Avruh 18
18
A Setru iv'iv'en sei an a Musis
(Tv'el V'nen Hua 1:9-18)
1A Setru, iv'i pris a Mitian kav'i a einan a Musis, itrn sera si udlani Atua iten sarei an a Musis m'er arm'ertu a Isrel avv'i m'ertuan, karn ti a Mlin Eia ilev'm'alet anr Isrel avln nut a Itsip. 2#Avruh 2:21,22.Sarei, a Setru, iv'i a einan a Musis, ilev' a Sipura, iv'i a naun a Musis katap'ei im'alet ml, sena ti a Musis itap'ei itauamu im'alet ml asn a tetian. 3#Parei 7:29.Kalev' a natn dui arru arv'el m'ei. Naha tv'aln iv'i a Kesum, (sena ti a Musis ivr ti a, “Kana nv'i v'anudl arna v'anu iav'i nkak”). 4Naha tv'aln iv'i a Eliesa, (sena ti ivr ti a, “Atuan a tetiak isr lm'ak kalev'la kana arna tali lilan a Veru”). 5Laha, a Setru, iv'i a einan a Musis, ima m'er a natn a Musis arv'i dui, m'ei a naun a Musis kavrama asn a Musis arna nut kaka, iv'i nut avlak dei arna nah pthan Atua.
6Ivr an a Musis kavr ti a, “Kana, nv'i a einam a Setru. Nma asnm m'ei a naum m'er a natn dui arru.” 7Laha, a Musis iv'el kadav'a asn einan kaiaul asn kasm pla nahn. Sarei, armiman nut avlak inap'ei, karv'a eim al nmah kanuis. 8Sarei, a Musis ivr an einan si udlani a Mlin Eia iani asn a Veru, m'er arm'ertu Itsip udlani, sanar m'ertu a Isrel udlani, kavrur si hua udlani iarr arna navanel, kavr nut a Mlin Eia ilev'lar inap'ei. 9Laha, a Setru irn ip'as sena si p'as udlani a Mlin Eia iani sanar Isrel, la Hin ilev'lar al lm'ar m'ertu Itsip ha. 10A Setru ivr ti a, “Npatei a Mlin Eia la Hin ilev'la kam'i al lm'ar arm'ertu Itsip ha, kalev'la kam'i al lm'an a Veru, kalev'lar arm'ertu a Isrel udlani a ti amavlak a nv' lm'ar arm'ertu Itsip ml. 11Hilaha nrndu ti a Mlin Eia ilil kasiv'r atua udlani, aau, isiv'r arna sei avukl hir sanan.” 12Sarei, a Setru, a einan a Musis, ilev' sakrivais kinkin ipali ipav'a asn Atua. Laha, a Erun ima m'er arelta a Isrel udlani, a ti apavhan tim'ah m'ei a Musis m'ei a einan arna nahn Atua.
13Dav'a, m'ih nen, a Musis ilak kav'ana hua m'er arm'ertu. M'ertu avp'tir arna nahn a Musis, m'etav'aran ier knarev'. 14Laha, naran a einan a Musis ila si udlani iani asnr m'ertu udlani ivr ti a, “?Kan v'ata anr m'ertu laha? ?Nakm klak mamk kav'ana hua m'er arm'ertu m'etav'aran ier knarev' sena v'ata?”
15A Musis ivr an a einan kavr ti a, “Sena ti arm'ertu avrama asnk a ti apavrndu sei Atua itaui. 16Naran si kinkin ihua asnr avrama asnk, laha kana nv'ana hua m'er, kav'iv'en v'nen huan Atua anr, kav'iv'en v'nen itau aranan.”
17Laha, a einan a Musis ivr ani, kavr ti a, “Sei kani iap'as. 18Nvrdaui, nakm m'er arm'ertu avrama asnm hilaha np'm'i ipastu. Sena ti si laha ihua par asnm. Nakm uaki kamk mkarndu ti pan si lera. 19Parn v'nenak hilaha. Kana p'ev'iv'en navanel anh, laha Atua ipalak m'ah. Pap'tir arna nahn Atua sanar m'ertu a ti nakm pauirv'a si dvar asn Atua. 20Laha, nakm pav'iv'en v'nen huan m'a si udlani itaui, kav'iv'en parei apavani pr. 21Kav'li hir kinkin ml asnr m'ertu udlani, apavv'i dui apavviviln a pari nen. Apavv'i dui avdedrn an Atua, kavv'i m'ertu na v'nen dau, kavlep'la p'kl na ti apavrn sia tv'alr. Laha, kani ti apavv'i mlinar. Apavv'i mlinar m'ertu apavsiv' tausen ipamk, mlinar m'ertu apavsiv' m'ertu inelnal iv'amk (100), mlinar m'ertu apavsiv' m'ertu inellm' (50), m'er mlinar m'ertu apavsiv' m'ertu inal. 22Nakm pam'ahu a ti hir apavv'ana hua m'er arm'ertu udlani ipel. Laha, ti si lil udlani apavuirma asnm, v'eti hir uaki apavv'ana hua sena si papa udlani. Laha, imahua par asnm, sena ti hir apavsr lm'am arna si dv udlani. 23Ipavr ti pan si lera, ipavr ti Atua ipataui a ti pani pr, sarei ti pariam imasiv'h. Sarei, m'ertu udlani laha apavrahau a utar arna tamat.”
24Laha, a Musis isapa v'nenan einan kan si udlani ivri. 25A Musis iv'li dui avviviln a pari lera avandan asnr m'ertu a Isrel udlani kani ti avrama kavv'i mlinar m'ertu udlani, avv'i mlinar m'ertu avsiv' tausen ipamk, mlinar m'ertu avsiv' m'ertu inelnal iv'amk (100), mlinar m'ertu avsiv' m'ertu inellm' (50), m'er mlinar m'ertu avsiv' m'ertu inal. 26Laha, avv'ana hua m'er arm'ertu udlani nakl, v'eti si ihua udlani avuirv'a asn a Musis. V'eti hir uaki avv'ana hua sena si papa.
27Sarei, a Musis im'ahu an einan a ti ipahau a utan.
Currently Selected:
Avruh 18: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
