गलातियनमन 1

जोहार

1मोंय पौलुस जे यीशु केर चुनल खास चेला हेकों आउर इ चिट्ठी के लिखाथों। मोंय केऊ आदमी चाहे आदमीमन केर दल से चुनल नी जाय हों, मगर मोंय हमर प्रभु यीशु मसीह आउर आबा परमेश्‍वर बटले चुनल जाय हों, जे यीशु के मुरदा में से जियालक। 2मोंय इ चिट्ठी के गलातिया परदेस केर कलीसियामन केर बिसवासी भाईमन केर नाँव में लिखाथों।

3मोंय प्रार्थना करोना कि हमर आबा परमेश्‍वर आउर प्रभु यीशु मसीह तोहरेमन उपरे किरपा करोक आउर शांति देओक। 4हमर आबा परमेश्‍वर केर इच्छा केर मोताबिक मसीह यीशु खुद के हमरे केर पापमन केर क्षमा लगिन बलिदान काइर देलक। ताकि हमरे इ दुनिया केर आदमीमन केर बुरा असर से बचल रहब। 5मोंय प्रार्थना करोना कि परमेश्‍वर केर स्तुति जुग-जुग होते रहोक। आमीन।

एके गो शुभ समाचार अहे

6मोंय ताजुब होई गेलों कि जे परमेश्‍वर तोहरेमन के मसीह केर किरपा से बोलालक, उके तोहरेमन एतना जल्दी छोइड़ के दोसर शिक्षा के मानेक लगला। 7सिरिफ एके गो शिक्षा अहे, मगर गोइठ एइसन अहे कि थोरेक आदमीमन तोहरे केर मन के भटकाएक आउर मसीह केर शिक्षा के बिगड़ाएक खोजैना। 8मगर, अगर हमरे में से केऊ चाहे स्वरग केर दूत हों, उ शिक्षा के छोइड़ के जेके हमरे तोहरेमन के सुनाय ही, केऊ आउर दोसर शिक्षा केर बारे में तोहरेमन के सुनाई, तो परमेश्‍वर उके जुग-जुग लगिन दंड देवी। 9जइसन हमरे पहिले कइह चुइक ही, तइसनेहें मोंय अब फिन कहोना कि उ शिक्षा के छोइड़ जेके तोहरेमन बिसवास काइर हा, अगर केऊ आउर दोसर शिक्षा केर बारे में सुनायला, तो परमेश्‍वर उके जुग-जुग लगिन दंड देवी।

10इ गोइठ पक्का अहे कि मोंय आदमीमन के खुश करेक निहीं मगर परमेश्‍वर के खुश करेक चाहोना। अगर मोंय अब तक आदमीमन के हें खुश करते रहतो, तो मसीह केर सेवक नी बनतो।

11हे बिसवासी भाईमन मोंय तोहरेमन के बताय देवाथों कि जे शुभ समाचार मोंय सुनाय हों, उ आदमीमन केर लिखल ना लगे। 12काले कि इके मोंय हमर पुरखामन से नी सीख हों, आउर ना ही केऊ धरम केर अगुवामन मोके सिखाय हैं। मगर यीशु मसीह मोके इ शुभ समाचार के देखाय हे। 13तोहरेमन सुइन हा कि कइसन मोंय यहूदीमन केर नियम के मानत रहों, आउर परमेश्‍वर केर कलीसिया केर बिसवासीमन के ढेइर हें सतात रहों आउर नाश करेक केर कोशिश करत रहों। 14मोंय अपन समय में, अपन जोड़ी यहूदीमन से ढेइर आगे रहों, आउर हमर पुरखामन केर शिक्षामन के सिखेक आउर मानेक लगिन ढेइर मेहनइत करत रहों। 15-16मगर परमेश्‍वर अपन बेटा के मोके देखालक, ताकि मोंय परजाइत आदमीमन के यीशु केर बारे में शुभ समाचार केर परचार करमूँ। परमेश्‍वर मोके मोर जनमेक से पहिलेहें चुइन लेलक, आउर अपन किरपा से मोके अपन सेवा करेक लगिन बोलालक। जब यीशु खुद के मोके देखालक, तो मोंय सलहा लेवेक लगिन केकरो ठिना नी गेलों, 17आउर ना जेमन मोर से पहिले से यीशु केर चुनल खास चेला अहैं उमन से मिलेक यरुशलेम शहर आलों। मगर तुरते अरब देस चाइल गेलों, फिन हूवाँ से दमिश्क नगर घूइर आलों।

18फिन तीन बरिस केर पाछे मोंय यीशु केर चुनल खास चेला पतरस से भेंट करेक लगिन यरुशलेम शहर गेलों, आउर उकर ठिना पन्द्रह दिन तक रहलों। 19मगर प्रभु में भाई याकूब के छोइड़ यीशु केर चुनल खास चेलामन में से आउर केकरो से नी भेटालों। 20परमेश्‍वर जानेला कि जे गोइठमन मोंय तोहरेमन के लिखाथों, उ बिलकुल सच हेके। 21इकर पाछे मोंय यरुशलेम शहर के छोइड़ सीरिया आउर किलिकिया परदेसमन में आलों। 22मगर यहूदिया परदेस केर कलीसियामन केर मसीही बिसवासीमन मोके तो कहियो नी देइख रहैं। 23मगर घरी-घरी एहे सुनत रहैं कि एक समय जे हमरे के सतात रहे, अब ओहे बिसवास केर शुभ समाचार केर परचार करेला। जबकि पहिले आदमीमन के मसीह में बिसवास करेक से रोकेक केर कोशिश करत रहे। 24से लगिन उमन परमेश्‍वर केर महिमा करैना, काले कि परमेश्‍वर मोके बिसवासीमन के सताएक वाला से बदइल के यीशु मसीह केर पिछे चलेक वाला बनाय देलक।

Currently Selected:

गलातियनमन 1: SCK

Highlight

Copy

Compare