Avruh 15

Npinan a Musis

(Avruh 14:13; Npin 78:12-14)

1 # Rev 15:3. Sarei, a Musis m'er arm'ertu a Isrel udlani avhai a npin laha kavpatei a Mlin Eia kavvr ti a, “Kana p'ehai kapatei a Mlin Eia, Sena ti Hin ihua kasiv' m'ertu avlep'lei kav'iv'en si p'sp'asan. Hus m'a m'ertu na husar isranr al nata. 2#Npin 118:14; Aisaia 12:2.A Mlin Eia iv'i nut huak kav'i npinak, laha Hin ima kalev'la kana. Hin iv'i Atuak, laha p'epatei. Iv'i Atuan a tetiak, laha p'ani nahan ipav'a eia. 3A Mlin Eia iv'i Dui hua na naur. Nahan iv'i a Mlin Eia. 4Hin itsran sera kat na nauran a Veru m'er m'rnuran udlani al nata. Armlin na m'rnur udlani, la hin iv'lair ha, avtpl al Nata M'iel. 5Nata lil ima kanpakarr. Avtpl kavier nadep' a nv' nata inep'a nav'et.

6U Mlin Eia, m'ldu lm'am ima kalini a si p'sp'asam kav'iv'en nut huam. U Mlin Eia, m'ldu lm'am iviapaprr m'ertu udlani avmlanh. 7Nakm kutakm a m'ertu udlani avp'tir kavmlanh arna nut hua na si p'sp'asam. Nakm ktep'a nl reram inep'a nap' iel nina m'am'a ihapu. 8Kiv nata a m'im'inam, laha nata ip'lt kap'tir kanep'a sera naml. Nadep' ima kam'am'a al p't nut na nata. 9M'ertu avmlen kam'em' avvr ti a, ‘Kana p'etkr anr kasiv'r kutakm anr. Laha, kavlev' siar kavsvsani. P'en si udlani nrni uaki anr. Laha, p'erv'la tali lilak katrp'nr kutakm anr udlani.’ 10Nakm kiv nata a m'im'inam, laha nata inpakarr. Avtpl a nadep' al nata lil, kanep'a let na uk itpl a nadep' ilahml.

11?U Mlin Eia, hin ak inap'ah asnr atua udlani? ?Hin ak inap'ah, la klini a si p'sp'asam kaviviln udlani ha? M'ertu avtah a sei kani kavdedrn kavpata naham sena pari lilil kani. 12Nakm kah m'ldu lm'am, laha nadep' idrlm'r udlani. 13Nakm kv'ev'a m'ertuam arna nl p'asam, Avv'i m'ertu Nakm ktlev'la sarar. Kv'av'ar arna nut huam a ti apavrav'a arna nutetam.

14M'ertu apavrni kavrdedrn. M'ertu a Vilistia apavrn istu ipastudau. 15Sarei, armlinar m'ertu a Itum apavdedrnet, M'ertu huar Muap dedrenien ipahudar dav'a apavrdedrn. Arm'ertu a Kenan udlani v'ahienar ipav'a a nadep' apavruh. 16Hir udlani v'ahienar ipastu, laha apavdedrn ipastudau. Nakm pani arna nut hua na lm'am a ti hir apavlak ms kavnep'a nav'et hua, Ipaier naran m'ertuam, la Nakm kullar ha, apavluvn ani. 17Nakm pav'av'ar apavrama arna nut Nakm ktau anr, Kalaur arna ptha iv'i nkam. U Mlin Eia, iv'i nut Nakm kani ti ipav'i nut Nakm palak aranan. Ipav'i nutetam Nakm khli al lm'am.

18A Mlin Eia ipav'i Mlin Lil dav'a dav'a ikahiris naran.”

19Sena ti a Veru iv'el m'a husan udlani, kat na nauran udlani, m'a dui nen udlani, kavrav'a al nata, sarei ti a Mlin Eia itum'alet a nata aranar ml. V'eti arm'ertu a Isrel udlani avv'el a nadep' m'am'a uaki arna p't nut na nata.

Npinan a Miriam

20Sarei, a Miriam, iv'i tav'et iv'i pruvet kav'i a v'nn a Erun iua seka arna lm'an. Laha, tav'et udlani avlev' nkar kavuei kavsapei kavduduvah ani kavan naval. 21Laha, a Miriam iv'av'ar kavhai kavvr ti a, “!Pavhai asn a Mlin Eia, sena ti Hin isiv'r m'ertu avan naur m'ei arna nut huan udlani kani ti nahan ipav'a eia! !Hin itsran sera hus m'a m'ertu nen udlani al nata!”

A Mlin Eia iani ti naui stu ima kap'as, iahau ml

22Laha, a Musis iv'av'ar arm'ertu a Isrel udlani dan al Nata M'iel, sarei ti avrav'a arna nut kaka, naha nut nen iv'i Sur. Sarei, kavv'el napn itl arna nut kaka lera, v'eti ahavla naui kinkin. 23Sarei, avier nut a Mara kavla nauei, v'eti akavm'ni sena ti ihau. Sena si lera avtu naha nut lera iv'i Mara. 24Sena si lera avv'ana stu m'ei a Musis, kavvr ti a, “?P'vm'n v'ata hilaha?” 25Laha, a Musis iv'ara eia ihua asn a Mlin Eia, laha a Mln Eia iv'iv'en nai iamk ani. Laha, ilev' nai lahara kasrani al nauei. Laha, nauei lahara ima kap'as, iahau ml. Sarei, Atua itu v'nen huan iamk a ti hir apavsapei, a ti Hin ipandinar kala v'ahienar atlera. 26Laha, kavr ti a, “Kam'i pavv'rn mamh a drlk kavan sei ipaviviln arna nahk, kavv'rn mamh a v'nen huak kavsapa v'nen hua udlani ntaui. Laha, ipavr ti pavuada v'nen huak udlani, Kana nkatu m'etien kinkin ikier kam'i, laha nttu sarei anr m'ertu a Itsip ha. Sena ti Kana nv'i a Mlin Eia la nmhmah a kam'i ha.”

27Sarei, avier nut a Elim. Arna nut lera nauei inal lman iru (12) itpeia, didi inelsaru (70) iak atlera. Laha, avhl nmah kanuisar kavm'atr nrnren asn nauei lera.

Currently Selected:

Avruh 15: nmb

Highlight

Copy

Compare