ROMMI 1
1
Pethakütsü
1Paul, Khristo Jisü qüaxeu, apostolmi shi peniye kulu, eno Alhou tsakiviu ghenguno kishe kütüta shive keu no ye ani. 2Atsape ti ye Pa no khaghi no Paw tungkupmi vecheo Kuchoyesü lono piqhi püakeu, 3Pa Nu, khuu timi lhoaye gholau no pini aye David polo kughukomi 4kemu Pa lolo akimthe nguagha akeu kiqilou ye Pa no akithi lono xüthughive keu vecheo aküka lo akeu Alhou Nu shi penike shuphetsü keno, ni Mpeu Jisü Khristo ghili huke. 5Pa vecheo ningu no küpükini eno apostol kümlapu ithulu keu ye Pa je lono shiye kümtsü sasü aküpülü ghokulu lo ighi niye ke, 6ti ye nongu khunoqo Jisü Khristo laumi shi peniye kuluve akeno kümtsü kihi küqha anie.
7Rome lo khunoqo Alhou no qhuivü keu lono akimtheshi xü peniye kulu keno: ni Pu Alhou eno Ampeu Jisü Khristo launo ighi keu küpükini eno aloinokütsü nongu gholo alo.
Rome lo Wunishi Kümsü
8Atüghüshi, nongu kümtsü ghenguno I no Jisü Khristo vecheo I Pu Alhou shikimthi ani, kughengu ayeghiqha kümtsü lo nongu küpülü ghili kügha anike. 9Kughengu I nguagha kümtsü pesü Anu tsakiviu sheshu keu vecheo Alhou khuu I no huthu acheni keno, Pa no Iw thopike ni ye tamono nongu jeku 10alhokuthu lo inikhu acheni, eno kishila shino ashekhalau nomu Alhou pulou lono nongu lau ighilu penike ni ye ado kivi khu acheni ke. 11Kughengu ni ye nongu ithuluni shikütü acheni, tishianguno I no aghungulo gho hami pesü nongu lau küsaje no shikumto tsüniye ke— 12tishino ningu ye lakhi no lakhi küpülü vecheo shikumto kileluni kehue. 13Aküsamiqo, nongu pelo mthano apeni shimoye pi ani, ni ye ghuthu kutomo nongu lau eno Jewkumomi lau ghi ighi no nongu gholo ghile hunike kughu ighivae (ikemu ishi kutolo lakhave ke likhie). 14Ni ye Greekmi ngo ayekümthami lau, ithishe kemi ngo mbomzümi lau ghi api xapu anie. 15Tighenguno nongu khunoqo Rom lo ani keno ni ye atsakiviu pesü nongu lau ghi pikülhani ke khekulhoshi anie.
Aküpülü lono Xü nani
16Ikehu ni ye atsakiviu ghenguno kujove chemoe, kughengu ti ye pülülu kemi kümtsü, atüghüshi Jewmi eno tithiu no Greekmi ghi, xalu nike ghenguno Alhou küka ke. 17Kughengu ishi yepüake toi, “Amikuchomi ye aküpülü lono xülu nani,”#Hab 2:4 atsakiviu lo ghi Alhou mikucho ye aküpülü lono huthu eno aküpülü lono kishekha keu pephe piye ani.
Amikuchokumomi Shou Aloghu
18Kughengu Alhou kümthami ngo amikuchokumomi khunono pano mikuchokumo lono kuchou qhasüpe acheni keno, kümtsü shou Alhou loghu ikughini ke kungugha lono pephe piyevae. 19Kughengu Alhou ghili kiu ithi kepu ani keno Pa no panoqo piyeve akehu ti ye panongu zülo thoqhalei ani. 20Kughengu ayeghiqha lhoke lono Alhouw ithukümla lho, ti ye Paw lhokta küka eno akimthe lhoaye, huye pulhosü keu thimeqo lono mtsümishei ithikuthulu ighivae. Ikehu panongu ye ajeku kiumu kühavae. 21Kughengu panongu no Alhou ithi anamu Pa ye Alhou kepi agigihu momu shikimthi tsümove, tike kumono pano kükümsü ye ame kühave, eno pano mbomzü mlo huno zümoi kitheve. 22Alokütsümie pi pükha ghi panongu ye mbomzümi ilhouve, 23eno thimoni keu Lhou juküvü theli lo thiveni keu timi, ashi-aghau, momu itikiche lhoxü julho kimihiqou sasü küsükilive.
24Tighenguno panongu no pano dolo aphimpi ghi gihumo no niqhinilai keu kümla shinike mineqhiyi ache ketoi Alhou no panoqo ikhiphepe tsüve, 25ti ye panongu no Alhouw kuchou vehu pesü akimki sasü küsükilive, eno Pulhoküsüu, khuu pülhapuju lo sheqhe aküzüpu keno, iyei, tishi pelo, Pa züqhulo pulhoküsü thime mlla eno huthu auve keu lono ke.
26Hi ghenguno Alhou no panoqo pelo ashilo ghakiqipu shi auve penike ikhiphepe tsüve. Totimiqo no alhoaye lo aphimpi peitha chekeu theli lo alhoaye kumomithe keu sasü küsükilive, 27titoi kiptimiqo ghi alhoaye lo totimi sasü ashiaji küqha chekeu ye qhive no pitipüza lakhino lakhi ghapiqi kileni keu no chhitoive, kiptimi no kiptimi sasü akukujopu kümla shiuveke lono pütüta jume panongu no aghime ithulu püani.
28Panongu no Alhouw kuchou ghili ithini keu pulomo keke panongu pelo shimo kepu shiauve peniye Alhou no shiküpsapu pe pano kükümsü shipuqove tsü. 29Ikehu panongu ye achipikumo, kixikila, akughuvu, aghichikupo, lhoaye no chhitoi ani. Pano lolo anhekushu, ghikiqhi, kuqhu-kidikumo, pishikiqhi, kütami lau alhoksa shini keu likhi ke. Panongu ye timi xikishimi, 30alatsa kipimi, Alhou kimthimi, timi thaigha kichemi, aqheküza akülakimi, alhoksa kiyiqimi ke, apuaza gholumo kemi, 31mbomzümi, piqhive no papemo kemi, akükümsü küha kemi, eno küpükini küha kemi ke. 32Alhou mikucho zakütsü kiqilo khunono hikithipu shicheni keno thive küzüe pi ithi apülaghi panongu no hipaqo shike likhi kumono kütami no shi aghike lo ghi pano kupulo tsü cheni.
Currently Selected:
ROMMI 1: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
