Ta̤htû̌sò̌ǐ 30
30
Khwǐdǎ̤wi̤ ata̤sò̌po̤hî̌bwǐhî̌sîrî
Khwǐdǎ̤wi̤ ata̤sò̌po̤.
1Kǒ Cǒmara tûjûpwa̤, na ma̤lû̌htò̌ge he.
Kǒ Cǒmara tûjûpwa̤, na bè̌htò̌yî̤ he dě pwa̤sò̌khě toǒ sò̌wî̤ǐ he khû̌ tò̤ akhû̌akhî, he htû̌sò̌ǐ na.
2Kǒ Cǒmara tûjûpwa̤, heběcǎ, he kwihtò̌ nata̤ma̤jè.
Dě na ma̤hǎmǎ bǎ heta̤shǐta̤sha.
3Kǒ Cǒmara tûjûpwa̤, na phî̌ge hesò̌phlǒhtûpwa̤ dě lṳnǎkhwǎdo.
He glè̌ lòte̤ dě lṳkûyo̤ akû dě na ma̤lû̌htò̌ge he.
4Kǒ kòyò htě a bè̌dubè̌na̤ Cǒmara toǒ, sò̌po̤htò̌mò̌ Cǒmara tûjûpwa̤.
Htû̌sò̌kò̌koǐ mò̌ ami̤cahtǐ.
5A sò̌phlǒdû̌ teděsǎ, a kè̌dû̌ ǐ tûjûpwa̤.
Hǎwo lṳmṳkhǐ, sò̌le̤sò̌lò̤ lṳmṳlî.
6Bǎ heta ǒlǒǒbe lo̤bǎgugèpe tò̤ akhanu, he hî̌ hena̤ ta, “Ta̤jîta̤jû hèbǎjòpe he dǐkhò̌꤮ tò̤.”#Ta̤htû̌sò̌ǐ 10:6
7Kǒ Cǒmara tûjûpwa̤, nabwǐdû̌ sîrîhtû akhû̌akhî, na bè̌ǒměgle he lò̤ta kholodû̌kholohtû.
Bǎ na kè̌khǒkè he akhanu, he ǐsha sò̌gònò̤ mè̤mè̤̌.
8Kǒ Cǒmara tûjûpwa̤, he kwigwèbǎǐhtò̌ na.
He kwihtò̌ Běcǎ ta̤adû̌ ata̤ma̤jè dě a glè gwèbǎǐ he.
9He dè sikè, mè̤tò̤mî̌ he dè lòte̤kè dě lṳkûyo̤ hî̌mî̌, a nî̤bwǐnî̤sîrî ta naya hî̌tè?
Hena̤klû htě a htû lo̤hǎ htǒo a htû̌sò̌ǐjòpenò na ya?
A htû̌sò̌ǐjòpenò nata̤cǒtè̤ ta yo̤ htǒo ya?
10Kǒ Cǒmara tûjûpwa̤, gana̤depû he kwi nahtǒo, gwèbǎǐpû he.
Kǒ Cǒmara tûjûpwa̤ ma̤jèpû he.
11Na htû̌lè̌tèplè̌kè bǎ heta̤sǎpla̤sǎyṳ ta ta̤kalî̌ htû̌sò̌kò̌ko hǒ.
Na plû̌htò̌kè bǎ he ta̤sǎpla̤ hǐdohǐyò̤, na kûsǒhtò̌ bǎ he ta̤sò̌le̤sò̌lò̤ hǐdohǐyò̤.
12Hǐnuakhû̌akhî, khònò̤htǒo he glè sò̌po̤ htû̌sò̌kò̌koǐ na ta hesò̌phlǒsamabò, tûklû̌klû̌ he glè ǒjòpe tò̤.
Kǒ he Běcǎ Cǒmara tûjûpwa̤, he glè hî̌bwǐhî̌sîrî na tûjûpwa̤ talakhǎ.
Currently Selected:
Ta̤htû̌sò̌ǐ 30: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
