hua ier sakrivais

22Sarei, a Mlin Eia ivr an a Musis kavr ti a, “Pavr anr arm'ertu a Isrel ipanap'i laha, kavr ti a, ‘Kam'i ktvla sera ti Kana nv'ana m'a kam'i dan nut eia. 23Mavan si kinkin ipalak asnk kav'i tv'alk. Mavan atua kinkin apavv'i nkam'i, kvani a silva v'aha kul. 24Pavtupien nadep' asnk kavan sakrivais aranan ipama asnk, ipav'i nki pavali udlani m'a nki ipav'i sakrivais na tamat. Pan sakrivais a sivsivam m'a plukam. Arna nut udlani Kana p'etu nahak, arna nut lera Kana p'emhmah a kam'i aranan. 25#TVH 27:5-7; Susua 8:31.V'eti ipavr ti pani a nav'et asnk, mahani a nav'et atri, sena ti ipavr ti pani a nav'et atri pani ti ipav'i si vn arna nahk. 26Laha, man nev'etet kinkin asnk ipav'i hatahat ti apavhap'r ani. Imahei ti apavla pna p'akm'i aranan.’

Currently Selected:

Avruh 20: nmb

Highlight

Copy

Compare