ROMMI 4
4
Abraham no Achipikalu
1Tishi aye ningu ye ashi lo ni sü Abraham ye kiu phulue pini kea? 2Kughengu Abraham ye akümla lono achipikalu püaghi aye, pa ye Alhou zülo ye kumo kemu qhezalu kepu kiuala aghini cheke. 3Ikemu Kuchoyesü lo kiu yepüani kea? “Abraham no Alhou pülü, eno ti ye achipi shi kihi tsüe.”#Bot 15:6 4Timi khuu no mla cheni keno, pa jume ye kümsagho lakhi shi kumono pa no ithulu küzüpu kepi kihi cheni. 5Eno khuu no mlamo namu alhoksami pesü achipiu shitsü chekeu Lhou pülüni keno, pa küpülü ye achipikalu kepushi kihive tsü cheni, 6David ghi Alhou no khuno pesü akümla nguno khalau no achipiu shi kihive tsü keno, pano kümghapu tsa ishi yepüa tsüe:
7“Khuno kümla lhoksa peve tsüni,
eno khuno xine jonhave tsüni keno akümghapue;
8Ampeu no khuno xine kihi tsümoni keno akümghapue.”#Lesh 32:1,2
9Kükümgha hipau ye aphighüyiko ghave kemi sala likhi keo, ghamo kemi sala ghi kea? Kughengu ningu no pi akeu ye Abraham pesü achipikalu keu ye pa küpülü kihilu tsükeu lono ke. 10Imaye, kishi kihitsü kea? Ti ye pa no aphighüyiko ghamphi lono keo tithiu no kea? Ghave kethiu no kumoe, tipa züuno ke. 11Pa ye ghamphi lonomu aküpülü vecheo achipiu shi xüche kehu ti mekha keu shi aphighüyiko kügha michipu ithulue. Ti ye khunono aphighüyiko ghamo namu pülüni keno Abraham pelo panoqo papu shipeni keu kimji lono ke, tishikeu lono panoqo ghi achipikaluve kemie pi kihi tsüniye ke; 12tihutoi itaghi khunono aphighüyiko ghaveke likhi kumono aküpülü lo ghi ni pu Abraham no ayiko ghamphi lo cheche keu nepa lo cheghini keno, panoqo papu ghi shipeniye ke.
Aküpülü Vecheo Pikiqhitsa Kupu
13Kughengu Abraham no ayeghiqha ighilu nanie pi pa eno pa laghami lau pikiqhitsa tsükeu ye Ayezah lono kumono aküpülü vecheo Alhou lau achipikalu keu lono ke. 14Tsala Ayezah papemi no amheghi kiyighimi shivepe aye, aküpülü ye ame kühave no pikiqhitsa ye abokümsa shinia. 15Kughengu Ayezah no aloghu süghi cheni, ikemu khile Ayezah küha keno, tile ye küqüve kepu ghi kühae.
16Ikehu pikiqhitsa ye aküpülü shou bepe ani, tishikeu lono tino küpükini shou bepe no Abraham laghami—ti ye Ayezah pelu kemi likhi kumono pa küpülü küsajelu kemi ghi, kümtsü no ithulu peniye ke, kughengu aküpülü lo pa ye ningu kümtsü papu ke, 17ti ye ishi yepüake toi, #Bot 17:5,18“I no o pelo ashiaye kutomo papu shilupe.” Kithimi xüputhu eno kiumu küha keu lono kümtsü pulhosü keu Lhou—Khuu Abraham no pülüche keno, Pa zülo ningu ye Abraham tianuliqo ke. 18Pa vilo, #Bot 15:5“O lagha ye kutomo shi nani” ipi püake toi pa ye lakujupu küha mithe keghi lajuqhiyi ashiaye kutomo papu shi nani kepi pülülue. 19Pa shiaji jukelo (ampe aqhe piqi shiuve keke) pa ye thiveke kumlhoshi akepu, moaye Sarah no anuhami ke tighi kiqiju kepushi akemu hipaqo no pa küpülü miqemleive pemoe. 20Pülükümlapu kiu nomu pa pelo Alhouw pikiqhitsa lono iqeve pemoe, ikemu ajuküvü pesü Alhou tsükeu lono pa ye aküpülü lo mtotoi thuwuve, 21eno Alhou no kiu piqhi püa keno shilu nanie pi thebei ithive. 22Hi ghenguno pa küpülü huno pa ye “achipikaluve keu shi kihiluve tsüe.” 23Ikemu, “Ti kihiluve tsü” ipikeu tsa ye pa ghengu likhi no ye ke kumono 24ningu ghengu ghi ke. Ningu khunono akithi lono ni Mpeu Jisü xüputhu keu Lhou pülü cheni keno kümtsü lau ghi ti kihitsü nani. 25Alhou no ni xine ghenguno Jisü pesü akithipu lo ikhiphetsü püzü ningu pelo achipikalu penike xüputhuve ke.
Currently Selected:
ROMMI 4: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
