Nwoŋim 15
15
Moses leiŋa kam
1Moses dedaane Isarele tiina kɔgɔ kom ma leeni leiŋa kanto se ba zuli Baŋa Wɛ:#Lei 106:12
Amo wó leeni a zuli Baŋa Wɛ,
o na pɛ o yere zaŋe wɛɛne to ŋwaane.
O jaane siseiŋa dedaane wolo na diini-ka to
o dole o de naneo kom wone.
2 Baŋa Wɛ mo ye wolo na pa-ne dam to,
ye wonto ŋwaane mo a leena.
O ma bere o tete we o ye amo vereno wom.
O ye amo Tu Wɛ mo ye amo wó taa tei‑o.
Amo kwo Wɛ mo konto.
Amo wó zeiŋi o yere wɛɛne.
3 Baŋa Wɛ ye babea mo.
O yere mo ye ‘Taa-wuu Baŋa Wɛ’.
4O vuvugi Ejipti Pɛ wom jar-keira bam
de ba torokooro tem
o de Nane-soŋo kom wone.
Na bam ma pu Pɛ wom jar-keira dedɛɛra bam pa se ba te.
5Naneo kom na-luŋa kam ma kwoli-ba.
Ba ma misi ba zo kuri kuri nenɛɛne kandwa mo tei.
6Debam Yuu-tu Baŋa Wɛ,
nmo jeŋa jege dam-fɔrɔ chekke!
Nmo jazem dem mage dé dona pa se n wane-ba.
Debam Yuu-tu Baŋa Wɛ, nmo jeŋa jege dam!#Lei 118:15-16
7Nmo ma‑n wane n dona pa se n yere tiini de zaŋe.
Nmo bane tiini de zaŋe ba baŋa ne,
nenɛɛne n na tɔrege mini n zwɛ ga-korro tei to.
8Nmo momwa vio yerane mo pɛ se
naneo kom na bam daŋe da-baŋa ne.
Ba zege mo cheppe nenɛɛne kabira dwoŋi mo to.
Na-luŋa kam ma leiri ka ji te-dɛa.
9Debam dona bam ya boŋe ba we,
“Pa-na dé duri dé pu ba kwaga se dé ja-ba.
Dé wó kwei se-zɔɔro dé chɔge-ba,
ye dé vere ba wonnu dé pɔɔre dé pa daane.
Dé wó na kolo maama dé na lage to.”
10Nmo nam na sii vio n yage naneo kom baŋa ne to,
na bam pugi Ejipti tiina bam mo
ye ba misi na-luŋa kam kuri ne,
nenɛɛne luu na misi tei to.
11 Baŋa Wɛ!
Wa yam maama wone nmo dwoŋi tera!
Nmo zula yam gaale! Nmo yere zaŋe wɛɛne!
Nmo ma‑n mae n dam-fɔrɔ n ke wo-kenkagela
ye n dwoŋi tera!#2 Tigisim 2:5
12Nmo twe n jazem dem yerane mo,
ye tega kam puri ka li dé dona bam.
13Nmo dɛ n swono kom ŋwaane mo,
n jwoŋi n nɔɔna bam cham wone.
N ma‑n tɔge n dam dem ŋwaane n kale-ba
n ja n vo nmo tete jeiga kam.
14 Dwi-gɛ tiina bam ma ni keim dento ŋwa,
pa se ba yera sae.
Lwia maa jege Filisi tiina bam ye ba yera chɛ.
15Edom tiina pwa bam laam fom mo.
Moaba dedɛɛra bam yera maa sae.
Kanaan tiina bam baare maama ma jei.
16Foone de lwia mo laam jege-ba,
ba na nɛ nmo dam-fɔrɔ kom to ŋwaane.
Ba zege ba nii mo de foone
ye n nɔɔna bam da ba yiga ne ba kɛ.
Baŋa Wɛ!
Nmo vere n nɔɔna bam n ja nwoŋi ba kabɛɛne wone,
ye ba dona bam zege ba nia!
17Nmo jaane-ba n zo n tete tega kam ne,
pa se ba zoore nmo peo kom yuu ne.
Amo Teiru Baŋa Wɛ!
Jei sem konto mo n kuri se n ta‑n zoore da.
Ko maa ye n sɔŋɔ kom, n tete jea na lɔge to.
18 Baŋa Wɛ paare dem wó taa wora wuu mo.
19Chega ŋwaane to, Isarele tiina bam déem vei te-kora baŋa ne ba bɛ naneo kom mo. Ko nam ná ye Ejipti tiina jar-keira torokooro tem, dedaane ba sisein-dira bam, banto na kwaane se ba bɛ to, Baŋa Wɛ pɛ se na bam jwoori ba ke daane ba pu-ba.
20Aron nakɔ Miriam déem ye Wɛ ni-jwoŋinu mo. O ma kwei senyaga se o ma o leeni leiŋa. Kaana bam maama de tɔge ded‑o ba maa jege senyɛ ba wɔe ye ba sae.#1 Samuwel 18:6 21Miriam déem leeni leiŋa kanto mo o bere-ba:
“Leeni-na á zuli Baŋa Wɛ,
o na pɛ o yere zaŋe wɛɛne to ŋwaane.
O jaane siseiŋa dedaane wolo na diini-ka to
o dole o de naneo kom wone.”
Na-chɛɛra
22Moses déem ma ja Isarele tiina bam o zege Nane-soŋo kom ne o vo o zo kagoa wo, ka yere na ye Sura to. Ba déem kare ba vei kagoa kam wone da yatɔ maama mo, ye ba wo nɛ na se ba nyɔ. 23Ba ma vo ba yi Mara jei sem. Na maa wora, ba na ye na-chɛɛra ye nɔɔna bam ware ba nyɔ to. (Konto mo pa se ba bwoi jei sem konto yere we Mara#15:23 Mara kuri mo ye wo-chɛɔ).
24Nɔɔna bam ma bobo se ba taa poona ye ba ta bwɛ Moses ba we, “Bɛ mo debam lage de nyɔ ye na bam chamma tento?” 25Moses ma lwoori o jare Baŋa Wɛ. Wɛ ma bere‑o tio kodwoŋi naga. O ma kaare-ka o de na bam wone. Na bam ma leiri ba ji na-ywona.
Dáane mo Baŋa Wɛ kwei o ni dem o tiŋi o pa nɔɔna bam se ba taa tɔga, ye o daare o faŋe nɔɔna bam o nii. 26O ma ta de-ba o we, “Nenɛɛne abam na wó sɛ á cheigi amo kwora lanyerane, ye á tɔge chwo-laao amo yiga ne, ye á daare á ke á tɔge amo nia yalo maama a na bere abam to, amo bá sɛ se jaweero telo dwi na daane Ejipti tiina bam to ja abam. Amo mo ye Baŋa Wɛ, wolo wom na zuri á jaweero to.”
27Ba ma zege dáane ba vo ba yi jeiga kadwoŋi, ka yere mo Elim. Jei sem konto ne mo buli-yia fuga-yalei dedaane konkware teeni fuserepɛ wora. Nɔɔna bam déem ma chwi ba vwoa buli-yia yam teiŋa ne.
Currently Selected:
Nwoŋim 15: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
