Avruh 14
14
Arm'ertu a Isrel avv'el a p't nut na nata arna nadep' m'am'a
1Laha, a Mlin Eia ivr an a Musis kavr ti a, 2“Pavr anr arm'ertu a Isrel kavr ti apavvav hir kavm'atr nren arna nah nut a Pi Hahirut, a p't nut na nut a Miktul m'a nata, a tv'eliel na nut a Palsivun. Kam'i pavm'atr nren a nah nut lera a p'ak nata. 3Sena ti a Veru ipavr ti a, ‘Hilaha arm'ertu a Isrel avmln kavv'el mamln unanut arna nut kaka. Nut kaka itukarr.’ 4Sarei, Kana p'ani ti nln a Veru ipama kahua mau a ti ipatp'av'r, laha p'ani ti nahak ipav'a eia mau aranan a Veru m'er m'rnuran udlani. Laha, m'ertu a Itsip apavrndu ti Kana nv'i a Mlin Eia.” Laha, arm'ertu a Isrel avani inep'a nut a Mlin Eia ivri inap'ei.
5Laha, a mlin a Itsip irn v'nen a ti arm'ertu a Isrel atvruh sarei. Laha, a Veru m'er arm'ertu na parian udlani avvav v'ahienar kavmlanr m'ertu a Isrel, kavvr ti a, “?Sena v'ata hin nvan si lera? Ardu a Isrel avv'i m'ertu na pariad. ?Sena v'ata hin nvm'ahu anr avv'el?” 6Sarei, hin ien mamh kat na nauran kalav'r m'ertuan avsapei. 7Kalev' kat na naur inelnal iv'alm'sei (600) ml m'er kat na naur udlani a Itsip m'er mlinar m'rnuran udlani p'sev'. 8Sarei, a Mlin Eia iani ti nln a Veru, la iv'i mlin a Itsip ha, ima kahua mau, katkr anr arm'ertu a Isrel. V'eti arm'ertu a Isrel avhua mau kavruh. 9Laha, arm'ertu a Itsip, hus m'a kat na nauran a Veru udlani, m'er arm'ertu avua hus, m'er m'rnuran udlani, avtp'av'r kavuadaur a nut avm'atr nren a p'ak nata, asn nut a Pi Hahirut, asiv' sarei, kadav'a a Palsivun.
10Naran a Veru avmima, arm'ertu a Isrel avklau kavlar, laha kavtah istudau, laha ardu a Itsip avtkr anr. 11Laha, avvr an a Musis kavvr ti a, “Klev' kam'em' nvruh arna nut a Itsip sena v'ata? ?Kv'ah ti nut apatin m'ertu ihei arna nut a Itsip hin klev' kam'em' a ti p'vram'a arna nut kaka? Sena v'ata kani inap'i lera a kam'em' hin klev'la kam'em' arna nut a Itsip? 12Ntvvr sera v'nen laha anh arna nut a Itsip kavvr ti a, ‘Paln kam'em' a ti p'vv'i m'ertu na m'akarienar ardu a Itsip.’ Sena ti ip'as mau a ti p'vv'i dui na m'akarienar ardu a Itsip kasiv' ti p'vram'a arna nut kaka.”
13Laha, a Musis ivr anr m'ertu udlani, kavr ti a, “Mavdedrn. Pavlak ms, kavla nut a Mlin Eia ipalev'la kam'i ipanap'ei, la Hin ipani arna nahm'i udlani ha. Sena ti ardu a Itsip la kvlar dika ha, mkavlar ml naran kinkin. 14A Mlin Eia ipan sera nauram'i, laha kam'i pavlak ms uaki.”
15Laha, a Mlin Eia ivr an a Musis, kavr ti a, “Sena v'ata kvalau m'a Kana? Pavr anr arm'ertu a Isrel kavr ti apavv'el, amavm'alet. 16V'eti nakm paua napilaktam eia kah lm'am arna nata katupri iparu. Laha, ardu a Isrel apavv'el arna nadep' m'am'a kavv'el a p't nut na nata. 17Laha, Kana p'ani ti nlr ardu a Itsip ipama kahua, sarei apavsapa kam'i. Sarei, ti nahak ipav'a eia. Arna nahn a Veru m'er m'rnuran udlani, kat na nauran udlani m'er dui na husan udlani. 18Sarei, ti ardu a Itsip apavrndu mamh ti Kana nv'i a Mlin Eia, naran Kana nani ti nahak iv'a eia aranan a Veru, kat na nauran udlani m'er dui na husan udlani.”
19Sarei, Enselan Atua la Hin itauamu anr arm'ertu a Isrel udlani ha, ivav Hin kadama katauatah anr. Laha, p'knaran tva lil iatauamu anr ml, v'eti ivav hin kadama katauatah anr. 20Laha, ima kap'tir arna p't nut nar m'rnur a Itsip udlani m'er arm'ertu a Isrel udlani. Laha, p'knaran lera iani ti nut im't arna nahr ardu a Itsip udlani kani ti nut iren asnr m'ertu a Isrel udlani. Dav'a a ti arki avlak al m'alk amavmima asnr ki avlak arna nut ren arna lihat lera udlani.
21Sarei, a Musis iua lm'an eia arna nata, laha a Mlin Eia iani ti nalen iendan arna Is katvtv ihua arna lihat lera udlani, dav'a ti nata itupr hin kani ti nadep' im'am'a. 22#1 Kurin 10:1,2; Isrel 11:29.Laha, arm'ertu a Isrel avv'el a p't nut na nata arna nadep' m'am'a. Nata itupr hin kap'tir kanep'a sera naml iru arna m'ldaur m'a m'ir nar. 23Sarei, ardu a Itsip avtkr anr kavsapar a p't nut na nata, avv'i husan a Veru, kat na nauran, m'er dui na husan udlani.
24Laha, naran nut pa ti nut iparen, a Mlin Eia ip'ar m'rnuran a Itsip dan arna p'knaran tva la ip'tir kav'a nep'v'en ha, kani ti m'rnur a Itsip udlani avdedrn kavrn istu. 25Kani ti kat na naurar ihlhl al nalv, laha ihua a ti apavv'el ipalahml. Laha, ardu a Itsip avvr ti a, “P'vruh arna nahr ardu a Isrel, sena ti a Mlin Eia ien naurar kamlen nakd nvv'i ardu a Itsip.”
26Sarei, a Mlin Eia ivr an a Musis kavr ti a, “Paua lm'am eia arna nata a ti nata ipamam'alet ml kauakar arm'ertu a Itsip, m'er kat na naurar m'er dui na husar udlani.” 27Laha, a Musis iua lm'an eia na nata, dav'a ti, naran nut ima kadaren, nata imam'alet ml kalin udlen m'lnen. Laha, arm'rnur a Itsip avruh, v'eti nata iuakarr. Laha, a Mlin Eia iutakm ardu a Itsip udlani arna p't nut na nata. 28Sarei, ti nata im'alet kauakar kat na naur m'er dui na hus udlani m'er m'rnuran a Veru udlani la avtkr anr kavsapar arna p't nut na nata ha. Laha, nki kinkin iahamk isilv' ml. 29V'eti arm'ertu a Isrel avv'el mamh arna nadep' m'am'a a p't nata. Nata lera ima kanep'a sera naml lil arna m'ldaur m'a m'ir nar. 30Arna napn lera a Mlin Eia ilev'lar arm'ertu a Isrel al lm'ar ardu a Itsip. Laha, avla p'akr ardu a Itsip atvram'a sarei. Nata isranr arna nun. 31Naran lera arm'ertu a Isrel avla pari lil a Mlin Eia iani arna nut a Itsip. Laha, m'ertu a Isrel avdedrn kavv'ah a Mlin Eia kavv'ah ti a Musis iv'i m'ertu na m'akarienan.
Currently Selected:
Avruh 14: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
