Hiburu 8

Yezu tiini o zeini debam Wɛ ni-doore dem ŋwaane

1Taane dem maama wone de jei sento mo bere we, dé seene dé jege Wɛ kaanem nakwe tu wom konto dwoŋi. O ma na jeiŋa jei telaao ne Yuu-tu Baŋa Wɛ paare yituŋu kom jazem seeni.#Maake 16:19 2O maa wo Wɛ wara-jei sem ne mo o toŋa o pa‑o. Jei sem konto ye Baŋa Wɛ tete nyem chekke mo, ye ko dae logo baŋa vwei delo nabiina na pugi se ba taa zuli‑o da to.

3Wolo maama na ye Wɛ kaanem nakwe tu to mae vara de pɛɛra dwi dwi mo o kaane Wɛ. Debam Wɛ kaanem nakwe tu Yezu de nam maŋe se o taa jege kolo o na wó kwei o ke Wɛ jeŋa ne to mo. 4O nam ba jege se o taa wo logo baŋa ne se o kwei woŋo o ma kaane Wɛ. Wɛ kaanem tiina maŋe ba wo logo baŋa ne, ye ba kwei pɛɛra ba ke Wɛ jeŋa ne, se ko maŋe de Moses nia yam na bere tei to. 5Banto na yeini ba toŋe ba pa Wɛ tei to ye ba lwoni totoŋa yalo na ye chekke to mo. Ba na toŋe mɛ to ye lunluŋu mo ko bere kolo na wo telaao ne ye ko ye chekke to na ye tei. Konto to, Moses déem na lage o pu Wɛ wara-vwei dem to, Wɛ déem bere‑o o na wó ke tei ye o we, “Kwaane n ke wonnu tem maama se te lwoni amo na maŋe a bere‑m peo kom yuu ne tei to.”#Nwoŋim 25:40

6Ko daare leile konto, Yezu na toŋe o pa Wɛ tei to tiini ko jege kuri lanyerane ko dwoi kaanem tiina bam totoŋa maama. Ko nam ye bedwe mo de ni-gwonim delo Wɛ na tɔge Yezu ŋwaane o ke o pa debam to na dwoi da-yiga ni-gwonim dem na ye tei to, de na tɔge o kampwola kam na tiini ka lana to ŋwaane mo. 7Da-yiga ni-gwonim delo Wɛ na ke o pa o nɔɔna to ya ná ba jege gɛɛre, ni dedwoŋi ya daa bá wane de leiri dento yuu ne. 8Ko nam na ye tei to, Wɛ déem bere we gɛɛre wora, ye o ta de o nɔɔna o we:

“Maŋa lage ka yi se amo jwoori a gwoni ni

de Isarele dwi tiina bam de Judah dwi tiina bam,

se ko taa ye amo ni-doore.

9Dento nam bá taa ye bedwe de ni delo a déem na gwoni de ba nabaara bam

maŋa kam a na mɛ a jeŋa a ja-ba a nwoŋi Ejipti teo kom wone to.

Banto déem wo sɛ ba tɔge amo ni-gwonim dem konto.

Ko ma pa a yiga daa tere ba wone.

10Maŋa kam ná yia, ni delo amo na wó gwoni de Isarele dwi tiina bam to mo tento:

Amo wó kwei a nia yam a tiŋi ba boboŋa ne mo,

ye a daare a popone-ya a yage ba bochara wone.

Amo maa wó taa ye ba Tu Wɛ wom,

se ba de taa ye amo nɔɔna.

11Ba wolowolo daa ba jege se o bere o dwonna,

naa se o ta de o chorro we, ba lɔre Baŋa Wɛ.

Kolo ŋwaane ba maama wó taa yei amo, ko ná maŋe ko ye nabwona de dedɛɛra de.

12Maŋa kam konto ne amo wó duri ba ŋwaŋa

de ba keim-lwanno tem.

A daa bá guli ba wɛleera yam gula.”

Mo Baŋa Wɛ na tage tei.#Jeremia 31:31-34

13Wɛ na ŋɔɔne o ni-doore dem taane konto dwoŋi to, ko bere we o da-yiga ni dem laam jigi ni-dwoori mo. Ko maa bere we dento daa ba jege kuri, ye de da yam lage ya kɛ.

Currently Selected:

Hiburu 8: KBG

Highlight

Copy

Compare