Hiburu 7

Melkizedeka de Yezu memaŋa

1A laam lage a ta Melkizedeka taane dem a bere abam. Wonto déem ye Salem tiina pɛ mo ye o kwori o ye Yuu-tu Baŋa Wɛ kaanem tu. Abaraham na wane pwa badwonna jara wone ye o laam jwoori maŋa kalo to mo Melkizedeka jeeri‑o chwoŋa ne o sɔɔle Wɛ swolim o ke o yuu ne.#Pulim 14:18-20 2Abaraham laam ma kwei nyɔɔre delo o na nɛ jara yam baŋa ne to o pɔɔre teiri delo na ye Melkizedeka nyem to o pa‑o. Melkizedeka yere dem kuri mo ye ‘Chega tu’. Ko woli da, o na ye Salem pɛ to, ko ta bere we o ye ‘Yazura pɛ’ mo. 3Debam nam wo nigi Melkizedeka kwo de o nu ŋwa, ye dé yeiri o kuri na bobo mɛ to. Dé maa yeiri o lora dɛ de o toone maŋa. Konto pa se o nye de Wɛ Bu wom, ye o ye Wɛ kaanem tu taa wuu.

4Boŋe-na á nii Melkizedeka déem na jege kamunim tei to. Konto ŋwaane mo debam nabaaro Abaraham déem le o nyɔɔre dem o na nɛ jara yam baŋa ne to o pa‑o. 5Ko ná ye balo na nwoŋi Levi dwi tiina wone ye ba kaane ba pa Wɛ to, Wɛ ni dem pɛ-ba chwoŋa se ba jwoŋi ba teiri wonnu ba dwonna Isarele tiina bam tei ne, ye ba maama maŋe ba ye Abaraham dwi tiina mo.#Jeelim 18:21 6Melkizedeka nam wo nwoŋi Levi dwi dem wone. De konto de, o jwoŋi o teiri wonnu Abaraham tete tei ne. O ma daare o sɔɔle Wɛ swolim o yage Abaraham yuu ne, ye Abaraham nam ya mo ye wolo Wɛ na pwooli kampwola ded‑o to. 7Ko nam ba jege bobwea we, nɔɔno ná sɔɔle Wɛ swolim o pa o dwoŋi, wonto mo ye nɔn-kamunu o dwoi wodwoŋi wom.

8Levi dwi tiina bam déem yeini ba jwoŋi ba teiri wonnu mo, ye banto mo ye balo na bá lu toone jeŋa ne to. Wɛ tɔnɔ kom nam bere we, Melkizedeka ye wolo na ŋwe to mo ye o jwoŋi o teiri wonnu. 9-10Abaraham na pɔɔre Melkizedeka wonnu o pa‑o maŋa kalo to, ba ta wo loge Levi ye o nam wo o nabaaro Abaraham jana wone. Levi nam ye wolo dwi tiina na jege chwoŋa se ba jwoŋi ba teiri wonnu ba dwonna tei ne to mo. De konto de, ko nye de Levi tɔge Abaraham ŋwaane mo o pa Melkizedeka jwoŋi o teiri wonnu.

11Wɛ na tɔge Moses jeŋa o pa o nia yam Isarele tiina bam to, o nia yam konto de Levi dwi tiina kaanem dem tɔge ya woli daane mo. Dé yei we banto na yeini ba ke kaanem ba pa Wɛ tei to wo wane ko yi chega kam chekke. Ko ya ná seene ko ye chega, Wɛ ya bá kuri kaanem tu wodwoŋi wolo na dae Levi dwi tu to. Wɛ nam kuri wolo na ye kaanem tu ne Melkizedeka déem na ye tei, ye o wo nwoŋi Aron dwi dem wone. 12Wɛ na leiri o kaanem tu dwi konto to, ko jege se o nia yam de tɔge ya leiri mo. 13-14Memaŋa yanto maama nam tɛ dé Teiru Yezu taane mo. Dé yei we ba loge wonto Judah dwi tiina wone mo, ye o dae Levi dwi tu. O dwi dento wone nɔɔn-nɔɔno wo fɔge o ji Wɛ kaanem tu. Ko ná ye Wɛ nia yalo o na ke Moses jeŋa ne to, ya wo pɛ Judah dwi tiina chwoŋa se ba ji Wɛ kaanem tiina kɔtaa.

15Dé nam seene dé lɔre Wɛ na tiŋi chwo-doŋa tei to. Ko maa ye o kaanem tu Yezu laam na nwoŋi dwi-gaa wone, ye o nye de Melkizedeka déem na ye tei to. 16Yezu na jigi Wɛ kaanem tu tei to wo tɔge nabiina chullu ŋwaane, se ko tɔge o ŋwea kalo toone na ba jege dam ka baŋa ne to ŋwaane mo. 17Wɛ nam tage o taane o we:

“Nmo mo wó ta‑n ye amo kaanem tu taa wuu,

ne Melkizedeka faŋa faŋa na ye tei to.”#Lei 110:4

18-19Ko maa bere we, chwo-dwoŋa kam mo gwoni ka yage, bɛŋwaane nia yalo Wɛ na ke Moses jeŋa ne to ware ya pa kolokolo taa ye chega chekke. Ya maa ba jege dam se ya woli nɔɔna. Ko daare leile konto dé laam jege teena lanyerane de Wɛ na tiŋi chwo-laao kolo o pa debam, se dé ma wane dé tɔge-ka dé vo dé yi o tei.

20Wɛ nam dugi duuri o woli da. Levi dwi tiina nam na jigi o kaanem tiina to, o wo dugi duuri dem konto dwoŋi. 21Ko daare Yezu na jigi Wɛ kaanem tu to, Wɛ dugi duuri o ŋwaane, ye o ta ded‑o o we:

“Amo Baŋa Wɛ mo dugi a duuri

ye a bá fɔge a za a ni.

Nmo wó ta‑n ye amo kaanem tu taa wuu.”

22Wɛ na dugi duuri o pa Yezu konto to, ko bere we, o na ke ni-gwonim delo o pa debam to tiini de lana de dwoi o ni-dwoori dem, Yezu na zege dé kwaga ne to ŋwaane.

23Ko ná ye Levi dwi tiina bam, ba dedɛ déem yeini ba jiri Wɛ kaanem tiina. Toone nam na yeini de jaane-ba to, ko pɛ se ba daa ware ba toŋe Wɛ kaanem totoŋa yam. 24Ko daare Yezu mo jege ŋwea taa wuu, ye nɔɔn-nɔɔno daa ba jege se o leiri o yuu ne o ji Wɛ kaanem tu. 25Konto to, o wae o jwoŋi balo na tɔge o ŋwaane ba vei Wɛ tei to o yaga, se kolokolo daa yé chɔge-ba, o na jege ŋwea maŋa maama ye o lwoori Wɛ o pa-ba to ŋwaane.#1 Jɔn 2:1

26Yezu na ye Wɛ kaanem nakwe tu tei to maŋe de debam boboŋa. O jege wo-pwoŋo de chega Wɛ yiga ne, ye tusim tera o tei ne. Wɛ ma pwɛ‑o nɔn-chechɔgero tei ne, ye o daare o zeiŋi‑o pa o zo o tei wɛyuu baŋa seeni. 27Ko ná ye Wɛ kaanem yiga tiina déem na ye tei to, dɛ maama ba yeini ba da yiga ba kaane Wɛ ba ma saare ba tete wɛleera, ye ba laam daare ba kaane Wɛ ba dwonna bam wɛleera ŋwaane.#Chullu 9:7; Rom 6:10 Yezu nam ba jege se o ke konto dwoŋi. Wonto kwei o tete mo o ma kaane Wɛ kuni bedwe yerane, ye konto jege kuri se ko taa vei wuu. 28Nia yalo Wɛ na ke Moses jeŋa ne to pae se nabiina mo taa jiri Wɛ kaanem yiga tiina ye ba bwona. Ko nam ná ye Wɛ ni-gwonim delo o na dugi duuri de ŋwaane to, dento laam mo leiri Moses nia yam yuu ne, ye de pa se Wɛ tete Bu wom ji o kaanem nakwe tu wolo na jege chega chekke se ko taa vei wuu to.

Currently Selected:

Hiburu 7: KBG

Highlight

Copy

Compare