Hiburu 4

Dé wó kwaane se dé zo Wɛ woro kom wo dé sii

1Wɛ na pwooli kampwola se o pa nɔɔna chwoŋa se ba zo o woro kom wo ba sii to ta fɔge ka wora mo. Debam nam wó taa yei dé tete mo se nɔɔn-nɔɔno yé sa chwoŋa ye o ta wo yi Wɛ woro kom se o sii. 2Debam maŋe dé ni Wɛ kwor-ywoŋa kam, nenɛɛne dé nabaara bam de na nigi-ka tei to. Banto nam na nigi-ka to, ba wo nɛ nyɔɔre ka baŋa ne, kolo ŋwaane ba wo ke ba wo-dedoa se ba tɔge Wɛ na tage kolo to. 3Debam balo na ke dé wo-dedoa de Wɛ to mo wó ba dé sii o woro kom wone. Wɛ nam tage nɔɔna banto taane o we:

“Amo tɔge a ban-zɔŋɔ kom ŋwaane

a du duuri a pa-ba a we,

amo bere a bá pa-ba chwoŋa se ba zo amo woro kom wo ba sii.”#Lei 95:11

Wɛ na tage konto to, ko nam dae we o ba jege woro mo se ba zo da ba sii. Ko zege maŋa kalo o na naane logo baŋa to mo o totoŋa yam ti ye o daare o sii. 4Wɛ tɔnɔ kom tage Wɛ totoŋa da yarepɛ siu dɛ dem taane ko we,

“Da yarepɛ dɛ dem ne mo Wɛ laam jeini o sii

o totoŋa yam maama wone.”#Pulim 2:2

5Wɛ daa ta tage o siu kom taane o we,

“Amo bere a bá pa-ba chwoŋa se ba zo amo woro kom wo ba sii.”

6Ko na ye konto to, dé nabaara balo na dɛ yiga ba ni Wɛ kwor-ywoŋa kam to wo wane ba zo o woro kom wo ba sii, ba na ve o ni to ŋwaane. Konto ŋwaane ko laam daare se nɔɔna badaara mo na chwoŋa se ba zo. 7Mo kokuri Wɛ daa ta tiŋi dɛ dedwoŋi se nɔɔna wane ba sɛ o ni, ye ba daare ba zo o woro kom wo ba sii. Dé nabaara bam na wo wane ba zo ye bena dedɛ kɛ to, Wɛ daa ta bere o ni dem de nɔɔna badaara, ye David ta de taane o we:

“Abam zem ná nigi Wɛ kwora,

se á yé pa á wo ke dam.”#Lei 95:7-8

8Josua déem tɔge Wɛ nɔɔna bam yiga o pa ba vo ba zoore te-ywoŋa jei ne. Ko nam dae Wɛ woro kom mo ba zo se ba sii. Ba ya ná seene ba na siu, Wɛ ya daa bá tiŋi dɛ dedwoŋi se nɔɔna na siu de wone. 9Konto mo dé yei we, chwoŋa ta wora zem se Wɛ nɔɔna bam na siu o tei ne. 10Wolo maama ná zo Wɛ woro kom wo se o sii, wonto wó seene o na siu o totoŋa yam wone, ne Wɛ de déem na sii de o totoŋa yam da yarepɛ dɛ ne tei to. 11Konto ŋwaane pa-na dé kwaane se dé zo Wɛ woro kom wo dé sii. Nɔɔn-nɔɔno yé zaŋe o ve Wɛ ni se o jwoori Wɛ kwaga ne, ne dé nabaara bam déem na ke tei to.

12Wɛ kwora kam jege ŋwea ye ka dana lanyerane. Ka nye de se-zɔɔ kolo na jege nia yalei to mo.#Efesia 6:17 Ka maa wae ka zoore nɔɔno wo ka pɔɔre o jworo de o bochare wonnu maama, ye ka daare ka lɔre o swa de o boboŋa maama na ye tei to. 13Kolokolo bá wane ko seigi Wɛ yiga ne. Woŋo kolo maama na wora to, o maŋe o yei ko na ye tei to chekke. Ko maa ye wonto mo dé jege se dé ja dé tete dé ba dé pa‑o, se o bwei debam o nii.

Yezu zo Wɛ tei debam ŋwaane

14Debam nam jege wolo na nɛ chwoŋa se o zo Wɛ tei telaao ne, o na ye Wɛ kaanem nakwe tu debam ŋwaane to. Wonto mo ye Wɛ Bu Yezu, ye o dwoi logo baŋa kaanem yiga tiina bam maama. Konto ŋwaane pa-na se dé tiini dé sɛ Wɛ chwoŋa tɔgem lanyerane. 15Wɛ kaanem nakwe tu wom konto nam dae wolo na bá wane o taa jege debam ŋwaŋa. O nam yei debam na bwona tei to, ye o na yaara yalo na faŋe‑o to, ne yaara yalo maama dwoŋi debam na nɛ to. De konto de, o ta wo sɛ o tusi.#1 Piita 2:22 16Konto ŋwaane, pa-na se dé taa jege baare ye dé vo dé yi Dam-fɔrɔ Tu Wɛ wom jeiŋa jei, se dé jwoŋi zaane o tei ne. Konto mo Wɛ wó duri dé ŋwaŋa ye o pa debam zaane se ko wane ko zeini debam maŋa kalo dé na lage wolim to.

Currently Selected:

Hiburu 4: KBG

Highlight

Copy

Compare