Puj Saeq 1
1
Ngah Yaeuhdaq Naeh Daj Ngah Cizmyenx Naeh Saeuh Bex Yaqdoznih-bixsowh
1 Yezsuzyaq tai yaq, puj Yixsowhleh cham Yez'hoahhuah: "Gaenqpiu ngah rawz mwz saeuh puj Zaznanh daekgoanq mux?" 2Yez'hoahhuah yaeng: "Ngah Yaeuhdaq mwz saeuh daekgoanq, gux haeuz aeu dih naeh nyaengx mwz ndaw mungz paenqdix eh." 3Ngah Yaeuhdaq naeh daj le ngah bihnongx dix ngah Cizmyenx naeh hax: "Vanz gaenqsu daj gaenqpiu mwz saeuh puj Zaznanh dih piu it zoah hawj piu hoak dih yuq naeh, bae'naj gaenqpiu goj daj gaenqsu bae saeuh sowh puj dih su it zoah hawj su hoak dih yuq naeh." Yaq ngah Cizmyenx naeh zoq daj ngah Yaeuhdaq naeh zaemh mwz. 4Zaqnaeh ngah Yaeuhdaq zoq mwz saeuh, Yez'hoahhuah aeu puj Zaznanh daj puj Bixliqcix nyaengx mwz ndaw mungz paenqdix, paenqdix yuq ndaw Bixsowh kaj ndaej fanh goanz ux. 5Paenqdix yuq dih gaengnaeh daj Yaqdoznih-bixsowh dungzmex, zoq daj dix dungzsaeuh, saeuh bex puj Zaznanh daj puj Bixliqcix. 6Yaqdoznih-bixsowh lenh gowx, paenqdix daem dix, jenj ndaej dix, daet neux mehmungz dix daj neux mehdin dix. 7Yaqdoznih-bixsowh hax: "Koax daekgoanq miz jiatsip laux hongz, zoah gux daet neux mehmungz daj neux mehdin, yuq dawj zongz gux zaep gaenqjin, gannaeh dij Sen hoakzaq gux hoak naeh, hoak boiz gux yah." Yaq paenqdix zoq zowz dix mwz ndaw Yezluqsaxlaengx, dix yuq ndaw Yezluqsaxlaengx tai.
Ngah Yaeuhdaq Naeh Saeuh Ndaej Yezluqsaxlaengx Daj Cizboahlunh
8Ngah Yaeuhdaq naeh mwz saeuh Yezluqsaxlaengx chaenh, longx ndaej aen chaenh naeh, aeu remz kaj dij goanz ndaw chaenh, goj aeu faez pyaeu aen chaenh naeh. 9Doaklaeng ngah Yaeuhdaq naeh bae saeuh le sowh puj Zaznanh ndowj ndaw bo'mbanj naeh, ndowj ndaw Nanhdiq naeh, ndowj ndaw doangh din bo naeh. 10Ngah Yaeuhdaq naeh goj bae saeuh sowh puj Zaznanh yuq ndaw Cizboahlunh dih mbaednduq rongx hoak Jizleh-Yaqbaz ndowj naeh, kaj Swqsaiz, Yaqcizmanq daj Dahmaix.
Owhtoahneh Saeuh Ndaej Ndaw Dixbih
11Paenqdix daeq dih gaengnaeh bae saeuh dij goanz ndaw Dixbih dih mbaednduq rongx hoak Jizleh-cizfuh naeh. 12Goanz rongx hoak Zazlowh naeh hax: "Gawz bae saeuh Jizleh-cizfuh, saeuh ndaej aen chaenh naeh, gux zoq aeu lug nyingz gux Yaqsax kai hawj dix hoak mez." 13Owhtoahneh goanz lug zaiz Jiznahswz goanz nongx zaiz Zazlowh naeh saeuh ndaej aen chaenh naeh, Zazlowh zoq aeu lug nyingz hoakri Yaqsax kai hawj dix hoak mez. 14Zwz Yaqsax kai hawj Owhtoahneh naeh, dix nemz po dix cham dez dix Zazlowh aeu oax raeh ux. Yaqsax daeh loangz dij loix, dez dix zoq cham dix: "Mawz aeu gaeng oaj?" 15Yaqsax yaeng: "Mawz haeuz aeu raehnaz ndaw Nanhdiq hawj gux, gaj gux naengz vanz mawz diauq ux tem, vanz mawz goj aeu mboq naemx soangq hawj gux." Zazlowh zoq aeu aen mboq baihnow daj aeu aen mboq baihdawj hawj dix.
Ngah Yaeuhdaq Naeh Daj Ngah Benqyaqminh Naeh Saeuh Ndaej Baenzzaqrawz Raeuh
16Dez mijmez Moahciz, luglan dix zawh puj Jiznih, luglan dix daj puj Yaeuhdaq zaemh ni aen chaenh maex mba'baet naeh, maz ndaw doanghmowz ndaw mbanj Yaeuhdaq baih nanhfangz Yaqlazdowh chaenh naeh, daj dij goanz dihnaeh zaemh ndowj. 17Ngah Yaeuhdaq naeh daj le ngah bihnongx dix ngah Cizmyenx naeh zaemh mwz, ndaep sowh puj Zaznanh yuq ndaw Cixfah ndowj naeh, vaih aen chaenh naeh. Aen chaenh naeh zoq nyaek hoak Hoah'exmax. Hoah'exmax zoq zawh hax zoah ndaep nauq. 18Ngah Yaeuhdaq saeuh ndaej Zazsah chaenh daj haenzhenz Zazsah chaenh, Yaqswhjizlunh chaenh daj haenzhenz Yaqswhjizlunh chaenh, Yixgowhlunh chaenh daj haenzhenz Yixgowhlunh chaenh. 19Yez'hoahhuah daj ngah Yaeuhdaq naeh zaemh yuq, ngah Yaeuhdaq naeh zoq longx ndaej bo'mbanj naeh. Sowh puj yuq ndaw doangh piang ndowj naeh, paenqdix miz chowz liak, baenzzaqnaeh ngah Yaeuhdaq naeh daem paenqdix ni mboq ndaej. 20Puj Yixsowhleh hoakzaq Moahciz saengq naeh, aeu ndaw Cizboahlunh hawj Zazlowh, Zazlowh zoq daem sam changz luglan Yaqnah naeh ni. 21Ngah Benqyaqminh naeh mboq daem sowh puj Yezbuqsez yuq ndaw Yezluqsaxlaengx ndowj naeh ni. Baenzzaqnaeh puj Yezbuqsez daj ngah Benqyaqminh naeh zaemh yuq ndaw Yezluqsaxlaengx ndowj, taengdiak gannaeh.
Rownz Yezsowh Saeuh Ndaej Ndaw Boztowhliq
22Rownz Yezsowh goj bae saeuh ndaw Boztowhliq, Yez'hoahhuah daj paenqdix zaemh yuq. 23Rownz Yezsowh nemz dij goanz bae leanj Boztowhliq, zoq zawh aen chaenh mbaednduq rongx hoak Luqswz naeh. 24Sowh puj bae leanj naeh leztaen miz goanz ux daeq ndaw chaenh og daeuj, zoq daj dix hax: "Jixzawh mawz haxdoq piu daeq kvead rawz mwz saeuh aen chaenh naeh ngaih nyeuz, bae'naj gaenqpiu toj doiq mawz ndae mboqyaq." 25Goanz gaengnaeh haxdoq paenqdix daeq kvead rawz. Rownz Yezsowh zoq bae saeuh aen chaenh naeh, aeu remz kaj dij goanz ndaw chaenh, gaj paenqdix zoangq goanz gaengnaeh daj daengz rownzgoanz gaengnaeh. 26Goanz gaengnaeh bae dih puj Howx, daengj aen chaenh ux, nyaek minxzwh hoak Luqswz, taengdiak gannaeh naengz rongx hoakzaqnaeh.
Sowh Dij Goanz Puj Yixsowhleh Mboq Daem Ni Naeh
27Ngah Maxnahciz naeh mboq daem sowh dij goanz yuq ndaw Boahsanq chaenh ndowj naeh daj sowh dij goanz yuq haenzhenz Boahsanq chaenh ndowj naeh ni, mboq daem sowh dij goanz yuq ndaw Taznah chaenh ndowj naeh daj sowh dij goanz yuq haenzhenz ndaw Taznah chaenh ndowj naeh ni, mboq daem sowh dij goanz yuq ndaw Dozex chaenh ndowj naeh daj sowh dij goanz yuq haenzhenz Dozex chaenh ndowj naeh ni, mboq daem sowh dij goanz yuq ndaw Yixboahleanh chaenh ndowj naeh daj sowh dij goanz yuq haenzhenz Yixboahleanh chaenh ndowj naeh naeh ni, mboq daem sowh dij goanz yuq ndaw Mixjehdoz chaenh ndowj naeh daj sowh dij goanz yuq haenzhenz Mixjehdoz chaenh ndowj naeh ni. Sowh puj Zaznanh le dihnaeh yuq le dihnaeh ndowj ngoahngoah, hoakrawz goj mboq ni. 28Puj Yixsowhleh haen maz, zoq gaemh puj Zaznanh hoak najgaengx naek, gaj mboq daem paenqdix ni saw.
29Ngah Yixfahleanh mboq daem sowh puj Zaznanh yuq ndaw Jizsowh chaenh ndowj naeh ni, yaq puj Zaznanh zoq naengzgaj yuq ndaw Jizsowh chaenh ndowj, daj puj Yixfahleanh zaemh ndowj.
30Ngah Cizbuqlunh naeh mboq daem dij goanz ndaw Jizlunh chaenh daj dij goanz ndaw Nahhazlaz chaenh ni, yaq puj Zaznanh zoq daj ngah Cizbuqlunh naeh zaemh ndowj, ngah Cizbuqlunh naeh hawj paenqdix hoak najgaengx naek.
31Ngah Yaqsowh naeh mboq daem dij goanz ndaw Yaqkowz chaenh daj dij goanz ndaw Cizdunq chaenh ni, goj mboq daem dij goanz ndaw Yaqhowhlaz chaenh, dij goanz ndaw Yaqgowhcih chaenh, dij goanz ndaw Howhbaz chaenh, dij goanz ndaw Yaqfuhgowh chaenh, dij goanz ndaw Liqhoah chaenh, mboq daem dij goanz le aen chaenh naeh ni. 32Ngah Yaqsowh naeh mboq daem puj Zaznanh dihnaeh ni, puj Zaznanh dih naeh zoq daj paenqdix zaemh ndowj.
33Ngah Nahfuhtazliq naeh mboq daem dij goanz ndaw Boah-seqmowh chaenh daj dij goanz ndaw Boah-yaqnah chaenh ni, Yaq puj Zaznanh dihnaeh zoq daj ngah Nahfuhtazliq naeh zaemh ndowj. Paenqdix hawj puj Zaznanh ndaw Boah-seqmowh chaenh daj puj Zaznanh ndaw Boah-yaqnah chaenh saeh paenqdix hoak najgaengx naek.
34Ngah Danq naeh zoah puj Yaqmoahliq dix mwz ndaw bo'mbanj ndowj, puj Yaqmoahliq mboq jinx paenqdix daeuj ndaw doangh piang ndowj. 35Puj Yaqmoahliq naengzgaj yuq ndaw Bo Cizleh, yuq ndaw Yaqyaxlunh daj yuq ndaw Cazbinz ndowj. Gaj rownz Yezsowh haen maz, zoq hawj puj Yaqmoahliq le dih naeh hoak najgaengx naek. 36Dih namh puj Yaqmoahliq zawh daeq kaeu Yaqkowhlaz, daeq ndaw Cizlaz goq mwz mwz.
Currently Selected:
Puj Saeq 1: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
