Avruh 17

Nauei irarev' dan al nav'et

(Livai 20:1-13)

1 # Nut Kaka 20:2-13. Sarei, nl nam'el udlani a Isrel avv'el kavln nut kaka, nahan iv'i Sin, inep'a nut a Mlin Eia itaui inap'ei, kavm'atr dei a Revitim. V'eti nauei a ti m'ertu apavm'ni ihei arna nut lera. 2Sena si lera arm'ertu avv'ana stu m'ei a Musis, kavvr ti a, “Patu kam'em' nauei p'vm'ni.” Laha, a Musis ivr anr kavr ti a, “?Inap'i hin kvv'ana stu m'a kana? ?Inap'i hin kvandidei a Mlin Eia?”

3M'ertu lera avrn navar a nauei atlera kavv'ana stu m'ei a Musis kavvr ti a, “?Klev'la kam'em' arna nut a Itsip sena v'ata, hin parp kam'em' a navarien, m'er a netm'em', m'a si slmam'em' udlani?”

4Laha, a Musis iv'ara eia asn a Mlin Eia, kavr ti a, “?P'en v'ata anr m'ertu laha? Nut pa ti apavmhrp'n kana.”

5Laha, a Mlin Eia ivr an a Musis kavr ti a, “Pav'a arna nah nelnal kalev' eltar Isrel kinkin apavsapah, kaua napilaktam, la krp a nauei a Itsip m'ei ha, kav'el. 6Palei, Kana p'ep'tir arna nahm arna nav'et arna nut a Hurep. Nakm parp nav'et lera, laha nauei ipadan a nln kararev', a ti m'ertu udlani apavm'ni.” Sarei, a Musis iani inap'i lera arna nahr eltar m'ertu a Isrel. 7Laha, itu naha nut nen iv'i Masa (avandidei), m'a Meripa (avv'ana stu). Sena ti m'ertu a Isrel avv'ana stu kavandidei a Mlin Eia, kavvr ti a, “?A Mlin Eia ilak m'a nakd v'aha ihei?”

A Mlin Eia iani ti avsiv'r arm'ertu Amalek

(Ap'u 14:7; Livai 13:29; 14:25)

8Laha, ardu Amalek avrama kavan naur m'er arm'ertu a Isrel arna nut a Revitim. 9Sarei, a Musis ivr an a Susua, kavr ti a, “Pav'li m'ertu kinkin kavrav'a kavan naur m'er ardu Amalek. M'ih kana p'ep'tir arna ual ptha laha kaua napilaktan Atua al lm'ak.” 10Laha, a Susua iani inep'a nut a Musis ivr ani inap'ei, kan naur m'er ardu Amalek. A Musis m'ei a Erun m'ei a Hur avrav'a eia arna ual ptha. 11Laha, naran a Musis iah lm'an, ardu a Isrel avsiv'r ardu Amalek, v'eti naran lm'an iv'a a nadep' ardu Amalek avsiv'r ardu a Isrel. 12V'eti lm'an a Musis arma kardv. Sena si lera avlev' nav'et iamk kavtaui a ti ipalak aranan. Laha, a Erun m'ei a Hur aruada lm'an, tv'aln iuada m'ldaun, tv'aln iuada m'ir nen, dav'a ti lm'an ahardul ier naran neiel itpl. 13Laha, a Susua irp Amalek m'er m'ertuan a tali lilan.

14 # TVH 25:17-19; 1 Sam 15:2-9. Sarei, a Mlin Eia ivr an a Musis, kavr ti a, “Pulul a si laha arna puk ipamk a ti m'ertu amavvnapn ani, kavr an a Susua ml a ti Kana p'utakm anr m'ertu Amalek udlani, kani ti m'ertu kinkin ikav'ahur m'ertu Amalek ml arna nadep' laha.” 15Sarei, a Musis ien nev'etet katu nahan ani iv'i “Iehuva Nisi” (A Mlin Eia iv'i vlaikad), 16sena ti ivr ti a, “A Mlin Eia ivri ihua kavrdaui, kavr ti a, ‘A Mlin Eia ipan naur m'er arm'ertu Amalek dav'a ipaier a natr dav'a dav'a.’ ”

Currently Selected:

Avruh 17: nmb

Highlight

Copy

Compare