Ni Aizjih 19

Dij goanz Yixsowhleh Yuq Din Bo Ciznaiq Ndowj

1Dij goanz Yixsowhleh daeq Aizjih og daeuj yaq, vaenz ni ndaej sam ndown daem naeh, paenqdix mwz taeng ndaw doanghmowz Ciznaiq. 2Paenqdix zawh daeq Liqfaezdingq loangzdin, maz taeng inxnaeh. Dij goanz Yixsowhleh zoq yuq ndaw doangh din bo Ciznaiq naeh daengj zangjpungh ndowj.

Yez'hoahhuah Daj Dij Goanz Yixsowhleh Dungzdingq

3 Moahciz kwnj mwz ndaw bo, mwz dih dij Sen naeh, Yez'hoahhuah yuq ndaw bo rongx dix, daj dix hax: "Mawz hoakzaqnaeh haxdoq dij goanz Yixsowhleh, luglan Yaqgowh: 4‘Su haeuz ndaej taen suq saeh gux hoak bae now to dij goanz Aizjih naeh. Su goj haeuz ndaej taen gux daj dij laemh dungzlumj aeu su owq now bik gux, zowz su maz haenz gux. 5Dihndin zawh gaenq gux gangq, gannaeh jixzawh su biak kauq gux, biak gaenq gux daj su dungzdingq naeh, gux zoq hawj su daj dij goanz yowngh ndai mboq dungzlumj, hawj su hoak dij goanz gux. 6Jixzawh gaenqsu biak kauq gux, gux zoq aeu gaenqsu daengzle hoak dij goanz goh gux, hawj gaenqsu daengzle hoak puj mbud dij Sen.’ Mawz aeu suq kauq naeh haxdoq dij goanz Yixsowhleh." 7Moahciz bae rongx dij goanz Yixsowhleh sowh puj jeq puj miz najta naeh maz, aeu suq kauq Yez'hoahhuah haxdoq dix naeh haxdoq paenqdix. 8Dij goanz Yixsowhleh zaemh yaeng: "Piu venq, Yez'hoahhuah yaix piu hoak gaeng, piu zoq hoak gaeng." Moahciz zoq aeu gaemz kauq paenqdix yaeng naeh mwz haxdoq Yez'hoahhuah.

Dij Goanz Yixsowhleh Dox Taj Lez Dij Sen

9 Yez'hoahhuah daj Moahciz hax: "Gux yuq ndaw pajfax daj mawz hax kauq, hawj dij goanz Yixsowhleh ruxnyinz gux daj mawz hax kauq. Hoakzaqnaeh paenqdix zoq sinq mawz daengznauq." Yaq Moahciz aeu gaemz kauq dij goanz Yixsowhleh yaeng naeh haxdoq Yez'hoahhuah. 10Yez'hoahhuah daeuq daj Moahciz hax: "Mawz bae haxdoq dij goanz Yixsowhleh, vaenznaeh daj vaenzbig, dangq goanz dangq hawj hoakri saw, yaix paenqdix saek ndangnungh. 11Vaenzlwz daengzle dox ndae zuxbaenz. Unj vaenzlwz gux loangz daeuj ndaw Bo Ciznaiq, daeuj doqnaj daengzle dij goanz Yixsowhleh. 12Mawz haxdoq paenqdix dih rawz zawh dih dungzjeg, mboq jinx paenqdix gvaq dih dungzjeg. Mawz hoakzaqnaeh haxdoq paenqdix: ‘Gaenqsu yauq caqsiq hem, mboq hawj kwnj mwz ndaw bo, goj mboq hawj maz haenz din bo. Gaeng yamq maz bo naeh zoq hawj gaeng tai. 13Sowh gaenq yamq mwz ndaw bo naeh, daengz mungz naengz laek aeu lumh, aeu tin saeuh dix tai rux aeu naqgoang saeuh dix tai. Doihdo gojndae, dij goanz gojndae, nanghgaj yamq mwz bo naeh zoq hawj dix tai.’ Ruxnyinz kaeu dij mbej chung ndowj yowngh ndowj yaq, zux hawj kwnj mwz ndaw bo." 14Moahciz daeq ndaw bo loangz daeuj, bae dih dij goanz Yixsowhleh yuq naeh, yaix paenqdix dangq goanz dangq hawj hoakri saw, yaix paenqdix saek ndangnungh. 15Moahciz daj dij goanz Yixsowhleh hax: "Taeng vaenzlwz, su daengzle dox ndae zuxbaenz. Le vaenz naeh mboq jinx daj puj nyingz zaemhnoanz."

Dij Sen Loangz Daeuj Ndaw Bo Ciznaiq

16Taeng vaenz daih sam zangnaw zaeux, faxumj, faxmyaeb, ndaw bo miz pajfax dungzding se, kaeu dij mbej chung ndae taeuq. Dij goanz Yixsowhleh yuq dih paenqdix ndowj naeh mbu daengz saenq saw. 17Moahciz zowz dij goanz Yixsowhleh og bae daj dij Sen dungztaen, paenqdix in yuq ndaw doangh din bo naeh. 18Yez'hoahhuah yuq ndaw faez loangz daeuj ndaw bo Ciznaiq, daengz bo miz gaj yailaeuh gangq. Yailaeuh laeuh mwz baihnow, daj yailaeuh pyaeu'jik dungzlumj. Daengz bo fenz nauq. 19Kaeu dij mbej gaj laeng gaj chung ndae, Moahciz zoq hax kauq, miz hiang dij Sen yaeng dix. 20Yez'hoahhuah loangz daeuj niangz bo Ciznaiq, Yez'hoahhuah rongx Moahciz mwz niangz bo, Moahciz zoq kwnj mwz. 21Yez'hoahhuah daj Moahciz hax: "Mawz bae saengq dij goanz Yixsowhleh, mboq jinx paenqdix maz dih gux inxnaeh lez. Yaj miz goanz lai rux zoah tai. 22Mawz yaix puj mbud dij Sen sowh puj maz haenz gux inxnaeh dangq goanz dangq hawj hoakri saw. Jixzawh paenqdix mboq biak, gux zoq rubraeb ndaep paenqdix." 23Moahciz daj Yez'hoahhuah hax: "Mawz haeuz saengq piu yaq, mawz hax: ‘Hoak dih dungzjeg, mboq jinx gvaq dih dungzjeg, aeu bo naeh hoak bo dij Sen. Baenzzaqnaeh, dij goanz Yixsowhleh mboq ndaej kwnj maz.’" 24Yez'hoahhuah daj Moahciz hax: "Loangz bae ndeh, mawz daj Yaqlunh daeuq kwnj maz, gaj puj mbud dij Sen daj dij goanz Yixsowhleh mboq jinx paenqdix maz dih gux inxnaeh, yaj gux rubraeb ndaep paenqdix." 25Yaq Moahciz loangz bae dih dij goanz Yixsowhleh naeh, saengq paenqdix mbaedmawq.

Currently Selected:

Ni Aizjih 19: ZHN

Highlight

Copy