१ कोरीन्थी 14
14
कलुङ् ॱस्यो़क्केन् धङ् केच्च्योक् ॱमीत् च्यीक्प लप्केन् १-२५
1झ्यम्ब झ्यीच्च्ये ॱनो़बे ॱसीम्ब खुर्च्यीत्। धम्बे थुगी कबप् घयेत् ॱसीम्बे यीक्नी लीन्ज्ये ॱनो़बे ॱसीम् खुर्च्यीत्। ॱनी हरुङ् मङ्स्योल कलुङ् ॱस्यो़त् छुबे कबप् लीन्ज्ये ॱनो़बे ॱसीम् खुर्च्यीत्। 2केच्च्योक् ॱमीत् च्यीक्पल ॱस्यो़क्केङ्गी तम् हुगो मील मेम्ब, को़न्ज्योक्ल ॱस्यो़क्केन् हीम्बल डोगेन् बेत्। हुगी केच्च्योक्की तम् हुगो मी ॱसी़ इक् ॱह मीत् घोगेन् बेत्। हुगो धम्बे थुगी झ्यीन ॱङीङ्बी़ केच्च्य घयेत् हुगी ॱस्यो़क्केन् बेत्। 3ॱनी यङ् कलुङ् ॱस्यो़क्केन् हुगो मी घयेत्ल ॱस्यो़क्केल्ल डोगेन् बेत्। हुगो मी घयेक्की धेप्प दील फेन् थोबल, ॱलोप्स्यीक् ॱङीच्च्येल धङ् ॱसीम्स तोङ्ज्येल बेत्। 4ॱनी यङ् केच्च्योक् ॱमीत् च्यीक्पल तम् ॱस्येप्पे लेमु हुगो रोरङ् ॱस्यो़क्केन् दीगी ॱसीम् दीलरङ् फेङ्गेन् बेत्। ॱनी कलुङ् ॱस्येप्पे केच्च्य हुगी छ्यो़ छोगी मी छङ्मल फेङ्गेन् बेत्। 5ङे ॱनो़बल खीत्रङ् कुरीक्की केच्च्योक् ॱमीत् च्यीक्पल तम् ॱस्यो़त् छुन, खीत्रङ्ल गस्सी युङ्गो़ट्टो ॱनो़गुक्। ॱनी खीत्रङ् कुरीक्की कलुङ् ॱस्यो़त् छुन, ॱसुम्ब हरुङ् हुले ॱल्हक्मागी गेस युङ्गो़ट्टो ॱनो़गुक्। घन्ड हीन् सीन्न केच्च्योक् ॱमीत् च्यीक्पल ॱस्येप्पे तम् हुगो छ्यो़ छोल फेन्दो युङे ढीक्ल हुगो ॱलोक्न ॱस्यो़क्केन् केत्ङीब मीत्न ॱनी, हुले कलुङ् ॱस्यो़क्केन् हुगो थोङ् छ्यीयाल ॱनेगेन् बेत्।
6पी़न्ज्यासो, ङ हुदु युङ्न धम्बे थुगी ङल ॱसल्न युङे केच्च्य, ॱस्यीब च्येङ्गी तम्, कलुङ्गी केच्च्य धङ् ॱलोप्से केच्च्य ङे खीत्रङ्ल ॱमत् ॱस्येप्प, ॱयोङ्मा केच्च्योक् ॱमीत् च्यीक्पल च्यङ्ज्यङ् तम् ॱस्येत्न ॱनी, हुगी खीत्ल घन्डे फेन् दी थोगेन्? 7ॱउमीक्की यप्च्य ॱलीमु हीन्, डम्लेङ् हीन्न अक्, हुगो ज्युरे यङ्ल हुगी दङ्गुक् दी गज्ये मत् युङ्न ॱनी, घन्डे दङ्यङ् हीम्ब हुगो घन्दुक् झ्यीन ॱयोङ्गी ॱयुव पीक् ॱस्यीगेन्? 8ॱमक्ल डोये यङ्ल ॱसा तोङ्गेङ्गी कङ्लीङ् दी भी़प्पे यङ्ल हुगी दङ्गुक् दी ॱसेज्ये मत् युङ्न ॱनी, ॱसु दी ॱमक् थुक्तु डोगेन्? 9ॱनी पी हीगो डस्सी खीत्रङ्गी खनी घो धक्पोक्मे केच्च्य ॱमत् ॱस्येत्न ॱनी, घन्दुक् झ्यीन हुगी धो़न् दी ॱयोङ्गी ॱह घो छुगेन्? हुगो धो़म्मीत् ॱलुङ्ल ॱस्येप्प डस्सील डोगेन् बेत्। 10जम्बुलीङ्ल केच्च्योक् ॱनम्ब गज्येन् यो़क्केन् बेत्। ॱनी म दी धो़म्मीक्की केच्च्योक् च्यीगी च्यीक् इक् मीप्प बेत्। 11हीगो झ्यीनी मी च्यीक्की ङल लबे तम् दी ङे ॱह मत् घोन ॱनी, हुगी ङ लुङ्ब ॱयोङ् छ्योगी मी हीम्ब डस्सी ॱसम्गेन् बेत्। ॱनी ङे एक् हुगो लुङ्ब ॱयोङ् छ्योगी मी हीम्ब डस्सीरङ् ॱसम्गेन् बेत्।
12खीत्रङ्गी उन धम्बे थुगी कबप् घयेत् गन्दीक्म लीन्ज्ये ॱनो़बे ॱसीम् खुर्कुक्। ॱनी हुगो म दी छ्यो़ छो छङ्मल फेन् थोज्ये यो़प्पल हरुङ् कबप् गज्येन् लीन्ज्ये ॱनो़बे ॱसीम् खुर्च्यीत्। 13हुगो झ्यीनी मी ॱसी़ केच्च्योक् ॱमीत् च्यीक्पल तम् ॱस्यो़क्कुक्क हुगी रोरङ्गी ॱस्येप्पे केच्च्ये धो़न् दी रोरङ्गीरङ् ॱयोङ्म घयेत्ल ॱस्येत्न टो़त् छुज्ये यो़प्पे ढीक्ल ॱसुव तोप् गोगेन् बेत्। 14घन्ड हीन् सीन्न हुन्दुक् झ्यीन ङे केच्च्योक् ॱमीत् च्यीक्पल ॱसुव तोप्को़त्न ॱनी, हुगो ङरङ्गी ॱनोक्सम् तङ्न तोप्केन् मेम्ब, ङे ॱसीम्बनी नुक्रङ् थो़न्न ॱसुव तबल डोगेन् बेत्। 15हुन्दुक् हीन्न ॱनी, ङ घन्ड झ्यीच्च्ये? ॱसुव तोप्केन् हुगो ङे ॱसीम्नी इक् नुक्रङ् थो़न्न तोप्केन्। यङ् ॱनोक्सम् तङ्न आक् तोप्केन्। तो़त्ली़ ॱलु ङे ॱसीम्नी इक् नुक्रङ् थो़न्न लीङ्गेन्। यङ् ॱनोक्सम् तङ्न आक्, लीङ्गेन्। 16रङ्गी ॱसीम्नी नुक्रङ् थो़न्न को़न्ज्योक्ल यस्सो कुट्टीन् पुबे यङ्ल उन यो़प्पे मी ॱयोङ्मागी रङ्गी थु छ्यी पुबे धो़न् दी ॱह दीरङ् मत् घोन ॱनी, घन्दुक् झ्यीन हुल थी़न्न आमेन् सीन्न सीर् छुगेन्? 17रङ्गी थु छ्यी पुब हुगो घन्दुक्मे लेबरङ् यो़त्न अक्, ॱयोङ्मागी ॱह मत् घोन ॱनी, हुगी ॱसीम्ल ॱमीत् फेङ्गेन् बेत्।
18खीत्रङ् कुरीक्ले ङे मङ्स्योल केच्च्योक् ॱमीत् च्यीक्पल तम् ॱस्यो़क्को़त्। हीगी ढीक्ल को़न्ज्योक्ल ङ थु छ्यी पुगेन्। 19ॱनी हीन्न अक्, छ्यो़ छोदु ङे केच्च्योक् ॱमीत् च्यीक्पल तम् छीक्तोक् तोङ्डक् च्यु ॱस्यो़प्पले त बोर ॱह घो छुगेङ्गी केच्च्यल ॱलोप्से तम् छीक्तोक् ॱङजो़त् च्यीक् ॱस्येत्न टेप्प फेम्बा युङेत् ॱनो़गुक्।
20पी़न्ज्यासो, खीत्रङ् ह हीनी झ्यीब दी भीजे ॱनोक्सम् डस्सी ॱमत् खुर्च्यीत्। बोर ङेम्ब झ्यीत् ॱमीत् ॱस्यीगेन् भीजे लेमु डस्सी धङ् ॱनोक्सम् ॱलीबे गेम्बा डस्सीगी ॱनोक्सम् तोङ्ज्यीत्। 21छ्यो़डीम्ल हीन्दुक् सीर ढीन यो़क्केन् बेत्।
चोव ज्यीन्दक्की हीन्दुक् ॱसुङ्गेन् बेत्। केच्च्योक् ॱयोङ् ॱयोङ् लप्केन्, लुङ्ब ॱयोङ्गी मी घयेक्की खनी ङे हीगी मीस्सीर् हील तम् ॱस्यो़क्केन्। ॱनी ॱस्येत्न आक्, हीबे ङे तम्ल मीत् नेङ्गेन् बेत्। (यशैया २८:११-१२)
22केच्च्योक् ॱमीत् च्यीक्पल तम् ॱस्यो़क्केन् हुगो छ्य स्योक्केङ्गी मील मेम्ब, छ्य मीत् स्योक्केङ्गी मील यीक् छ्यीबे तम् बेत्। ॱनी यङ् कलुङ् ॱस्यो़प्पे केच्च्य हुगो छ्य मीत् स्योक्केङ्गी मील मेम्ब, छ्य स्योक्केन् घयेत्ल फेन् थोगेन् यीक् छ्यीबे केच्च्य बेत्।
23छ्यो़ छो छुबे यङ्ल कुरीक्की केच्च्योक् ॱमीत् च्यीक्पल च्यङ्ज्यङ् तम् ॱस्येत्न ॱनी, उन ॱस्यो़च्च्ये मीप्पे मी धङ् छ्य मीत् स्योक्केङ्गी मी युङ्न यो़त्न ॱनी, हुबे खीत्रङ्ल ॱनोनर हीङ्गो़प्पेत् सीन्न सीर् छुगेन् बेत्। 24ॱनी हुगो मेम्ब, कुरीक्की कलुङ् ॱस्येत्न ॱनी, उन छ्य मीत् स्योक्केङ्गी मी धङ् ॱस्यो़च्च्ये मीप्पे मी युङ्न यो़त्न ॱनी, कलुङ् ॱस्येप्पे केच्च्य घयेत् दीगी हुगी ॱसीम्ल रोरङ्ल छ्येप्प फोक्कुक् ॱनो़न दीक्च्येन् हीम्ब छोर्तु ची़क्केन् बेत्। 25हुगी ॱसीम्ल यो़प्पे केच्च्य घयेत् दी तो़ङ्गेन् बेत्। हुनी हुगी को़न्ज्योक्ल छ्यक् छेन खेबुक्ल देत्न हुगी खीत्रङ्ल सीक्केन् बेत्। को़न्ज्योक् गन्दीय खीत्रङ्गी घुङ्न दुक्।
छ्यो़ छो छुबे यङ्ल ओ़ब डीक्प युङ् गोगेन् २६-४०
26हुगो हीन्न ॱनी, पी़न्ज्यासो, हज्यरङ् घन्दुक् झ्यीत् गोगेन् बेक्क ॱनी? खीत्रङ् घयेत् छ्यो़ छो छुबे यङ्ल च्यीक्ल ॱलु लीन्ज्येम यो़क्केन्, ॱनी च्यीक्ल यङ् ॱलोप्स ज्यक्च्येमे केच्च्य यो़क्केन्, ॱनी च्यीक्ल यङ् को़न्ज्योक्की ॱसल्तु ची़प्पे केच्च्य ॱस्यो़च्च्येम यो़क्केन्, ॱनी च्यीक्ल यङ् केच्च्योक् ॱमीत् च्यीक्पल ॱस्यो़च्च्येमे तम् यो़क्केन्, ॱनी च्यीक्ल यङ् हुगो ॱलोक्न ॱस्यो़त् छुबे धो़न् दी यो़क्केन् बेत्। ॱनी म दी हीगो कुरीक् छ्यो़ छोगी मी छङ्मे धेप्पल फेन् थोब युङ् गोगेन् बेत्। 27ॱनी केच्च्योक् ॱमीत् च्यीक्पल तम् ॱस्यो़क्केन् घयेक्की पालो झ्यीन मीरङ् ॱङीजो़त् ॱसुम्जो़त् च्यीक्कीरङ् ॱस्यो़च्च्यीत्। हुले ॱल्हक्मागी ॱमत् ॱस्यो़च्च्यीत्। ॱनी मी च्यीक्की हुगी धो़न् दी ॱलोक्न ॱस्येत्न टो़त् गोगेन् बेत्। 28हुगी धो़न् दी ॱलोक्न ॱस्येत्न टो़क्केङ्गी मी उन मीत्न ॱनी, हुगी केच्च्योक् ॱमीत् च्यीक्पे तम् हुगो छ्यो़ छो छोसदु मत् लप्च्यीत्। हुगी रोरङ्ल फेम्ब युङ को़न्ज्योक्लरङ् ॱस्यो़च्च्यीत्। 29ॱनी कलुङ् ॱस्यो़क्केन् घयेक्की मीरङ् ॱङीजो़त् ॱसुम्जो़त् च्यीक्कीरङ् ॱस्यो़च्च्यीत्। ॱनी ॱयोङ्म घयेत् दीबे हुल नम् च्येत्न तो़ज्यीत्। 30ॱनी च्यीक् लोङ्न कलुङ् ॱस्यो़प्पे यङ्ल उन दो़क्केन्, मी ॱयोङ् च्यीक्ल धम्बे थुगी केच्च्य ॱयोङ्मा च्यीक् ॱसल्तु ची़त्न ॱनी, ॱएम्मा दी देत्न तीङ्मा दील ॱस्यो़त्तु ची़च्च्यीत्। 31ॱनी खीत्रङ् कुरीक्की गन्दीक्म ॱह घोन ॱलोप्स्यीक् ॱङीच्च्ये यो़प्पल कलुङ् ॱस्यो़क्केन् कुरीक्की पालो झ्यीन ॱस्यो़च्च्यीत्। 32कलुङ् ॱस्यो़त् छुबे धम्बे थुगी कबप् यो़प्प च्येम्मे कलुङ्गी केच्च्य घयेत् दी रोरङ्गी ॱवङ्गी होक्ल युङ्गेन् बेत्। 33घन्ड हीन् सीन्न को़न्ज्योक् च्यानी स्यीव मीप्प मीत् डीक्पे लेमु मीत् युङ्गेन् बेत्। स्यीव डीक्पे लेमु युङ्गेन् बेत्।
को़न्ज्योक्की मी चङ्म घयेक्की छ्यो़ छो घयेत्न यो़प्पे लेमु डस्सी 34खीत्रङ्गी हुदु उक् छ्यो़ छो छुबे यङ्ल भुमु घयेत् ॱहरक्प दो़च्च्यीत्। हुबे तम् ॱस्यो़च्च्ये मीत् युङ्गेन् बेत्। हुब ॱयोङ्गी ॱवङ्गी होक्ल दो़त् गोगेन् बेत्। हीगो छ्यो़डीम्गी कल आक् यो़क्केन् बेत्। 35ॱनी भुमी़ रोरङ्गी ॱमत् ॱस्यीबे धो़न् ढीज्ये ॱनो़न खीम्दु ॱसोस्सोरङ्गी छ्योबुल ढी गोगेन् बेत्। घन्ड हीन् सीन्न छ्यो़ छो छुबे यङ्ल भुमी़ केच्च्य ॱस्येत्न, हुगो ङु छये लेमुल डोगेन् बेत्। 36को़न्ज्योक्की केच्च्य खीत् च्येन्नी थो़न्न युङ बक् ॱनो़गुक्क? को़न्ज्योक्की केच्च्य खीत्ल छ्युवक् युङ बक् ॱनो़गुक्क?
37उन मी ॱसी़ कलुङ् ॱस्यो़क्केन् हीन् ॱनो़ब झ्यीगुक्क, ॱनी यङ् ॱसी़ धम्बे थुगी कबप् यो़त् ॱनो़ब झ्यीगुक्क हुगी ङे ढीबे केच्च्य हीगो चोव ज्यीन्दक्की ॱनङे क बेत् ॱनो़ब ॱह घोव झ्यीज्यीत्। 38ॱनी हील हुगी मेम्बेत् सीक्को़त्न ॱनी, हुगोल अक् को़न्ज्योक्की मेम्बेत् सीन्न सीक्केन् बेत्। 39ङे पी़न्ज्यासो, कलुङ् ॱस्यो़क्केङ्गी कबप् लीन्ज्ये ॱनो़बे ॱसीम् खुर्च्यीत्। केच्च्योक् ॱमीत् च्यीक्पल तम् ॱस्येत्न युङ हुगो क ॱमत् च्यो़च्च्यीत्। 40खीत्रङ्गी घन्ड झ्यीन अक्, हुगो थी़म्ब डीक्प झ्यीन पम्बोक्म झ्यीत् गोगेन् बेत्।
Currently Selected:
१ कोरीन्थी 14: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
