Rut 1
1
Mach'atic ay yu'un Elimelec bajt'ic ta Moab
1-2Te c'alal wentainbil israeletic yu'un a te juecetic, jich yorail tal bayal wi'nal ta sq'uinal Israel. Ay jtul winic ta lum Belén, ta sq'uinal Judá, Elimelec sbiil te ba nainuc ta sq'uinal Moab ta scaj te wi'nale. La yic' bael yinam te Noemí sbiil, soc cheb snich'nab, Mahlón soc Quelión. Spisilic yajwal Efrata,#1 Cr 4.4. ja' nix te lum Belén. C'otic ta Moab, tey nainic a.
3Ja'uc me to, laj te Elimelec, te smamlal Noemí. Ja' xanix a jil soc te cheb yalataque. 4Ta patil la sta yinamic, ja' la yiq'uic te moab-antsetic. Te jtule Orfa sbiil, te yane Rut sbiil. Lajuneb ja'wil ta patil 5lajic bael te Mahlón soc te Quelión. Jich jilic me'ba antsetic soc te Noemí, ma'yuquix jilel yalatac soc ma'yuquix smamlal.
Noemí soc Rut sujt'ic ta Belén
6Te Noemí la yaiy stojol te ma'yuquix wi'nal ta slumal, te na'botix yo'bolil sbaic yu'un Dios, ac'botiquix lec swe'elic. 7Jich yu'un, la snop te ya sujt' bael ta sq'uinal Judá. Jich loc' bael tey a te banti nainem soc xchebal te yalibe. 8Ja'uc me to, la yalbey ta be xchebal te yalibe:
—Baanic, sujt'anic bael ta sna te ame'ique. Ya me xc'uxtayex te Cajwaltic, jich bit'il la ac'uxtayic te anima amamlalic, soc nix te bit'il la ac'uxtayonic te jo'one. 9Ja' me ya yac' xnujbinex xan, t'ujbil me ya xc'oex yu'un —xi' te Noemí.
Te Noemí la sbujts'ilay bael. Ja'uc me to, tulan c'opojic yu'un, jajch'ic ta oq'uel. 10Jich la yalic:
—Ma sujt'otic bael. Ya jointicat bael ta alumal —xiic.
11Te Noemí la yalbey xan:
—Sujt'anic bael, antsetic. ¿Bistuc ya ajoinonic bael? ¿Yu'un bal ya xtal xan cal cac'beyex amamlalinic? 12Baanic jiche, sujt'anic bael ta anaic. Te bit'il me'elonixe, ma'yuquix ta co'tan te ya xcha'nujbinon xane. Manchuc me ya cal: “Ya xnujbinon yo'tic ta ajc'ubal,” teme xoone, te co'tanuc yacuc xtal xan bayal calatac, 13¿ya ni bal amaliyic a ja' to c'alal ya xmuc'ubic te ya xnujbinex soque? ¿Ja' nax bal ma xnujbinex yu'un ta scaj nax xc'uxul awo'tanic ta smaliyel te jichuque? Ma jichuc, antsetic. Melel te Cajwaltic la yac'bon c'axuc jwocol; ja'uc me to, c'axem to me xan jich ya xc'ax jwocol teme ya quilbeyex awocolic te ja'exe —xi' te Noemí.
14Cha'jajch'ic xan ta oq'uel yu'un. Jich yu'un te Orfa la sc'opon jilel soc la sbujts'i te yalib-me'ele, bajt' ta slumal. Yan te Rut la sjoin jilel stuquel. 15Jich yu'un te Noemí la yalbey te Rut:
—Bajt' meix ta slumal te ajoy ta antsil soc ta stojol te diosetic yu'une. Baan me uuc —xi' te Noemí.
16Ja'uc me to, la sjac' te Rut:
—Ma xawalbon te ya quijq'uitayat, te ya apijt'eson bael. Te bay ya xbaat te ja'ate, tey nix me ya xboon a; ta bay ya xnainat, tey me ya xnainon a. Te alumale ja' me jlumal ya xc'ot uuc. Te Dios awu'une, ja' nix me Dios cu'un ya xc'ot. 17Te bay ya xlajat te ja'ate, tey nix me ya xlajon a, tey me ya jc'an quich' muquel a. Te Cajwaltic ac'a yac'bon tulan castigo teme ya quijq'uitayat jilel, teme ma ja'uc ta scaj lajel te ya quijq'uitay jbajtic yu'une —xi' te Rut.
18La yil te Noemí te snopoj ta lec te ya sjoin baele, jich ma'yuc bi la yalbeyix. 19Jich jajch'ic ta beel xchebalic, c'otic c'alal ta Belén. C'alal c'otiquix ta Belén, bayal c'opoj yo'tanic te lume. Ay antsetic la yalbey sbaic:
—¿Ma bal ja'uc Noemí? —xiic yu'un.
20Te Noemí la sjac':
—Ma xawalboniquix Noemí, yu'un ma t'ujbiluquix q'uinal ya caiy. Ja' lec ac'boniquix jbiilin Mara, melel te Dios te Spisil ya xju' yu'une, la yac'bon ch'aubuc co'tan sujt'el tel yu'un mel-o'tan. 21Ts'acalon c'alal loc'on bael; ja'uc me to, jtuquel xanix jpetoj jc'ab sujt'el tel, yu'un jich la sc'an yo'tan te Cajwaltique. Jich yu'un ma me xawalbonic xan Noemí, melel te Cajwaltic te Spisil ya xju' yu'une, la spijt'eson ta yo'tan soc la yac'bon bayal jwocol —xi' te Noemí.
22Awaiy bit'il sujt' tel ta Moab te Noemí. Julic ta Belén soc Rut, te yalib te moab-ants stuquele. C'alal julic ta Belén, yorailix ta set'el ochel sit a te cebada.
Currently Selected:
Rut 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.