ᤕᤢᤜᤢᤴᤏᤠ 11
11
ᤗᤠᤈᤖᤛᤧᤴ ᤛᤩᤧᤒᤠ
1ᤀᤠᤸᤗ ᤒᤣᤌᤠᤏᤡ#᥇᥇:᥇ ᤒᤣᤌᤠᤏᤡ ᤐᤠᤱᤓᤣ᤹ᤀᤡᤴ ᤕᤜᤢᤍᤡᤕᤠ ᤌᤢᤶᤔᤥ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤛᤢᤶᤛᤡ ᤁᤡᤗᤥᤔᤡᤋᤖ ᤔᤠ᤺ᤱᤄᤠ ᤏᤧᤛ᤻ᤛᤧᤖᤥ॥ ᤁᤴ ᤒᤣᤌᤠᤏᤡ ᤐᤠᤱᤓᤣ᤹ᤀᤡᤴᤏᤢ᤺ᤸᤗᤧ ᤕᤢᤜᤢ ᥇:᥈᥎. ᥇᥆:᥊᥆ ᤀᤥᤒᤠ ᤒᤣᤌᤠᤏᤡ ᤘᤣ᤹ᤛᤔᤠᤖᤥ॥ ᤐᤠᤱᤓᤣ᤹ᤀᤥ ᤗᤠᤈᤖᤛ ᤔᤧᤵᤔᤏᤠᤒᤠ ᤗᤳᤇᤠ ᤔᤏᤠᤴ ᤛᤠ᤹ᤖᤡᤰ ᤋᤢᤃᤧᤀᤠᤱ ᤏᤧᤛ᤻ᤛᤧ॥ ᤂᤧᤸᤗᤧ ᤁᤢᤴᤈᤣᤗᤡᤔᤠᤜᤠ᤹ ᤔᤖᤡᤕᤔ ᤏᤢ ᤔᤠᤷᤌᤠ ᤔᤧᤵᤔᤏᤠᤔᤠ ᤘᤕᤧᤳᤇᤡᤖᤥ॥ 2ᤒᤠ ᤁᤴ ᤔᤖᤡᤕᤶᤔᤡᤸᤗᤧ ᤋᤠ᤺ᤴᤍᤡ#᥇᥇:᥈ ᤁᤴ ᤜᤡᤴᤍᤥᤰᤁᤡᤴ ᥇᥈:᥉ ᤀᤥ ᤐᤥᤱ॥ ᤍᤠᤱᤒᤠᤸᤗᤧ ᤁᤢᤗᤠᤱᤅᤥ ᤑᤢᤱᤏᤠᤶ ᤏᤡ᤺ᤱᤃᤣ᤺ᤴ ᤜᤢᤰᤂᤢᤀᤠᤱ ᤁᤢᤎᤧᤃᤣ᤺ᤰᤁᤡᤸᤗᤧ ᤋᤢᤃᤢᤀᤠᤱ ᤘᤕᤧᤖᤥ॥ ᤂᤧᤸᤗᤧ ᤁᤢᤴᤛᤠ᤹ ᤗᤠᤈᤖᤛᤧᤴ ᤋᤢᤃᤧᤀᤠᤱ ᤏᤧᤛ᤻ᤛᤧᤖᤥ॥ 3ᤂᤧᤴ ᤁᤢᤴᤈᤣᤗᤡᤔᤠᤜᤠ᤹ᤖᤧ ᤕᤧᤛᤢᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤧᤳᤇᤢ. “ᤍᤠᤱᤒᤣ. ᤗᤢᤱᤔᤠ᤹ ᤁᤧᤍᤢᤰᤋᤢᤒᤠ ᤁᤧᤴᤈᤢᤶᤔᤡᤴ ᤛᤠ᤹ᤖᤡᤰ ᤋᤢᤰᤁᤠᤱ ᤏᤧᤖᤥ॥”
4ᤕᤧᤛᤢᤖᤧ ᤁᤴ ᤀᤡᤱᤄᤱᤅᤡᤴ ᤂᤧᤵᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤂᤢᤏᤧ᤹ᤃ ᤁᤴ ᤋᤢᤰᤔᤠᤸᤗᤧ ᤔᤧᤛᤡ᤺ᤏᤧᤴᤗᤥ॥ ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤗᤧ ᤗᤠᤃᤡ ᤐᤥ᤺ᤰᤂᤧᤒᤠᤖᤥ॥ ᤁᤴᤗᤠᤶᤒᤠ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤐᤥᤱᤗᤥ॥” 5ᤕᤧᤛᤢᤖᤧ ᤔᤠᤷᤌᤠ. ᤂᤧᤸᤗᤧ ᤁᤢᤴᤛᤠ᤹ ᤔᤖᤡᤕᤔ ᤏᤢ ᤗᤠᤈᤖᤛᤧᤴ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤘᤕᤧᤛᤠᤱ 6ᤗᤠᤈᤖᤛᤧᤴ ᤋᤢᤰᤁᤠᤱ ᤏᤧ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤂᤧᤵᤛᤢᤀᤠᤱᤛᤠᤱ ᤂᤢᤏᤧ᤹ ᤏᤡᤕᤧᤴ ᤌᤠᤖᤡᤰ ᤘᤕᤧᤒᤠ ᤋᤧᤴᤏᤥᤀᤣ ᤕᤠ᤺ᤰᤋᤧᤖᤥ॥
7ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤠᤏᤡ᤹ ᤕᤠᤶᤔᤥ ᤕᤜᤢᤍᤡᤕᤠ ᤌᤢᤶᤔᤥ ᤏᤢ᤺ᤰᤂᤡ ᤐᤡᤃᤡᤖᤥ॥” 8ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤳᤌᤥᤃ ᤕᤜᤢᤍᤡᤜᤠ᤹ᤖᤧ ᤁᤢᤓᤠ ᤕᤧᤴ ᤋᤃᤡ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠ ᤁᤧᤶᤃᤥ᤺ᤳᤋᤧᤀᤠᤱ ᤘᤕᤧ. ᤜᤧᤰᤁᤣᤛᤠᤱ ᤂᤧᤏᤧ᤹ ᤕᤠᤶᤔᤥ ᤂᤧᤳᤌᤥᤀᤣ ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”
9ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤌᤡᤰ ᤗᤧᤴᤍᤡᤰᤁᤥ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤔᤧᤒᤥᤱᤏᤧᤴᤒᤡ᥅ ᤀᤠᤳᤋᤡᤴ ᤔᤏᤠᤴ ᤗᤧᤴᤍᤡᤰ ᤗᤠᤱᤄᤣ᤺ᤰ ᤂᤧᤸᤗᤧ ᤁᤢᤗᤠᤱᤅᤡᤴ ᤔᤧᤍᤥ᤺ᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤂᤠᤀᤥ᤺ᤵᤔᤠᤀᤥ ᤔᤡᤰ ᤏᤡ᤺ᤖᤥ॥ 10ᤁᤖ ᤀᤠᤳᤋᤡᤴ ᤔᤏᤠᤴ ᤛᤧᤴᤍᤡᤰ ᤗᤠᤱᤄᤣ᤺ᤰ ᤂᤧᤸᤗᤧ ᤁᤢᤗᤠᤱ ᤋᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤠᤍᤠᤶᤔᤥ ᤂᤧᤸᤗᤧ ᤌᤥ᤹ᤛᤡᤱᤔᤠ ᤀᤥ᤺ᤳᤋᤡ᤺ᤴ ᤔᤧᤃᤳᤋᤢᤴᤗᤥ॥”
11ᤀᤰᤂᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ ᤆᤢᤶ ᤗᤠᤈᤖᤛᤧᤴ ᤔᤢᤖᤢᤰᤂᤢᤖᤢᤰ ᤀᤡᤵᤛᤧᤀᤠᤱ ᤏᤧᤖᤥ. ᤁᤖ ᤂᤢᤏᤧ᤹ ᤁᤢᤓᤥ᤺ᤱᤛᤧ ᤐᤣ᤺ᤰᤁᤠᤖᤥ॥”#᥇᥇:᥇᥇ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤔᤧᤛᤡ᤺ᤸᤗᤧ ᤀᤡᤶᤛᤧ ᤔᤧᤒᤣ᤺ᤰᤐᤠ ᤁᤢᤀᤡᤛᤡᤰ ᤐᤥᤱ. ᤌᤣᤀᤠᤱᤓᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥᤛᤢ᤹ (ᤕᤢᤜᤢ ᥉:᥇᥌. ᥋:᥈᥊. ᥇᥆:᥈᥎. ᥇᥇:᥈᥋-᥈᥌)॥
12ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤢᤏᤧ᤹ ᤀᤡᤵᤛᤧᤀᤠᤱᤗᤰ ᤏᤧᤏᤧ ᤑᤠ᤹ᤃᤪ ᤐᤥ᤺ᤰᤗᤥ॥” 13ᤕᤧᤛᤢᤖᤧ ᤂᤧᤱᤜᤠ᤹ ᤗᤠᤈᤖᤛᤖᤧ ᤁᤢᤛᤡᤔᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤢᤛᤡᤀᤠᤱ ᤘᤕᤧ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤗᤠᤈᤖᤛᤧᤴ ᤀᤡᤵᤛᤧᤀᤠᤱᤗᤰ ᤏᤧ᤹᤺ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥
14ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤁᤢᤍᤥ᤺ᤵᤔᤠᤀᤣ ᤔᤧᤳᤋᤢᤛᤡ. “ᤗᤠᤈᤖᤛᤧᤱᤃ ᤛᤩᤧᤖᤥ. 15ᤁᤖ ᤀᤠᤸᤗᤛᤠᤱ ᤂᤡᤏᤡ᤹ ᤕᤖᤡᤰ ᤕᤠᤵᤔᤡ ᤏᤛᤠᤴ ᤀᤠᤃᤧᤈᤥᤃᤡᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤳᤏᤠ ᤜᤥ᤺ᤵᤋᤠᤱᤒᤠᤴᤏᤣ ᤂᤡᤏᤡ᤹ ᤗᤠᤃᤡ ᤏᤢᤒᤠ ᤐᤥ᤺ᤰᤂᤧᤖᤥ॥ ᤀᤠᤸᤗ ᤂᤢᤏᤧ᤹ ᤁᤢᤛᤠ᤹ᤛᤧ ᤐᤣᤃᤡᤖᤥ॥”
16ᤜᤧᤰᤁᤩᤠᤱ ᤍᤡᤍᤡᤔᤛ ᤔᤧᤵᤔᤏᤠᤒᤠ ᤌᤥᤔᤠ᤺ᤸᤗᤧ#᥇᥇:᥇᥌ ᤍᤡᤍᤡᤔᤛ ᤏᤢ ᤌᤥᤔᤠ ᤏᤧᤵᤔᤠᤱᤗᤧ ᤁᤢᤒᤣ᤺ᤱᤃ “ᤁᤠᤵᤛᤠᤒᤠ” ᤐᤥᤱᤗᤥ॥ ᤘᤣ᤹ ᤁᤢᤴᤈᤢᤶ ᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ᤀᤠᤱ ᤍᤠᤱᤒᤠᤴᤏᤢᤀᤣ ᤐᤣᤃᤡᤀᤠᤱ ᤂᤢᤏᤧ᤹ᤏᤢᤀᤣ ᤛᤩᤧ᤹ᤀᤡᤖᤥ॥”
ᤕᤧᤛᤢᤖᤧ ᤔᤠᤷᤌᤠ᤺ᤴ ᤏᤢ ᤔᤖᤡᤕᤶᤔᤡᤴ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡ᤹
17ᤂᤧᤱᤜᤠ᤹ ᤒᤧᤌᤠᤏᤡᤀᤥ ᤔᤧᤃᤧᤖᤧᤸᤗᤧ ᤗᤠᤈᤖᤛᤧᤴ ᤂᤠᤶᤔᤥ ᤔᤧᤈᤡᤰᤂᤢᤒᤠᤱᤃ ᤗᤡᤛᤡ ᤕᤧᤴ ᤁᤧᤖᤧ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡᤱᤘᤠ᤹ ᤂᤥᤛᤢᤖᤥ॥ 18ᤒᤧᤌᤠᤏᤡᤃ ᤕᤖᤢᤛᤗᤧᤔᤗᤠᤶ ᤁᤡᤗᤥᤔᤡᤋᤖ ᤛᤢᤶᤛᤡ ᤕᤠᤖᤡᤰ ᤔᤠ᤺ᤰᤂᤧ. 19ᤜᤧᤰᤁᤩᤠᤱ ᤕᤖᤡᤰ ᤕᤜᤢᤍᤡᤜᤠ᤹ ᤔᤠᤷᤌᤠ ᤏᤢ ᤔᤖᤡᤕᤔᤖᤧ ᤂᤢᤴᤇᤡ᤹ ᤛᤱᤘᤠᤒᤠᤴ ᤛᤩᤧᤒᤠᤀᤥ ᤂᤢᤴᤇᤡ᤹ ᤀᤠ᤺ᤴᤇᤡᤱᤔᤠ ᤐᤡᤛᤧ ᤂᤧᤵᤔᤥ ᤔᤧᤍᤩᤧᤀᤠᤱ ᤔᤧᤘᤕᤧ॥ 20ᤔᤠᤷᤌᤠᤖᤧ ᤕᤧᤛᤢᤴ ᤑᤧᤴᤗ ᤐᤳ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤗᤠᤶᤍᤣ᤺ᤱ ᤌᤠᤖᤡᤰ ᤁᤢᤍᤢᤶᤛᤧ ᤐᤣᤖᤥ. ᤁᤖ ᤔᤖᤡᤕᤶᤔᤡᤴ ᤜᤡᤶᤔᤥᤀᤣ ᤕᤠ᤺ᤰᤋᤧᤖᤥ॥
21ᤔᤠᤷᤌᤠᤖᤧ ᤕᤧᤛᤢᤴ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤁᤵᤔᤥ ᤁᤧᤘᤕᤧᤸᤗᤧᤃ ᤀᤠᤴᤛᤠ᤹ ᤔᤧᤛᤩᤧᤏᤧᤶᤒᤠᤔᤧᤴ᥄ 22ᤁᤖ ᤀᤠᤸᤗᤥ ᤌᤣ ᤁᤧᤏᤠ᤺ᤰᤋᤢᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡ᤹ ᤁᤧᤗ᤹ᤒᤠᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥”
23ᤕᤧᤛᤢᤖᤧ ᤔᤠᤷᤌᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤴᤛᤠ᤹ᤃ ᤕᤠᤶᤔᤥ ᤛᤡᤔᤧᤴᤗᤠᤶ ᤜᤡᤱᤗᤥ॥”
24ᤜᤧᤰᤁᤣ᤺ᤸᤗᤧ ᤔᤠᤷᤌᤠᤖᤧ ᤏᤥᤃᤵ ᤐᤡᤖᤢ. “ᤀᤥᤖᤥ ᤀᤠᤍᤠᤱᤒᤣ. ᤁᤢᤏᤢᤵᤔᤠ ᤕᤧᤴᤏᤥ ᤛᤡᤔᤧᤴᤗᤠᤶ ᤜᤡᤱᤔᤴᤏᤥ ᤂᤢᤏᤧ᤹ ᤕᤠᤶᤔᤥ ᤜᤡᤱ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥”
25ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ᤃ ᤁᤧᤛᤡᤒᤠᤜᤠ᤹ ᤕᤠᤶᤔᤥ ᤜᤡᤱᤔᤴ ᤁᤧᤒᤡᤒᤠ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠᤀᤠᤖᤥ॥ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤏᤛᤠᤴ ᤆᤥᤰᤁᤠ ᤂᤧᤱᤃ ᤛᤡ ᤛᤠᤱ ᤕᤠᤶᤔᤥ ᤜᤡᤱᤗᤥ॥ 26ᤜᤧᤰᤁᤩᤠᤱ ᤀᤡᤱᤃᤠ᤹ᤀᤥ ᤏᤛᤠᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤜᤡᤱᤒᤠᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤛᤡᤏᤧᤴᤗᤥ॥ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤀᤠᤒᤠ᤺ᤴᤏᤡᤴ ᤏᤛᤠᤴ ᤁᤧᤈᤥᤃᤢᤒᤡ᥅”
27ᤔᤠᤷᤌᤠᤖᤧ ᤏᤥᤃᤵ ᤐᤡᤖᤢ “ᤀᤥᤖᤥ ᤀᤠᤍᤠᤱᤒᤣ. ᤂᤧᤏᤧ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤢᤔᤠ ᤁᤧᤒᤥᤱᤒᤠ ᤏᤡᤱᤘᤠ᤹ᤑᤢᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣ᤺ᤴᤍᤧᤒᤠ ᤂᤪᤡᤛ᤻ᤋᤏᤧ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤛᤠᤴ ᤆᤥᤃᤢᤱᤗᤥ॥”
28ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤠᤶᤔᤥ ᤜᤡᤶᤔᤥ ᤏᤢ᤺ᤰᤂᤧ ᤐᤣᤀᤠᤱ ᤔᤖᤡᤕᤶᤔᤡᤴ ᤔᤧᤖᤡᤱ ᤁᤧᤎᤰᤐᤠᤜᤠ᤹ᤗᤠᤶ ᤌᤡᤰᤗᤧᤵᤔᤠᤱ ᤛᤫᤠ᤺ᤳ ᤀᤢ᤺ᤳᤋᤢ ᤋᤣ᤹ᤖᤢᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤠᤱᤃ ᤁᤵᤔᤥ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤏᤧ᤹ ᤁᤧᤀᤢ᤺ᤳᤋᤧᤀᤠᤱ ᤘᤠ᤹ᤖᤥ॥” 29ᤔᤖᤡᤕᤔᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤏᤢᤔᤧ᤺ᤴᤏᤣ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤧᤛᤢᤖᤧ ᤁᤢᤍᤢᤶᤛᤧ ᤐᤣᤖᤥ॥ 30ᤂᤧᤴ ᤕᤧᤶ ᤌᤠᤖᤡᤰ ᤕᤧᤛᤢ᤺ᤴᤃ ᤐᤠᤱᤓᤣ᤹ᤀᤥ ᤔᤧᤱᤃᤧᤳᤋᤣ ᤘᤕᤧ. ᤁᤖ ᤂᤢᤏᤧ᤹ᤃ ᤔᤠᤷᤌᤠᤖᤧ ᤋᤢᤔᤢᤒᤠ ᤋᤧᤴᤏᤥᤀᤣ ᤘᤕᤧ॥ 31ᤀᤠ᤺ᤴᤇᤡᤱᤔᤠ ᤐᤡᤛᤧ ᤜᤡᤶᤔᤥ ᤁᤧᤍᤠᤒᤠ ᤕᤜᤢᤍᤡᤜᤠ᤹ᤖᤧ ᤔᤖᤡᤕᤶᤔᤡᤴ ᤜᤧᤰᤁᤣᤗ᤹ᤖᤡᤰ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤐᤣᤒᤠ ᤔᤧᤏᤡᤛᤢᤀᤠᤱ ᤛᤧᤰᤂᤠᤛᤠᤱ ᤂᤢᤏᤧ᤹ ᤁᤢᤴᤛᤠ᤹ᤖᤧ ᤁᤢ᤺ᤀᤡᤵᤐᤢᤱᤅᤥ ᤔᤧᤖᤡᤱ ᤌᤰᤛᤧ ᤐᤣᤒᤠᤒᤡᤗᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ 32ᤔᤖᤡᤕᤶᤔᤡᤴ ᤕᤧᤛᤢᤴ ᤘᤕᤧᤒᤠᤍᤧᤴᤏᤥ ᤁᤧᤖᤧᤀᤠᤱ ᤌᤢᤱᤒᤥᤜᤈ᤹ᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤁᤵᤔᤥ ᤁᤧᤘᤕᤧᤸᤗᤧᤃ ᤀᤠᤴᤛᤠ᤹ ᤔᤧᤛᤩᤧᤏᤧᤶᤒᤠᤔᤧᤴ॥”
33ᤕᤧᤛᤢᤖᤧ ᤔᤖᤡᤕᤶᤔᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ᤀᤠᤱ ᤔᤧᤖᤡᤱ ᤔᤧᤎᤰᤋᤧᤒᤠ ᤏᤡᤛᤢᤛᤡᤸᤗᤧ ᤁᤢᤛᤠ᤹ᤀᤡ ᤕᤃᤧᤀᤠᤱ ᤁᤢᤕᤥᤶ ᤐᤢ᤹ᤖᤧᤖᤥ॥ 34ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤢᤏᤧ᤹ ᤀᤠᤳᤋᤥ ᤁᤧᤏᤧᤛ᤻ᤛᤢᤶᤔᤠᤱ ᤏᤧᤒᤣ᥅” ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤍᤠᤱᤒᤣ. ᤑᤧᤖᤧ᤹ᤀᤠᤱ ᤀᤥᤔᤧᤳᤋᤧ᤹ᤀᤥ॥”
35ᤕᤧᤛᤢᤴ ᤜᤠᤒᤧ॥
36ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤥᤔᤧᤳᤋᤧᤶᤔᤧ᤹ ᤂᤢᤏᤧ᤹ᤃ ᤗᤠᤈᤖᤛᤧᤴ ᤀᤠᤰᤂᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠᤒᤣ᥅”
37ᤁᤖ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤔᤧ᤺ᤶᤒᤧ. ᤔᤡᤰᤑ᤺ᤶᤒᤠᤴ ᤏᤡᤔᤠ ᤁᤧᤛᤢᤰᤐᤠ ᤁᤧᤈᤥ᤺ᤰᤐᤠᤱᤃ ᤒᤠ ᤂᤢᤏᤧ᤹ ᤔᤣ᤺ᤶᤒᤡ᥅ ᤌᤣᤀᤠᤱ ᤁᤴ ᤗᤠᤈᤖᤛᤧᤴ ᤛᤡᤔᤠᤗᤠᤶ ᤜᤡᤱᤔᤠ ᤔᤧᤛᤢᤰᤋᤢᤶᤒᤠᤒᤣ᥅”
ᤕᤧᤛᤢᤖᤧ ᤗᤠᤈᤖᤛᤧᤴ ᤛᤡᤔᤧᤴᤗᤠᤶ ᤜᤡᤱᤄᤢ᤹
38ᤕᤠᤶᤔᤥᤀᤠᤱ ᤕᤧᤛᤢᤴ ᤛᤠ᤹ᤖᤡᤰ ᤁᤢᤕᤥᤶ ᤐᤢ᤹ᤖᤧᤀᤠᤱ ᤀᤡ᤺ᤵᤐᤢᤱᤅᤡᤸᤗᤧ ᤁᤢᤒᤣᤛᤠᤱ ᤐᤣ॥ ᤂᤧᤴ ᤀᤡ᤺ᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤕᤶᤒᤠ ᤗᤢᤱᤅᤡᤴ ᤔᤧᤕᤧᤵᤛᤢᤒᤠ ᤑᤢᤰᤁᤢ ᤘᤕᤧᤖᤥ॥ 39ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤀᤡᤛᤧᤶᤔᤧ᤹॥”
ᤁᤖ ᤗᤠᤈᤖᤛᤖᤧ ᤁᤢᤴᤏᤧ᤹ ᤔᤠᤷᤌᤠᤖᤧ ᤔᤧᤳᤋᤢ. “ᤍᤠᤱᤒᤣ. ᤂᤢᤏᤧ᤹ᤃ ᤂᤠᤶᤔᤥ ᤆᤡᤱᤔᤏᤠᤒᤠ ᤗᤡᤛᤡ ᤕᤧᤴ ᤁᤧᤖᤧᤔᤠᤖᤧᤖᤥ. ᤀᤠᤸᤗᤃ ᤏᤠᤶᤛᤢᤒᤡᤗᤠᤖᤥ॥”
40ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤔᤧᤳᤋᤢ. “ᤏᤛᤠᤴ ᤁᤧᤈᤥᤃᤢᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤁᤧᤏᤡᤛᤢ᤹ ᤑᤠ᤹ᤀᤠᤱ ᤋᤃᤡᤛᤠ ᤔᤧᤳᤏᤧᤀᤠᤱ ᤘᤕᤧᤖᤥ॥”
41ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤡ᤺ᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥᤒᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤔᤧᤀᤡᤛᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤌᤠ᤺ᤱ ᤀᤥᤔᤧᤳᤋᤢᤖ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤏᤧ᤹ ᤀᤠᤒᤣᤗᤡᤴ ᤁᤧᤄᤧᤵᤛᤢᤒᤠᤀᤥ ᤏᤥᤃᤧᤴᤗᤥ॥ 42ᤂᤧᤏᤧ᤹ᤃ ᤛᤍᤠᤍᤡᤱ ᤀᤠᤒᤣᤗᤡᤴ ᤁᤧᤄᤧᤵᤛᤢ᤹ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤛᤢᤱᤗᤥ. ᤁᤖ ᤀᤡᤱᤃᤠ᤹ ᤁᤵᤔᤥ ᤀᤠᤄᤡᤖᤡ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤕᤠᤵᤔᤡ ᤁᤧᤒᤠᤱᤄᤧᤒᤠ ᤐᤠ᤺ᤴᤏᤡᤴ ᤏᤛᤠᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤒᤠᤖᤥ॥”
43ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤕᤶᤒᤠ ᤀᤡᤰᤗᤠᤀᤥ ᤀᤢ᤺ᤳᤋᤢ. “ᤗᤠᤈᤖᤛ᤻ᤛᤣ. ᤗᤠ᤺ᤰᤁᤠᤳ ᤗ᤺ᤴᤍᤧ᤹ᤀᤥ᥄” 44ᤁᤧᤛᤡᤒᤠ ᤗᤠᤈᤖᤛᤧᤴ ᤗᤠ᤺ᤰᤁᤠᤳ ᤗ᤺ᤴᤍᤧ. ᤂᤢᤏᤧ᤹ ᤁᤢᤗᤠᤱ ᤏᤢ ᤁᤢᤜᤢᤰᤜᤠ᤹ ᤆᤣᤍᤣ᤺ᤳᤋᤡᤸᤗᤧ ᤁᤢᤓᤠᤰ ᤁᤢᤓᤠᤰ ᤔᤧᤃᤡᤳᤋᤢᤀᤠᤱ ᤐᤳᤇᤧ ᤜᤧᤰᤁᤩᤠᤱ ᤁᤢᤏᤠᤖᤠᤴᤏᤠᤱ ᤆᤡᤖᤡᤰᤁᤡᤸᤗᤧ ᤔᤧᤍᤧᤵᤋᤢᤀᤠᤱ ᤐᤳᤇᤧᤖᤥ॥
ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤆᤣᤍᤣ᤺ᤳᤋᤡᤴ ᤑᤠ᤺ᤰᤂᤧᤶ ᤐᤡᤖᤧᤶᤔᤧ᤹ᤀᤠᤱ ᤐᤣ᤺ᤰᤗ ᤕᤠ᤺ᤴᤍᤧᤶᤔᤧ᤹॥”
ᤕᤧᤛᤢᤴ ᤛᤧᤵᤔᤠ ᤆᤧᤶᤓᤴ
(ᤔᤳᤋᤡ ᥈᥌:᥇-᥋; ᤔᤷᤁᤢ ᥇᥊:᥇-᥈; ᤗᤢᤁᤠ ᥈᥈:᥇-᥈)
45ᤂᤧᤸᤗᤧᤆᤥᤃᤢᤸᤗᤧ ᤂᤧᤵᤔᤥ ᤔᤖᤡᤕᤔᤖᤧ ᤁᤢᤍᤢᤶᤛᤧ ᤁᤧᤍᤠᤒᤠᤀᤠᤱ ᤁᤧᤘᤠ᤹ᤒᤠ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤏᤡᤛᤢᤀᤠᤱ ᤕᤧᤛᤢᤴ ᤏᤛᤠᤴ ᤔᤧᤈᤥᤃᤢᤖᤥ॥ 46ᤁᤖ ᤁᤢᤓᤠ ᤔᤏᤠᤜᤠ᤹ᤃ ᤑᤖᤡᤛᤡᤜᤠ᤹ᤀᤥ ᤔᤧᤒᤣᤀᤠᤱ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤔᤧᤈᤧᤰᤋᤢᤛᤡ॥ 47ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤐᤠ᤺ᤴᤎᤰᤛᤧ ᤕᤜᤢᤍᤡ ᤕᤧᤈᤢᤶᤓᤥ#᥇᥇:᥊᥍ ᤕᤜᤢᤍᤡ ᤕᤧᤈᤢᤶᤓᤥ᤺ᤴ ᤕᤜᤢᤍᤡᤜᤠ᤹ᤖᤧ “ᤛᤧᤴᤜᤧᤍᤪᤡᤴ” ᤔᤧᤔᤧᤳᤋᤢ॥ ᤂᤧᤴ ᤕᤜᤢᤍᤡ ᤕᤧᤈᤢᤶᤓᤥᤀᤥ ᥍᥇ ᤕᤜᤢᤍᤡ ᤗᤠᤶᤗᤥᤒᤠ ᤐᤠᤛᤡᤱᤜᤠ᤹ ᤔᤧᤘᤕᤧ॥ ᤂᤧᤴ ᤕᤜᤢᤍᤡᤜᤠ᤹ᤖᤧᤴ ᤁᤠᤰᤏᤢ᤺ᤸᤗᤧ ᤕᤶᤒᤠ ᤂᤠᤛᤧᤴ ᤆᤢᤶᤗᤢᤱ ᤆᤥᤃᤧ॥ ᤕᤢᤱᤔᤠ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤸᤗ ᤀᤠᤏᤡ᤹ ᤌᤣ ᤀᤠᤈᤥᤃᤢᤶᤒᤠᤒᤣ᥅ ᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤢᤛᤡ॥ ᤁᤴ ᤔᤏᤠ᤺ᤸᤗᤧᤃ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤆᤥᤃᤢᤖ ᤘᤠ᤹ᤖᤥ॥ 48ᤒᤠ ᤀᤰᤂᤣ ᤗᤧᤵᤔᤠᤏᤧ ᤑᤠ᤹ᤃᤪ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤛᤠᤴ ᤔᤧᤈᤥᤃᤢ᤹ᤀᤠᤱ ᤔᤧᤍᤡᤶᤍᤢ᤹॥ ᤜᤧᤰᤁᤩᤠᤱ ᤖᤥᤔᤡ ᤌᤰᤛᤢᤒᤠᤜᤠ᤹ ᤔᤧᤍᤠᤀᤠᤱ ᤔᤠᤱᤜᤡᤶᤔᤡᤴ ᤏᤢ ᤀᤠᤏᤡ᤹ ᤛᤢᤘᤠᤱᤜᤠ᤹ ᤔᤧᤔᤧᤰᤂᤢᤛᤡ᤹ᤖᤥ॥
49ᤜᤧᤰᤁᤩᤠᤱ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ᥄ 50ᤁᤠᤰ ᤀᤠᤏᤡ᤹ ᤗᤠᤈᤣ᤹ᤀᤡᤴ ᤔᤧᤰᤔᤠᤏᤢ᤺ᤸᤗᤧ ᤁᤴ ᤗᤳᤇᤠ ᤔᤏᤠᤴ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠ ᤛᤡ᤺ᤸᤗᤧ ᤂᤡᤏᤡ᤹ ᤗᤠᤃᤡ ᤏᤢᤒᤠ ᤐᤥᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹॥”
51ᤂᤢᤏᤧ᤹ ᤁᤴ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤔᤣ᤺ᤴᤗᤥ. ᤁᤖ ᤂᤢᤏᤧ᤹ᤃ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤴ ᤗᤠᤈᤣ᤹ᤖᤧ ᤗᤠᤃᤡ ᤛᤡᤔᤠ ᤐᤥᤱ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤒᤠᤖᤥ. 52ᤜᤧᤰᤁᤩᤠᤱ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤖᤰ ᤔᤣ᤺ᤴ. ᤁᤖ ᤘᤣ᤹ ᤗᤠᤈᤣ᤹ᤜᤠ᤹ᤀᤥ ᤁᤠᤰ ᤁᤧᤛᤧᤒᤠᤀᤠᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤛᤥᤖᤡᤰ ᤋᤠ᤺ᤵᤔᤠᤛᤡᤀᤠᤱ ᤌᤡᤰᤜᤢᤵ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤁᤴ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤂᤧᤸᤗᤧ ᤐᤠ᤺ᤳᤋᤢᤒᤠᤖᤥ॥ 53ᤜᤧᤰᤁᤣ᤺ᤸᤗᤧ ᤂᤧᤴ ᤕᤧᤴᤏᤠᤱᤎᤥ ᤂᤧᤱᤜᤠ᤹ᤖᤧ ᤕᤧᤛᤢᤴ ᤛᤧᤵᤔᤠ ᤑᤠ᤹ᤀᤠᤱ ᤆᤧᤶᤓᤴ ᤔᤧᤈᤥᤃᤢᤖᤥ॥
54ᤂᤧᤸᤗᤧᤆᤥᤃᤢᤸᤗᤧ ᤕᤧᤛᤢᤖᤧ ᤕᤜᤢᤍᤡ ᤗᤢᤶᤔᤥ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤖ ᤘᤠ᤹ᤔᤠ ᤐᤣ᤺ᤰᤔᤠ ᤗᤧᤖᤢᤖᤥ॥ ᤂᤧᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ᤃ ᤕᤧ᤺ᤱᤄᤠᤍᤧᤴ ᤐᤣᤛᤠᤱᤒᤠ ᤀᤣᤑᤪᤠᤀᤡᤔ ᤔᤧᤵᤔᤏᤠᤒᤠ ᤐᤠᤱᤓᤣ᤹ᤀᤥ ᤐᤣᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤂᤧᤵᤔᤥᤀᤣ ᤕᤠ᤺ᤰᤋᤧᤖᤥ॥
55ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤋᤠᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤐᤠᤱᤓᤣ᤹ᤜᤠ᤹ᤀᤥᤗᤠᤶ ᤕᤖᤡᤰ ᤔᤏᤠᤜᤠ᤹ ᤂᤧᤴ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤋᤃᤡ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤛᤠᤰᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤆᤥ᤺ᤰᤛᤡᤱᤛᤧ ᤕᤖᤢᤛᤗᤧᤶᤔᤥ ᤔᤧᤒᤣ॥#᥇᥇:᥋᥋ ᤛᤠᤶᤕᤥᤛᤠᤵᤗᤠ ᤁᤢᤀᤡᤛᤡᤰ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤐᤥᤱ (᥈ ᤛᤠᤵᤔᤢ ᥉᥆:᥇᥍-᥇᥏)॥ ᤂᤧᤸᤗᤧ ᤗᤠᤃᤡ ᥍ ᤕᤧᤴ ᤌᤠᤖᤡᤰ ᤌᤖᤢ॥ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤗᤢᤶᤔᤥ ᤁᤧᤕᤢᤱᤒᤠ ᤕᤜᤢᤍᤡᤜᤠ᤹ᤖᤧ ᤛᤠ᤹ᤖᤡᤰ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤐᤥᤱ ᤁᤧᤗ᤹ᤒᤠ ᤔᤧᤀᤡ᤺ᤳᤋᤢᤖᤥ॥ 56ᤂᤧᤴ ᤔᤏᤠᤜᤠ᤹ᤖᤧ ᤕᤧᤛᤢᤴ ᤔᤧᤃᤥ᤺ᤳᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤱᤜᤡᤶ ᤗᤰᤂᤢᤶᤔᤥ ᤔᤧᤕᤧᤒᤧᤸᤗᤧ ᤀᤰᤂᤣ ᤔᤧᤔᤧᤳᤇᤡᤱ. “ᤂᤢᤏᤧ᤹ ᤁᤴ ᤋᤱᤏᤠᤶᤔᤥ ᤋᤠ᤺ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅” 57ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤕᤧᤛᤢᤴ ᤋᤧᤶᤔᤠ ᤛᤢᤰᤋᤧᤳᤗ ᤑᤠ᤹ᤀᤠᤱ ᤂᤢᤏᤧ᤹ ᤁᤧᤏᤡᤛᤢᤶᤏᤧ ᤑᤠ᤹ᤃᤪ ᤕᤠᤵᤔᤡ ᤀᤠᤔᤧᤳᤋᤧᤶᤔᤧ᤹ᤀᤥ ᤗ᤹ᤖᤡᤰ ᤔᤏᤠᤜᤠ᤹ ᤀᤡᤱᤈᤠᤱ ᤔᤧᤒᤡᤖᤢᤛᤡᤀᤠᤱ ᤔᤧᤘᤕᤧᤖᤥ॥
Currently Selected:
ᤕᤢᤜᤢᤴᤏᤠ 11: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.