ᤕᤢᤜᤢᤴᤏᤠ 18
18
ᤕᤧᤛᤢᤴ ᤔᤧᤍᤧᤶᤛᤢ᤹
(ᤔᤳᤋᤡ ᥈᥌:᥊᥍-᥋᥌; ᤔᤷᤁᤢ ᥇᥊:᥊᥉-᥋᥆; ᤗᤢᤁᤠ ᥈᥈:᥊᥍-᥋᥉)
1ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢ ᤛᤢᤖᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤁᤡᤍᤪᤥᤏ ᤔᤧᤵᤔᤏᤠᤒᤠ ᤜᤱᤜᤱᤘᤠ᤺ᤸᤗᤧ ᤏᤠᤎᤠ᤺ᤶᤒᤡ ᤐᤣᤖᤥ॥ ᤂᤧᤵᤔᤥ ᤈᤤᤋᤢᤏ ᤛᤡᤱᤗᤠ ᤌᤡᤰ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤗᤠᤛᤧ॥ 2ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤸᤗᤧᤀᤠᤱ ᤂᤧᤴ ᤋᤧᤴᤏᤡᤴ ᤏᤡᤛᤢᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤡᤰᤗᤧᤱ ᤂᤧᤵᤔᤥ ᤋᤢᤔᤢᤛᤡᤀᤠᤱ ᤘᤕᤧᤖᤥ॥ 3ᤂᤧᤸᤗᤧᤆᤥᤃᤢᤸᤗᤧ ᤕᤜᤢᤍᤠ᤺ᤸᤗᤧ ᤁᤢᤓᤠ ᤖᤥᤔᤡ ᤌᤰᤛᤢᤒᤠᤜᤠ᤹ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤔᤠᤱᤜᤡᤶ ᤁᤧᤃᤥᤒᤠ ᤋᤡᤗᤡᤱᤃᤠᤜᤠ᤹ ᤂᤧᤴ ᤈᤤᤋᤢᤏ ᤛᤡᤱᤗᤠᤀᤥ ᤗᤠᤶᤗᤥᤛᤢᤛᤡᤀᤠᤱ ᤋᤠᤖᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤋᤡᤕᤠᤗᤥ. ᤛᤣᤔᤡ ᤏᤢ ᤑᤧᤈᤢᤶ ᤑᤧᤕᤠᤜᤠ᤹ ᤔᤧᤃᤳᤋᤢᤖᤥ॥
4ᤕᤧᤛᤢᤖᤧ ᤀᤠᤸᤗ ᤂᤢᤏᤧ᤹ᤏᤢ ᤌᤣ ᤐᤥᤱ ᤁᤧᤗ᤹ᤒᤠᤴ ᤁᤠᤰ ᤏᤡᤛᤢᤀᤠᤱ ᤂᤢᤏᤧ᤹ ᤋᤃᤡ ᤐᤣᤀᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠᤳ ᤁᤧᤃᤥ᤺ᤳᤋᤢᤶᤒᤠᤒᤣ᥅”
5ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤠᤛᤖᤋᤒᤠ ᤕᤧᤛᤢᤴ॥”
ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤱᤃ ᤀᤡᤱᤃᤠ᤹ᤀᤣᤖᤥ॥” ᤂᤧᤴ ᤕᤧᤶᤔᤥ ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤴᤏᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤕᤧᤒᤧᤖᤥ॥ 6ᤕᤧᤛᤢᤖᤧ ᤂᤧᤱᤜᤠ᤹ “ᤂᤧᤱᤃ ᤀᤡᤱᤃᤠ᤹ᤀᤣᤖᤥ” ᤔᤧᤳᤋᤢᤛᤡᤸᤗᤧ ᤂᤧᤱᤜᤠ᤹ ᤀᤣᤃᤠᤱ ᤔᤧᤈᤳᤇᤡᤱᤗ ᤗᤧᤖᤠᤱ ᤁᤠᤰᤐᤧᤳ ᤂᤠᤶᤔᤥ ᤔᤧᤗᤧᤰᤂᤧᤖᤥ॥
7ᤕᤠᤶᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠᤳ ᤁᤧᤃᤥ᤺ᤳᤋᤢᤶᤒᤠᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤠᤛᤖᤋᤛᤔᤠ ᤕᤧᤛᤢᤴ ᤗᤥ॥”
8ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤀᤠᤖᤥ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥ ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤔᤏᤠ᤺ᤱᤃ ᤀᤡᤱᤃᤠ᤹ᤏᤧ ᤑᤠ᤹ᤃᤪ ᤁᤱᤜᤠ᤹ᤃ ᤐᤣ᤺ᤰᤔᤠ ᤐᤠᤱᤄᤧᤶᤛᤡᤶᤔᤧ᤹ᤀᤥ॥” 9ᤁᤧᤒᤡᤖᤠᤱᤒᤠᤜᤠ᤹ᤀᤥ ᤌᤡᤰᤁᤠᤱ ᤔᤧᤔᤠ᤺ᤛᤢᤱᤅᤡᤴᤗᤥ ᤗ᤹ᤖᤡᤰ ᤕᤧᤛᤢᤖᤧ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤁᤴ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
10ᤜᤧᤰᤁᤩᤠᤱ ᤛᤡᤔᤥᤏ ᤐᤋᤪᤢᤛᤖᤧ ᤋᤠᤓᤣᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤧᤘᤠᤖᤥᤒᤠ ᤔᤠᤸᤂᤛ ᤔᤧᤵᤔᤏᤠᤒᤠᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤖᤥ॥
11ᤕᤧᤛᤢᤖᤧ ᤐᤋᤪᤢᤛᤧᤴ ᤔᤧᤳᤋᤢ. “ᤁᤧᤍᤠᤓᤣ᤺ᤴ ᤑᤧᤛᤡ᤺ᤵᤐᤥ ᤕᤠᤰᤋᤧ᤹᥄ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤡᤱᤃᤠ᤹ ᤐᤡᤀᤠᤒᤠ ᤀᤡᤏᤥᤃᤧᤴ ᤋᤢᤰᤂᤣᤘᤠ ᤂᤥᤷᤕᤠᤀᤥᤗᤠᤶ ᤌᤢᤅᤢᤱᤗᤀᤣ ᤐᤥᤱ॥”#᥇᥎:᥇᥇ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤑᤠ᤹ᤀᤡᤱᤃ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤂᤢᤏᤧ᤹ ᤋᤢᤰᤂᤣ ᤆᤠᤔᤠ ᤕᤠᤖᤡᤵ ᤘᤕᤧ॥
ᤕᤧᤛᤢᤴ ᤜᤴᤏᤠᤛᤖᤥ ᤔᤧᤍᤣ᤹ᤖᤢ᤹
(ᤔᤳᤋᤡ ᥈᥌:᥋᥍; ᤔᤷᤁᤢ ᥇᥊:᥋᥉; ᤗᤢᤁᤠ ᥈᥈:᥋᥊)
12ᤜᤧᤰᤁᤣᤗ᤹ᤖᤡᤰ ᤌᤰᤋᤢᤶᤒᤠ ᤏᤢ ᤌᤰᤛᤢᤒᤠᤜᤠ᤹ᤖᤧ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤕᤧᤛᤢᤴ ᤔᤧᤍᤧᤶᤛᤢᤀᤠᤱ ᤀᤡᤔᤧᤄᤣ᤺ᤰᤂᤢ. 13ᤜᤧᤰᤁᤩᤠᤱ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤁᤢᤴᤏᤥ᤺ᤵᤐᤠ ᤜᤴᤏᤠᤛᤖᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢᤖᤥ॥#᥇᥎:᥇᥉ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤧᤴᤇᤡᤀᤣ ᤌᤠᤖᤡᤰ ᤛᤧᤘᤠ ᤆᤥᤃᤢ. ᤁᤖ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤕᤖᤡᤰᤗᤧᤱ ᤗᤧᤰᤂᤢ॥ ᤏᤠᤈᤡᤖᤡ ᤋᤱᤒᤣ ᥌ ᤀᤥ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤛᤧ ᤜᤴᤏᤠᤛᤧᤴ ᤔᤧᤛᤣᤃᤢ. ᤜᤧᤰᤁᤩᤠᤱ ᤏᤠᤈᤡᤖᤡ ᤋᤱᤒᤣ ᥇᥋ ᤀᤥ ᤁᤢᤶᤒᤠᤱᤔᤡ᤹ ᤁᤤᤕᤠᤑᤠᤛᤧᤴ ᤔᤧᤛᤣᤃᤢ॥ ᤁᤖ ᤔᤧᤴᤇᤡᤀᤣ ᤌᤠᤖᤡᤰ ᤜᤴᤏᤠᤛᤖᤧ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤜᤡ᤺ᤛᤢᤛᤡ॥ 14ᤒᤠ ᤁᤴ ᤁᤤᤕᤠᤑᤠᤛᤖᤧᤀᤣ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠ ᤌᤡᤰ ᤔᤏᤠᤴ ᤛᤡᤔᤠᤀᤣ ᤏᤢᤒᤠ ᤐᤥᤱ ᤗ᤹ᤖᤡᤰ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡᤀᤠᤱ ᤘᤕᤧᤖᤥ॥
ᤐᤋᤪᤢᤛᤖᤧ ᤕᤧᤛᤢᤴ ᤏᤠ᤹ᤖᤢ᤹
(ᤔᤳᤋᤡ ᥈᥌:᥌᥏-᥍᥆; ᤔᤷᤁᤢ ᥇᥊:᥌᥌-᥌᥎; ᤗᤢᤁᤠ ᥈᥈:᥋᥋-᥋᥍)
15ᤛᤡᤔᤥᤏ ᤐᤋᤪᤢᤛ ᤏᤢ ᤘᤣ᤹ ᤁᤢᤜᤢ᤹ᤛᤠᤶᤒᤠᤎᤡᤰᤗᤧ ᤕᤧᤛᤢᤴ ᤋᤡᤶᤍᤧᤳᤇᤢᤖᤥ॥ ᤂᤧᤴ ᤘᤣ᤹ ᤜᤢ᤹ᤛᤠᤶᤒᤠᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤴ ᤋᤡᤶᤍᤢᤖ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰᤂᤢᤶᤔᤥ ᤌᤠᤖᤡᤰ ᤁᤧᤖᤧ॥ 16ᤁᤖ ᤐᤋᤪᤢᤛᤖᤧ ᤗᤠ᤺ᤰᤁᤠᤳ ᤂᤢᤏᤧ᤹ ᤜᤠᤱᤄᤢᤖ ᤕᤧᤒᤧ॥ ᤂᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤢᤛᤡᤱ ᤁᤧᤏᤡ᤺ᤵᤐᤠ ᤜᤢ᤹ᤛᤠᤶᤒᤠᤴ ᤛᤡᤃᤠᤱᤗᤠᤶ ᤏᤢ᤺ᤰᤂᤧ ᤑᤧᤖᤧᤀᤠᤱ ᤗᤠᤶᤎᤣ᤺ᤵ ᤁᤧᤃᤥᤔᤠ ᤛᤣᤘᤠᤖᤥᤔᤠᤴ ᤔᤧᤳᤋᤢᤀᤠᤱ ᤐᤋᤪᤢᤛᤧᤴ ᤛᤡᤃᤠᤱ ᤋᤣ᤹ᤖᤢᤖᤥ॥
17ᤂᤧᤴ ᤛᤣᤘᤠᤖᤥᤔᤠᤸᤗᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤔᤧ᤺ᤴᤏᤧᤒᤡ᥅”
ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ॥”
18ᤛᤠ᤹ᤖᤡᤰ ᤆᤢᤱᤈᤡ᤺ᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤛᤧᤘᤠᤖᤥᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤔᤡᤔᤧᤍᤢᤵᤋᤢᤀᤠᤱ ᤂᤡᤖᤡ ᤔᤡᤈᤠ᤹ᤏᤢ ᤔᤧᤕᤧᤒᤧᤖᤥ॥ ᤐᤋᤪᤢᤛᤧᤴᤏᤠᤱ ᤂᤢᤏᤡ᤹ ᤐᤣᤛᤠᤱ ᤔᤡᤈᤠ᤹ᤏᤢ ᤕᤧᤒᤧᤖᤥ॥
ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤧᤛᤢᤴ ᤛᤣ᤺ᤴᤍᤥᤛᤢ᤹
(ᤔᤳᤋᤡ ᥈᥌:᥋᥏-᥌᥌; ᤔᤷᤁᤢ ᥇᥊:᥋᥋-᥌᥊; ᤗᤢᤁᤠ ᥈᥈:᥌᥌-᥍᥇)
19ᤀᤠᤸᤗ ᤜᤡᤶᤛᤡᤃᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤧᤛᤢᤴ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤁᤢᤏᤡᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤍᤥᤛᤢᤖ ᤕᤠᤃᤧ॥
20ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ᤃ ᤁᤠᤰᤗᤧ ᤔᤧᤄᤧᤵᤛᤢᤖᤀᤣ ᤐᤠ᤺ᤖᤠᤱᤗᤥ. ᤀᤡᤱᤃᤠ᤹ᤃ ᤁᤠᤰ ᤕᤜᤢᤍᤡᤜᤠ᤹ ᤔᤧᤈᤢᤶᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤔᤠᤱᤜᤡᤶᤔᤥ ᤔᤏᤠᤜᤠ᤹ ᤛᤍᤠᤍᤡᤱ ᤜᤢ᤹ᤖᤢᤱᤛᤡᤱᤗ ᤘᤠ᤹ᤖᤥ॥ ᤀᤡᤱᤃᤠ᤹ ᤛᤫᤠ᤺ᤳᤋᤠᤱ ᤌᤣᤀᤠᤱ ᤔᤧᤶᤒᤠ᤺ᤵᤐᤧᤴᤗᤥ॥ 21ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤕᤠᤵᤔᤡ ᤛᤣ᤺ᤴᤃᤧᤍᤥᤛᤡᤒᤣ᥅ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤧᤄᤧᤶᤒᤠᤜᤠ᤹ᤀᤣ ᤛᤣ᤺ᤴᤍᤥᤛᤧᤶᤛᤡᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹ᤖᤥ॥”
22ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤸᤗᤧ ᤂᤧᤵᤔᤥ ᤏᤡ᤺ᤳᤋᤠᤱ ᤁᤧᤕᤧᤵᤐᤠ ᤛᤢᤜᤠᤱᤕᤢᤰᤐᤠᤎᤡᤰᤗᤧ ᤕᤧᤛᤢᤖᤧ ᤁᤢᤏᤧᤍᤧᤱᤒᤠᤴ ᤗᤧᤰᤂᤢᤀᤠᤱ ᤔᤧᤳᤋᤢ. “ᤀᤰᤂᤣᤗ᤹ᤖᤡᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴᤏᤢ ᤔᤢᤖᤠ ᤁᤧᤍᤥᤒᤡ᥅”
23ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤐᤠᤴ ᤑᤣ᤺ᤴᤍᤢᤱᤏᤧ ᤑᤠ᤹ᤃᤪ ᤐᤠ᤺ᤳᤋᤧ᤹॥ ᤁᤖ ᤀᤡᤱᤃᤠ᤹ ᤛᤧᤰᤂᤠ ᤐᤠᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤌᤣᤀᤠᤱ ᤁᤧᤜᤡᤵᤐᤠᤒᤠᤒᤣ᥅” 24ᤜᤧᤰᤁᤩᤠᤱ ᤜᤴᤏᤠᤛᤖᤧ ᤕᤧᤛᤢᤴ ᤀᤡᤔᤧᤄᤣ᤺ᤰᤂᤢᤒᤠᤴ ᤔᤧᤶᤓᤠ᤺ᤱᤅᤣ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤥ ᤐᤠᤱᤄᤢᤍᤣᤛᤢᤖᤥ॥
ᤐᤋᤪᤢᤛᤖᤧ ᤕᤧᤛᤢᤴ ᤕᤠᤶᤔᤥ ᤏᤠ᤹ᤖᤢ᤹
(ᤔᤳᤋᤡ ᥈᥌:᥍᥇-᥍᥋; ᤔᤷᤁᤢ ᥇᥊:᥌᥏-᥍᥈; ᤗᤢᤁᤠ ᥈᥈:᥋᥎-᥌᥈)
25ᤛᤡᤔᤥᤏ ᤐᤋᤪᤢᤛᤧᤴ ᤔᤡᤈᤠ᤹ᤏᤢ ᤕᤧᤒᤧᤸᤗᤧ ᤁᤢᤓᤠᤖᤧ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ᤀᤠᤱ ᤂᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤔᤧ᤺ᤴᤏᤧᤒᤡ᥅”
ᤐᤋᤪᤢᤛᤖᤧ ᤂᤧᤴ ᤐᤠ᤺ᤴᤏᤡᤴ ᤏᤠ᤹ᤖᤢᤖ ᤔᤧᤳᤋᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ॥”
26ᤐᤋᤪᤢᤛᤖᤧ ᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠᤛᤢᤒᤠ ᤔᤏᤠ᤺ᤸᤗᤧ ᤁᤢᤃᤠ᤹ᤀᤡ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤘᤣ᤹ᤛᤔᤠ ᤁᤢᤛᤣᤘᤠᤖᤥᤒᤠᤎᤡᤰᤁᤠᤱ ᤂᤧᤵᤔᤥ ᤕᤧᤒᤧ॥ ᤂᤧᤸᤗᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤈᤤᤋᤢᤏ ᤛᤡᤱᤗᤠᤀᤥ ᤕᤧᤛᤢᤴ ᤏᤢ ᤁᤧᤘᤕᤧᤒᤠ ᤏᤡᤏᤧᤒᤠ ᤔᤣ᤺ᤶᤒᤡ᥅” 27ᤐᤋᤪᤢᤛᤖᤧ ᤕᤠᤶᤔᤥ ᤔᤣ᤺ᤴᤗᤥ ᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤒᤠ ᤂᤧᤴ ᤕᤧᤶᤔᤥᤀᤣ ᤀᤡᤱᤘᤠ ᤁᤠᤛᤧᤖᤥ॥
ᤕᤧᤛᤢᤴ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤁᤢᤍᤃᤡ ᤔᤧᤕᤧᤵᤛᤢ᤹
(ᤔᤳᤋᤡ ᥈᥍:᥇-᥈.᥇᥇-᥇᥊; ᤔᤷᤁᤢ ᥇᥋:᥇-᥋; ᤗᤢᤁᤠ ᥈᥉:᥇-᥋)
28ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤕᤧᤛᤢᤴ ᤋᤠᤏᤠᤶᤛᤠ ᤁᤤᤕᤠᤑᤠᤛᤖᤧ ᤁᤢᤜᤡᤶᤔᤥᤗᤠᤶ ᤖᤥᤔᤡ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤜᤠᤱᤜᤡᤶᤔᤥ ᤔᤧᤍᤣ᤹ᤖᤢ॥ ᤁᤖ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤀᤠᤛᤢᤳᤌᤥ ᤀᤠᤒᤥᤱᤅᤠᤱ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤆᤠ ᤆᤠᤔᤠ ᤂᤥᤔᤧᤍᤧᤳᤏᤧᤴ ᤑᤠ᤹ᤀᤠᤱ ᤂᤧᤱᤜᤠ᤹ ᤜᤡᤶᤛᤡᤃᤠᤱ ᤔᤧᤴᤗᤠᤛᤧᤴᤗᤥ॥#᥇᥎:᥈᥎ ᤕᤜᤢᤍᤡᤜᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤡᤶᤛᤡᤃᤠᤱ ᤗᤠ᤺ᤵᤔᤠ ᤔᤧᤴᤏᤢ᤺ᤶᤏᤠᤒᤠ ᤌᤡᤶ ᤘᤕᤧᤖᤥ॥ ᤔᤧᤗᤠ᤺ᤛ᤻ᤛᤧᤸᤗᤧ ᤀᤠᤛᤢᤳᤌᤥ ᤔᤧᤒᤥᤱᤒᤠ ᤏᤢ ᤋᤱᤏᤠᤶᤖᤧ ᤆᤠ ᤆᤠᤔᤠ ᤔᤧᤱᤄᤥᤛᤢᤴᤒᤠ ᤘᤕᤧ॥ 29ᤜᤧᤰᤁᤣ᤺ᤸᤗᤧ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣ ᤀᤠᤵᤋᤡᤰ ᤁᤧᤍᤠᤖᤢᤶᤔᤠᤱ ᤁᤧᤘᤕᤡ᤹ᤒᤣ᥅”
30ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤴ ᤔᤏᤠ᤺ᤸᤗᤧ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤘᤕᤧᤸᤗᤧᤃ ᤂᤧᤏᤧ᤹ᤀᤥ ᤔᤧᤍᤠᤖᤢᤶᤒᤧᤴ ᤔᤣ᤺ᤴ॥”
31ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠᤴ ᤋᤣ᤹ᤖᤧᤶᤔᤧ᤹ᤀᤠᤱ ᤂᤡᤏᤡ᤹ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹॥”
ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤕᤢᤰ ᤔᤧᤃᤳᤋᤢᤶᤒᤧᤴᤗᤥ॥” 32ᤁᤱᤃ ᤕᤧᤛᤢᤖᤧ ᤂᤢᤏᤧ᤹ ᤀᤠᤰᤋᤱᤒᤠ ᤛᤡᤔᤧᤸᤗᤧ ᤛᤡ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗ#᥇᥎:᥉᥈ ᤕᤢᤜᤢ ᥉:᥇᥊. ᥇᥈:᥉᥈-᥉᥊ ᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤁᤢᤗᤠᤱ ᤁᤢᤜᤢᤰᤜᤠ᤹ᤀᤥ ᤑᤧᤴᤋᤡᤱᤅᤡᤸᤗᤧ ᤔᤧᤎᤧᤵᤋᤢᤀᤠᤱ ᤔᤧᤓᤥᤴᤍᤢ ᤔᤧᤛᤧᤖᤢ᤹॥ ᤕᤜᤢᤍᤡ ᤛᤠᤶᤕᤥᤌᤡᤶᤔᤥ ᤛᤡᤔᤧᤸᤗᤧ ᤂᤢᤶᤍᤡᤱᤅᤡᤴ ᤗᤢᤱᤅᤡᤸᤗᤧ ᤗᤧᤵᤔᤠᤀᤠᤱ ᤛᤧᤵᤔᤠ ᤘᤕᤧ. ᤁᤖ ᤖᤥᤔᤡ ᤌᤡᤶᤔᤥ ᤛᤡᤔᤧᤸᤗᤧ ᤂᤢᤶᤍᤡᤱᤅᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥᤔᤠ ᤛᤧᤵᤔᤠ ᤘᤕᤧ॥ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
33ᤐᤡᤗᤠᤋᤛᤧᤴ ᤕᤠᤶᤔᤥ ᤜᤠᤱᤜᤡᤶ ᤛᤡᤃᤠᤱ ᤗᤠᤛᤧᤀᤠᤱ ᤕᤧᤛᤢᤴ ᤀᤢ᤺ᤳᤋᤢᤀᤠᤱ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅”
34ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤁᤴ ᤐᤠ᤺ᤴᤏᤡᤴ ᤀᤠᤒᤠᤅᤣ ᤁᤧᤏᤡᤱᤘᤠ᤹ᤀᤡᤸᤗᤧ ᤁᤧᤒᤠ᤺ᤳᤋᤢᤒᤠᤒᤡ. ᤀᤡ ᤘᤣ᤹ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤁᤧᤶᤔᤧᤳᤋᤧᤒᤠᤒᤡ᥅”
35ᤐᤡᤗᤠᤋᤛᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤕᤜᤢᤍᤡᤀᤠᤒᤡ᥅ ᤀᤠᤒᤠᤅᤣ ᤁᤧᤕᤠᤵᤔᤡᤜᤠ᤹ ᤏᤢ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤏᤧ᤹ ᤜᤢᤰᤔᤧᤛᤢᤵᤋᤠᤱᤅᤠᤱ ᤘᤠ᤹॥ ᤂᤧᤏᤧ᤹ ᤌᤣ ᤕᤠ᤺ᤶᤒᤰ ᤁᤧᤓᤣ᤺ᤴᤍᤢ᥅”
36ᤕᤧᤛᤢᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤀᤠᤜᤠᤱᤈᤢᤶᤔᤡᤱᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤣ᤺ᤴᤗᤥ॥ ᤁᤵᤔᤥᤒᤠ ᤘᤕᤧᤸᤗᤧᤃ ᤀᤡᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹ᤖᤧ ᤀᤡᤱᤃᤠ᤹ ᤕᤠᤵᤔᤡ ᤋᤧᤶᤔᤠ ᤔᤧᤱᤄᤥᤀᤠᤴᤗ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ᤏᤢ ᤌᤱ ᤔᤧᤈᤥᤃᤢᤒᤠᤔᤧᤴ. ᤁᤖ ᤀᤠᤜᤠᤱᤈᤢᤶᤔᤡᤴ ᤁᤵᤔᤥᤒᤠ ᤔᤣ᤺ᤴᤗᤥ॥”
37ᤐᤡᤗᤠᤋᤛᤖᤧ ᤔᤧᤳᤋᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤜᤠᤱᤏᤧᤀᤣ ᤏᤧᤒᤡ᥅”
ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤜᤠᤱᤀᤠ ᤑᤠ᤹ᤀᤠᤱ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢ᤹ᤖᤥ॥ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤧᤰᤂᤠ᤺ᤸᤗᤧᤴ ᤋᤥ᤺ᤴᤍᤡ ᤐᤡᤛᤧ ᤀᤡᤱᤃᤠ᤹ ᤛᤠᤘᤠ᤺ᤴᤇᤡᤅᤠᤱᤒᤠᤖᤥ॥ ᤛᤧᤰᤂᤠᤀᤥ ᤁᤧᤒᤵᤐᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤒᤠ᤺ᤴᤏᤡᤴ ᤔᤧᤄᤧᤵᤛᤢ᤹ᤖᤥ॥”
38ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢ. “ᤛᤧᤰᤂᤠ᤺ᤱᤃ ᤌᤧᤔᤠ᤺ᤴᤒᤣ᥅” ᤂᤧᤸᤗᤧ ᤜᤧᤰᤁᤣ ᤐᤠ᤺ᤳᤋᤢᤖ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤕᤜᤢᤍᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥᤒᤠᤴᤗᤥ॥ 39ᤁᤖ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤂᤡᤏᤡ᤹ ᤗᤠᤃᤡ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠ᤺ᤒᤠᤎᤡᤰ ᤗᤧᤖᤢᤱ ᤐᤡᤏᤡᤱᤒᤠ ᤌᤡᤶ ᤁᤧᤃᤳᤋᤢᤶ. ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤜᤠᤱᤅᤡᤴ ᤗᤧᤖᤢᤱ ᤐᤡᤏᤡᤱᤒᤡ᥅”
40ᤂᤧᤱᤜᤠ᤹ᤖᤧ ᤔᤧᤀ᤺ᤰᤋᤧᤖ ᤔᤧᤔᤧᤳᤋᤢ. “ᤔᤣ᤺ᤴ᥄ ᤂᤧᤴ ᤔᤣ᤺ᤴ᥄ ᤒᤖᤒ᤻ᤒᤠᤛᤧᤴ ᤗᤧᤖᤧ ᤀᤠᤒᤡᤖᤧ᤹᥄” (ᤀᤠᤸᤗ ᤒᤖᤒ᤻ᤒᤠᤛᤧᤱᤃ ᤜᤠᤱᤒᤡᤑᤩᤢᤱᤒᤠ ᤘᤕᤧᤖᤥ॥)
Currently Selected:
ᤕᤢᤜᤢᤴᤏᤠ 18: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.