Avruh 19

Arm'ertu a Isrel avier Ptha Lil a Sainai

1Arna nitla nal, naran na ti m'ertu a Isrel atvln sera v'anu a Itsip, arna napn nen, avrama kavier Nut Kaka na Sainai. 2Sena ti atvln sera nut a Revitim kavrama asn Nut Kaka na Sainai, kavhl nmah kanuisar kavlak atlera arna nah ptha.

3A Musis iv'a eia asn Atua, laha a Mlin Eia iv'ara dan asn ptha asnn, kavr ani, kavr ti a, “Pavr anr nl nam'elan a Sikup kav'ana m'er arm'ertu a Isrel, kavr ti a, 4‘Kam'i ktvla sera sei nten sarei asnr m'ertu Itsip, hin nrman kam'i inep'a np'el irman a natn arna nil heian, hin Kana uaki nlev'la kam'i kvrama asnk. 5#1 P'ita 2:9.#TVH 4:20; 7:6; 14:2; 26:18; Taitas 2:14.Sena si lera, ipavr ti pavsapa mamh v'nenak kavuada turanienak, laha kam'i pavv'i si p'sp'as asnk, kavp'as kavsiv' m'ertu uraur udlani arna nadep' arna nahk, sena ti nadep' udlani iv'i nkak. 6#Rev 1:6; 5:10.Laha, kam'i pavrama kavv'i v'anu na pris, kavv'i v'anuet arna nahk.’ Nakm pavr v'nen laha asnr m'ertu a Isrel.”

7Sarei, a Musis ima kav'ara eltar m'ertu udlani kav'iv'en v'nen udlani la a Mlin Eia ittu sarei ani ha. 8Laha, m'ertu udlani avvrprani kavvr ti a, “Si udlani Atua ivri p'vani.” Sarei, a Musis ivrm'alet a v'nenar m'ertu udlani ml asn a Mlin Eia. 9A Mlin Eia ivr an a Musis, kavr ti a, “Palei, Kana p'ama asnm'i al p'knaran lil a ti m'ertu udlani apavv'rn naran p'ev'ana m'ah, kavv'ahah dav'a.” Sarei, a Musis ivr v'nenar m'ertu udlani iv'a asn a Mlin Eia ml.

10Laha, a Mlin Eia ivr an a Musis, kavr ti a, “Pav'a asnr m'ertu udlani kani ti apavrama kavlvlvar arna nahk kavsila klusar dika m'a m'ih. 11A ti apavdadar arna nitla napn. Sena ti arna nitla napn lera a Mlin Eia ipadan arna nut eia kadama auei arna ptha iv'i Sainai arna nah m'ertu udlani. 12#Isrel 12:18-20.Nakm patu naml ipamlden ptha ipatukar m'ertu kavr anr kavr ti a, ‘Pavv'ahur kam'i a ti mavrav'a eia asn ptha v'aha ti kavier pnen. Ipavr ti m'ertu kinkin ipaier pna ptha, nvrdaui, apavkap'ni. 13Lm'a m'ertu imaiari, v'eti nvrdaui, apamhrp'ni v'aha apaluep'ni. Ipavr ti ipav'i m'ertu v'aha si dm, ikasilv'.’ Naran apiv natav ipap'arei, apavmima asn ptha.”

14Laha, a Musis isasr arna ptha kadama auei asnr kani ti m'ertu udlani avlvlvar arna nahn a Mlin Eia, laha avsila klusar. 15Laha, ivr anr m'ertu udlani, kavr ti a, “Pavandedp' kam'i sena nitla napn lera, mavm'atr m'er a naum'i.”

16 # Rev 4:5. # TVH 4:11,12. Sarei, arna nitla napn, m'etav'aran, nav'l iv'l kalev' m'aten istudau, m'a p'knaran lil arna ptha. Drl natav iv'a eia istudau, laha ti m'ertu udlani avlak al nmah kanuisar avvrdedrn. 17A Musis ilav'r m'ertu udlani kauirv'ar apavmima asn Atua, kavp'tir arna pna ptha. 18Ienap' itukar ptha Sainai udlani, sena ti a Mlin Eia ima auei aranan al nep'v'en. Ienap' nen iv'a eia inep'a ienap' na tup', laha ptha udlani idudul ililet. 19Laha, naran drl natav ima eia ip'arei, kadav'a eia mau, a Musis iv'ana, laha Atua ivrprani a drln. 20Sarei, a Mlin Eia ima auei arna ptha Sainai, arna ual ptha. Laha, a Mlin Eia iv'ara an a Musis a ti ipav'a arna ual ptha, sarei a Musis iv'a eia.

21Laha, a Mlin Eia ivr an a Musis kavr ti a, “Pav'a auei kav'ana m'er arm'ertu udlani ipahua. Imahei ti apavsiv' nut ntaui a ti apavp'a nahk, laha hir apavstudau apavram'a. 22Pavr anr arpris ml, la avmima asn a Mlin Eia ha, a ti apavan hir apavlvlvar. Imahei ti a Mlin Eia ipamlanr karpr.”

23V'eti a Musis ivr an a Mlin Eia kavr ti a, “M'ertu udlani akavmima asn ptha Sainai, sena Nakm kvri ihua a kam'em' kavr ti a, ‘Patu naml kamlden ptha kani ti ipalvlvar arna nahk.’ ”

24V'eti a Mlin Eia ivr ani, kavr ti a, “!Paruh! Pav'a auei, sarei kadama ml eia, kam'i m'ei a Erun parv'el m'ei. V'eti mam'ahu a ti arpris m'er arm'ertu udlani apavsiv' naml kavrama asn a Mlin Eia, imahei ti Hin ipamlanr karpr.” 25Laha, a Musis iv'a auei asnr m'ertu udlani kav'ana m'er.

Currently Selected:

Avruh 19: nmb

Highlight

Copy

Compare