Hiburu 9

Logo baŋa wara-vwei dem taane

1A lage a ta da-yiga ni-gwonim dem taane mo. De déem jege chullu telo na bere nɔɔna ba na wó taa zuli Wɛ tei o wara-jei selo na wo logo baŋa ne to wone mo. 2Wɛ wara-vwei dem konto wo nam pɔɔre di selei mo. De kwaga diga kam yere mo ‘Wɛ di-yuu kom’, ye ka jege min-zwon-zego kom.#9:2 min-zwon-zego kom = sabu-seŋa woŋo kolo na jege min-zwonnu terepɛ zega jei to. Tabolo de maa wora ye bworobwooru telo na ye Wɛ nyem to maa tigi ko baŋa ne.#Nwoŋim 25:23-40 3Di-yun-gala de maa wora, ka na tiini ka ye wose Wɛ ŋwaane to mo, ye gare-jale pale de gare de che-ka. 4Sabu-seŋa Wɛ kaanem dakaa maa zege da, ba na zwɛ wonnu telo lwom na ywomma to ka baŋa ne ba pa‑o. Wɛ ni-gwonim dakaa kam de maa wora ba na mɛ sabu-seŋa ba ma kwoli-ka. Ka wo kom maa jege sabu-seŋa zoŋa kalo de wo na jege wodiu kolo yere na ye ‘Manna’ to. Nacheiga kalo na ye Aron nyem ye ka déem puli vɔɔro to de maa wora Wɛ ni-gwonim dakaa kam wone, ko woli de kandwa-pelɛ selei Wɛ nia fuga kam na popone se baŋa ne to.#Nwoŋim 16:33; 25:10; Jeelim 17:8-10 5Dakaa kam baŋa maa ye jeiga kalo Wɛ na saare nabiina wɛleera mɛ to. Ba déem ma ke cherubi selei nyenyero ba zege da. Se maa bere Wɛ nenɔŋ-fɔrɔ kom ye se vɔna yam kwoli dakaa kam baŋa.#Nwoŋim 25:18-20

Ko nam daa dae se dé ŋɔɔne wonnu tem konto taane dedɛ.

6Wara-vwei dem de de wonnu tem na wora konto to, Wɛ kaanem tiina bam yeini ba zo de kwaga diga kam dɛ maama mo se ba toŋe ba totoŋa yalo na pae Wɛ jege zula to. 7Ko nam ná ye di-yun-gala kam, Wɛ kaanem nakwe tu wom yerane mo jege chwoŋa se o zo ka wo bedwe bene maama wone. Wonto nam ná lage o zo, o wó kwei vara jana mo o ja zo se o ma kaane Wɛ, se ko saare o tete wɛleera, se ko daare ko saare tusim kikia yalo o dwonna nabiina na ke ye ba yeiri ya ni ne to.#Chullu 16:2-34; Jeelim 18:1-7

8Wɛ Sin-laao kom laam mae kikia yam konto maama na ye tei to mo ko bere debam we, chwoŋa déem ya tera se nɔɔna wane ba zo Wɛ di-yun-gala kam. Vwei dem dedaane de kwaga diga kam maama ta na zege to bere we di-yun-gala kam ni ta wo pore mo. 9Ko maa ye maana mo ko bere debam zem se dé lɔre Wɛ chwoŋa tɔgem na ye tei to. Ko bere we vara de pɛɛra yalo maama nabiina na kwei ba ma kaane Wɛ to bá wane ya zeini wolo na kwei-ya o ma zuli Wɛ to se ya pa o bochare kwɛ fase Wɛ seeni. 10Kaanem kikia yanto dwoŋi jege kuri logo baŋa seeni yerane mo, ko ná ye wodiu dim, naa bochare digiru zarem ŋwaane. Ya maama tɔge nabiina chullu mo, ye ya jege kuri se ko taa vei maŋa kam Wɛ na wó fɔge o tiŋi o chwo-doŋa kam to.

Yezu Krista jana bam taane

11Wɛ laam tiŋi o chwo-doŋa kam mo de Yezu Krista na tu o ba o ji o kaanem nakwe tu debam ŋwaane to. Ko ma pa dé jwoŋi o ŋwe-doŋa wo-laaro telo na maŋe te wora to. Yezu na zo Wɛ tei debam ŋwaane to, ko ye Wɛ sɔŋɔ chekke mo o zoa, ye konto tiini ko lana ko dwoi logo baŋa vwei dem. O na zo mɛ to dae vwei delo nabiina na pugi to. 12O ma vo o zo Wɛ tete di-yun-gala kam. Ko ye bedwe yerane mo o zoa, ye o laam wora taa wuu. O nam wo kwei bone naa na-bale jana o ja zo se o ma kaane Wɛ. Ko maa ye o tete jana mo o mɛ o ŋwe debam wɛleera jene, ye o jwoŋi debam o ke Wɛ jeŋa ne se ko taa vei wuu. 13Wɛ ni-dwoori dem bere we, nɔɔno wolo bochare ná jege digiru, ba jege se ba kwei bone jana naa na-bale jana ba gwaane de na-chwɛ delo ba na zwɛ to tentwarem mo ba ma mi nɔɔno wom yera. Keim dem konto mo yeini de zare o yera digiru tem ye de daare de fɔge‑o Wɛ chwoŋa wone.#Chullu 16:15-16 14Ko na ye konto to, Yezu na tega ye o jana nwoŋi to, ko bá tiini ko fɔge nɔɔna bochara mo na? O ma tɔge Wɛ Jworo kom na wo o tei ne taa wuu to baŋa o ji kaanem delo na lana fase to o ke o pa Wɛ. O na kaane Wɛ debam ŋwaane konto to, ko wae ko pae dé bochara taa lana fase, pa se dé boboŋa daa yé zo wo-yɔɔro kikia,#9:14 wo-yɔɔro kikia naa kikia yalo na pae toone to ye dé daare dé zuli Ŋwea Tu Baŋa Wɛ.

15Konto ŋwaane Yezu mo ye wolo Wɛ na dɛ o ŋwaane o gwoni ni-doore de o nɔɔna bam to. O na mɛ o toone o ŋwe nabiina wɛleera jene to, o wae o jwoŋi-ba de ba na ke kolo ba chɔge Wɛ da-yiga ni-gwonim dem to. Konto ŋwaane balo maama Wɛ na kuri se ba taa ye o bia to wae ba jwoŋi o ŋwe-doŋa kam de ka wo-laaro tem maama, ne o na pwooli se o pa-ba tei to.

16-17Ko nye de nɔɔno na gwoni o ni o bere se, o ná tega o daare, ba na wó pɔɔre o wonnu tei to. O ta ná ŋwe, o ni dem konto ba jege bu. Nɔɔna nam ná lɔre we o tega, ba laam wó pɔɔre o wonnu tem se ko maŋe de o ni dem na tage tei to. 18Konto ŋwaane mo, Wɛ na ke da-yiga ni-gwonim dem o pa o nɔɔna to, ba kwei varem jana mo ba ma bere we, o ni dem jege bu. 19Ko déem na ke to, Moses bobo o tɔɔle Wɛ nia yam maama o bere Isarele tiina bam maama. O laam ma kwei na-bale de bone delo ba na go to jana o gwaane de na, ye o daare o ma o mi tɔnɔ kolo Wɛ nia yam na popone da to. O laam ma mi Isarele tiina bam maama yera ne. O kwei Husopa tio daa, ye o vɔ gare-ŋon-seŋa ka yuu ne o lu jana bam wone o ma mi wonnu tem, de nɔɔna bam maama.#Jeelim 19:6 20O déem na yeini o ke konto dwoŋi to mo o tage we, “Jana banto bere we Wɛ ni-gwonim dem jege bu, o na tage abam se á tɔge-de to.”#Nwoŋim 24:8

21Moses daa ta ma kwei jana bam o ke konto dwoŋi o ma mi vwei dem de wonnu telo maama na wora Wɛ zula ŋwaane to. 22Ko ye chega mo we, Wɛ nia yalo o na ke Moses jeŋa ne to bere we nɔɔna jege se ba kwei varem jana mo ba ma zare ba wonnu Wɛ ŋwaane. Ko ye nenɛɛne wonnu maama jege se te zare konto mo. Ko ta woli da, toone jana ná tera, Wɛ bá yage nɔɔna wɛleera o ma chɛ-ba.#Chullu 17:11

23Logo baŋa vwei dem wonnu telo na wora ye te lwoni Wɛ telaao wonnu chekke na ye tei to jege se te zare de vara jana mo konto dwoŋi. Ko daare Wɛ telaao wonnu tem tete na wó fɔge te kwɛ tei to, ko fe mo se ba kaane Wɛ se ko taa dwoi faŋa kaanem dem na ye tei to. 24Yezu Krista nam na zo Wɛ tei to, ko dae wara-vwei delo nabiina na pugi ye de lwoni Wɛ sɔŋɔ chekke to mo o zoa. O nam seene o zo Wɛ tei telaao ne mo chekke. O maa wo dáane o zege Wɛ yiga ne debam zeinim ŋwaane. 25O na zo Wɛ tei chekke konto to, o zo kuni bedwe mo, ko dae bene maama wone, nenɛɛne Wɛ kaanem yiga tiina déem na ke tei to. Banto yeini ba kwei vara jana mo ba ja zo Wɛ di-yun-gala kam, ko dae ba tete jana. 26Yezu ya ná jege se o kwei o tete o ma kaane Wɛ bene maama wone, o ya wó yaare o te kuni dedɛ, ko zege logo baŋa boboa ne ko ba ko yi zem. Ko nam na ye tei to, o laam tu o veere o tete nabiina tetare ne mo logo baŋa kweelim da yam ne. O tu bedwe mo ye o ba o te o kaane Wɛ se ko pa nabiina wɛleera saare se ko taa vei wuu. 27Ko nye de nɔɔno maama na jege se o te bedwe tei to, se o laam vo Wɛ tei ye o di o taane. 28Yezu Krista de nam tu o te o ma kaane Wɛ bedwe mo, se o wane o le nɔɔna dedɛ wɛleera o yage. O nam ta wó jwoori o ba logo baŋa, ye ko bá taa ye nɔɔna wɛleera saarem ŋwaane. Ko ye se o jwoŋi balo na jege o teena se o ba to o yage mo.#Izaya 53:12

Currently Selected:

Hiburu 9: KBG

Highlight

Copy

Compare