Ni Aizjih 25

Aeu Gaeng Hoak Zangjpungh Dij Sen

1 Yez'hoahhuah daj Moahciz hax: 2"Mawz haxdoq dij goanz Yixsowhleh, yaix paenqdix aeu raengraeng soangq hawj gux, gawz mizzaw soangq, su zoq deq gaenq gawz, yaq aeu hoak gaenq gux. 3Su deq sowh gaenq baihdawj inxnaeh: Jim, ngaenz, dongz, 4mae daeuh, mae zaemq, mae ndiang, mae'banq gaenq liak gaenqnaeh, koan dij mbej, 5naeng mbej taek sowh aeu nyomx ndiang naeh, sowh naeng naemx bae ndaw dix mboq ndaej naeh, maex ciztimh, 6yuz daeng, sowh gaenqhom aeu hoak sowh yuz aeu daz naeh, sowh gaenqhom aeu hoak ciang naeh, 7maxnaux ndiang daj bauxswh yowngh ndai, le gaenqnaeh aeu doj Yixfuhdowh#25:7 Yixfuhdowh zawh ndangnungh puj mbud dij Sen goanz saeq dwx nyeuz daengzle naeh. daj sowh paeng aeu yaz baeg'aek naeh. 8Mawz yauq nemz paenqdix daengj dih ux hoak dih gux, hawj gux yuq jeh paenqdix ndowj. 9Hoak zangjpungh gux, hoak sowh za'hoq ndaw zangjpungh naeh, hoak gaenqrawz gojndae, hoak daj sowh rangh gux mbaenqnaeh hawj mawz taen naeh dungzlumj.

Hoakrawz Hoak Aen Gvih Dij Sen

10"Aeu maex ciztimh hoak aen gvih ux, riz song azmax #25:10 Azmax ux riz baenzzaq qensog mwz taeng byai mungz naeh. mbengj, deanj azmax ux laeng mbengj ux, sung azmax ux laeng mbengj ux. 11Haenz gvih, ndaw gvih gaj dih gaj aeu jim gangq gob, haenz gvih daengz siq haenz aeu jim hoak laeb ux hoak yawz. 12Daeuq hoak siq goangh jim, aeu dix doj siq ka aen gvih, baih ux song goangh. 13Aeu maex ciztimh hoak song saenj maextam, song saenj maex naeh goj aeu jim gob. 14Aeu maextam ndonj song goangh jim tam gvih. 15Maextam aeu ndonj mwz ndaw goangh jim yaq, mboq jinx it daeuj. 16Gux aeu tin piang fahlih hawj mawz, mawz aeu nyaengx bae ndaw gvih. 17Aeu jim gangq hoak pa'gvih#25:17 Pa'gvih gaemz kauq naeh zawh hax "gumq," zoq zawh hax: "gumq gaenq hoakloang." ux, riz song azmax laeng mbengj ux, deanj azmax ux laeng mbengj ux. 18Aeu jim ti hoak song goanz Jizluqboah, aeu doj song haenz pa dix. 19Song baih, baih ux miz goanz Jizluqboah ux. Hawj song goanz Jizluqboah daj pa dix dungzrangh. 20Song goanz Jizluqboah yuq baihnow aj bik, yaz zoah pa dix, song goanz Jizluqboah ueq maz dungzdoq, lez bae doq pa dix. 21Aeu pa'gvih doj now gvih. Gux rux aeu tin piang fahlih hawj mawz, taeng zwz naeh mawz zoq aeu dix nyaengx ndaw gvih. 22Gux yuq dih gaengnaeh daj mawz dungztaen, gux yuq now pa gvih, yuq jinghzang song goanz Jizluqboah naeh haxdoq mawz daengzle sowh gaenq gux yaix dij goanz Yixsowhleh hoak naeh.

Hoakrawz Hoak Aen Zongz Dij Sen

23"Mawz aeu maex ciztimh hoak aen zongz ux, laengriz song azmax, laengdeanj azmax ux, laengsung azmax mbengj. 24Daengz aen zongz aeu jim gangq gob, haenz zongz daengz siq haenz aeu jim hoak laeb ux hoak yawz. 25Now zongz hoak haenz, haenz dix laengsung pajmungz ux, haenz dix daengz siq haenz aeu jim hoak laeb ux hoak yawz. 26Hoak siq goangh jim, aeu paenqdix doj siq ka zongz, dih jimq zongz naeh, 27dih yuq zawj laeb haenz zongz naeh, yaq aeu dix ndonj maextam, hoakzaqnaeh zux tam ngaih. 28Maextam aeu maex ciztimh hoak, aeu jim gob, aeu dix tam zongz. 29Aeu jim gangq hoak aen panx, hoak baed, hoak aen pinh, hoak aen zung. Aen pinh daj aen zung zawh aeu deq sowh laeuj aeu zoaj mbud naeh, le gaenqnaeh zawh koang'hoq aen zongz naeh. 30Now aen zongz yuq doqnaj gux naeh zwzzwz aeu sowh binx baiz doqnaj gux naeh baiz.

Hoakrawz Hoak Aen Daeng Dij Sen

31"Aeu jim gangq hoak rax daeng ux, rax naeh aeu choih ti, ti din dix, raengx dix, zung dix, sowh mbaw god ndog dix naeh daj ndog dix, daengzle dungzrangh. 32Rax naeh miz choak ngah, doj song baih, baih ux sam ngah. 33Ngah ux miz sam ndog, daj ndog maegpung dungzlumj, daengz choak ngah gaj ngah gaj hoakzaqnaeh. 34Raengx dix miz siq ndog, daj ndog maegpung dungzlumj, miz sowh mbaw god ndog dix naeh daj ndog dix. 35Sam ndog baihdawj naeh, ndog dangq ndog haeg yuq goak song ngah dungzpiang naeh, 36hawj ndog dix daj ngah dix dungzrangh. Daengz aen zawh aeu jim gangq aeu kvaix jim dog ti hoak. 37Hoak jiat aen zung daeng, aeu nyaengx now rax naeh, hawj daeng yangz zoah baihnaj. 38Aeu jim gangq hoak dau daet mownz daeng daj hoak aen panx aeu dej mownz daeng. 39Aeu tazleanhdowh#25:39 Tazleanhdowh ux zoq zawh jiatsip-haj gaen. jim gangq ux hoak rax daeng daj jiat aen zung daeng daj dau daj aen panx. 40Mawz caqsiq hem, hoakzaq sowh rangh yuq ndaw bo gux hawj mawz taen naeh bae hoak.

Currently Selected:

Ni Aizjih 25: ZHN

Highlight

Copy