Hiburu 6

1Konto ŋwaane pa-na se dé yage Yezu Krista taane wo-mwaalo tem, se dé laam pa dé boboŋa kweere Wɛ chega kam seeni. Abam daa ba jege se á jwoori á bobo Wɛ taane dem zamesem, bɛŋwaane á maŋe á lɔre á na wó yage wo-yɔɔro kikia#6:1 wo-yɔɔro kikia naa kikia yalo na pae toone to tei to, de á na wó ke á wo-dedoa de Wɛ tei to. 2Á maŋe á zamese nɔɔna na wó zare ba tete Wɛ ŋwaane tei to, ko woli de nakwa na wó kwei ba je ba daŋe nɔɔna yuu ne se Wɛ zeini-ba tei to, ye á kwori á zamese twa na wó bi tei to, ko woli de Wɛ na wó ba o di nabiina bora tei to. 3Pa-na dé yage wonnu tem konto zamesem se dé daare dé kwaane dé kɛ yiga. Wɛ ná sɛ, dé wó wane dé ke konto.

4Ko ná ye balo na maŋe ba sɛ Wɛ chega kam to, ba laam ná paale ba ywori o tei ne, nɔɔn-nɔɔno daa bá wane o jwoori o de-ba Wɛ chwoŋa wone. Banto mo maŋe ba ye balo yi na poore de Wɛ chega kam ye ba daare ba lɔre Wɛ ŋwe-doŋa kam na ye tei to. Ba de Wɛ Sin-laao kom maa me daane. 5Ba maŋe ba lɔre Wɛ ni taane dem na ywomma tei to, ye ba na Wɛ totoŋ-kamunnu telo na maŋe de Wɛ paare delo na lage de ba to mo. 6Nɔɔna banto dwi ná ywori Wɛ chwoŋa wone, nɔɔn-nɔɔno daa bá wane o pa ba leiri ba wo se ba daa taa tɔge Wɛ, kolo ŋwaane ba yeini ba pa Wɛ Bu Yezu na chaveera nɔɔna yiga ne, nenɛɛne ba tete na jwoori ba ke‑o dagara kam yuu ne ba go tei to.

7Ko nye de doa ná wora ka nena lanyerane nɔɔno kara ne. Tega kam ná nyɔge doa na bam, ye ka daare ka ke wodiiru lanyerane ka pa balo na dugi ka baŋa ne to, Wɛ wó swɛ tega kam konto swolim. 8Ko daare tega kam ná ke sabare de wo-korro yerane, ko bere we ka ye kafɛ mo ye ka maŋe se Wɛ mo sɔɔle-ka o yage. Ko kweelim nam ye se ba ma mini mo ba zwɛ-ka ba chɔge.

9De konto de, a badwoŋ-swonnu bam, abam wó taa gara. Amo yei we abam ta wo Wɛ chwoŋa wone á maa vei o tei se o jwoŋi abam. 10Wɛ ye chega tu mo. O nam bá swei á na maŋe á tɔge keim-laaro tei to. O ta bá swei á na jege o swono lanyerane, ye á toŋe á woli o nɔɔna bam ko ba ko yi zem maama to. 11Amo nam na tiini a lage kolo to mo ye se abam maama ta‑á yei á tete lanyerane de á na tɔge Wɛ tei to, se á laam vo á yi o tei ye á seene á na wo-laaro telo á na jege teena se á na to. 12Á yé pa se jawɔrɔ zo abam. Nam lwoni-na balo na fɔge ba zege de pu-dɛa ye ba jege wo-dedoa de Wɛ to. Banto laam wó ba ba jwoŋi wonnu telo Wɛ na pwooli we, o wó pa-ba to.

Wɛ kampwola bá fɔge ka leiri

13Faŋa faŋa to, Wɛ déem pwooli de Abaraham o we, omo wó fɔge‑o lanyerane. Wɛ na tiŋi o ni dem ded‑o konto to, o dugi de o tete mo, kolo ŋwaane woŋo tera ko na dwoi‑o se o ma du de-ko. 14Wɛ gwoni o ni dem ded‑o o we:

“Amo wó swɛ nmo swolim lanyerane

ye a pa se n dwi dem puli dedɛ.”#Pulim 22:17

15Wɛ na dugi konto to, Abaraham déem ma vɔ pu-dɛa taa, ye o laam ba o na Wɛ na pwooli se o pa‑o kolo to.

16Ko ná ye nabiina ná yeini ba du duuri, ba wó ma wolo na dwoi ba tete to yere mo ba du, se ko bere we ba taane dem ye chega, se bwɛa daa ta tera. 17Ko ná ye Wɛ na pwooli kampwola de balo to, o lage se ba lɔre lanyerane we, o bá fɔge o yiri o ni dem. Konto ŋwaane mo o dugi duuri o woli de o kampwola kam. 18Kikia yanto yalei bá wane ya leiri ya ji vwa, ko na ye Wɛ tete kikia to ŋwaane. Konto ŋwaane mo debam balo na ke dé tete Wɛ jeŋa ne to wó tiini dé ke pu-dɛa ye dé ta jege teena ded‑o we, dé wó na wonnu telo o na tiŋi o pa debam to. 19Teena yam dé na jege Wɛ tei ne konto to tiini ya dana ye ya bá wane ya chɔge. Ya maa pae se dé boboŋa tigi jeiga dedoa, ye ya zo Wɛ tete jeiŋa jei mɛ na chege de gare-jale se nabiina yé zo to.#Nwoŋim 26:33; Chullu 16:2; Hiburu 9:2-5 20Yezu nam maŋe o da yiga o zo jei sem konto se o pore chwoŋa mo o pa debam. Wonto mo jigi Wɛ kaanem nakwe tu se ko taa vei wuu, ne Melkizedeka déem na ye tei to.#Lei 110:4

Currently Selected:

Hiburu 6: KBG

Highlight

Copy

Compare