ᤕᤜᤢᤍᤠ 1
1
ᤕᤜᤢᤍᤠᤗᤠᤶ ᤛᤧᤘᤠ
1ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤧᤘᤠᤖᤥᤒᤠ ᤏᤢ ᤕᤠᤁᤢᤒᤖᤧ ᤁᤢᤴᤛᤠ᤹ ᤀᤡᤱᤃᤠ᤹ ᤕᤜᤢᤍᤠᤗᤠᤶ. ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢ᤺ᤳᤋᤢᤛᤡᤒᤠ. ᤗᤢᤱᤔᤠ᤹ ᤋᤢᤰᤋᤢᤛᤡᤒᤠ ᤏᤢ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤁᤶᤒᤪᤠᤱ ᤔᤧᤳᤋᤢᤛᤡᤒᤠᤜᤠ᤹. ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤗᤥ॥
2ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤡᤖ. ᤕᤖᤡᤰ ᤛᤏᤠᤖᤢᤱᤅᤡᤴ ᤁᤧᤒᤡᤖᤡᤖ ᤜᤧᤰᤁᤩᤠᤱ ᤏᤢᤖᤡᤰ ᤁᤧᤔᤧᤳᤋᤡᤖᤖᤥ॥
ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹
3ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤏᤡ᤹ ᤁᤧᤖᤧᤰᤗᤧ ᤀᤠᤄᤥᤛᤢᤶᤒᤠ ᤛᤧᤴᤗᤵᤖᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ᤀᤥ ᤛᤰᤀᤡᤱᤄᤱ ᤜᤠᤱᤔᤠ ᤛᤠ᤹ᤖᤡᤰᤁᤣ ᤀᤡᤱᤃᤠ᤹ ᤀᤠᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧᤖᤥ॥ ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤜᤢᤰᤛᤢᤵᤋᤢᤛᤡᤒᤠ ᤏᤛᤠ᤺ᤴᤏᤡᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ᤗᤠᤶᤒᤠ ᤋᤠᤱᤃᤧᤛᤧ᤺ᤵᤋᤢᤶᤗ ᤑᤠ᤹ᤀᤠᤱ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤔᤠᤀᤣ ᤁᤧᤒᤥᤱᤒᤠ ᤏᤡᤛᤢᤱᤗᤥ॥ 4ᤀᤡᤱᤃᤠ᤹ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱ ᤔᤣ᤺ᤴᤏᤣᤒᤠ ᤁᤢᤓᤠ ᤔᤏᤠᤜᤠ᤹ ᤛᤫᤠ᤺ᤳᤋᤠᤱ ᤂᤡᤏᤡ᤹ ᤗᤢᤶᤔᤥ ᤔᤧᤗᤠᤛᤧᤀᤠᤱ ᤔᤧᤘᤠ᤹ᤖᤥ॥ ᤋᤃᤡᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤧᤴ ᤜᤧᤰᤋᤱᤒᤠ ᤔᤏᤠᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥᤛᤢ᤹ ᤗ᤹ᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤐᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤒᤡ᤹ ᤗ᤹ᤖᤡᤰ ᤔᤧᤒᤠ᤺ᤳᤋᤢ᤹. ᤜᤧᤰᤁᤩᤠᤱ ᤀᤠᤏᤡ᤹ ᤌᤡᤰᤗᤰ ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤆᤥ᤺ᤰᤔᤠ ᤔᤧᤴᤍᤧᤴᤏᤧᤴᤗᤥ॥
5ᤁᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤏᤡᤛᤢᤶᤛᤠᤱ ᤕᤠᤶᤔᤥ ᤂᤡᤏᤡ᤹ ᤏᤡᤱᤘᤠ᤹ᤛᤥᤀᤥ ᤀᤡᤱᤃᤠ᤹ ᤋᤠᤖᤢᤱ ᤐᤡᤏᤡᤱᤗᤥ—ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤏᤠᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤋᤠᤱᤛᤧ᤺ᤵᤋᤢᤛᤡᤀᤠᤱ ᤗ᤺ᤳᤋᤢᤛᤡᤛᤠᤱ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤕᤠᤱᤛᤡ ᤔᤧᤰᤂᤢᤛᤡᤖᤥ॥ 6ᤜᤧᤰᤁᤩᤠᤱ ᤀᤠᤒᤠᤅᤣ ᤂᤢᤏᤡ᤹ ᤘᤠ᤹ᤔᤠ ᤋᤧᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤕᤢᤰᤁᤥ ᤔᤧᤴᤘᤠ᤹ᤔᤏᤠᤒᤠ ᤔᤠᤱᤗᤠᤀᤡᤱᤒᤠᤜᤠ᤹ ᤕᤶᤒᤠ ᤂᤠᤛᤧᤴ ᤕᤧᤴ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤔᤠᤰᤗᤢᤶᤒᤠ᤺ᤳᤋᤥ ᤀᤡᤄᤣ᤺ᤰᤂᤢ ᤕᤢᤰᤂᤢᤛᤡᤀᤠᤱ ᤔᤧᤕᤢᤱᤗᤥ॥ 7ᤜᤧᤰᤁᤩᤠᤱ ᤛᤍᤥᤔ ᤏᤢ ᤃᤔᤥᤖᤠ ᤜᤧᤰᤁᤩᤠᤱ ᤂᤡᤖᤡᤒᤠ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤀᤠᤱ ᤀᤡ᤺ᤳᤋᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤃ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤁᤠᤰ ᤐᤖᤡᤰᤐᤠ ᤕᤠᤶᤃᤧᤛᤡᤱᤒᤠ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤥ ᤗᤠᤶ ᤔᤧᤒᤥ᤺ᤳᤋᤧᤀᤠᤱ ᤔᤧᤘᤕᤧ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤴᤇᤡ᤺ᤶᤏᤠ ᤁᤧᤍᤡ᤺ᤵᤐᤠ ᤔᤡᤗᤠᤶᤒᤠ ᤂᤠᤛᤧᤴᤏᤥ ᤔᤧᤎᤩᤧᤒᤠ ᤐᤠ᤺ᤴᤏᤡᤴ ᤔᤡᤰᤛᤣᤴ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
8ᤛᤧᤵᤔᤠᤱ ᤔᤧᤔᤠᤰᤋᤢᤒᤠ ᤁᤢᤀᤡᤛᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤧᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤌᤰᤁᤥ ᤗᤠᤕᤥ ᤔᤧᤈᤥᤃᤢ᤹. ᤍᤠᤱᤒᤠᤸᤗᤧ ᤁᤢᤕᤢᤰᤁᤡᤴ ᤔᤧᤏᤠ᤹ᤖᤢᤀᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤠ᤺ᤳᤗᤥ॥ 9ᤁᤖ ᤋᤢᤶ ᤔᤠᤱᤗᤠᤀᤡᤱᤒᤠ ᤔᤡᤂᤠᤀᤧᤗᤖᤧᤀᤠᤱ ᤔᤥᤛᤠᤖᤧ ᤁᤧᤛᤡᤒᤠ ᤁᤢᤎᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤑᤧᤴᤛᤠᤶᤔᤡᤴᤏᤢ ᤐᤠ᤺ᤴᤎᤰᤋᤧᤸᤗᤧ ᤔᤠᤑᤧᤴᤛᤠᤶᤔᤡᤴ ᤐᤠ᤺ᤴᤎᤡᤰᤔᤠ ᤔᤧᤀᤠ᤺ᤴᤇᤡᤱᤅᤡᤴᤗᤥ. ᤁᤖ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤧᤓᤧ᤺ᤰᤗ᥄ ᤖᤰ ᤔᤧᤳᤋᤢᤖᤥ॥ 10ᤁᤖ ᤁᤴ ᤔᤏᤠᤜᤠ᤹ᤃ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠ ᤐᤠ᤺ᤴᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤆᤧ᤹ᤕᤠᤐᤠᤴ ᤔᤧᤒᤠ᤺ᤳᤗᤥ॥ ᤜᤧᤰᤁᤩᤠᤱ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤜᤥᤵᤐᤠ ᤌᤰᤛᤠ ᤁᤢᤀᤡᤛᤡ᤺ᤰᤗᤰ ᤐᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤀᤠᤱ ᤜᤧᤰᤋᤱᤒᤠ ᤐᤠ᤺ᤴᤜᤠ᤹ᤖᤧᤀᤣ ᤔᤧᤰᤂᤢᤛᤡ᤹ᤖᤥ॥
11ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤁᤕᤡᤏᤖᤧ ᤁᤢᤗᤠᤕᤥᤒᤠ ᤗᤠᤶᤔᤡᤴ ᤔᤧᤏᤠ᤺ᤳᤋᤢᤀᤠᤱ ᤘᤠ᤹. ᤕᤠᤱᤛᤠᤁᤢᤴᤎᤣᤖᤧ ᤗᤠᤃᤡ ᤒᤠᤗᤠᤔᤖᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤢᤀᤡᤛᤡᤰ ᤔᤧᤈᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤁᤥᤖᤜᤖᤧ ᤒᤡᤑᤩᤢᤱ ᤆᤥᤃᤢᤀᤠᤱ ᤔᤧᤃᤧᤒᤠ ᤁᤢᤀᤡᤛᤡᤰ ᤔᤧᤔᤧᤰᤗᤥ॥#᥇:᥇᥇ ᤋᤥᤗᤡᤱ ᥊:᥇-᥇᥌ ᤀᤥ ᤁᤕᤡᤏᤖᤧ ᤁᤢᤴᤛᤠ᤹ᤀᤡᤴ ᤛᤧᤖᤢ॥ ᤂᤠᤏᤡ᤺ᤳ ᥈᥈:᥇-᥉᥋ ᤀᤥ ᤒᤠᤗᤠᤔᤖᤧ ᤕᤠᤱᤛᤠᤁᤢᤴᤎᤣᤖᤧ ᤗᤠᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢ॥ ᤂᤠᤏᤡ᤺ᤳ ᥇᥌:᥇-᥉᥋ ᤀᤥ ᤁᤥᤖᤜᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤗᤠᤶᤗᤥᤒᤠ ᤔᤏᤠᤜᤠ᤹ ᤒᤡᤑᤩᤢᤱ ᤆᤥᤃᤢᤛᤡ॥
12ᤂᤧᤱᤜᤠ᤹ᤃ ᤂᤡᤏᤡ᤹ ᤛᤣᤛᤣᤜᤢᤵᤗᤰᤁᤥ ᤛᤥᤖᤡᤰ ᤆᤢᤶᤔᤠᤀᤠᤱ ᤆᤠ᤺ᤔᤏᤠᤒᤠ ᤛᤠᤓᤠᤱᤈᤠ ᤁᤧᤈᤡ᤺ᤶᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤘᤣ᤹ᤜᤠ᤹ ᤀᤥᤔᤧᤶᤔᤧᤳᤇᤡᤱᤅᤣ ᤀᤠᤒᤠᤅᤣᤖᤰ ᤔᤧᤈ ᤔᤧᤎᤢᤱᤅᤢ᤹ᤖᤥ॥ ᤂᤧᤱᤜᤠ᤹ᤃ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤐᤰᤂᤢ ᤋᤣ᤹ᤖᤢᤒᤠ ᤆᤫᤠ᤺ᤳ ᤔᤣ᤺ᤴᤏᤣᤒᤠ ᤂᤠᤶᤍ᤺ᤶᤒᤠ ᤏᤢ ᤛᤡᤱᤛᤣ᤹ ᤔᤧᤴᤎᤥ᤺ᤰᤔᤏᤠᤒᤠ ᤛᤡᤱᤒᤢᤱ ᤁᤢᤀᤡᤛᤡᤰ ᤔᤧᤈᤥᤰ॥ ᤂᤧᤱᤜᤠ᤹ ᤁᤧᤛᤡᤒᤠ ᤛᤡᤱᤒᤢᤱ ᤜᤧᤰᤁᤣᤖᤰ ᤔᤣ᤺ᤴ ᤁᤖ ᤁᤧᤀᤠ᤺ᤰᤐᤠᤀᤠᤱ ᤁᤧᤜᤣᤒᤠ ᤁᤧᤛᤡᤒᤠ ᤛᤡᤱᤒᤢᤱ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ 13ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰᤁᤡᤴ ᤘᤠᤜᤱᤅᤥ ᤁᤧᤒᤥ᤺ᤰᤐᤠ ᤕᤶᤒᤠ ᤘᤠᤓᤧᤸᤗᤧᤱᤅᤡᤸᤗᤧ ᤁᤢᤒᤢᤳᤌᤢᤱᤘᤠ ᤁᤢᤀᤡᤛᤡᤰ ᤆᤥᤰᤗᤥ॥ ᤂᤧᤱᤜᤠ᤹ᤃ ᤁᤧᤀᤡᤒᤠᤖ ᤁᤧᤘᤠ᤹ᤒᤠ ᤂᤣ᤺ᤶᤛᤡᤰ ᤁᤢᤀᤡᤛᤡ᤺ᤰᤐᤠ ᤔᤏᤠᤛᤡᤖᤥ. ᤂᤧᤱᤜᤠ᤹ᤖᤧ ᤗᤠᤃᤡ ᤂᤠᤔᤠᤰ ᤋᤧᤴᤏᤡᤴ ᤛᤍᤠᤍᤡᤱ ᤕᤠᤖᤡᤵ ᤆᤥᤃᤧᤀᤠᤱ ᤘᤠ᤹ᤖᤥ॥
14ᤀᤠᤍᤔᤗᤠᤶ ᤏᤢᤛᤡᤃᤣᤰᤐᤠ ᤁᤢᤔᤢ᤹ᤀᤡᤍᤠᤱᤛᤠ ᤜᤏᤥᤁᤖᤧ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤋᤃᤡᤛᤠ ᤀᤰᤂᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤀᤠᤱ ᤘᤠ᤹. “ᤀᤥᤔᤧᤳᤋᤧᤶᤔᤧ᤹ᤀᤥ. ᤍᤠᤱᤒᤠᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤛᤣᤛᤣ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢᤖ ᤐᤳᤗᤥ॥ 15ᤂᤢᤏᤧ᤹ ᤁᤠᤰ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹. ᤜᤧᤰᤁᤩᤠᤱ ᤁᤠᤰ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤑᤧᤴ ᤕᤠ᤺ᤶᤒᤰᤜᤠ᤹ ᤏᤢ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤒᤠ ᤑᤧᤴ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡ᤹ᤖᤥ॥”#᥇:᥇᥊-᥇᥋ ᤁᤴ ᤂᤧᤍᤠ᤹ᤀᤡᤴ ᤀᤣᤏᤥᤁᤖᤧ ᤁᤢᤛᤠᤵᤐᤴᤏᤥ ᤛᤠᤵᤋᤢᤀᤠᤱ ᤐᤳ॥ 16ᤁᤱᤜᤠ᤹ᤃ ᤁᤠᤏᤠᤰᤏᤠᤰ ᤁᤧᤗ᤹ᤒᤠᤜᤠ᤹. ᤁᤢᤏᤡᤱᤘᤠ᤹ ᤔᤧᤴᤍᤠ᤺ᤶᤏᤠ ᤗᤢᤱᤃᤧᤜᤠ᤺ᤵᤐᤠᤜᤠ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤏᤡᤱᤘᤠ᤹ ᤌᤠᤵᤌᤠᤵ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤏᤢ ᤀᤠᤒᤠᤅᤣ ᤀᤡᤴᤎᤠ᤺ᤰᤗᤧ ᤗᤠᤃᤡ ᤘᤣ᤹ᤜᤠ᤹ ᤁᤧᤗᤧᤶᤒᤠᤛᤡᤖᤥ॥
ᤏᤛᤠ᤺ᤴᤛᤠᤒᤠ ᤐᤥᤱᤔᤠ ᤐᤥᤱ
17ᤁᤖ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤋᤃᤡᤛᤠ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 18ᤂᤧᤱᤜᤠ᤹ᤖᤧᤃ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧ. “ᤁᤢᤏᤢᤵᤔᤠ ᤕᤧᤶᤔᤥ ᤁᤡᤏᤠ᤺ᤴᤍᤡ ᤁᤧᤈᤥ᤺ᤰᤐᤠᤜᤠ᤹ ᤔᤧᤍᤠᤀᤠᤱ ᤀᤠᤒᤠᤅᤣ ᤑᤧᤴᤏᤡᤱᤘᤠ᤹ᤀᤡᤸᤗᤧ ᤏᤡᤱᤘᤠ᤹ᤋᤠᤍᤠ ᤔᤧᤈᤥᤃᤢᤖᤥ॥” 19ᤒᤠ ᤁᤴ ᤔᤏᤠᤜᤠ᤹ᤖᤧᤀᤣ ᤂᤡᤏᤡ᤹ ᤗᤢᤶᤔᤥ ᤂᤧᤔᤠ᤹ ᤔᤧᤓᤥᤰᤂᤢᤀᤠᤱ ᤁᤧᤶᤛᤧᤴᤍᤡ᤹ᤖᤥ॥ ᤂᤧᤴ ᤛᤣᤛᤣᤔᤠᤱ ᤔᤣ᤺ᤴᤏᤣᤒᤠ ᤔᤏᤠᤜᤠ᤹ᤖᤧ ᤁᤴ ᤜᤡᤱᤔᤴᤏᤥᤒᤠ ᤕᤠᤶᤏᤡᤱᤘᤠ᤹ ᤐᤠ᤺ᤴᤜᤠ᤹ᤀᤥᤖᤰ ᤏᤡᤱᤘᤠ᤹ ᤔᤧᤒᤡᤖᤢ᤹.
20ᤁᤖ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ ᤛᤣᤛᤣ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤛᤣᤛᤣᤔᤠᤱᤅᤥ ᤋᤢᤘᤠ ᤆᤥᤃᤧᤶᤔᤧ᤹ᤖ ᤘᤕᤧᤶᤔᤧ᤹ᤀᤥ॥ 21ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤔᤠ᤹ ᤁᤧᤍᤢᤰᤋᤡᤀᤠᤱ ᤁᤧᤒᤡᤖᤡᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤜᤠᤱᤄᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤔᤡ᤺ᤶᤈᤡ ᤔᤧᤳᤋᤧᤶᤔᤧ᤹ᤀᤥ॥ 22ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤆᤥ᤺ᤰᤔᤥ ᤆᤵᤆᤡ ᤁᤧᤈᤥ᤺ᤰᤐᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹. 23ᤜᤧᤰᤁᤩᤠᤱ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤔᤡᤀᤥ ᤗᤠ᤺ᤵᤔᤠ ᤁᤧᤀᤡ᤺ᤵᤐᤠᤜᤠ᤹ᤃ ᤀᤢ᤺ᤰᤂᤧᤶᤛᤡᤶᤔᤧ᤹ᤀᤠᤱ ᤋᤠᤱᤛᤧ᤺ᤵᤋᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤔᤡᤸᤗᤧ ᤂᤢᤏᤡ᤹ ᤗᤠᤕᤥᤸᤗᤧ ᤁᤧᤴᤗᤡ᤺ᤰᤋᤡᤴᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥
ᤁᤢᤏᤢᤵᤔᤠ ᤋᤢᤘᤠ
24ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤗᤠᤕᤥᤀᤥ ᤌᤠ᤺ᤔᤠᤗᤠᤶ ᤂᤡᤏᤡ᤹ ᤛᤧ᤺ᤵᤔᤠ ᤁᤧᤛᤢᤰᤋᤡ᤹. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤁᤢᤔᤡᤔᤡᤍᤡᤱᤅᤡᤸᤗᤧ ᤁᤢᤍᤃᤡ ᤗᤠᤕᤥ ᤔᤣ᤺ᤴᤏᤣ ᤐᤕᤶ ᤛ᤺ᤵᤔᤠᤴᤏᤢ ᤋᤠ᤺ᤵᤔᤠ ᤁᤧᤛᤢᤰᤋᤡ᤹ᤖᤥ॥ 25ᤕᤧᤛᤢ ᤂᤪᤡᤛ᤻ᤋᤗᤠᤶ ᤀᤠᤏᤡ᤹ ᤛᤧᤴᤗᤵ ᤁᤧᤒᤡᤒᤠ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ. ᤜᤠᤱᤕᤢᤰ. ᤔᤢᤰᤛᤠᤶ ᤜᤧᤰᤁᤩᤠᤱ ᤕᤢᤰᤁᤡᤴ ᤋᤥᤗᤡᤱᤛᤥᤔᤢᤀᤠᤱᤎᤥ ᤛᤍᤠᤍᤡᤱ ᤛᤍᤠᤍᤡᤱ ᤂᤥᤔᤠ ᤗᤠ᤹ᤖᤢᤖᤥ᥄ ᤀᤠᤔᤧᤴ᥄
Currently Selected:
ᤕᤜᤢᤍᤠ 1: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.