Htû̌sò̌htò̌ 24
24
Khwǐdû̌ dǒ a ô̌ kû̌ ta̤sîrîdû̌sîrîhtû
Khwǐdawi̤ ata̤sǎwǐ 1Hǎkhû̌běkhû̌ kû̌ ta̤pṳ̂̌꤮ tôcǒ ô̌ dǒ hǎkhû̌ tôběbò nutokhlǒ mî̌ Cǒmara tûjû̌pwa̤ ata.
Lǒ̤bò hǎkhû̌běkhû̌ kû̌ kòyòhǎkhû̌phû̌ nutokhlǒ mî̌ ata lǒ̤bò pwǎ.#Kôritu awǐlǒ tôbǎ 10:26
2A shǒǐlò̤ hǎkhû̌ akòshî̌gutṳ̌.
A shǒǐ měglewô̌ lû̌û dǒ shidû̌shite̤we̤ kòda.
3Mò̌pè tôpwa̤ gǔ htò̌nṳ̌ dǒ Cǒmara tûjû̌pwa̤ akhôlô plò̌shǐkhû̌ pě ya?
Mò̌pè tôpwa̤ gǔ ihtǒô̌ dǒ ata̤lṳhtò̌hô plò̌shǐ akûnu pě?#Htû̌sò̌htò̌ 15:1
4Kòyò dǒ acǔde mṳ̂plî, asǎphlǒ plò̌shǐ, a caba kû̌ kò ta̤yô̤ta̤gî̌ tô̤̌, a ǐshǒlò̤ lòhǎlòhô kû̌ kòyò ta̤hî̌bǎ tôkhò̌꤮ tô̤̌ nutokhlǒ nô̤̌pwǎ.#Matè̌ 5:8
5A nǐ̤bǎ ta̤ǐshowî̤ dǒ Cǒmara tûjû̌pwa̤ aô̌.
Cǒmaradû̌ dǒ a ma̤hǎplǎge lû̌û nutôpwa̤ pwe̤ǐlṳ̌ kû̌ ata̤sǔ ô̌ tôcǒ꤮ tô̤̌ pě.
6Kòyò hǒnumî̌ a mî̌ kò dǒ a hè dǒ Cǒmaradû̌ aô̌.
Pwa̤ dǒ a kè̌lǎ Ya̤kò a Cǒmaradû̌ ami̤sǎ.
7Ǒ꤮ we̤takhadû̌ sî, lṳ̂mô mò̌.
Ǒ꤮ takhadû̌ dǒ něhǎlau tokhlǒ, bǔmôhtò̌ mò̌.
Khwǐdû̌ dǒ aô̌ kû̌ ta̤sîrîdû̌sîrîhtû glè̌ hènṳ̌ hǒ.
8Khwǐdû̌ dǒ a ô̌ kû̌ ta̤sîrîdû̌sîrîhtû numî̌ mò̌pè?
A mî̌ Cǒmara tûjû̌pwa̤ dǒ ashû̌asho, apô̤aphǎ, a ma̤pè̤̌bò ta̤shěta̤pě̤.#Hǎplǎge 15:3,6
9Ǒ꤮ we̤takhadû̌ sî, lûmô mò̌.
Ǒ꤮ takhadû̌ dǒ něhǎlau tokhlǒ, bǔmôhtò̌ mò̌.
Khwǐdû̌ dǒ a ô̌ kû̌ ta̤sîrîdû̌sîrîhtû hènṳ̌ pě.
10Khwǐdû̌ dǒ a ô̌ kû̌ ta̤sîrîdû̌sîrîhtû numî̌ mò̌pè?
A mî̌ Cǒmara tûjû̌pwa̤ dǒ a pǒ ta̤ lǒ̤꤮ bò, khwǐdû̌ dǒ a ô̌ kû̌ ta̤sîrîdû̌sîrîhtû.
Currently Selected:
Htû̌sò̌htò̌ 24: KXF
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
