१ कोरीन्थी 12
12
धम्बे थुगी कबप् घयेत् १-११
1पी़न्ज्यासो, धम्बे थुगी कबप् घयेक्की ढीक्ल खीत्रङ्ल ॱस्यो़च्च्ये मीप्प घयेत् ङे ॱस्यो़च्च्ये ॱनो़गुक्। 2खीत्रङ्ल एल्ला को़न्ज्योक् ॱस्यो़च्च्ये मीप्पे यङ्ल लम् ॱयोङ्ल फीन्न ॱउमीक्की कु घयेत्ल ॱसम्बे ॱवङ्ल ॱसोङ्न यो़प्प खीत्रङ्ल ॱस्यो़च्च्ये यो़क्केन् बेत्। 3हीगी ढीक्ल खीत्रङ्ल ङे हीगो ॱस्येत् योङ्। को़न्ज्योक्की थुगी झ्यीन मी ॱसी़ इक् येशुल ॱमो़त्मु सुक्ल ज्युक्च्यीत् सीन्न सीर् ॱमीत् छुगेन् बेत्। हुनी यङ् येशु ङे चोव ज्यीन्दक् हीन् सीन्न मी ॱसी़ सीगुक्क हुगो धम्बे थुगी झ्यीन मेन्द, सीर् ॱमीत् छुगेन् बेत्।
4थुज्यीगी कबप् ॱनम्ब गज्येन् युङ्गेन् बेत्। ॱनी म दी हुगो ॱनङ्गेन् धम्बे थु दी च्यीक् बेत्। 5स्यप्च्यी़गी ले ॱनम्ब गज्येन् युङ्गेन् बेत्। ॱनी म दी हुगी चोव ज्यीन्दक् दी च्यीक् बेत्। 6को़न्ज्योक्की ॱस्यीक्की झ्यीक्केङ्गी लेमु ॱनम्ब गज्येन् युङ्गेन् बेत्। ॱनी हुगो कुरीक् मी रीदङ् रीगी लम् ज्यी़त्नी डुप्तु ची़क्केन् को़न्ज्योक् दी च्यीक् बेत्। 7मी रीदङ् रील धम्बे थुगी घन्दुक् झ्यीबे ॱमेल्लम् ॱनङ्न यो़दङ् हुगो मी कुरीक्ल फेन् थोज्येगी ढीक्ल बेत्। 8मी च्यीक्ल धम्बे थुगी झ्यीन झ्यी़रीक् च्येम्मे तम् लप्तु ची़क्केन् बेत्। ॱनी यङ् मी ॱयोङ् च्यीक्ल धम्बे थु च्यीक्कीरङ् ॱस्यीब च्येङ्गी तम् लप्तु ची़क्केन् बेत्। 9ॱनी यङ् मी ॱयोङ् च्यीक्ल धम्बे थु च्यीक्कीरङ् छ्य स्योक् छुबे ॱस्यीक् ॱनङ्गेन् बेत्। ॱनी यङ् मी ॱयोङ् च्यीक्ल धम्बे थु च्यीक्कीरङ् नेप्प ढक्तु ची़च्च्येमे थुज्यीगी कबप् घयेत् ॱनङ्गेन् बेत्। 10ॱनी यङ् मी ॱयोङ्म च्यीक्ल ॱस्यीक् छ्यीम्मी़ ले झ्यीत् छुज्येमे ॱस्यीक् ॱनङ्गेन् बेत्। ॱनी यङ् मी ॱयोङ्म च्यीक्ल कलुङ् ॱस्यो़त् छुबे कबप् ॱनङ्गेन् बेत्। ॱनी यङ् च्यीक्ल धम्बे थुगी ङो़गी हीन् धङ् जी़म ङो़गी हीन् हुगो ॱयुव पीक् छुबे कबप् ॱनङ्गेन् बेत्। ॱनी यङ् च्यीक्ल केच्च्योक् ॱमीत् च्यीक्पल तम् ॱस्यो़त् छुबे कबप् ॱनङ्गेन् बेत्। ॱनी यङ् च्यीक्ल केच्च्योक् ॱमीत् च्यीक्पल लबे तम्गी धो़न् दी ॱलोक्न ॱस्यो़त् छुबे कबप् ॱनङ्गेन् बेत्। 11हुन्दुक् झ्यीन ले ॱनजो जेक्केन् धम्बे थु दी च्यीक्रङ् बेत्। हीन्दुक् झ्यीबे कबप् खोङ्गी ॱसु ॱसुल ॱनङ्ज्ये ॱनो़गो़दङ् हुगो रीदङ् रील ॱनङ्गेन् बेत्।
सी़ दी च्यीक् यल्लक् दी गज्येन् १२-३१
12कोलीमीगी सी़ल यल्लक् गज्येन् युङ्गेन् बेत्। ॱनी यल्लक् गज्येन् यो़त्न अक्, सी़ दी च्यीक् बेत्। ॱनी हीगो डस्सी दी क ख्रीष्ट् सी़ च्यीक्तङ् छ्येत्मीत् यो़क्केन् बेत्। 13यहुदी हीन्, ज्यी़त् ॱयोङ्गी मी हीन्, रङ्मो़ मीप्पे ॱयोक्पु हीन्, यङ् रङ्मो़ च्येम्मे मी हीन्, हज्यरङ् ॱसुरङ् हीन्न अक्, कुरीक् सी़ च्यीक् युङे ढीक्ल धम्बे थु च्यीक्की लम्नी बप्तीस्ल स्युब बेत्। कुरीक्की थुङ्गेङ्गी धम्बे थु दी इक् हज्यरङ्ल च्यीक्रङ् ॱनङ्न यो़क्केन् बेत्।
14सी़ल यल्लक् च्यीक् मेम्ब, गज्येन् युङ्गेन् बेत्। 15ॱनी कङ्बे ङ ॱनी लक्प मेम्ब, कङ्ब हीन्। ङ सी़गी यल्लक् मेन् सीन्न सीक्को़त्न अक्, हुगो यल्लक्रङ् बेत्। 16ॱनी यङ् आम्ज्योक्की ङ ॱनी ॱमीक् मेम्ब, आम्ज्योक् हीन्। ङ सी़गी यल्लक् मेन् सीन्न सीक्को़त्न अक्, हुगो यल्लक्रङ् बेत्। 17सी़ छङ्मल ॱमीक् च्यङ्ज्यङ् झ्युङ्न ॱनी, घोज्येम दी घन् दीगी घोगेन्? ॱनी यङ् सी़ छङ्मल आम्ज्योक् च्यङ्ज्यङ् झ्युङ्न ॱनी, ॱनुम्ज्येम दी घन् दीगी ॱनुम्गेन्? 18हुन्दुक् मेम्ब, सी़गी यल्लक् घयेत्ल को़न्ज्योक्की थुल ॱनो़बल रङ् रङ् ॱसोस्सोल ले को़न स्यक्न यो़क्केन् बेत्। 19ॱनी सी़गी छप्पुल यल्लक् च्यीगी च्यीक्रङ् यो़त्न ॱनी, हुनी सी़ दी घङ्गोल सीक्केन्? 20सी़ल यल्लक् गज्येन् युङ्गेन् बेत्। ॱनी यो़त्न अक्, म सी़ दी च्यीगी च्यीक्रङ् बेत्।
21ॱमीक्की यङ् लक्पल रङ् ङल मीत् गो़बेत् सीन्न सीर् ॱमीत् छुगेन् बेत्। ॱनी यङ् गो़ कङ्बल रङ् ङल मीत् गो़बेत् सीन्न सीर् ॱमीत् छुगेन् बेत्। 22हीगो मेम्ब, थोङ् छ्यीस्स्यो मीप्पे सी़गी यल्लक् घयेत् दी क गो़स्योल युङ्गेन् बेत्। 23ॱनङ्ज्युङ् च्येम्मे सी़गी यल्लक् घयेत्ल हज्यरङ्गी पम्सो तो़क्केन् बेत्। ॱनी पम्ज्ये मीप्पे यल्लक् घयेत् यङ् हज्यरङ्गी मङा तुम्गेन् बेत्। 24ॱनी पम्सो च्येम्मे यल्लक् घयेत् तुम् मीत् गो़ब युङ्गेन् बेत्। थोङ् मीप्पे यल्लक् घयेत्ल तो़प्प युङ्ज्येल हुगी सी़ल को़न्ज्योक्की डीक्न स्यक्न यो़क्केन् बेत्। 25हुगो ॱमत् छुङ, रङ् रङ् ॱसोस्सो भीज्येल मेम्ब, सी़ च्यीक्की यल्लक् हीम्ब झ्यीनी, च्यीक्तङ् च्यीक्ल त गोगेङ्गी ढीक्ल डीक्न यो़क्केन् बेत्। 26यल्लक् च्यीक्ल दुक्प नोङ्न ॱनी, यल्लक् कुरीक् दुक्प गुर्रो झ्यीक्केन् बेत्। ॱनी यङ् यल्लक् च्यीक्ल तो़प्प युङ्न ॱनी, यल्लक् कुरीक्ल गेस युङ्गेन् बेत्।
27ॱनी ख्रीष्ट्की सी़ दी क खीत्रङ् घयेत् बेत्। खीत्रङ् रीदङ् री खोङ्गी सी़गी यल्लक् रीदङ् रील डोगेन् बेत्। 28छ्यो़ छो छङ्मल को़न्ज्योक्की को़न यो़प्पल गोम छ्यीस्स्यो दील ठीक्नल घयेत् युङ्गेन् बेत्। हुगी होक्नी कलुङ् ॱस्यो़क्केन् घयेत्, हुगी होक्नी चयेलम घयेत्, हुनी ॱस्यीक् छ्यीम्मी़ ले झ्यीक्केन् घयेत्, हुनी नेप्प ढक्तु ची़च्च्येमे कबप् च्येम्म घयेत्, हुनी फेन् थोबे दगु झ्यीक्केन् घयेत्, हुनी गोयो़त् झ्यीक्केन् घयेत्, हुनी केच्च्योक् ॱमीत् च्यीक्पल तम् ॱस्यो़त् छुगेन् घयेत् को़न युङ्गेन् बेत्। 29ॱनी हुब कुरीक् ठीक्नलल को़ब बेक्क ॱनी? हुब कुरीक् कलुङ् ॱस्यो़क्केन् बेक्क ॱनी? हुब कुरीक् चयेलम बेक्क ॱनी? हुब कुरीक् ॱस्यीक् छ्यीम्मी़ ले झ्यीक्केन् बेक्क ॱनी? 30हुब कुरीक्ल नेप्प ढक्तु ची़च्च्येमे कबप् यो़क्केन् बेक्क ॱनी? हुब कुरीक्की केच्च्योक् ॱमीत् च्यीक्पल तम् ॱस्यो़त् छुगेन् बेक्क ॱनी? हुबे केच्च्योक् ॱमीत् च्यीक्पल लबे तम्गी धो़न् दी कुरीक्की ॱलोक्न ॱस्यो़त् छुगेन् बेक्क ॱनी? 31ॱनी थुज्यीगी कबप् गस्स्यो घयेत् खीत्रङ्गी ॱसीम्बे यीक्नी लीन्ज्ये ॱनो़ब खुर्च्यीत्।
हरुङ् ङे खीत्रङ्ल कुरीक्ले गस्स्योगी लम् च्यीक् तो़न् योङ्।
Currently Selected:
१ कोरीन्थी 12: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
