IPEKULU 6

Alhou no Xaphe nike Piqhi

1Ikemu Ampeu no Moses vilo pi, “Itehi I no Pharaoh lau kiu shiniye ani keno nono ithulu nani; kughengu au kumto vecheo pa no panoqo puwuve nani, eno au kumto vecheo pa yeghi lono panoqo hapheve nani.”

2Alhou no Moses pütsa no pi, “Ni ye Ampeu ke. 3Ni ye Akughushu Lhou shi Abraham, Isaac, eno Jacob lau ipeghi, ikemu I je, Ampeu, pesü Ni ye panongu lau kilethi moe. 4Canaan yeghi khipau lo panongu no kachenami shi ache keno tipau panoqo tsünie pi I no panongu sasü ghi Iw puloshoqhi shike. 5Tinguno alau, I no Iw timi Israelmi, khunoqo Egyptmi no aqüaxe shi tsüghape ani keno, panoqo mloghuju chiluvae, eno I no Iw puloshoqhi kümsüchile luvae. 6Tighenguno Israelmi vilo pilo, ‘Ni ye Ampeu, eno I no Egyptmi makho kimshi lono nongu saipeghive nani, eno I no panoqo qüaxe lono nongu xaphe luve nani, I no I u kumto ngo küghakütha kümla kije vecheo nongu qhüchile luve nani. 7Iw timi shinike I no nongu ikhiluve nani, eno I no nongu Lhou shive nani, eno nongu no Ni ye Ampeu nongu Lhou, Egyptmi makho kimshi lono nongu saipeghi keu kepi Ni ithi nani. 8I no Abraham, Isaac, eno Jacob noqo lau tsünie pi tushoqhi püakeu yeghi lo nongu saghi nani. I no tipau amheghi shi nongu tsü nani. Ni ye Ampeu ke.’” 9Ikehu Moses no Israelmi pütsa, ikemu panongu no Moses tsa ini tsümoe, ti ye pano ghungu ghüthiküsü eno ayikushu qüaxe lo ake ghenguno ke.

10Tighenguno Ampeu no Moses vilo pi, 11“Ilo lo, Egypt kükau Pharaoh vilo Israelmi pelo pa yeghi lono ipeve penike pilo.” 12Ikemu Moses no Ampeu vilo pi, “Julo, ni ye atsa düdüshi piche kemi, eno Israelmi thotsü I tsa initsü moke kishino Pharaoh no ini tsüni kea?” 13Ikemu Ampeu no Israelmi ngo Egypt kükau Pharaoh ghenguno Moses ngo Aaron pama azah tsü: ti ye Egypt yeghi lono Israelmi saipeghi peniye ke.

Moses ngo Aaron Laghaphi

14Hipaqo no pütüta lilo akütsü: Israel nu anoghiu Reuben nuli: Hanoch, Pallu, Hezron, eno Carmi; hipaqo no Reuben laghami ke. 15Simeon nuli: Jemuel, Jamin, Ohad, Jachin, Zohar, eno Shaul, pa ye Canaanmi totimi nu lakhi ke; hipaqo no Simeon laghami ke. 16Hipaqo no Levi nuli, pano tiqheli kiqi lono: Gershon, Kohath, eno Merari, Levi küxü mpe ye 137. 17Gershon nuli: Libni eno Shimei, panoqo lagha kiqi lono. 18Kohath nuli: Amram, Izhar, Hebron, eno Uzziel, Kohath küxü mpe ye 133. 19Merari nuli: Mahli eno Mushi. Hipaqo no Levi laghami ke, pano tiqheli kiqi lonoe. 20Amram no pa nipu Jochebed, papu chepu luve, eno li no pa lau Aaron ngo Moses punutsü, Amram küxü mpe ye 137. 21Izhar nuli: Korah, Nepheg, eno Zikhri. 22Uzziel nuli: Mishael, Elzaphan, eno Sithri. 23Aaron no Elisheba, Amminadab nga eno Nahshon chepu pa nipu shinike luve, eno li no pa lau Nadab, Abihu, Eleazar, eno Ithamar punutsü. 24Korah nuli: Assir, Elkanah, eno Abiasaph; hipaqo no Korah laghami ke. 25Aaron nu Eleazar no Putiel ngaqo dolo lakhi pa nipu shinike luve, eno li no pa lau Phinehas punutsü. Hipaqo no Levi lagha dolo ali lo akütsü ke.

26Aaron ngo Moses pama vilo Ampeu no pi: “Israelmi amqo kiqi lono Egypt yeghi lono saipeghi lo.” 27Egypt yeghi lono Israelmi saipeghi nike Egypt kükau Pharaoh pütsa keu ye Moses eno Aaron hipama ke.

28Egypt yeghi lo Ampeu no Moses pütsake tsalani, 29Ampeu no Moses vilo pi, “Ni ye Ampeu ke; Egypt kükau Pharaoh vilo I no o vilo pi keu kümtsü pilo.” 30Ikemu Moses no Ampeu vilo pi, “Julo, ni ye atsa düdüshi piche kemie. Pharaoh ye kishino I tsa inini kea?”

Currently Selected:

IPEKULU 6: SUMRVBSI

Highlight

Copy