ᤕᤢᤜᤢᤴᤏᤠ 5
5
ᤒᤧᤌᤛ᤻ᤍᤠ ᤘᤠᤒᤠᤰᤁᤥ ᤗᤱᤗᤧ᤺ᤱᤘᤠᤴ ᤘᤣ᤺ᤳᤋᤧᤒᤠ
1ᤂᤧᤴ ᤀᤣᤃᤠᤱ ᤕᤧᤛᤢᤴ ᤕᤜᤢᤍᤡ ᤋᤱᤏᤠᤶᤖᤧ ᤗᤠᤃᤡ ᤌᤥ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤐᤣ॥ 2ᤀᤠᤸᤗ ᤕᤖᤢᤛᤗᤧᤶᤔᤥ ᤔᤧᤸᤗᤢᤰ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤒᤣᤛᤠᤱ ᤅᤠᤛᤡ ᤛᤡᤳᤗᤠᤱᤜᤠ᤹ᤖᤧ ᤁᤒᤪᤡᤱ ᤁᤒᤢᤒᤠ ᤜᤡᤒᤪᤢ ᤐᤠ᤺ᤴᤏᤥ ᤒᤧᤌᤛ᤻ᤍᤠ ᤔᤧᤵᤔᤏᤠᤒᤠ ᤘᤠᤒᤠᤰᤌᤡᤰ ᤏᤧ᤹᤺॥ 3ᤂᤧᤵᤔᤥ ᤕᤖᤡᤰ ᤁᤧᤍᤢᤰᤐᤠ ᤔᤏᤠᤜᤠ᤹—ᤔᤡᤰᤑ᤺ᤶᤒᤠ. ᤗᤠᤱᤛᤰᤐᤠ ᤏᤢ ᤗᤱᤗᤧ᤺ᤱᤘᤠ ᤔᤏᤠᤜᤠ᤹ ᤔᤧᤏᤧᤛ᤻ᤛᤧᤖᤥ॥ ((ᤂᤧᤱᤜᤠ᤹ᤖᤧ ᤇᤡᤶᤗᤡᤱ ᤇᤡᤶᤗᤡᤱ ᤗ᤹ᤖᤡᤰ ᤁᤧᤔᤢᤶᤒᤠ ᤆᤫᤠ᤺ᤳᤋᤡᤴ ᤔᤧᤜᤠᤱᤄᤢᤀᤠᤱ ᤔᤧᤏᤧᤛ᤻ᤛᤧᤖᤥ॥ 4ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤁᤢᤓᤠ ᤕᤧᤴᤏᤥ ᤋᤠᤀᤠᤱ ᤆᤫᤠ᤺ᤳᤋᤡᤴ ᤔᤢᤴᤍᤢᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤆᤫᤠ᤺ᤳᤋᤥ ᤁᤧᤗᤠ᤺ᤵᤐᤧᤴ ᤀᤠᤰᤋᤱᤒᤠ ᤋᤢᤰᤔᤠ ᤕ᤹ᤔᤠ ᤁᤳᤋᤢᤛᤠᤱ ᤘᤣ᤺ᤳᤋᤧᤖᤥ॥)) 5ᤂᤧᤵᤔᤥ ᤁᤧᤏᤧᤒᤠ ᤌᤡᤰ ᤁᤧᤍᤢᤰᤐᤠ ᤔᤏᤠ᤺ᤱᤃ ᤛᤢᤶᤕᤧᤳ (᥉᥎) ᤋᤱᤒᤣᤀᤠᤱᤎᤥ ᤏᤧᤛ᤻ᤛᤧᤖᤥ॥ 6ᤕᤧᤛᤢᤖᤧ ᤂᤧᤴ ᤔᤏᤠᤴ ᤂᤧᤵᤔᤥ ᤏᤧᤛ᤻ᤛᤧᤒᤠ ᤏᤡᤛᤢ ᤜᤧᤰᤁᤩᤠᤱ ᤕᤖᤡᤰ ᤋᤱᤒᤣᤀᤠᤱᤎᤥ ᤋᤢᤰᤁᤠᤱ ᤏᤧᤖᤥ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤘᤣ᤺ᤵᤔᤠ ᤁᤧᤛᤡᤖᤠ᤹ ᤌᤠᤱᤒᤡ᥅”
7ᤂᤧᤴ ᤁᤧᤍᤢᤰᤐᤠᤸᤗᤧ ᤏᤥᤃᤵ ᤐᤡᤖᤢ. “ᤀᤥᤖᤥ. ᤀᤠᤍᤠᤱᤒᤣ. ᤁᤖ ᤂᤧᤴ ᤘᤠᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤇᤡᤶᤗᤡᤱ ᤇᤡᤶᤗᤡᤱ ᤗ᤹ᤖᤡᤰ ᤔᤢᤴᤏᤡᤸᤗᤧ ᤂᤧᤵᤔᤥ ᤕᤠᤵᤔᤡ ᤁᤧᤃᤣ᤺ᤵᤐᤠ ᤜᤠ᤺ᤳᤋᤠᤱ ᤜᤥᤵᤗᤥ॥ ᤀᤡᤱᤃᤠ᤹ ᤂᤧᤵᤔᤥ ᤗᤠ᤺ᤵᤔᤠ ᤋᤶᤛᤡᤱ ᤆᤥᤃᤢᤱᤗ ᤐᤳᤋᤠᤸᤗᤧᤛᤠ ᤘᤣ᤹ᤜᤠ᤹ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤔᤧᤗᤠᤳ ᤔᤧᤒᤣ᤺ᤰᤗᤥ॥”
8ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤥᤃᤧ᤹᥄ ᤜᤧᤰᤁᤩᤠᤱ ᤁᤧᤏᤧᤳᤏᤠᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹ᤀᤥ॥” 9ᤂᤡᤔᤥ ᤂᤧᤴ ᤔᤏᤠᤴ ᤘᤣ᤺ᤳᤋᤧᤀᤠᤱ ᤁᤢᤏᤧᤳᤏᤠᤴ ᤕᤠᤱᤛᤡᤱᤅᤠᤱ ᤌᤠᤛᤡᤱᤗᤥ॥
ᤀᤠᤸᤗ ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤏᤡᤱᤃ ᤏᤠ᤺ᤶᤛᤡᤱ ᤕᤧᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ 10ᤂᤧᤸᤗᤧᤆᤥᤃᤢᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤧᤴ ᤁᤧᤘᤣ᤺ᤵᤐᤠ ᤔᤏᤠᤴ “ᤂᤧᤏᤧ᤹ ᤏᤠ᤺ᤶᤛᤡᤱ ᤕᤧᤴᤏᤥ ᤁᤧᤏᤧᤳᤏᤠᤴ ᤐᤱᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤁᤧᤶᤒᤡᤏᤧᤴᤗᤥ” ᤔᤧᤔᤧᤳᤋᤢᤖ ᤔᤧᤀᤳᤋᤢ॥
11ᤁᤖ ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤕᤠᤵᤔᤡ ᤁᤧᤘᤣ᤺ᤶᤒᤠ ᤔᤏᤠ᤺ᤸᤗᤧᤀᤣ ‘ᤁᤧᤏᤧᤳᤏᤠᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤳᤋᤠᤱᤒᤠᤖᤥ॥”
12ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤳᤋᤡᤴ ᤔᤏᤠ᤺ᤸᤗᤧ “ᤂᤧᤏᤧ᤹ ᤁᤧᤏᤧᤳᤏᤠᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹” ᤁᤧᤔᤧᤳᤋᤧ ᤗ᤹ᤖᤡᤰ ᤂᤧᤴ ᤛᤣ᤺ᤴᤔᤧᤍᤥᤛᤢ॥ 13ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤧᤘᤣ᤺ᤶᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤒᤠ ᤔᤏᤠᤗᤢᤶᤔᤥ ᤕᤧᤛᤢᤴ ᤀᤡ᤺ᤶᤛᤡᤱ ᤐᤣᤀᤠᤱ ᤜᤥ᤺ᤵᤋᤧᤖᤥ॥
14ᤕᤠᤱᤛᤡ ᤕᤧᤛᤢᤖᤧ ᤂᤧᤴ ᤔᤏᤠᤴ ᤔᤠᤱᤜᤡᤶᤔᤥ ᤋᤢᤔᤢᤀᤠᤱ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤏᤢᤖᤧᤀᤠᤱ ᤁᤧᤘᤠ᤹ᤖᤥ॥ ᤀᤠᤸᤗᤀᤠᤱᤎᤥ ᤗᤠᤕᤥ ᤔᤧᤈᤥᤃᤧᤴᤏᤧ᤹ᤀᤥ. ᤔᤣ᤺ᤴᤏᤣ ᤑᤠ᤹ᤃᤪ ᤁᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤍᤢᤔᤢ᤹ᤖᤥ॥”
15ᤂᤧᤴ ᤔᤏᤠ᤺ᤴ ᤐᤣᤀᤠᤱ ᤀᤡᤱᤃᤠ᤹ ᤁᤧᤘᤣ᤺ᤶᤒᤠᤱᤃ ᤕᤧᤛᤢᤴ ᤏᤣᤖᤧᤳᤇ ᤑᤠ᤹ᤀᤠᤱ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤔᤧᤳᤋᤢᤛᤡᤖᤥ॥
16ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴ ᤛᤠᤶᤕᤥᤌᤡᤶᤔᤡᤴ ᤑᤣ᤺ᤴᤍᤢ ᤑᤠ᤹ᤀᤠᤱ ᤕᤧᤛᤢᤴ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤵᤔᤠ ᤔᤧᤜᤣ᤺ᤰᤋᤢᤖᤥ॥ 17ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤶᤒᤠᤖᤧᤀᤣ ᤀᤠᤸᤗᤥ ᤌᤠᤖᤡᤰ ᤕᤠ᤺ᤶᤒᤰ ᤆᤥᤃᤢᤖ ᤘᤠ᤹. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ᤀᤠᤱ ᤆᤥᤃᤢᤱᤗᤥ॥” 18ᤂᤢᤏᤧ᤹ᤃ ᤏᤠ᤺ᤶᤛᤡᤱ ᤕᤧᤴᤏᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠ ᤛᤠᤶᤕᤥᤌᤡᤶᤔᤡᤴᤗᤰ ᤔᤧᤏᤠ᤹ᤖᤢᤴ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ “ᤀᤠᤶᤒᤠᤖᤥ” ᤐᤠ᤺ᤳᤋᤢᤀᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤢᤍᤱᤒᤠ ᤆᤥ᤺ᤰᤛᤡᤱ ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰᤛᤠᤱ ᤂᤢᤏᤧ᤹ ᤛᤧᤵᤔᤠ ᤐᤥᤱ ᤗ᤹ᤖᤡᤰ ᤋᤶᤛᤡᤱ ᤔᤧᤈᤥᤃᤢ॥
19ᤕᤧᤛᤢᤖᤧ ᤂᤧᤱᤜᤠ᤹ ᤀᤰᤋᤱᤒᤠ ᤏᤥᤃᤵ ᤐᤡᤖᤢᤛᤡ. “ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤁᤢᤛ᤻ᤛᤠ᤺ᤸᤗᤧ ᤀᤠᤒᤠᤅᤣᤃ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴ. ᤁᤖ ᤂᤢᤏᤧ᤹ᤃ ᤐᤠᤏᤢᤍᤡᤱ ᤁᤢᤶᤒᤠᤖᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤏᤡᤛᤢᤒᤠ ᤁᤢᤀᤡᤛᤡ᤺ᤰᤗᤰ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤌᤣ ᤆᤥᤃᤢ᤹ ᤒᤠ ᤂᤧᤴᤏᤣ ᤁᤢᤛ᤻ᤛᤠ᤺ᤸᤗᤧᤀᤠᤱ ᤆᤥᤃᤢ᤹ᤖᤥ॥ 20ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤛ᤻ᤛᤠᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤂᤢᤏᤧ᤹ ᤆᤥᤃᤢᤒᤠ ᤁᤠᤰ ᤕᤠ᤺ᤶᤒᤰᤁᤡᤴ ᤀᤥᤛᤣ᤺ᤴᤎᤠᤰᤋᤢ᤹ᤖᤥ॥ ᤜᤧᤰᤁᤩᤠᤱ ᤁᤴ ᤔᤏᤠᤴ ᤘᤣ᤺ᤳᤋᤧᤒᤠᤴᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤀᤥᤛᤣ᤺ᤴᤎᤠᤰᤋᤢᤒᤠ ᤁᤧᤏᤡᤛᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤠᤖᤥ॥ 21ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤧᤛᤡᤒᤠᤜᤠ᤹ ᤕᤠᤶᤔᤥ ᤜᤡᤱᤄᤢᤛᤡᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤁᤢᤛ᤻ᤛᤠ᤺ᤸᤗᤧᤀᤠᤱ ᤏᤡᤱᤘᤠ᤹ ᤆᤥᤃᤢᤛᤡᤒᤠ ᤔᤏᤠᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤐᤡᤖᤢᤛᤡ᤹ᤖᤥ॥ 22ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤠᤏᤢᤍᤡᤱ ᤐᤠ᤺ᤸᤗᤧ ᤜᤠ᤺ᤳᤋᤠᤱ ᤀᤠᤒᤠᤅᤣ ᤂᤠᤛᤧᤴ ᤔᤧᤈᤥᤃᤢᤴ. ᤁᤖ ᤁᤠᤰ ᤂᤠᤛᤧᤴ ᤆᤥ᤺ᤰᤔᤠ ᤕᤢᤰᤁᤡᤴ ᤁᤢᤛ᤻ᤛᤠᤴ ᤐᤡᤖᤢᤀᤠᤱ ᤘᤠ᤹ᤖᤥ॥ 23ᤂᤧᤸᤗᤧᤆᤥᤃᤢᤸᤗᤧ ᤁᤠᤰ ᤔᤏᤠᤜᤠ᤹ᤖᤧ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠᤱ ᤔᤧᤒᤡᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤁᤢᤛ᤻ᤛᤠᤴᤏᤠᤱ ᤔᤧᤒᤡᤖᤢᤖᤖᤥ॥ ᤁᤖ ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤀᤡᤱᤎᤠᤱ ᤔᤧᤶᤒᤡᤔᤏᤠᤒᤠᤸᤗᤧᤃ ᤁᤢᤛ᤻ᤛᤠ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤀᤡᤱᤎᤠᤱ ᤔᤧᤒᤡᤖᤢᤴᤗᤥ॥”
24ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤐᤣᤗᤡᤃᤧᤴ ᤀᤠᤒᤠ᤺ᤴᤈᤠᤰᤁᤡᤴ ᤂᤧᤵᤛᤢᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤏᤛᤠᤴ ᤆᤥᤃᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤛᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤂᤢᤶᤍᤡᤱ ᤔᤧᤄᤥᤛᤢᤴ. ᤁᤖ ᤂᤧᤱᤃ ᤋᤃᤡᤛᤠ ᤛᤡᤔᤧᤴᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤆᤳᤇᤡᤱ ᤐᤣᤀᤠᤱ ᤘᤠ᤹ᤖᤥ॥ 25ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤸᤗ ᤕᤧᤶᤔᤡᤴ ᤋᤠᤖ ᤐᤳᤗᤥ. ᤁᤧᤛᤡᤒᤠᤜᤠ᤹ᤖᤧ#᥋:᥈᥋ ᤁᤧᤛᤡᤒᤠᤜᤠ᤹—ᤁᤴ ᤑᤠ᤹ᤀᤡᤴ ᤏᤠᤛᤡᤱᤃᤧᤴ ᤌᤰᤁᤥ ᤔᤣ᤺ᤴ. ᤁᤖ ᤕᤠᤶᤛᤠᤶᤃᤧᤴ ᤛᤡᤔᤧᤴᤗᤥ॥ ᤗᤠᤕᤥ ᤁᤧᤈᤥ᤺ᤰᤐᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡ ᤕᤠᤶᤛᤠᤶᤔᤥ ᤔᤧᤛᤡᤀᤠᤱ ᤂᤧᤔᤠᤕᤱᤛᤱ ᤔᤧᤒᤣ᤺ᤰ ᤁᤖ ᤍᤠᤱᤒᤠ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤋᤠᤱᤔᤧᤛᤧ᤺ᤵᤐᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥᤛᤢ᤹॥ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤀᤡᤰᤗᤠᤴ ᤔᤧᤄᤧᤵᤛᤢ᤹ ᤜᤧᤰᤁᤩᤠᤱ ᤁᤢᤀᤡᤰᤗᤠᤴ ᤁᤧᤄᤧᤶᤒᤠᤜᤠ᤹ ᤔᤧᤜᤡᤱᤗᤥ ᤜᤧᤰᤁᤩᤠᤱ ᤛᤧᤰᤂᤠᤀᤣ ᤂᤧᤴ ᤕᤧᤶᤔᤡᤱᤃ ᤀᤠᤸᤗᤥᤀᤣᤖᤥ॥ 26ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤠᤰ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤸᤗᤧ ᤁᤢᤒᤢᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛ᤻ᤛᤠᤴᤏᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥ 27ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤠᤰ ᤔᤧᤴᤇᤠᤶ ᤛᤢᤘᤠᤱ ᤛᤶᤍᤠᤱ ᤂᤠᤛᤧᤴ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤢᤰ ᤐᤡᤖᤢᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤔᤧᤴᤇᤠᤶᤛᤠ᤺ᤖᤥ॥
28“ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹. ᤛᤧᤰᤂᤠᤀᤣ ᤀᤰᤋᤱᤒᤠ ᤕᤧᤶ ᤋᤠᤖ ᤐᤳ. ᤂᤧᤴ ᤕᤧᤶᤔᤥᤃ ᤀᤡ᤺ᤵᤐᤢᤱᤅᤥᤒᤠ ᤁᤠᤰ ᤁᤢᤛᤡᤘᤧᤳᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤀᤡᤰᤗᤠᤴ ᤔᤧᤄᤧᤵᤛᤢᤀᤠᤱ 29ᤂᤧᤱᤜᤠ᤹ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱ—ᤏᤢᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥᤛᤢ᤹. ᤁᤖ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤂᤢᤶᤍᤡᤱ ᤔᤧᤄᤥᤛᤢ᤹ᤖᤥ॥”
30ᤀᤡᤱᤃᤠ᤹ ᤀᤠᤒᤠᤅᤣᤃ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤁᤠᤴᤗᤥ. ᤁᤖ ᤀᤡᤱᤃᤠ᤹ ᤂᤧᤵᤛᤢᤱᤒᤠ ᤁᤢᤀᤡᤛᤡ᤺ᤰᤗᤰ ᤂᤠᤛᤧᤴ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤆᤥᤃᤢᤱᤒᤠ ᤂᤠᤛᤧᤴᤏᤡᤴ ᤛᤠᤶᤕᤥᤒᤠ ᤆᤥᤰᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤀᤡᤸᤗᤧ ᤌᤠᤵᤋᤢᤒᤠ ᤌᤣᤀᤠᤱ ᤔᤧᤈᤥᤰᤁᤠᤴ. ᤁᤖ ᤕᤠᤵᤔᤡ ᤁᤧᤒᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤗᤰ ᤆᤥᤃᤢᤱᤗᤥ॥
ᤕᤧᤛᤢᤖᤧ ᤁᤢᤍᤥ᤺ᤴᤍᤡᤴ
31“ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤀᤠᤒᤠᤅᤣ ᤋᤥ᤺ᤴᤍᤡ ᤐᤡᤖᤢᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤍᤥ᤺ᤴᤍᤡᤴ ᤛᤧᤰᤂᤠ ᤔᤧᤒᤥᤱᤏᤧᤸᤗᤥ॥#᥋:᥉᥇ ᤕᤜᤢᤍᤡ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤐᤠ᤺ᤵᤔᤏᤠᤒᤠ ᤐᤠ᤺ᤴᤏᤡᤴ ᤛᤧᤰᤂᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤏᤧᤳᤇᤡ ᤋᤥ᤺ᤴᤍᤡ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤘᤕᤧ॥ 32ᤁᤖ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤒᤠᤱᤃ ᤘᤣ᤹ᤎᤡᤰ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤥ᤺ᤴᤍᤡᤱᤃ ᤛᤧᤰᤂᤠ ᤆᤥᤰᤗᤥ॥”#᥋:᥉᥈ ᤕᤧᤛᤢᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤖ ᤐᤳ॥
33ᤛᤧᤰᤂᤠᤀᤣ ᤂᤡᤏᤡ᤹ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤖᤥ ᤁᤢᤒᤠᤴ ᤂᤧᤶᤛᤧ ᤁᤧᤒᤠᤱᤄᤢᤶᤛᤡᤶ ᤜᤧᤰᤁᤩᤠᤱ ᤛᤧᤰᤂᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤋᤥ᤺ᤴᤍᤡ ᤐᤡᤖᤢᤀᤠᤱ ᤘᤠ᤹ᤖᤥ॥ 34ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤴ ᤋᤥ᤺ᤴᤍᤡ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴᤗᤥ. ᤁᤖ ᤁᤴ ᤁᤠᤰ ᤐᤠ᤺ᤴᤜᤠ᤹ᤃ ᤂᤡᤏᤡ᤹ ᤛᤧᤴᤗᤵ ᤁᤧᤄᤥᤛᤢᤶᤗ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤖᤥ॥ 35ᤕᤢᤜᤢᤴᤏᤠ᤺ᤱᤃ ᤛᤣᤔᤡ ᤁᤢᤀᤡᤛᤡᤰ ᤁᤧᤍᤡ᤺ᤵᤐᤠ ᤏᤢ ᤀᤥ᤺ᤳᤋᤡ ᤁᤧᤒᤡᤒᤠ ᤘᤕᤧ ᤜᤧᤰᤁᤩᤠᤱ ᤛᤵᤑᤠᤎᤡᤰᤛᤠᤱ ᤂᤢᤏᤧ᤹ ᤁᤢᤀᤥ᤺ᤳᤋᤡᤴ ᤂᤡᤏᤡ᤹ ᤛᤡᤖᤠ᤹ᤌᤠᤅᤧᤖᤥ. 36ᤁᤖ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤕᤢᤜᤢᤴᤏᤠ᤺ᤸᤗᤧ ᤁᤢᤍᤥ᤺ᤴᤍᤡᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤋᤥ᤺ᤴᤍᤡ ᤘᤠ᤹. ᤂᤧᤱᤃ ᤆᤥᤃᤢᤱᤗ ᤘᤠ᤹ᤀᤠᤒᤠ ᤀᤠᤶᤒᤠᤖᤧ ᤆᤥ᤺ᤰᤔᤠ ᤛᤢ᤺ᤵᤔᤠ ᤑᤠ᤹ᤀᤠᤱ ᤐᤡᤖᤠᤱᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤐᤠᤏᤢᤍᤡᤱ ᤀᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠ ᤑᤠ᤹ᤀᤠᤱ ᤋᤥ᤺ᤴᤍᤡ ᤁᤧᤒᤡᤖᤡᤖᤥ॥ 37ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤀᤠᤱ ᤘᤠ᤹ᤖᤥ॥ ᤂᤡᤏᤡ᤹ ᤀᤠᤵᤑᤠᤸᤗᤧᤀᤠᤱ ᤁᤢᤒᤠᤴ ᤔᤧᤱᤄᤧᤶᤔᤣ ᤏᤢ ᤂᤢᤏᤧ᤹ ᤔᤧᤴᤏᤡᤀᤣ ᤁᤧᤘᤕᤡ᤹ᤖᤥ॥ 38ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤀᤥ ᤔᤧᤘᤠ᤹ᤏᤧᤴᤗᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠᤱᤄᤢᤒᤠ ᤔᤏᤠᤴ ᤂᤡᤏᤡ᤹ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤗᤥ॥ 39ᤂᤡᤏᤡ᤹ᤃ ᤛᤠᤶᤕᤥᤛᤠᤵᤗᤠᤴ ᤏᤢ᤺ᤖᤡᤰᤁᤠᤱ ᤁᤧᤏᤡᤛᤢᤶᤗᤥ ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤛᤢᤶᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ. ᤁᤖ ᤂᤧᤴ ᤛᤠᤶᤕᤥᤛᤠᤵᤗᤠ᤺ᤸᤗᤧᤀᤣ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤡ᤹ᤖᤥ॥ 40ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤡᤱᤃᤠ᤹ᤀᤥ ᤋᤠᤔᤠᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠ ᤏᤡᤱᤘᤠ᤹ ᤁᤧᤴᤈᤥᤃᤢᤶᤔᤡᤴᤗᤥ॥
41“ᤀᤡᤱᤃᤠ᤹ᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤏᤠᤖᤠ ᤔᤧᤓᤥᤛᤢᤖ ᤔᤧᤗ᤹ᤀᤠᤴᤗᤥ॥ 42ᤁᤖ ᤂᤡᤏᤡ᤹ ᤀᤠᤰᤋᤱᤒᤠ ᤁᤧᤈᤥᤃᤡ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤗᤥ॥ ᤂᤡᤏᤡ᤹ ᤏᤡᤱᤘᤠ᤹ᤀᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤶᤔᤧᤳᤋᤢᤶᤔᤡᤴᤒᤠᤴ ᤀᤡᤱᤃᤠ᤹ ᤏᤡᤛᤢᤱᤗᤥ॥ 43ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤢᤰ ᤐᤡᤖᤠᤱᤅᤠᤱ ᤐᤠᤱᤄᤠᤱᤛᤠᤱ ᤕᤠᤵᤔᤡ ᤗᤠᤱᤃᤧᤴᤍᤠ᤺ᤰᤋᤡᤴᤗᤥ ᤁᤖ ᤘᤣ᤹ᤜᤠ᤹ ᤜᤠ᤺ᤳᤗᤧᤀᤠᤱ ᤕᤢᤰ ᤔᤧᤶᤒᤡᤀᤣ ᤀᤠᤒᤠᤅᤣ ᤂᤢᤏᤡ᤹ ᤕᤢᤰᤁᤥ ᤁᤧᤍᤠᤒᤠᤜᤠ᤹ ᤂᤡᤏᤡ᤹ ᤗᤠᤱᤃᤧᤍᤠ᤺ᤰᤋᤢᤶᤛᤡᤶᤗᤥ॥ 44ᤂᤡᤏᤡ᤹ ᤀᤠᤒᤠᤅᤣ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤀᤠᤛᤡ. ᤁᤖ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠᤒᤠ ᤔᤡᤱᤛᤥ ᤀᤡᤱᤎᤠᤱᤅᤡᤱᤃ ᤁᤧᤱᤃᤥ᤺ᤳᤋᤢᤶᤔᤡᤴ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤕᤠᤵᤔᤡ ᤏᤛᤠᤴ ᤆᤥ᤺ᤰᤔᤠ ᤁᤧᤛᤢᤰᤋᤡᤒᤣ᥅”
45“ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤍᤃᤡ ᤀᤠᤵᤋᤡᤰ ᤔᤧᤃᤢ᤺ᤳᤏᤡᤱᤅᤡᤴᤗᤥ. ᤁᤖ ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤸᤗᤧᤀᤣ ᤂᤡᤏᤡ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤡ᤹ᤖᤥ॥ 46ᤛᤧᤰᤂᤠᤀᤣ ᤔᤥᤛᤠᤴ ᤏᤛᤠᤴ ᤁᤧᤈᤥᤃᤢᤶᤔᤡᤸᤗᤧᤃ ᤀᤡᤱᤃᤠ᤹ ᤕᤠᤵᤔᤡ ᤏᤛᤠᤴ ᤁᤧᤈᤥᤃᤡᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤕᤠ᤺ᤶᤒᤣᤀᤥ ᤛᤠᤵᤋᤢᤀᤠᤱ ᤐᤳᤗᤥ॥ 47ᤁᤖ ᤂᤡᤏᤡ᤹ ᤔᤥᤛᤠᤖᤧ ᤛᤠᤵᤋᤢᤒᤠ ᤐᤠ᤺ᤴᤏᤥᤀᤣ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤏᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤕᤠᤵᤔᤡ ᤏᤛᤠᤴ ᤁᤧᤈᤥᤃᤡ᤹ᤒᤣ᥅”
Currently Selected:
ᤕᤢᤜᤢᤴᤏᤠ 5: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.