Ta̤htû̌sò̌ǐ 26
26
Kòyòcǒkòyòtè̤ ata̤kwisaba
Khwǐdǎ̤wi̤ ata̤sò̌po̤.
1Kǒ Cǒmara tûjûpwa̤, he ma̤ còcè̌ ta̤ dě acǒatè̤ akhû̌akhî, olò̤mèlò̤ bǎ dǒ he ta heta̤sǔ ǒ dǐcǎ꤮ tò̤.
He nǎla̤ǐ pwǎ꤮ pǒ̤ Cǒmara tûjûpwa̤.
Hesò̌phlǒ nûhtonûlò̤ nǒtò̤.
2-3Kǒ Cǒmara tûjûpwa̤, nata̤mo̤ǐ htě ahǎbòjò tò̤ htǒo a yṳ̂klè̌nè̌klò he dě he ǒhtûpwa̤ nata̤te̤ta̤mǎ akû akhû̌akhî, sèlèkè̌ mò̌ hesò̌phlǒ, sèlèkè̌ mò̌ hesǔshi.
4He cû̌hǎnòò̌htu kû̌ta kòyòlòhǎlòhonu tò̤.
He cû̌bǒsû̌htu kû̌ta kòyòjîcǒjîtè̤ ana̤nu toǒ tò̤tò̤.#Ta̤htû̌sò̌ǐ 1:1
5He sò̌khě kòyòphû̌mò̤nu toǒ ata̤ǒhtuhî̌bǎplǒ.
He hǎnòò̌htu kû̌ta kòyòkhu kòyòhî toǒ tò̤.#Ta̤htû̌sò̌ǐ 31:6
6Kǒ Cǒmara tûjûpwa̤, he shǔbòkè hecǔde la̤dǔlṳ ta heta̤sǔta̤plě ǒtò̤.
He cû̌te̤we̤ tû̌ nata̤lṳhtò̌wa̤.
7He sò̌po̤htû̌sò̌ǐ hî̌bwǐhî̌sîrî yi̤kǒyi̤hta.
He pwe̤ǐlṳbò nata̤ma̤ cǒklî̌kî̌ya.#Ta̤htû̌sò̌ǐ 9:1
8Kǒ Cǒmara tûjûpwa̤, he mo̤ǐ hǐ htě na ǒǐnu ta gûla̤ htě nata̤sîrîdû̌sîrîhtû lîrakhahtò̌lṳnu tò̤glò.
9Ma̤pî̌htu kû̌ pûma̤ he ta ta̤ma̤sǔphû̌nu toǒ ma̤.
Ma̤sihtu kû̌ pûma̤ he ta pwa̤ma̤sima̤hǎmǎ kònu toǒ ma̤.#Ta̤htû̌sò̌ǐ 28:3
10Asîcǔdenu a ma̤ còcè̌꤮ ta̤phû̌mò̤shî̌hto.
Asîcǔdemûnu a lǒbebò ta ta̤phû̌bǐǎshǎ.
11He lè̌dě he ma̤pwǎ ta̤ acǒatè̤.
Gwèbǎǐ dě ma̤lû̌htò̌ge mò̌ he.#Ta̤htû̌sò̌ǐ 26:1
12He ǒ dě klè̌toklè̌bǎ akû.
Dě kòyòprṳ̂ho aklanu he htû̌sò̌ǐ tû̌ta Cǒmara tûjûpwa̤ pě.
Currently Selected:
Ta̤htû̌sò̌ǐ 26: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
