Hiburu 5

1Ko ná ye Wɛ kaanem nakwe tu maama, ba yeini ba le‑o o dwonna nabiina wone mo se o taa toŋe o pa-ba Wɛ chwoŋa tɔgem seeni. Wonto jege se o taa kaane Wɛ ba maama wɛleera saarem ŋwaane mo. 2O tete nam na bwona ye o yeini o tusi to, o wae o jaane o bochare de balo na yeiri Wɛ chega kam lanyerane ye ba tusi to. 3O na bwona konto to, ko fe mo se o kaane Wɛ o tete wɛleera saarem ŋwaane, se ko woli de balo o na toŋe o pa-ba to de wɛleera ŋwaane.

4Nɔɔn-nɔɔno nam bá wane o le o tete se o ji Wɛ kaanem nakwe tu. Ko ye Wɛ mo wó kuri‑o se o taa ye konto, nenɛɛne o déem na bobo o kuri Aron tei to.

5Ko ta ye bedwe mo de Yezu Krista na jigi Wɛ kaanem nakwe tu to. O wo boŋe kamunim o pa o tete se o taa ye konto. Wɛ nam mo tage ded‑o o we:

“Nmo mo ye amo Bu,

ye zem amo de ji nmo Kwo.”#Lei 2:7

6Wɛ daa ta tage o tɔnɔ kom jei sedwoŋi ne we:

“Nmo wó ta‑n ye amo kaanem tu taa wuu,

ne Melkizedeka na ye tei faŋa faŋa to.”#Lei 110:4

7Yezu na wo logo baŋa ne maŋa kalo to, o yeini o tiini o ware Wɛ, ye o ka yi-na o kaase o ma lwoori‑o, o na yei we Wɛ wó wane o jwoŋi‑o toone wone to ŋwaane. Wɛ ma sɛ o wɛ-lworo kom, o na tu o tete ye o zuli‑o lanyerane to ŋwaane.#Luka 22:41-44 8O maŋe o ye Wɛ Bu mo. De konto de, o na yaare tei to mo pɛ o lɔre o na wó ke tei o tɔge Wɛ ni to. 9O laam ma ji wolo na jege chega chekke ye o wae o jwoŋi balo maama na sɛ o ni to o pa ba na ŋwea Wɛ tei ne. 10Wɛ ma le‑o se o taa ye o kaanem nakwe tu, ne Melkizedeka faŋa faŋa na ye tei to.

Dé yé ywori Wɛ chwoŋa wone

11Amo ya jege taane dedɛ se a ta a bere abam konto baŋa ne, ye ko nam tiini ko chana se a pa á ni ko kuri, kolo ŋwaane abam laam jege jawɔrɔ á boboŋa ne. 12Ko ná dae konto ŋwaane, tento wɛɛne abam ya wó ta‑á ye balo na maŋe se á ta‑á jege Wɛ nɔɔna á zamese to mo. Ko na ye chega to, ko maŋe se nɔɔna jwoori ba zamese abam Wɛ taane wo-mwaalo tem mo. Abam nye de bia balo ta na wo yi wodiu dim, ye á jege se á ta‑á ŋɔge yela mo ne bu-balɛ tei to. 13Balo na jege bu-balɛ boboŋa konto to bere we, ba ta wo lɔre Wɛ kwora kalo na bere o chega kam to chekke. 14Ko daare balo boboŋa na kweere Wɛ chega kam seeni to mo laam yi se ba di wodiu kolo na duna to. Banto mo yeini ba tɔge Wɛ chega kam de jawala, pa se ba wae ba pɔɔre lam de lwarem daane.

Currently Selected:

Hiburu 5: KBG

Highlight

Copy

Compare