ᤕᤢᤜᤢᤴᤏᤠ 8
8
1ᤁᤖ ᤕᤧᤛᤢᤴ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣᤖᤥ॥
ᤆᤠᤃᤧᤖᤠᤶᤔᤠ ᤔᤧᤴᤇᤢᤔᤠ᤹ᤀᤡᤴ
2ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤂᤠᤀᤥ᤺ᤳᤋᤧᤏᤢᤔᤧ᤺ᤴᤏᤣ ᤂᤢᤏᤧ᤹ ᤔᤠᤱᤜᤡᤶᤔᤥ ᤋᤩᤧ॥ ᤜᤧᤰᤁᤩᤠᤱ ᤂᤧᤵᤔᤥ ᤔᤏᤠᤜᤠ᤹ ᤆᤢᤶᤔᤠ ᤔᤧᤜᤣ᤺ᤰᤋᤧᤀᤠᤱ ᤂᤢᤏᤧ᤹ ᤕᤢᤱᤛᤡᤱᤅᤠᤱ ᤂᤧᤱᤜᤠ᤹ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥ 3ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢᤖ ᤐᤳᤇᤧᤸᤗᤧ ᤔᤧᤍᤧᤶᤛᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤔᤏᤠᤗᤢᤵᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤕᤧᤵᤛᤢ॥
4ᤂᤧᤱᤜᤠ᤹ᤖᤧ ᤕᤧᤛᤢᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤁᤴ ᤔᤧᤴᤇᤢᤔᤠ᤹ᤀᤡᤴ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤧᤖ ᤐᤳᤇᤧᤸᤗᤧᤀᤣ ᤔᤧᤍᤧᤶᤛᤢᤀᤠᤱ ᤋᤠᤖᤢᤶᤒᤧᤒᤠᤖᤥ॥ 5ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤔᤥᤛᤠ᤺ᤸᤗᤧᤃ ᤀᤰᤋᤱᤔᤠ ᤔᤧᤴᤇᤢᤔᤠ᤹ᤀᤡᤴ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤡᤃᤧᤀᤠᤱ ᤘᤠ᤹ᤖᤥ. ᤁᤖ ᤂᤧᤏᤧ᤹ᤃ ᤌᤣ ᤕᤠᤵᤔᤡ ᤁᤧᤔᤧᤵᤐᤣ᥅”#᥎:᥋ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤀᤰᤋᤱᤔᤠ ᤔᤧᤴᤇᤢᤔᤠ᤹ᤀᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ᤺ᤴᤏᤠᤱ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠ ᤌᤡᤶ ᤘᤕᤧ (ᤗᤧᤒᤡ ᥈᥆:᥇᥆; ᤛᤠᤶᤕᤥ ᤀᤡᤱ ᥈᥈:᥈᥈-᥈᥊)॥
6ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤴᤏᤥ ᤌᤠ᤺ᤔᤠᤀᤠᤱ ᤁᤢᤍᤰᤗᤧᤱᤘᤠᤀᤥᤒᤠ ᤐᤠ᤺ᤴᤏᤡᤴ ᤂᤥᤔᤠ ᤑᤠ᤹ᤀᤠᤱ ᤁᤴ ᤛᤣ᤺ᤴᤔᤧᤍᤥᤛᤢᤀᤠᤱ ᤘᤕᤧ. ᤁᤖ ᤕᤧᤛᤢᤴ ᤌᤢ᤺ᤱᤛᤡᤱᤅᤠᤱ ᤂᤠᤶᤒᤠᤱᤅᤥ ᤌᤣᤎᤣᤀᤡ ᤁᤢᤜᤢᤰᤆᤥ᤺ᤸᤗᤧ ᤛᤠᤵᤋᤢᤖ ᤕᤢᤅᤧ॥#᥎:᥌ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤕᤧᤛᤢᤴ ᤐᤠ᤺ᤴᤏᤥ ᤌᤠ᤺ᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤘᤕᤧ॥ ᤕᤧᤛᤢᤖᤧ ᤗᤢᤱᤅᤡᤸᤗᤧ ᤗᤧᤵᤋᤧᤶᤔᤧ᤹ ᤐᤠ᤺ᤳᤋᤢᤏᤧ ᤑᤠ᤹ᤃᤪ ᤖᤥᤔᤡ ᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠ ᤐᤥᤱ. ᤌᤣᤀᤠᤱᤓᤧᤸᤗᤧ ᤖᤥᤔᤡ ᤜᤠᤱᤕᤢᤰᤐᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤸᤗᤧᤀᤠᤱ ᤛᤧᤵᤔᤠ ᤂᤢᤶᤍᤡᤱ ᤐᤡᤔᤠ ᤕᤢᤰ ᤔᤧᤱᤃᤳᤋᤢᤴ. ᤜᤧᤰᤁᤩᤠᤱ ᤗᤢᤱᤅᤡᤸᤗᤧ ᤔᤧᤗᤧᤵᤋᤧᤶᤔᤡᤴᤏᤧ᤹ ᤐᤠ᤺ᤳᤋᤢᤏᤧ ᤑᤠ᤹ᤃᤪ ᤔᤥᤛᤠᤖᤧ ᤁᤢᤍᤰᤗᤧᤱᤘᤠ ᤐᤠ᤺ᤱᤒᤠ ᤘᤕᤧ॥ 7ᤂᤧᤱᤜᤠ᤹ᤖᤧ ᤀᤧᤳᤗᤧᤱ ᤛᤣ᤺ᤴᤔᤧᤍᤥᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤐᤥᤃᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤥ ᤀᤠᤸᤗᤥ ᤌᤠᤖᤡᤰ ᤗᤠᤕᤥ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠ ᤜᤠᤳ ᤘᤠ᤹᥅ ᤜᤠᤖᤠ᤹ ᤒᤠ ᤂᤧᤸᤗᤧᤀᤣ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤴ ᤔᤧᤴᤇᤢᤔᤠ᤹ᤀᤡᤴ ᤗᤢᤱᤅᤡᤸᤗᤧ ᤗᤧᤵᤋᤢᤖᤖᤥ॥” 8ᤂᤢᤏᤧ᤹ ᤕᤠᤶᤔᤥ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤂᤠᤶᤒᤠᤱᤅᤥ ᤛᤠᤵᤔᤠ ᤜᤣ᤺ᤰᤋᤢᤖᤥ॥
9ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤋᤢᤶᤓᤠᤰᤛᤠ ᤜᤧᤰᤁᤩᤠᤱ ᤂᤧᤴᤏᤠᤱ ᤕᤥᤒᤠᤜᤠ᤹ ᤌᤡᤰᤌᤡᤰ ᤗ᤹ᤖᤡᤰ ᤐᤣ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤕᤧᤛᤢᤴ ᤏᤢ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤗᤰ ᤕᤠ᤺ᤰᤋᤧᤳᤇᤡᤖᤥ॥ 10ᤜᤧᤰᤁᤩᤠᤱ ᤕᤧᤛᤢᤴ ᤐᤥᤃᤧᤀᤠᤱ ᤂᤧᤴ ᤛᤣ᤺ᤴᤍᤥᤛᤢ “ᤔᤠᤔᤢᤀᤣ. ᤂᤧᤏᤧ᤹ ᤐᤠᤴ ᤁᤧᤎᤡᤰᤐᤠᤜᤠ᤹ ᤀᤠᤳᤋᤡ ᤔᤧᤒᤣᤒᤣ᥅ ᤜᤠ᤺ᤳᤗᤧᤀᤠᤱ ᤂᤧᤏᤧ᤹ ᤐᤠᤴ ᤁᤧᤴᤎᤡᤰᤋᤧᤴᤒᤡ᥅”
11ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤜᤥᤵᤗᤥ. ᤀᤠᤍᤠᤱᤒᤣ᥄”
ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ᤀᤠᤱ ᤔᤧᤎᤡᤰᤏᤧᤴᤗᤥ॥ ᤐᤣᤃᤧ᤹ᤀᤥ. ᤁᤖ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤗᤠᤕᤥ ᤔᤧᤈᤥᤃᤧᤴᤏᤧ᤹ᤀᤥ॥”))
ᤕᤧᤛᤢ᤺ᤴᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤖᤥ
12ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤀᤠᤖᤥ॥ ᤜᤠ᤺ᤳᤗᤧ ᤀᤡᤱᤃᤠ᤹ ᤏᤛᤠᤴ ᤆᤥ᤺ᤰᤁᤠ ᤂᤧᤴᤏᤢ ᤜᤡᤱᤔᤴ ᤁᤧᤒᤡᤒᤠ ᤀᤥ᤺ᤳᤋᤡ᤺ᤴ ᤘᤠ᤹ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤂᤧᤴ ᤂᤠᤍᤠᤶᤔᤥ ᤗᤠᤱᤄᤣ᤺ᤰᤔᤠ ᤔᤧᤒᤥᤱᤏᤧᤸᤗᤥ॥”
13ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤀᤠᤒᤠᤅᤣ ᤁᤧᤕᤠ᤺ᤶᤒᤣᤀᤥ ᤁᤧᤒᤠ᤺ᤳᤋᤢ᤹ᤖᤥ ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠ ᤔᤣ᤺ᤴᤗᤥ॥”
14ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤒᤠ᤺ᤴᤜᤠ᤹ ᤀᤠᤒᤠᤅᤣ ᤐᤠ᤺ᤳᤋᤢᤱᤛᤠᤱ ᤂᤧᤴ ᤛᤧᤰᤂᤠᤀᤣᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤳᤋᤥᤗᤠᤶ ᤋᤩᤠᤱᤅᤠᤱ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤂᤧᤴ ᤏᤢᤖᤡᤰᤁᤠᤱ ᤏᤡᤛᤢᤱᤗᤥ ᤁᤖ ᤂᤡᤏᤡ᤹ᤃ ᤀᤡᤱᤃᤠ᤹ ᤀᤠᤳᤋᤥᤗᤠᤶ ᤋᤩᤠᤱᤒᤠ ᤜᤧᤰᤁᤩᤠᤱ ᤀᤠᤳᤋᤥ ᤐᤣ᤺ᤰᤁᤠᤖ ᤐᤳᤋᤠ ᤂᤧᤴ ᤌᤣᤀᤠᤱ ᤁᤧᤴᤏᤡᤛᤢᤶᤔᤡᤴᤗᤥ॥ 15ᤂᤡᤏᤡ᤹ᤃ ᤔᤧᤴᤇᤠᤶ ᤌᤡᤶ ᤁᤢᤀᤡᤛᤡ᤺ᤰᤁᤣ ᤂᤠᤛᤧᤴ ᤁᤧᤗᤥ᤺ᤴᤍᤡ᤹ᤖᤥ. ᤁᤖ ᤀᤡᤱᤃᤠ᤹ᤃ ᤀᤠᤳᤋᤡᤸᤗᤧᤴᤏᤠᤱ ᤂᤠᤛᤧᤴ ᤔᤧᤈᤥᤃᤢᤱᤅᤡᤴᤗᤥ॥ 16ᤁᤖ ᤀᤡᤱᤃᤠ᤹ ᤂᤠᤛᤧᤴ ᤆᤥᤃᤢᤱᤏᤧ ᤑᤠ᤹ᤃᤪ ᤀᤠᤄᤠᤛᤧᤴᤏᤡᤴ ᤛᤧᤰᤂᤠᤀᤣ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤖᤰ ᤜᤥ᤺ᤵᤐᤠᤖᤥ॥ ᤀᤡᤱᤃᤠ᤹ᤏᤢᤃ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤘᤠ᤹ᤖᤥ॥ 17ᤂᤡᤏᤡ᤹ ᤛᤠᤶᤕᤥᤌᤡᤶᤔᤥ ᤏᤧᤵᤑᤢ ᤔᤏᤠᤜᤠ᤹ᤖᤧ ᤌᤡᤰ ᤐᤠ᤺ᤴᤏᤥ ᤋᤱᤛᤡᤀᤠᤱ ᤋᤥ᤺ᤴᤍᤡ ᤐᤡᤛᤢᤏᤧ ᤑᤠ᤹ᤃᤪ ᤂᤧᤴ ᤋᤥ᤺ᤴᤍᤡᤴ ᤛᤧᤰᤂᤠᤀᤣ ᤐᤥᤱᤗᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳᤗᤥ॥#ᤛᤠᤶᤕᤥ ᤀᤡᤱ ᥇᥏:᥇᥋ 18ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤱᤗᤥ. ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧᤀᤠᤱ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤖᤥ॥”
19ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤖ ᤁᤧᤏᤧᤒᤠ ᤐᤠᤏᤢᤍᤡᤱ ᤁᤧᤶᤒᤠᤃ ᤀᤠᤳᤋᤥ ᤘᤠ᤹ᤒᤣ᥅”
ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤃ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤴᤏᤡ᤺ᤳᤋᤡᤴ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ॥ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤏᤡ᤺ᤳᤋᤡᤸᤗᤧᤃ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤔᤧᤴ॥”
20ᤕᤧᤛᤢᤖᤧ ᤁᤴ ᤐᤠ᤺ᤴᤜᤠ᤹ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤕᤠᤰᤔᤏᤠᤒᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤏᤡᤛᤠᤶ ᤜᤢ᤹ᤖᤢᤛᤡᤖ ᤐᤳᤇᤧᤸᤗᤧ ᤐᤠ᤺ᤳᤋᤢᤒᤠᤖᤥ. ᤁᤖ ᤂᤢᤏᤧ᤹ᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤴᤍᤧᤶᤛᤢᤴᤗᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤕᤧᤶ ᤔᤧᤴᤍᤠᤀᤣ ᤘᤕᤧᤖᤥ॥
ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ
21ᤕᤠᤱᤛᤡ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤐᤣ᤺ᤰᤁᤠᤀᤠᤱ ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤗᤠᤕᤥᤀᤥ ᤁᤧᤛᤩᤧ᤹ᤀᤡᤖᤥ॥ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤧᤴᤏᤥ ᤂᤡᤏᤡ᤹ ᤋᤠᤔᤠ ᤁᤧᤴᤇᤢᤰᤋᤡᤴᤗᤥ॥” 22ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤛᤣ᤺ᤴᤔᤧᤍᤥᤛᤡᤱ. “ᤕᤧᤛᤢᤴ ᤀᤠᤒᤠᤅᤣ ᤛᤧᤳᤇᤡᤱᤒᤠᤒᤡ᥅ ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤧᤴᤏᤥ ᤋᤠᤔᤠ ᤁᤧᤴᤇᤢᤰᤋᤡᤴᤗᤥ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠᤒᤡ᥅”
23ᤂᤢᤏᤧ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤒᤠ ᤁ᤹ᤕᤥᤒᤠᤏᤡᤱᤗᤥ. ᤁᤖ ᤀᤡᤱᤃᤠ᤹ ᤌᤥᤗᤠᤶᤒᤠᤀᤠᤖᤥ॥ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤏᤡᤱᤗᤥ ᤁᤖ ᤀᤡᤱᤃᤠ᤹ᤃ ᤔᤧ᤺ᤴᤏᤠ᤹ᤖᤥ॥ 24ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤗᤠᤕᤥᤜᤠ᤹ᤀᤥ ᤁᤧᤛᤩᤧ᤹ᤀᤡᤖᤥ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤖᤥ॥ ᤀᤡᤱᤃᤠ᤹ ᤜᤠ᤺ᤳᤀᤠ#᥎:᥈᥊ ᤗᤠ ᥉:᥇᥊ ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ “ᤀᤡᤱᤃᤠ᤹ ᤂᤢᤏᤧ᤹ᤀᤠ” ᤗ᤹ᤖᤡᤰ ᤐᤠ᤺ᤳᤋᤢᤖᤥ॥ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤴ ᤂᤡᤏᤡ᤹ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤏᤡᤸᤗᤧᤃ ᤂᤡᤏᤡ᤹ ᤛᤧᤰᤂᤠᤀᤣ ᤀᤠᤒᤠᤅᤣ ᤗᤠᤕᤥᤜᤠ᤹ᤀᤥ ᤁᤧᤛᤩᤧ᤹ᤀᤡ॥”
25ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅”
ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤋᤃᤡᤏᤢᤀᤣ ᤔᤧᤳᤏᤡᤱᤗ ᤘᤠ᤹ᤀᤠᤒᤠᤴᤏᤣ ᤂᤢᤏᤧ᤹ᤀᤠᤖᤥ॥ 26ᤀᤡᤱᤃᤠ᤹ᤃ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤕᤖᤡᤰ ᤐᤠ᤺ᤵᤔᤠ ᤏᤢ ᤂᤡᤏᤡ᤹ ᤑᤧ᤺ᤰᤔᤠ ᤐᤠᤴ ᤁᤳᤋᤢᤱᤗᤥ॥ ᤁᤖ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤛᤧᤰᤂᤠᤀᤣ ᤆᤥᤰᤗᤥ ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤂᤧᤵᤛᤢᤱᤒᤠ ᤐᤠ᤺ᤴᤏᤡᤴᤗᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ ᤔᤧᤳᤋᤢᤱᤛᤡᤱᤗᤥ॥”
27ᤕᤧᤛᤢᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ 28ᤂᤧᤸᤗᤧᤆᤥᤃᤢᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤧᤴᤇᤠᤶᤛᤠᤴ ᤌᤠ᤺ᤱ ᤁᤧᤒᤰᤂᤢᤶᤔᤡᤸᤗᤧ ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣ ᤔᤧᤒᤠ᤺ᤳᤋᤠᤴ ᤁᤖ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤜᤢ᤹ᤖᤠᤱᤒᤠ ᤐᤠ᤺ᤴᤗᤰ ᤐᤠ᤺ᤳᤋᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥ 29ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤱᤃ ᤛᤍᤠᤍᤡᤱ ᤀᤡᤱᤃᤠ᤹ᤏᤢ ᤘᤠ᤹ᤖᤥ॥ ᤂᤢᤏᤧ᤹ᤃ ᤀᤠᤵᤑᤠᤸᤗᤧᤀᤠᤱ ᤀᤡᤱᤃᤠ᤹ ᤀᤣ᤺ᤰ ᤔᤧᤸᤗᤧᤳᤋᤣ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤍᤠᤍᤡᤱ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤕᤠ᤺ᤶᤒᤰ ᤆᤥᤃᤢᤱᤗᤥ॥ 30ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ᤀᤥ ᤏᤛᤠᤴ ᤔᤧᤈᤥᤃᤢᤖᤥ॥”
ᤀᤒᤪᤠᤜᤠᤶᤔᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ
31ᤕᤧᤛᤢᤖᤧ ᤂᤢᤏᤧ᤹ᤀᤥ ᤏᤛᤠᤴ ᤁᤧᤈᤥ᤺ᤰᤐᤠ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ᤀᤥ ᤆᤰᤔᤧᤸᤗ᤹ᤀᤣ ᤁᤧᤒᤳᤇᤡ᤹ᤏᤧ ᤑᤠ᤹ᤃᤪ ᤛᤧᤰᤂᤠᤀᤣ ᤀᤠᤜᤢ᤹ᤛᤠᤶᤒᤠ ᤁᤧᤒᤥ᤺ᤰᤂᤡ᤹ᤖᤥ॥
32“ᤜᤧᤰᤁᤩᤠᤱ ᤛᤧᤰᤂᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤛᤧᤰᤂᤠ᤺ᤸᤗᤧ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡᤖᤥ॥”
33ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤡᤃᤧᤖᤥ॥ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤀᤠᤳᤋᤡᤸᤗᤧᤴᤏᤠᤱ ᤁᤢᤕᤥ᤺ᤰᤐᤠ ᤔᤧᤶᤒᤥᤱᤅᤣ ᤘᤕᤡᤃᤧᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤆᤥ᤺ᤰᤕᤢᤶᤓᤥ ᤁᤧᤄᤥᤛᤢᤶ ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤵᤐᤠᤒᤣ᥅”
34ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤜᤠ᤺ᤳᤗᤧ ᤗᤠᤕᤥ ᤆᤥᤃᤢ᤹. ᤂᤧᤱᤃ ᤗᤠᤕᤥᤖᤧ ᤁᤢᤕᤥ᤺ᤰᤐᤠ ᤐᤥᤱᤗᤥ॥ 35ᤀᤠᤸᤗ ᤕᤥ᤺ᤰᤐᤠᤱᤃ ᤛᤍᤠᤍᤡᤱ ᤜᤡᤶᤛᤕᤱᤅᤥᤒᤠ ᤔᤣ᤺ᤴᤗᤥ. ᤁᤖ ᤛᤠ᤺ᤱᤃ ᤛᤍᤠᤍᤡᤱ ᤜᤡᤶᤛᤕᤱᤅᤥᤒᤠᤖᤥ॥
36“ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤆᤥ᤺ᤰᤕᤢᤶᤓᤥ ᤁᤧᤈᤥᤃᤡᤏᤧ ᤑᤠ᤹ᤃᤪ ᤛᤧᤰᤂᤠᤀᤣ ᤂᤡᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤒᤥ᤺ᤰᤂᤡ᤹ᤖᤥ॥ 37ᤂᤡᤏᤡ᤹ᤃ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤏᤡᤱ ᤑᤠ᤹ᤀᤠᤱ ᤏᤡᤛᤢᤱᤗᤥ. ᤜᤧᤰᤁᤣᤛᤠᤱ ᤕᤠᤵᤔᤡ ᤛᤧᤵᤔᤠ ᤁᤧᤃᤥ᤺ᤳᤋᤡ᤹ᤖᤥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤜᤢ᤹ᤏᤡᤱᤒᤠ ᤏᤡᤛᤠᤶᤔᤡᤴ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤕᤢᤱᤔᤠ ᤁᤧᤴᤍᤧᤴᤍᤡᤴᤗᤥ॥ 38ᤀᤡᤱᤃᤠ᤹ᤃ ᤐᤠᤏᤢᤍᤡᤱ ᤀᤠᤶᤒᤠᤏᤢ ᤘᤕᤠᤱᤅᤡᤸᤗᤧ ᤏᤡᤛᤢᤱᤒᤠ ᤐᤠ᤺ᤴᤜᤠ᤹ᤀᤣ ᤐᤠ᤺ᤳᤋᤢᤱᤗᤥ. ᤁᤖ ᤂᤡᤏᤡ᤹ᤃ ᤂᤡᤏᤡ᤹ ᤐᤠᤗᤠᤶᤒᤠ ᤁᤧᤄᤧᤵᤛᤢᤶᤒᤠᤴᤗᤰ ᤁᤧᤈᤥᤃᤢᤶᤗᤥ॥”
39ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠ᤺ᤱᤃ ᤀᤒᤪᤠᤜᤠᤶᤔᤡᤴᤏᤣᤖᤥ॥”
ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ ᤁᤧᤘᤕᤡᤸᤗᤧᤃ ᤀᤒᤪᤠᤜᤠᤔᤖᤧ ᤆᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤈᤥᤃᤢᤶᤗᤥ॥ 40ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤧᤵᤛᤢᤱᤒᤠ ᤛᤧᤰᤂᤠ᤺ᤴᤏᤣ ᤂᤡᤏᤡ᤹ ᤔᤧᤳᤏᤡᤱᤗᤥ. ᤁᤖ ᤂᤡᤏᤡ᤹ᤃ ᤕᤠᤵᤔᤡ ᤛᤧᤵᤔᤠ ᤁᤧᤃᤥ᤺ᤳᤋᤡ᤹ᤖᤥ॥ ᤀᤒᤪᤠᤜᤠᤔᤖᤧᤃ ᤜᤧᤰᤁᤣ ᤔᤧᤈᤥᤃᤢᤴᤗᤥ॥ 41ᤂᤡᤏᤡ᤹ ᤀᤠᤒᤠᤅᤣ ᤐᤠ᤺ᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ᤀᤣ ᤂᤡᤏᤡ᤹ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥”
ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤣ ᤂᤥ᤹ᤛᤠᤛᤡᤃᤧᤃ ᤔᤣ᤺ᤴᤗᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠ᤺ᤖᤥ॥”
42ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤐᤠ ᤘᤕᤧᤸᤗᤧᤃ ᤀᤡᤱᤃᤠ᤹ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤳᤋᤡᤔᤧᤴ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤠᤱᤒᤠᤖᤥ. ᤀᤡᤱᤃᤠ᤹ ᤀᤠᤒᤠᤅᤣ ᤋᤩᤠᤱᤒᤠ ᤔᤣ᤺ᤴᤗᤥ ᤁᤖ ᤂᤢᤏᤧ᤹ ᤀᤡᤱᤃᤠ᤹ ᤐᤠᤱᤄᤠᤱᤒᤠᤖᤥ॥ 43ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤶᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤁᤡᤴ ᤂᤧᤶᤔᤠ ᤁᤧᤴᤇᤢᤰᤋᤢᤶᤔᤡᤴᤗᤥ॥ 44ᤂᤡᤏᤡ᤹ ᤐᤠ᤺ᤱᤃ ᤔᤠᤑᤧᤴᤛᤠᤶᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤜᤧᤰᤁᤣᤀᤣ ᤆᤥ᤺ᤰᤔᤠ ᤂᤡᤏᤡ᤹ ᤛᤡᤖᤠ᤹ᤌᤠᤱᤗᤥ॥ ᤂᤧᤱᤃ ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤔᤧᤴᤇᤠᤶ ᤕᤠᤵᤔᤡ ᤁᤧᤛᤧᤵᤐᤠ ᤘᤕᤧ॥ ᤂᤧᤸᤗᤧ ᤛᤧᤰᤂᤠᤴ ᤆᤡ᤺ᤳᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤧᤰᤂᤠᤴ ᤂᤢᤏᤧ᤹ᤀᤥ ᤜᤥᤵᤗᤥ॥ ᤂᤢᤏᤧ᤹ ᤋᤠᤵᤑᤧ᤺ᤶᤒᤠ ᤁᤢᤛᤢᤳᤏᤠ᤺ᤴ ᤁᤢᤀᤡᤛᤡ᤺ᤰᤁᤣ ᤀᤡᤱᤗᤧᤰ ᤐᤠ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤜᤧᤰᤁᤩᤠᤱ ᤀᤡᤱᤗᤧᤰᤁᤣ ᤐᤠ᤺ᤴᤜᤠ᤹ᤖᤧ ᤁᤢᤶᤒᤠᤖᤥ॥ 45ᤀᤡᤱᤃᤠ᤹ ᤛᤧᤰᤂᤠᤴ ᤔᤧᤳᤏᤡᤱᤛᤠᤱ ᤂᤡᤏᤡ᤹ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤗᤥ᥄ 46ᤂᤡᤏᤡ᤹ᤀᤥ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤗᤠᤕᤥᤒᤠ ᤔᤧᤵᤔᤠ ᤛᤢᤰᤁᤠᤒᤣ᥅ ᤀᤡᤱᤃᤠ᤹ ᤛᤧᤰᤂᤠ ᤐᤠᤴ ᤔᤧᤳᤏᤡᤱᤛᤠᤱ ᤌᤣᤀᤠᤱ ᤂᤡᤏᤡ᤹ ᤏᤛᤠᤴ ᤁᤧᤴᤈᤥᤃᤢᤶᤔᤡᤶᤒᤠᤒᤣ᥅ 47ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ᤹ᤖᤥ॥ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤔᤧ᤺ᤴᤏᤡᤱᤗᤥ. ᤂᤧᤸᤗᤧᤆᤥᤃᤢᤸᤗᤧᤀᤣ ᤂᤡᤏᤡ᤹ ᤁᤢᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴᤗᤥ॥”
ᤕᤧᤛᤢᤴ ᤀᤒᤪᤠᤜᤠᤶᤔᤡᤴᤏᤢ᤺ᤸᤗᤧ ᤕᤶᤒᤠ
48ᤕᤜᤢᤍᤡᤜᤠ᤹ᤖᤧ ᤕᤧᤛᤢᤴ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ ᤛᤠᤔᤖᤡ ᤛᤢᤘᤠᤱᤒᤠᤏᤧ ᤜᤧᤰᤁᤩᤠᤱ ᤂᤧᤏᤧ᤹ ᤑᤧᤴᤛᤠᤶᤔᤡᤸᤗᤧ ᤁᤧᤍᤖᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤀᤠᤏᤡᤃᤣ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ॥”
49ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤑᤧᤴᤛᤠᤶᤔᤡᤸᤗᤧ ᤔᤧᤴᤕᤠᤱᤅᤣ ᤘᤠ᤹ᤀᤠᤖᤥ॥ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤱ. ᤁᤖ ᤂᤡᤏᤡ᤹ᤃ ᤀᤡᤱᤃᤠ᤹ ᤀᤡᤱᤎᤠᤱ ᤕᤠᤵᤔᤡ ᤁᤧᤶᤒᤡᤖᤡᤴᤗᤥ॥ 50ᤀᤡᤱᤃᤠ᤹ᤃ ᤀᤠᤵᤑᤣᤰ ᤀᤠᤔᤡᤔᤡᤍᤡᤱᤅᤡᤴ ᤔᤧᤃᤥ᤺ᤳᤋᤢᤱᤅᤡᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤔᤡᤔᤡᤍᤡᤱᤅᤡᤴ ᤁᤥ᤺ᤳᤋᤢ᤹. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤠᤛᤧᤴᤗᤥ᤺ᤶᤒᤠᤖᤥ॥ 51ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤀᤠᤏᤡᤛᤠᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤛᤡ᤺ᤏᤧᤴᤗᤥ॥”
52ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤛᤧᤰᤂᤠᤀᤣ ᤑᤧᤴᤛᤠᤶᤔᤡᤸᤗᤧ ᤁᤧᤕᤠᤱᤄᤧᤀᤠᤱ ᤁᤧᤘᤠ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ॥ ᤌᤣᤀᤠᤱᤓᤧᤸᤗᤧ ᤀᤒᤪᤠᤜᤠᤶᤔᤡᤴ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤠᤰ ᤔᤧᤛᤩᤧ ᤔᤧᤄᤧᤖᤧ. ᤁᤖ ᤂᤧᤏᤧ᤹. ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤛᤡᤏᤧᤴᤗᤥ ᤗ᤹ᤖᤡᤰ ᤁᤧᤒᤠ᤺ᤳᤋᤢ᤹ᤖᤥ॥ 53ᤂᤧᤏᤧ᤹ ᤀᤠᤏᤡᤃᤣ ᤛᤢᤎᤧᤒᤠ ᤋᤠᤰᤌᤧᤒᤠ ᤀᤒᤪᤠᤜᤠᤶᤔᤡᤴᤏᤢ᤺ᤸᤗᤧᤀᤠᤱ ᤕᤶᤒᤠᤏᤧᤒᤡ᥅ ᤂᤢᤏᤧ᤹ᤃ ᤛᤩᤧ ᤜᤧᤰᤁᤩᤠᤱ ᤁᤠᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤔᤧᤛᤩᤧᤖᤥ॥ ᤂᤧᤏᤧ᤹ᤃ ᤀᤠᤒᤠᤅᤣ ᤜᤠ᤺ᤳᤀᤠ ᤁᤧᤗ᤹ᤒᤣ᥅”
54ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤒᤠᤅᤣ ᤆᤶᤛᤡᤱᤅᤠᤏᤧ ᤑᤠ᤹ᤃᤪ ᤂᤧᤱᤃ ᤌᤣᤀᤠᤱ ᤔᤣ᤺ᤴᤗᤥ. ᤁᤖ ᤂᤡᤏᤡ᤹ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱ ᤁᤧᤔᤧᤳᤋᤢᤶᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧᤀᤣ ᤀᤡᤱᤃᤠ᤹ ᤀᤠᤔᤡᤔᤡᤍᤡᤱ ᤆᤥᤃᤢ᤹ᤖᤥ॥ 55ᤂᤡᤏᤡ᤹ᤃ ᤂᤢᤏᤧ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤇᤠᤱ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤗ᤹ᤖᤡᤰ ᤐᤠ᤺ᤳᤋᤢᤱᤏᤧ ᤑᤠ᤹ᤃᤪ ᤂᤡᤏᤡ᤹ ᤜᤧᤰᤁᤣᤀᤣ ᤀᤡᤱᤃᤠ᤹ ᤀᤡᤱᤗᤧᤰᤁᤣ ᤐᤥᤱᤅᤠᤖᤥ. ᤁᤖ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤁᤢᤒᤠ᤺ᤴᤈᤠᤰᤁᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥ 56ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠ ᤀᤒᤪᤠᤜᤠᤔᤖᤧᤀᤠᤱ ᤁᤴ ᤀᤠᤍᤠᤔᤠ ᤕᤧᤶᤔᤡᤴ ᤀᤥᤔᤧᤵᤔᤠ ᤑᤠ᤹ᤀᤠᤱ ᤛᤠ᤹ᤖᤡᤰ ᤁᤢᤛᤡᤰ ᤛᤔᤧᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤕᤧᤴᤏᤡᤴ ᤏᤡᤛᤢᤀᤠᤱ ᤛ᤺ᤳᤋᤧᤖᤥ॥”
57ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤋᤱᤒᤣ ᤅᤠᤃᤡᤵᤐᤠᤱ (᥋᥆) ᤔᤧᤱᤃᤧᤳᤋᤣ ᤁᤧᤘᤠ᤹ ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤒᤪᤠᤜᤠᤶᤔᤡᤴ ᤁᤧᤏᤡᤛᤢᤀᤠᤱ ᤁᤧᤘᤠ᤹ᤒᤣ᥅”
58ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤀᤒᤪᤠᤜᤠᤶᤔᤡᤴ ᤛᤠᤘᤠ᤺ᤴᤇᤡᤱᤔᤠᤏᤢ᤺ᤸᤗᤧ ᤋᤃᤡᤀᤠᤱᤎᤥᤀᤣ ᤀᤡᤱᤃᤠ᤹ ᤘᤠ᤹ᤀᤠᤖᤥ॥” 59ᤜᤧᤰᤁᤣ ᤐᤠ᤺ᤳᤋᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤗᤧᤵᤔᤠ ᤛᤧᤵᤔᤠ ᤑᤠ᤹ᤀᤠᤱ ᤗᤢᤱ ᤔᤧᤄᤵᤛᤢ.#᥎:᥋᥏ ᤕᤧᤛᤢᤖᤧ ᤁᤢᤒᤠ᤺ᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ ᤂᤧᤱᤃ ᤔᤠᤱᤆᤧ᤹ᤕᤠ ᤘᤕᤧᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤗᤢᤱᤅᤡᤸᤗᤧ ᤗᤧᤵᤔᤠ ᤔᤧᤃᤥ᤺ᤳᤋᤢ (ᤗᤧᤒᤡ ᥈᥊:᥇᥉-᥇᥌)॥ ᤁᤖ ᤕᤧᤛᤢᤴ ᤆᤡᤱᤛᤡᤱᤅᤠᤱ ᤔᤠᤱᤜᤡᤶ ᤗᤰᤂᤢᤶᤔᤥᤗᤠᤶ ᤛᤫᤠ᤺ᤳᤋᤠᤱ ᤗ᤺ᤴᤍᤧ ᤐᤣᤖᤥ॥
Currently Selected:
ᤕᤢᤜᤢᤴᤏᤠ 8: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.